今次台灣之行，野蠻啲講句，係香港快運迫我哋去嘅！
上年年尾上網搵沖繩機票嘅資料，見到香港快運由香港飛台中只需 $50，真係忍唔住唔去買！
由於今年年頭會去沖繩，自然買台中機票時唔會買得太近沖繩嘅旅程~
優惠機票出發有效期到十月，亦唔係個個日子買到 $50 嘅價錢，其實搶到已經好幸運，最後就買咗 11/10 ~ 15/10 呢幾日~
我呢，去旅行通常都去八日或以上先夠喉，今次去五日，主要因為想就埋兩個朋友~
不過可惜吖，佢哋最後都係決定唔去，都唔緊要嘅，最緊要我有個最佳旅遊伴侶同我去~
五日四夜行程，本來已經唔算長，點知有人買機票嘅時候，買咗夜機去午機返......
實質只有三日多少少......
要改時間的話，每程要補 $700，唔駛講，梗係唔改啦，接受現實把啦~
去台中玩，我通常都會租車，上兩次去台中，都要喺機場搭的士出市區再租車，今次好啲囉，格上喺機場嘅分站由今年開始，可以提供租車同還車服務，咁我一落機就可以攞車，正！
不過我開心得太早喇，頭痛嘅問題好快就出現，準時起飛的話，去到台中嘅時間係 20:15，而格上嘅營業時間只係到 20:30，我就算準時抵達，順利入境都唔一定趕到，更何況班機唔一定準時起飛......
當然，我可以選擇第二日先租車，不過，我哋已經冇咩時間玩，所以想話趁仲趕得切，落機即刻揸車入日月潭，第二日起身就可以開始行程~
我將我呢個問題話咗俾格上知，回覆返嚟嘅答案簡直令人震驚！
「如因為飛機延遲抵達因素，只要確定有飛，我們會等您的」
呢句說話，深深咁烙咗喺我個腦入面，呢啲服務，去邊度搵？有佢呢句，我真係放心晒！
呢次係我第三次去台中，不過其實頭兩次都唔係好主要咁遊台中，所以今次就會集中返喺台中同埋南投~
其中日月潭係必遊地點，因為第一次嚟台中時，有去到日月潭，不過當時好大雨，真係可以話去咗等於冇去，今次希望唔會又咁黑仔啦~
由於我哋唔太喜歡 hea 遊，所以甚少會去啲去過嘅地方，通常都只會去啲未去過嘅地方，不過其實台中同南投，我哋有興趣嘅地方唔多，所以啲出名嘅大景點，就算冇大興趣都會去吓~
橫掂今次冇太多地方想去，於是我就加插咗自助餐同溫泉呢兩個項目~
唔知台灣嘅自助餐係點嘅呢？有啲期待！
呢次旅程，我好早就計劃好晒，跟住就放低咗冇理過，直至屎塔有日同我講，我哋仲有個幾星期就去台灣喇喎~
係喎，個幾星期咋喎，話就話計劃好晒行程，但其實仲有大把嘢要準備，其中一樣最花時間嘅就係將啲景點喺地圖度做標記，方便搵路~
我習慣記晒喺兩個唔同嘅地圖 apps 度，不過今次唔夠時間，只係記咗喺其中一個度，可能今次日數比較少，又係相對熟識嘅台灣，所以出發前都冇太上心~
行程：
Day 01：格上租車機場站 → 潭暉時尚風華旅店
Day 02：孔雀園 → 慈恩塔 → 玄光碼頭(阿婆蛋) → 搭船到水社碼頭 → 搭船到伊達邵碼頭 → 伊達邵瑪蓋旦 → 搭船到玄光碼頭 → 車埕火車站 → 集集軍史公園 → 集集鎮武昌宮 → 集集火車站 → 象鼻山瞭望台 → 妖怪村 → 杉林溪大飯店
Day 03：杉林溪 → 猴探井天空之橋 → 寶島時代村 → 圓滿教堂 → 僑園大飯店(自助餐) → 伊豆日式露天溫泉
Day 04：新社莊園 → Alpaca Coffee 草泥馬咖啡 → 安尼公主花園 → 宮原眼科 → 這裡有貓輕食屋 → 中華夜市 → 心驛商旅
Day 05：月眉天馬牧場 → 格上租車機場站
好，出發！
沒有留言:
發佈留言