嵐山展望台 → 屋我地道路公園 → 古宇利島 → 今帰仁城跡 → 八重岳桜の森公園 → 名護中央公園 → 丸隆そば → 道の駅 許田 → 万座毛 → 金武觀音寺 → 仲泊遺跡 → 今帰仁城跡 → 元祖海ぶとう → Renaissance Okinawa Resort
今日第一站去「嵐山展望台」
呢個展望台，可以眺望「屋我地島」及「古宇利島」的~
今朝出門口時好鬼大雨，部車泊咗喺露天地方，今日仲要拎埋行李走~
好彩呢間酒店大門前方有個屋仔頂，於是我衝出去攞車，再駛到個屋仔頂度上人上行李~
不過由於風同雨都大，就算有頂都因為撇雨而弄濕衣服~
離開咗酒店一段時間，雨開始細，最後仲停埋~
去呢個展望台，又係要行埋啲荒山野嶺，有過噚日去秧雞展望台嘅經驗，今次駛入呢啲路嘅時候，已經冇咁猶豫，只係去到有啲成三四條小路嘅時候，真係要望楚邊條路先啱~
其實我真係覺得可以由頭到尾都行正式嘅路，不過我諗 GPS 會優先俾條最短嘅路去做導航，所以先會帶我哋行呢啲山路~
經過一條又一條細小山路，最後出返好正式嘅路行多陣就到~
唔......天色唔好又勁大風，啲相......
下一站係「屋我地道路公園」
去呢個公園，係為咗欣賞吓古宇利大橋~
落山就多數都係行大路，只係行好少山路，好快就到~
睇夠就過埋古宇利島，再搵個位停低望返過嚟~
橋底係海灘，可以穿梭左右的~
之後就打算喺古宇利島兜個圈先走~
離遠見到山上面有個疑似觀景台咁上下嘅地方，有個目標都好，就向山上方向走~
到喇到喇，原來呢度叫「Kouri Ocean Tower」
泊好車之後，有個人喺樓上從建築物外圍嘅樓梯急步走落嚟，佢俾我個感覺好似我哋闖咗入禁區咁......
佢落到嚟話我哋知未開門，其實我都估到，售票處窗口都未開~
佢講完就行開咗，又冇話唔俾泊，冇叫我哋走，於是我哋就周圍行咗陣~
呢度風景係唔錯，不過今日天色咁差，就算開咗我都唔會俾錢入場，冇意思~
行咗陣就駕車離開~
下一站係「今帰仁城跡」
除咗睇歷史痕跡，仲可以睇櫻花~
由於古宇利島唔大，離開 Kouri Ocean Tower 之後，我哋就繼續沿路向前行，相信好快就可以繞一圈去返條橋附近~
過咗橋之後差啲撞到隻狗！
事源有隻狗突然喺對面線飊出嚟，好彩我揸得唔快，不過都一嘢收到時速十幾~
個狗主喺左邊行人路睇風景，完全唔知頭先發生咩事......
只剩半缸油，見到油站就入咗油先~
到咗今帰仁城跡，買好飛後有個阿叔係咁同我哋傾偈，內容都係圍繞沖繩同香港嘅嘢，佢話佢去過香港，又問我哋香港係咪主要講英文......
其實去過香港就知一街都係中文字......
去到入口，唔係好妥，點解冇人收飛嘅？
猶豫咗一陣，唔理喇，橫掂有買飛，就光明正大咁行入去，有人截住我哋先算~
結果行咗唔夠二十米就有人好緊張咁追上嚟，追我哋攞飛~
城牆前有個更亭，我遞高兩張飛，用行動去問佢駛唔駛俾佢睇，佢只係點頭，不過其實我本身都有嘢問佢~
喺同一日內，我會到今帰仁城跡兩次，而家一次，今晚一次~
出發前我一直都疑惑緊，今晚嚟駛唔駛再買飛呢？
我當然可以嚟到先問，不過我心急，又想早點知道多點資料，便於掌握同計劃，於是我就 send 咗 email 去問，得返嚟嘅答案係，只需要購一次票便可，但要到場蓋印~
所以見到呢個更亭，我就再問佢一次，佢都話唔駛再買飛，但又唔見佢有意識去幫我蓋印~
於是我就問佢係咪要蓋印啦，佢即時反應係：呀~~~ yes yes yes haha first time
由於今日係第一日有夜祭，而佢又咁講，我可能係今屆第一個提出呢個問題或要求嘅人~
(妖，咁又點，又唔係威又唔係有獎......)
講完之後佢就喺兩張門票嘅背面寫上今日日期再蓋印，搞掂！
過咗城牆入口，就係兩旁種滿櫻花嘅小路，不過櫻花只係開咗好少，但係都預咗，所以都好滿足~
第一次睇呢啲城跡，覺得幾特別，不過其實外面成個城牆係最好睇，因為入面最主要嘅部份已經唔存在~
睇到有條路標示住舊路，又見有人喺嗰度行上嚟，於是我哋就走落去睇睇，原來行到尾係去返入嚟嗰條櫻花小路~
咁鬼難行，如果知道只係另一條路，真係唔會行......
之後就行埋個歷史文化館~
不過入面唔俾影相的~
食咗杯紅芋雪糕，都 OK 的，食完就離開~
下一站係「八重岳桜の森公園」
嚟呢個公園，純粹睇櫻花，呢個係沖繩出名嘅賞櫻名所~
行吓行吓差唔多到，就去到一處近米字形嘅路口，有個牌寫住啲字，內容大概係指示山嘅唔同高度，櫻花盛開嘅情況，就由呢度開始，我已經完全冇留意個 GPS，一路都係睇牌同睇吓邊度有櫻花~
嚟到現場，同之前喺 GOOGLE MAP 睇嘅完全唔同，咁現場有指示就梗係唔鬼理之前喺 GOOGLE MAP 睇過啲咩啦~
過咗個指示牌一段路，有個小草地，入面有幾棵開得唔錯嘅櫻花，嗱嗱聲扭入去，由於現場唔係正式停車場，最好梗係跟人泊，泊喺人哋隔籬~
睇夠就繼續驅車向上，沿路都見到有人喺路邊影相，間中亦見有人將車停埋一邊，慢慢觀賞~
而我就唔打算咁做，因為路面唔闊，雖然泊埋一邊唔算太阻人，不過有咩意外俾人撞一撞真係有排煩~
喺車入面影就算喇，反正影相唔係最重要，最重要係親身感受~
上到「頂上」就冇再上~
如果喺滿開時嚟到頂上，就會見到遍山櫻花，喺呢度睇就會幾靚~
參觀完呢個八重岳桜の森公園，覺得今次過嚟沖繩賞櫻嘅心願，算係超額完成，要知道咁早過嚟可能真係咩都冇得睇嘛~
之後嗰啲就算冇咩睇都已經不再重要~
下一站係「名護中央公園」
都係沖繩出名嘅賞櫻名所~
沿路落山，人多車多，駛得太左，怕撞到人；駛得太右怕撞到車，真係要打醒十二分精神，要好小心好小心咁揸！
到咗名護中央公園......嘅山腳，泊好車，就要向上爬數之不盡嘅梯級~
喺起程之前，見到隔籬有間小食店，我哋決定回程返落嚟時要食啲嘢補補先！
上到一半，再向上望，已經知道呢度啲櫻花開得比較少，係接近冇~
咁當然，一場嚟到，梗係會行到頂啦~
成條路都係呢間廠嘅燈籠~
上到頂喇！
呢度都幾高~
上到嚟，見到左邊有條小路，就走過去睇吓~
過咗小路，有少少櫻花~
見到有指示牌，方向指向不遠處嘅樓梯，上面寫住「史跡 名護城」，冇櫻花睇，睇城跡都好~
唔......上面只係見到呢個嘢，係咁多......
回程時見到有班棒球小子跑緊上嚟，我哋身處最高位置，見到嘅梗係全部都冇晒力啦，其實可以 keep 住快速嘅步伐走上嚟，都唔容易呀~~~
一路落山，一路有棒球小子上緊山，有快有慢，最令我意外嘅係，約有十份一嘅棒球小子，主動同我哋講「こんにちは」！
其實真係蠻感動的，我自己去過嘅地方雖然好少，約有十個國家吧，就只有日本呢個民族會咁樣主動同人打招呼~
主動同我哋傾偈嘅，其他地方都有，但迎面見到，純粹打個招呼就已經各走不同方向嘅，就只遇過日本人會咁做(之前喺北海道都遇過)，而且仲係年青人呀，仲要唔止一個呀~~~
呢樣嘢我係冇記喺電話嘅記事簿，呢種感動嘅記憶，相信不用刻意記低，亦不會忘記吧~
落山途中已經知道有兩個棒球小子一路落，一路數梯級嘅數量~
落到底嘅時候，我有少少想問吓佢哋究竟數到幾多級，不過好似好多事咁，最後都係冇問到~
由於下一站係去食晏，所以喺呢個小食店度，只係食咗少少嘢~
本來想食棉花糖，不過唔知點解又冇食度~
好襯呢度嘅環境~
下一站係「丸隆そば」
旅遊書話丸隆そば係沖繩そば嘅元祖，所以就嚟試吓佢~
途經 Orion 啤酒廠，不過我哋都唔飲酒嘅，冇咩興趣喇~
丸隆そば嘅所在地，對開係一個停車場，附近有超市有便利店，似係一個休息站咁嘅地方~
泊低部車，見到附近風景唔錯，所以就周圍行吓先~
叫都叫唔住，屎塔一嘢就行咗出去，我梗係要跟上去，有咩事我都可以扶佢一把~
唔知點解啲水嘅色咁得意嘅......
跟住就去搵吓丸隆そば喺邊，呢幢嘢嘅左上角見到丸隆兩個字，但下面就係 Blue Seal，我哋試過上去睇吓，不過上咗一層就唔俾上，而呢一層就肯定唔係食肆添~
周圍行咗陣，都仲係唔見，於是我哋就走入超市，諗住問吓人~
入到超市見到有生果賣，就買咗啲，到俾錢時再問吓人丸隆そば喺邊~
收銀嗰個就唔係好清楚，不過佢好好呀，幫我哋問咗兩個同事，不過結果都係冇人知......
唉，好沮喪，諗住問埋便利店嗰個，如果佢唔知就算，喺附近搵吓嘢食囉~
入到便利店，有位年輕嘅女士，佢睇到丸隆そば，即時有反應，佢係咁摷嘢，又喺一疊紙度翻嚟翻去，唔通搵緊地圖？
我即刻拎部手機出嚟，想話俾個地圖佢睇之際，佢就攞咗自己部電話出嚟，以光速打咗一堆字，再撳咗幾吓，遞俾我哋睇~
係一堆韓文字嚟......
我哋話佢知我哋係 Chinese，佢又撳咗幾吓再俾我哋睇，上面顯示住「已經搬家」
噢！搬咗，咁即係冇緣啦，正喺我放棄之際，聰明嘅屎塔就提議，不如喺 GPS 用電話 seacrh 個目的地試吓~
得喎！只要佢冇改電話，實去到咖喎！
Search 完之後，目的地在四公里外，掂啦，四公里之嘛，揸車嘅話，陣間就到啦！
GoGoGo~~~~~~
後記：
丸隆そば搬前搬後~
途經一座建築物，好大隻蜥蝪呀！
嘿嘿，丸隆そば，仲唔俾我哋摷到你！
現場同海畑極為相似，都係一半塌塌米，一半普通檯櫈~
豚肉そば
好食係好食，不過都係普通咗啲......
三枚肉そば
三枚肉好香，唔錯！
唔......慕名而來的話，算係有點失望，不過失望可能只係出於無知，可能識食嘅人真係食得出咩係正宗~
由於今朝嘅行程有所延誤，再加上搵丸隆そば花咗相當多嘅時間，而家要做一個好艱難嘅決定，就係今日餘下嘅景點，cut 邊個好呢？
有兩個比較花時間嘅景點，要二選一，分別係「海中公園」同「金武觀音寺」
去海中公園，係為咗海中展望台同搭玻璃船睇魚~
金武觀音寺，係為咗睇鐘乳洞~
其實真係勁難取捨~
睇魚，以呢次旅程嚟講，只有呢次機會，但係唔睇，又唔係真係覺得好可惜~
鐘乳洞，呢次旅程，計埋金武觀音寺，共有三次機會睇，不過鐘乳洞，係每一個都獨一無異，所以有啲唔捨得~
最後我哋忍痛決定唔去海中公園~
下一站係「道の駅 許田」
由於我哋唔去海中公園，本來係唔需要嚟嘅(本來嚟買飛)，不過見順路，就嚟食杯黑糖雪糕啦~
知道道の駅 許田係一個有嘢睇有嘢食嘅休息站，不過其實我哋興趣不大，嚟到喺外面行咗一圈，買咗杯黑糖雪糕就上返車~
好意外，杯黑糖雪糕普通到不得了！
好彩真係順路，否則就真係嘥鬼氣~
下一站係「万座毛」
一早知道呢度得一個景，唔......我承認當中係有點心理包袱，唔嚟好似有點可惜咁~
離開咗道の駅 許田，開始落雨，希望去到万座毛時停咗雨啦~
越接近万座毛，馬路上就越見越多旅遊巴，唔知去到會唔會好多人呢？
到咗万座毛，仲落緊雨，雖然唔係好大，不過都係等一陣睇吓點先~
現場已經停泊咗多部旅遊巴，呢度啲泊位又奇怪喎，旅遊巴嘅泊係完全頂住某啲私家車位嘅，咁如果架私家車要走，旅遊巴就要開車讓，咁都幾煩喎，仲唔排除要讓幾次添！
等咗陣，見到細雨咗好多，唔等喇，落車啦！
哈，落咗車直情唔覺有落雨，好！
由停車場行出去公園，真係兩個世界，停車場都已經好大風，咁沿海城市，大風就梗咖啦，所以都冇咩嘢，行到出公園先犀利，直情大風到吸氣都要用力，要同啲風爭空氣！
(後記：以我喺沖繩去過嘅地方，万座毛係最大風~)
Well......冬天冇咩毛嘅万座毛~
睇完咖喇，不過我哋都唔係好想走咁，當然唔係因為景色吸引，而係咁快就走，好似冇喺万座毛存在過咁......
其實現場又大風到不宜久留，算吧，行個圈就走~
返到停車場，行吓啲商店就離開~
下一站係「金武觀音寺」
去金武觀音寺，除咗佢本身係一間幾有歷史嘅寺，更因為寺旁有鐘乳洞~
去金武觀音寺嘅途中，個 GPS 傻鬼咗，明明一條大直路，佢行行吓會入咗一處根本唔係道路嘅地方，而且個標示唔識返出嚟~
結果我哋要停低部車，重新輸入過個 MAPCODE 先正常返~
去到金武觀音寺，一個人都見唔到，而以我所知，入鐘乳洞係要收費嘅，我哋自然唔會喺未俾錢嘅情況下私自入洞~
再加上現場有維修工程，根本就唔知係咪仍然開放~
唉，山長水遠嚟到，仲要捨棄咗海中公園，唔係唔開放下化......
後來發現洞口有張告示，大意謂：洞內大部份地方正在維修，入場無料
咦，即係入得又免費，咁唔駛等啦，入去啦！
入口好窄，越落就越覺得濕氣好重，地下又跣，每步都要好小心~
洞入面好細，估計係因為維修關係，封閉咗大部份地方，亦因為咁先至可以免費入場~
唔知維修前係咪可以入嘅呢？
唔......第一次睇鐘乳洞，可能因為睇得太少，冇咩感受，好似好普通咁......
上返地面，可能因為冇人，顯得個寺更加莊嚴，我哋都唔係幾好意思只為拍照而走近~
下一站係「仲泊遺跡」
呢個遺跡係古人曾經喺度住過嘅，其實睇人相就冇咩睇，反正順路，所以都走過去睇吓~
嚟到仲泊遺跡，首先見到條「比屋根板石疊道」，喺地面睇唔到盡頭，都諗緊上唔上好，呢啲路勁難行，上都還好，落仲辛苦~
唔理咁多，一場嚟到，上啦！
屎塔叫我行先，佢自己慢慢行，實際上係想我行快啲，睇吓上面有啲咩，冇咩睇佢就唔駛行咁上~
由於有幾個轉折位，當我上到去，睇到上面咩都冇嘅時候，佢都已經上晒嚟咁滯，咁就梗係行埋佢啦~
上到嚟只可以話係一個高地，冇咩遺跡，不過風景都幾好，叫做嚟過~
勁辛苦先平安落返地面......
前方仲有少少嘢睇，其實我哋都估冇咩好睇，所以我就自己行咗去睇，屎塔就自己休息吓~
真係好難想像以前啲人點樣生活！
離開咗仲泊遺跡，睇到附近有個休息站，今晚又冇咁早食飯，就去休息站度方便吓同食啲嘢~
買咗八粒章魚燒嚟食，食完之後，印象深刻，從未食過咁唔好食嘅章魚燒......
下一站係「今帰仁城跡」
晚上再次造訪今帰仁城跡，係為咗今帰仁城跡嘅晚燈~
由於訂好晒酒店先知今日係第一日有晚燈，亦由於知道得太遲，想改酒店都改唔到(是晚住喺北谷)，唯有硬住頭皮，揸個幾鐘車落今帰仁城跡~
呢個決定，都真係幾掙扎，來回兩個幾鐘，為咗睇城跡晚燈？我不禁問自己：值嗎？
我唔敢答，我只知做咗冇咩大不了，唔做可能會覺得遺憾，租部車都係想去邊就去邊，諗咁多做乜？
最後當然係決定去啦~
去到城跡，show 一 show 今朝張飛背後個日子同印，就可以大搖大擺咁行入去~
入到去發現，似乎錯過咗個開幕 show，其實都唔緊要，我本身就冇諗住趕嚟睇，醉翁之意不在酒~
城跡晚燈，講唔上特別，只係自己未睇過，但俾我揀多次，我同樣會選擇嚟~
喺呢度影夜櫻，條頸會勁攰，啲櫻花全部都頭茸茸，個人就頭仰仰，要等佢冇乜風，仲要肌肉繃緊咁等曝光，好鬼攰~
相機設定錯誤影出嚟嘅怪色~
下一站係「元祖海ぶとう」
嚟沖繩冇理由唔試食吓沖繩名物海葡萄咖~
之前喺香港食自助餐都食過，著實不算甚麼，希望食啲地道啲嘅會有新嘅體驗~
喺去元祖海ぶとう嘅途中，見到有幢大廈嘅頂有個好大嘅「志」字，唔知咩嚟嘅呢？
到咗元祖海ぶとう，入面客人唔多~
叫咗元祖海ぶとう丼~
呢兜嘢真係絕不欺場，同 menu 同埋現場畫嘅畫係一模一樣！
味道呢......地道嘅海葡萄比較清新一點，其實可能因為量多先有咁嘅感覺，講到尾都係冇咩特別，其實真係唔需要為食而食~
海膽就幾好，味濃；中間白色嗰啲就真係唔知咩嚟，黏黏的~
另外叫咗個苦瓜定食，當係補返之前喺居酒屋ゆきの叫錯咗嘅~
啲苦瓜真係幾好食，好甘香，唔係一味得個苦字，好味道！
下一站係「Renaissance Okinawa Resort」
去呢間酒店係為咗睇燈飾，不過免費嘅，我諗應該會好普通，冇所謂啦，順路啫~
去到酒店門口，職員就問我哋係咪 check-in，話俾佢知唔係，只係嚟睇燈飾，不過佢唔明我哋講咩......
唔理咁多，問佢部車可以泊邊，佢就叫咗我哋泊對面馬路嘅一處地方~
聽得出佢英文唔係咁好，不過佢教我哋去個停車場時，講得好清楚，好有條理，非常好！
泊好車行返過酒店，再問嗰個職員燈飾位置，佢竟然答我哋唔知道......
算吧，唔難為佢喇，自己搵啦~
其實行入少少再兩頭望就見到~
唔......一如所料，極之普通~
睇夠就揸車去酒店，途經便利店，買咗啲宵夜同早餐~
不過今次搵呢間酒店有啲障礙，搞咗勁耐先上到酒店房！
用 MAPCODE 做定位，GPS 帶咗我哋去一個小型停車場，但又唔似係我哋要去嘅地方，當刻真係有點迷茫~
既然 MAPCODE 去唔到我哋想去嘅地方，就用電話號碼啦~
哼，點知，入完個電話號碼，GPS 話電話號碼無效！
我即刻再拎訂房嘅文件出嚟，我相信會有酒店嘅電話號碼~
今次入到喇，兜咗個圈，又帶咗我哋去前一個街口，不過仍然唔似係.......
冇計，真係要落車走去問人~
我走咗入間便利店，問咗個女店員，個女店員就同男店員講嘢，個男店員就走埋嚟問我咩事，我拎住份嘢指俾佢睇，再問佢知唔知喺邊~
個男店員望咗半眼，所謂半眼，只係敷衍我，扮有望度，但其實完全冇望真，更加係唔需要經過思考就同我講唔知道......
真係有啲嬲嬲地，不過人哋又冇責任去幫你，你又奈佢咩何吖，算數~
帶點不爽又帶點無奈咁走出便利店，四圍望，睇吓有冇人可以俾我問吓，我見到有間舖頭著咗燈，似係嗰啲賣時裝用品嘅公司，即係嗰啲假人呀，衣架呀嗰啲~
我帶點尷尬咁走去敲人度門，入面有三個人，似係爸爸媽媽加個仔咁，個仔都應該有三十上下，完全靠估嚟講，佢哋似係印度人~
爸爸皺晒眉頭，帶點不耐煩咁走到門前，仲要摷鎖匙開門，呢刻真係覺得好唔好意思，不過都洗濕咗個頭啦~
佢開咗門我就表明來意，佢帶咗我入去，再問媽媽~
媽媽好努力咁諗，又拎埋部手機出嚟睇地圖，同爸爸熟練地用日語交談，唔係好肯定咁講咗個方向俾我知，其實我都冇咩信心，咁當然都要一臉認真同誠懇咁道謝啦~
其間我留意到阿仔嘅眼神唔多友善，或者我諗多咗，又或者我打擾佢哋之前，佢哋本身正在激烈咁交流緊意見都未定~
轉身準備離開之際，我發現咗樣有趣嘢~
我敲嗰度門嘅隔籬，仲有度門，一直都維持開啟狀態的......
我自然就由開咗嘅呢度門離開~
出咗門口，根據佢講嘅方向望吓~
就係呢個時候，爸爸叫住我，跟住媽媽走出嚟，拉住我行出咗少少，再指住不遠處嘅一幢大廈，示意就係我要搵嘅地方~
好，就照住佢哋講嘅咁走過去~
哈，傻仔，我哋去到佢講嘅嗰度，其實就係我哋用 MAPCODE 帶我哋去嗰度，其實個 MAPCODE 冇錯，只係夜晚我哋唔認得個環境~
我負責泊好部車，卸下行李，屎塔就去搵吓個接待處~
我搞掂晒就見到屎塔同個男人講緊嘢，跟住走埋嚟我度，我相信呢個男人就係我哋要搵嘅人~
(原來屎塔只係諗住搵佢問嘢，點知咁好彩就係我哋要搵嘅人)
佢走到埋嚟，我問佢部車泊呢度啱唔啱，佢就叫我哋等一陣，跟住走咗去~
一等就等咗五分鐘，之後佢返嚟就搞手續，同埋話我知佢有自己專屬嘅停車場~
其實事後睇返，係我哋搞到人哋，人哋規定要 2100 前 check-in，我哋冇留意~
今次係我哋第一次 book apartment 式嘅住宿，冇為意有呢啲規矩，下次要小心啲~
呢間酒店(為求方便，繼續用酒店嚟形容)個門鎖幾過癮，要用密碼嚟開門，而 1 至 9 嘅數字排列每次都唔同，想估都冇得估~
呢間房有按摩浴池的，不過今日搞到咁夜，唔玩喇，早啲瞓~
沒有留言:
發佈留言