ニライカナイ橋 → 知念城跡 → 玉城城跡 → 糸数城跡 → 玉泉洞・王国村 → 中本てんぷら店 → 真壁ちなー → 平和祈念公園及祈念堂 → 姬百合之塔及資料館 → 具志川城跡 → 喜屋武岬 → 琉球玻璃村 → Trick Art Museum → 暖暮拉麵
今日第一站係「ニライカナイ橋」
冇錯，又係ニライカナイ橋，由於去第二站時會經過ニライカナイ橋附近，又由於噚晚天色差，所以想俾多次機會，反正算係順路~
唉，可惜，今早嘅天色比噚晚仲差，冇計~
本來今早頭兩個行程係「百名海灘」同「新原海灘」，但正如我之前提過，去完 Emerald 海灘，已經冇咩衝動去其他海灘(市區嘅波上海灘除外)，所以我將打後會到嘅海灘行程都 cut 咗~
Cut 咗兩個海灘，又 cut 埋八重瀬公園(噚晚去完發覺冇咩櫻花，原本計劃好今日嚟，既然冇櫻花，今日就唔去喇)，凸咗出嚟嘅時間去邊好呢？
好順理成章，就去噚日冇時間去嘅三個小城跡~
下一站係「知念城跡」
小城跡一個，相信冇咩特別的，不過我就係有興趣~
做功課時，喺 GOOGLE MAPS 都唔係好搵到點去，所以諗住搞掂個 MAPCODE 去到先算，所以都冇諗太多~
嚟到 MAPCODE 所指嘅地方，都好，望到個城跡，有個方向~
(上面維修中的便是知念城跡)
跟住再靠 OFFLINE MAPS，自己搵路，結果都去得到~
下一站係「玉城城跡」
都係啦，小城跡一個~
呢個就好易搵，跟 MAPCODE 就到，不過泊好車仲要行一段路的~
我諗以前啲人就係行木梯左邊嘅石路......
個入口成個心型咁~
附近有個高爾夫球場~
下一站係「糸数城跡」
小城跡小城跡小城跡......
呢個城跡就冇停車場，可以直接揸到城跡度，不過入去嘅路況好差，我哋都係泊埋一邊，行過去算，否則為咗懶行而整爆胎就真係夠晒戇居！
呢個城跡分兩邊的，唔知以前係咪連埋嘅，不過望落又唔似~
我哋爬咗上去，超難行，每一步都有 50% 拗柴機會！
下一站係「玉泉洞・王国村」
王国村有點似琉球村，不過我哋最注意嘅係玉泉洞~
蛇嗰部份就唔去喇，冇咩興趣~
呢個係其中一個可以用優惠景點門票 package 嘅地方~
入咗場，而家係 0945，我知道 1030 有表演，仲有 45 分鐘，我哋應該遊覽玉泉洞先定王国村先呢？
我同屎塔意見分歧，最後嘅共識係遊覽玉泉洞先，相信 45 分鐘可以睇得晒~
玉泉洞門口，有度氣閘，入去嘅時候，眼鏡同相機即時朦晒！
入到洞情況就更嚴重，根本睇唔到嘢亦影唔到相~
進入洞後首張相片......
隔咗起碼五分鐘先開始好少少~
行咗大約 20 分鐘，再對返地圖，嘩，行咗好少咋喎！1030 前肯肯定行唔晒！
而家有兩個選擇：
1. 走返出去，遊覽王国村先，再睇表演，如果未睇完王国村就睇埋佢，再遊覽剩餘嘅玉泉洞，不過呢個方案就將啲景點斬開一截截，唔理想~
2. 睇埋佢，睇完先睇王国村，再 hea 到 1230 睇表演，呢個方案就嘥好多時間~
最後決定方案 2，好彩嘅係，cut 咗八重瀬公園，時間上算係可以的~
相就真係影咗好多，不過睇相遠遠及唔上親眼睇咁好睇，貼幾張算了~
我幾鍾意呢一部份~
以前嘅水位~
呢度嘅鐘乳石洞先係我想像中嘅規模，睇咗成個幾鐘，好好睇！
睇完玉泉洞，一上地面就見到 SEGWAY~
我哋之前都未試玩過，知道呢度有得玩吓，而且價錢可以接受，所以出發前我已經計劃好要嚟試玩吓~
我哋 join 咗 20 分鐘嘅基本訓練， 首次試玩，有點不知所措，不過個教練教得幾好，我哋好快已經掌握到基本竅門，操控上算係可以，只要慢一點就冇問題~
掌握好基本操作後，基本上已經完咗個課程，但又未夠 20 分鐘，於是教練就帶我哋去行咗轉水果園~
去水果園，其實係另一個收費，可能教練見教又教晒，原地逗留又冇咩意思，反正冇咩客，所以就帶我哋去行個圈~
不過去水果園途中出了點小意外......
行緊一條上斜嘅路，我行最後~
由於先前訓練時都冇見過有車行，所以完全唔為意嗰度係車路嚟，大家都行係緊中間偏左~
後來我聽到有汽車聲，向後望一望，見到有車上緊嚟，於是我打算再稍稍向左駛~
就喺回頭望返前嘅呢個時候，行到有個渠蓋凸出咗路面約三吋，我喺完全冇時間去避開嘅情況下直摌上去，成個人即時失咗重心......
玩 SEGWAY，控制重心係最關鍵嘅，向左失咗重心，下意識將手抦向左，即時連人帶車衝向草叢~
草叢外係斜坡，好彩我跳咗出嚟棄車而逃，否則一定連人帶車衝埋落斜坡！
由於我棄咗車嘅關係，冇外力再將個手抦壓向任何一方，部車好快就停低咗，而我，只係俾啲樹技擦傷咗少少，完全唔需要理會的~
教練即時衝過嚟睇吓我有冇事，佢好緊張，問咗我好多次有冇事~
當然，我可以將佢睇成因為喺佢帶領下有人受傷，佢會好大鑊，不過，睇佢嗰種誠懇嘅慰問，同埋佢真係一眼都冇望過部車，我百份百相信佢嘅關心係真心嘅~
至於部車，其實真係一啲事都冇~
喺佢嘅帶領下，遊覽咗水果園，佢一路行一路介紹，佢操控部 SEGWAY 嘅能力，已經係人車合一，無論佢身體點擺動，甚至雙手離開個手抦，部車都完全喺佢掌控之內~
成個過程當然係愉快兼興奮，不過最令我驚訝嘅係，有兩位日本女士要求同我倆嚟個合照，當時唔醒起叫教練用我哋部機影一張，而家諗起有點後悔......
行完水果園，就真係結束呢個「課程」~
成個過程個教練都有同我哋傾偈，主要當然係講沖繩嘢啦，佢仲推介我哋食 shabu shabu 阿咕豬添~
臨離開前，佢又問我有冇事，呢個教練真係好有心~
距離表演仲有差唔多一個鐘，行王国村行唔行到咁耐呢？我深信係唔得嘅~
我哋唯有以一個極其緩慢嘅步伐去行，尤其啲手信店~
我哋到而家，一啲手信都未買過，雖然喺機場實買得到，不過都想睇吓有冇唔係咁常見嘅嘢~
我咁樣提得，就梗係因為我喺呢度見到啦~
其實都唔係咩特別嘢，主要都係紅芋同埋鹽製嘅產品，只不過真係未喺其他手信舖度見過，而且價錢可以接受，於是我哋就大手入貨！
最正係自駕嘛，天氣又咁涼，又唔係猛太陽，買完啲嘢放返入車先，再繼續行程！
王国村同琉球村可以話係同一樣嘢嚟，都係古舊民房加體驗工場，對我哋嚟講實在太~~~悶！
唯一令我情緒上有點起伏嘅係，又撞返阿同事 Mink，又會咁鬼蹺嘅，再蹺嘅係，我哋聽日同一班機返香港......
王国村雜影~
好唔容易先捱到睇表演時間~
唔......我個人嚟講就鍾意琉球村嗰個多啲~
呢度嘅表演就唔俾影相嘅，其實我都幾同意呢個措施，表演嘅同睇嘅都可以更專心~
唉，王国村又悶，表演又冇之前嗰個咁好睇，咁就浪費咗兩個鐘，好彩有 SEGWAY 解吓悶~
不過唔睇過又唔知嘅~
下一站係「中本てんぷら店」
喺沖繩一間好出名嘅天婦羅店，位於奧武島~
講起奧武島，喺 GOOGLE MAPS 嘅沖繩範圍內，我發現有三個奧武島，唔知係 GOOGLE MAPS 嘅問題定真係三個島都叫奧武島喇~
嚟到揀咗三種天婦羅，分別係魚、魷魚、水雲
水雲就冇咩特別，魚就非常不錯，魷魚呢，我一向都唔係話好鍾意食，只係有人叫開就食，我咁樣講，係想話俾大家知，呢度嘅魷魚天婦羅，就連我唔係特別鍾意食魷魚嘅人都一口接一口咁係咁食，呢啖未食完已經想食第二啖，好食呀！
不過呢，呢度不設堂食，唔介意食食吓有陣怪風一吹，吹到成面成身都係汁的話，可以喺對開石壆坐低食，介意嘅就只好死返入車入面食嘞~
由於噚晚喺齋場御嶽都有食天婦羅，一個對比之下，我覺得噚晚嗰啲真係唔配叫做天婦羅呀！
我哋見到有海葡萄手卷，諗位叫，雖則我哋唔係特別喜歡海葡萄，不過相信而家唔食都幾難有機會食到~
點知張 poster 只係宣傳嘢，呢度冇賣海葡萄手卷嘅......
落開南部玩，值得兜一兜落嚟試吓，冇落開南部嘅，我又覺得未好食到要特登落嚟咁啦~
下一站係「真壁ちなー」
呢間嘢，唔係因食物而出名，係因為本身嘅建築物~
呢間嘢建於 1891 年，係傳統嘅琉球民房，經歷過二次世界大戰，幸運地沒有被摧毀，柱身仍然可見有子彈嘅痕跡~
儘管知道佢嘅歷史，不過感受又唔會話特別深，可能呢類民房唔係第一次見，只係冇佢咁耐歷史而已~
雖然佢唔係因食物而出名，不過旅遊書一樣有推介~
打開 MENU，搵嚟搵去都搵唔到「フーちゃんぶる定食」，原來，旅遊書第一個字用咗片仮名，而 MENU 就用平仮名「ふーちゃんぶる定食」，好彩認得到~
呢碟小菜包含有苦瓜、雞蛋、沖繩豚同麵筋~
味道呢，就真係比一般更一般~
另外就自己揀碟「皿そば(オリジナル海鮮あんかけそば)」
見到海鮮兩個字，所以揀佢~
味道呢......總之有點後悔囉~
真壁ちなー雜影~
下一站係「平和祈念公園及祈念堂」
紀念二戰時喺琉球嘅戰役，同時祈求世界和平~
呢個公園好大，我就唔打算走偏每個角落，主要都係走去海邊個中心點~
中心點附近有紀念碑，刻晒當年戰役中死去人士嘅名稱，而且每年都有更新~
平和祈念公園雜影~
由於我哋入菠蘿園意外地冇俾到飛，所以手上仲有一人一張飛，而呢度嘅資料館係可以用呢張飛嘅，所以我哋就打算用嚟入埋資料館嘞~
一路行一路行，上埋一條長長嘅樓梯，上到去見到呢度原來係祈念堂，頂，行錯咗，又要行返落去，再去返頭先經過嘅資料館......
行到去資料館，俾飛入場，頂！原來手上嘅呢張飛係不適用於資料館，適用嘅係祈念堂，又要行返上去，嘥鬼晒啲時間！
祈念堂入面有座好大嘅佛像同畫展~
佛像堂外另有畫展~
地庫有雲石室，有幾粒仲係來自香港嘅~
其實祈念堂係冇咩睇，不過有畫展睇都幾好~
下一站係「姬百合之塔及資料館」
紀念戰爭時，由師範學生充當臨時看護，但最後大部份看護在戰蠔被敵軍炸死嘅地方~
紀念塔就喺戰蠔旁~
再入就係資料館，入面有啲相關嘅歷史遺物，亦有受害者嘅相片同故事~
仲有倖存者嘅短片，講述當時嘅情況~
睇呢啲資料館，心情非常沉重~
註：館內禁止拍照
下一站係「具志川城跡」
海邊小城跡~
具志川城跡附近正在大興土木，根本已經唔可以跟 GPS 行，不過呢度嘅指示尚算充足，一路跟指示行都去得到~
其實去唔到都冇有怕，我仲有秘密武器：OFFLINE MAPS
呢啲小石路，唔知有冇歷史價值呢？
呢個城跡啲石偏細，其實咁樣仲難起個城牆......
附近風景~
下一站係「喜屋武岬」
被稱為沖繩本島最南面，不過其實未必係，只係真正嘅最南面，普通人係去唔到嘅~
同樣，附近一帶都係工程，又封路又改路，我哋都只係睇牌行，GPS 可以暫時休息~
途經一個位，有部泥頭車向我方向嚟緊，但我相信條路唔夠同時間一齊過，只好等佢過咗先~
其實我有點慶幸，唔係入咗條路先見到佢，否則要一路倒後讓佢過......冇理由要佢咁大部車讓我咖......
轉轉折折，終於到達喜屋武岬~
相信喺度睇日落會相當不錯，不過呢頭本身已經好偏僻，路況唔算好，再加上有工程，再要摸黑走就唔係幾好喇~
下一站係「琉球玻璃村」
希望睇啱嘢，可以送俾一個相識超過十年，將要移民台灣嘅女性朋友~
本來呢，諗住今日啲行程都有點遲，唔去咖喇，不過睇返時間，去到都應該仲有幾個字可以行吓，就過去碰碰運氣~
到達琉球玻璃村，仲有十五分鐘就閂門，我同屎塔匆匆行咗個圈~
大家不約而同睇中咗一隻杯，就佢啦！
我哋打算買一對，但由於每隻都係人手造，所以每隻嘅花紋都有出入，我哋要趕緊喺人哋閂門前要揀好兩隻~
屎塔仲揀咗另一款送俾佢媽媽~
俾錢時，店員問我有冇 smartphone，吓？我以為我聽錯，我示意我聽唔清楚，佢講多次都係問我有冇 smartphone~
咁我就拎部電話出嚟啦，拎到一半，我明喇！
折扣券！
我出發前已經印好晒啲折扣券，諗住喺度買嘢有九折，點知嚟到完全冇咗件事！
於是我由拎電話改為拎折扣券，店員睇完示意 OK，三隻杯加埋慳返八百幾円~
好開心買到呢份禮物，以我對呢位朋友嘅認識，我好有信心佢會好鍾意！
(後記：朋友唔係喺我面前拆的，不過佢話俾我知，佢拆開時「嘩」咗一聲，因為佢覺得好靚！呢啲時刻，我選擇做一個單純嘅人，我信佢係真心鍾意嘅~)
下一站係「Trick Art Museum」
係一個錯視藝術展覽，展場喺 Ashibinaa~
嚟到 Ashibinaa，竟然搵唔到停車場，圍住 Ashibinaa 行咗兩個圈都唔見有停車場，我深信唔會冇，只係唔知點解我哋搵唔到啫，不過我都唔打算搵落去，泊喺對面 Toda Books，反正我哋唔會留得耐~
展覽唔算得上好精彩，不過都幾有趣嘅~
多數作品都要有人參與其中先會令個立體效果出到嚟，所以只可以貼到幾張好少少嘅~
下一站係「暖暮拉麵 - 系満店」
曾經係九州第一，都幾有興趣試吓~
嚟到現場，店舖對開嘅停車位一架車都冇，入到舖頭，又一個客都冇......
我哋叫咗兩拉麵一餃子~
豚濃拉麵 + 流心蛋~
湯底真係幾香幾濃，豚肉都幾唔錯，可惜隻蛋唔係幾流心~
整體嚟講幾好食，但唔覺特別出色~
小葱芝麻拉麵~
非常香口嘅芝麻同葱，惟食到中段有點膩嘅感覺~
整體嚟講非常不錯~
博多一口餃子~
味道不錯，幾好幾好~
可能期望過高啦，好食係好食，不過驚喜欠奉咁啦~
嚟嗰時就冇客，不過走嘅時候已經全場滿座，而且仲有差唔多十個人等緊位~
跟住就揸車返酒店，途經油站，入吓油先~
呢個油站採自助式設計，一手一腳自己搞掂~
成個過程順利，唔難處理~
惟到最後，唔識找錢！
於是我哋走入去問店員點找錢，原來另外有部找錢機嘅~
其實之前喺北海道都試過，只係我哋唔記得，真係要去多幾次日本自駕先得~
入完油就繼續揸返酒店，途經便利店，買咗啲宵夜，完結今日行程~
沒有留言:
發佈留言