殘波岬 → 座喜味城跡 → 琉球村 → 道の駅かでな → ミニミニ動物園 → 勝連城跡 → すば处うわちち → 中城城跡 → 中村家住宅 → 普天満宮 → 美國村 → Sunset Beach → 大木海產物レストラン → 座喜味城跡
今日第一站係「殘波岬」
名牌景點嘛，必到！
去殘波岬嘅時候，經過兩個名牌景點，係我冇安排到嘅~
一個就係「御菓子御殿 - 読谷本店」；另一個就係「Aquagrace Chapel」
御菓子御殿呢，連停低影張相嘅衝動都冇~
Aquagrace Chapel 呢，我本身都想嚟，不過估到極大機會唔俾入，放棄，但既然嚟到門口，就停低影兩張相啦~
嚟到就見到告示牌，簡單啲講：閒人免進
隔籬就係殘波海灘~
殘波海灘呢，本身喺行程入面，不過去完 Emerald 海灘，其實已經冇咩衝動去其他海灘(市區嘅波上海灘除外)，所以我將打後會到嘅海灘行程都 cut 咗~
由於冇真正落到海灘，所以啲相就......算把啦~
到咗殘波岬，又係勁大風，風力僅次於万座毛~
殘波岬公園幾大，見到有兩公婆喺度散步，喺度晨運真係一流！
可惜燈塔仲未修復完，冇得上去~
近燈塔旁嘅海浪非常強勁，海浪拍打崖邊嘅浪花足有大半個燈塔咁高，加上強勁嘅風力，將啲浪花吹上燈塔附近區域，如果呢個時候行過去燈塔，一定濕晒！
行到公園中部，有個平台，平台有幅圍牆，有個男人喺度影緊相~
不過我睇佢嘅行為就有點不解，佢單反加腳架，但影嘅係地下，仲要好專心咁，就好似曝緊光咁唔敢郁咁~
日光日白專注地等，仲要影地下，唔知玩緊咩呢？
不過咁，攝影嘅嘢，我識條毛咩~
由於公園太大，我哋只係行沿海嘅一邊就折返，沿途盡情享受被強風吹到快要撕裂嘅感覺，爽到盡呀！
附近有隻殘波大獅子~
下一站係「座喜味城跡」
世界遺產、免費入場，兩樣加埋，感覺有點奇怪~
到咗座喜味城跡，可以自出自入，唔......真係唔怕俾啲手多多嘅人破壞咁重要嘅歷史遺跡？
入場前見到啲宣傳單張，就攞嚟睇吓~
咦！座喜味城跡都有晚燈喎！我有興趣呀！不過依我嘅行程，只有今晚可到，因為聽日已經落返那覇嗰邊，睇睇今日玩成點再決定~
呢個城跡都幾細，人亦少，好快行完~
呢度都幾危險，容許遊人行上城牆邊，但城牆上面係冇圍欄嘅，真係要勁小心先得~
下一站係「琉球村」
據聞係由唔同地方嘅古舊民房搬過嚟集合而成嘅，而每間民房都有體驗活動~
呢個係其中一個可以用優惠景點門票 package 嘅地方~
由於我哋對啲體驗活動興趣不大，亦由於啲民房間間差唔多，唔......都幾悶......
好彩佢個遊行表演都幾好睇~
最後仲俾人拉咗出去跳舞......
下一站係「道の駅かでな」
喺呢度可以睇到戰機升降，現場感受吓，我諗應該幾好睇~
嚟到現場，見到有單車比賽，所以呢度勁多單車同單車友，不過上到觀景台就只有長炮攝友~
可惜等咗一段時間，唔好話戰機升降，就連搵架會郁嘅戰機睇吓都冇......
唉，都唔可以無止境咁等咖，算吧，反正之後仲有機會，走人~
下一站係「ミニミニ動物園」
呢個動物園幾特別的，老闆主要係賣蛋製品，不過佢自己鍾意養動物，養吓養吓就越養越多，索性將佢造成一個動物園，供遊人免費參觀~
個停車場都唔細，但仍然滿晒咁滯，都幾多人嚟~
對極都對錯焦，又冇時間慢慢 set，其實呢張相係想講隻馬騮(唔知咩品種，暫稱馬騮)自己蓋被，不停搵張嘢圍住自己，好醒目！
一對好巨型嘅雞！
呢隻孔雀，開咗屏之後，係咁轉，係咁兩頭扭，完全係著咗「炫耀 MODE」，佢都真係扭咗好耐！
有絛假嘅蛇作伴，定玩具？
本來個動物園唔算特別，但諗到係私人飼養至到變成動物園，仲要唔係普通家庭寵物，就真係幾特別！
之後行吓間舖頭就離開~
下一站係「勝連城跡」
又一個免入場費嘅世界遺產~
去勝連城跡嘅途中，見到有間油站寫住「地域最安值」，油針又就嚟到中間，就入去入油！
入油阿叔又話俾我知佢去過香港，乜咁多沖繩人去過香港呀~
勝連城跡呢度有間休憩所，入面有少部份文物，同埋有地方俾人食嘢~
勝連城跡~
城跡以外，風景亦相當不錯~
下一站係「すば处うわちち」
呢個地方係食嘢嘅，老闆開業至今堅持將豬軟骨由生炙燒至熟，聽落好似好惹味咁，期待！
附近都係啲井字形嘅街道，冇 GPS 都幾難搵，條條街都一樣~
叫咗一個炙燒豬軟骨そば~
睇相好似好燶，其實唔係，燶嗰層係好薄好薄，食落完全唔覺的~
食落味道確係很不一樣，有淡淡嘅焦肉香味，肉身非常軟稔，夾 wasabi 食簡直係絕配，再講多次，夾 wasabi 食簡直係絕配，夾到不得了！真係好同埋很正呀！
另外叫咗豆腐そば~
我哋都幾鍾意食豆腐，呢兜嘢成兜都係豆腐，好似食緊豆腐花咁，豆腐又夠豆味，好食！
食吓食吓，原來下面有塊三枚肉咖，呢塊三枚肉絕對不比丸隆そば差，一樣咁香咁好食~
好滿足嘅一餐，炙燒豬軟骨超出預期，豆腐係意外驚喜！
唔知點解，幾鍾意呢張相~
下一站係「中城城跡」
呢個城跡係咁多個城跡當中最大嘅~
城跡雜影~
城跡嘅背面~
城跡內有工程，似係砌返啲石頭上去，真係超高難度！
啲石頭有晒標籤~
城跡以外，風景亦相當不錯~
下一站係「中村家住宅」
係古時富有人家嘅住所~
嚟到中村家住宅，買好飛之後，售票嘅姐姐邀請我哋入售票處喝茶，不過呢，我自己咁晏就唔可以飲茶，夜晚會瞓唔著，唯有有禮咁婉拒佢嘅好意~
中村家住宅，保存得極為完好，內籠保養得好新淨！
唔......作為富有人家嘅住宅，又好似細咗啲喎......
下一站係「普天満宮」
目的同金武觀音寺一樣，唔係嚟睇寺，係嚟睇鐘乳洞，唔同嘅係，呢個要預約嘅，之前第一日到沖繩，去到酒店已經請職員幫忙預約好~
差唔多到嘅時候，慢線塞車，行得極慢，幾分鐘先郁一郁，如是者我都等咗十幾分鐘，不過又奇，只係塞慢線，唔通塞轉左嘅橫街？
睇睇 GPS，普天満宮係過咗條橫街，後面又已經有無數咁多架車抽頭走人，我就諗，條龍如果係排普天満宮，唔會有咁多車抽頭走，可能真係塞橫街，啲車走第二條路卦......
嗯，一定係咁！
跟住我有樣學樣，抽出隔籬線走人，一抽，頂，我錯喇！
原來啲車真係塞緊入普天満宮，因為普天満宮停車場滿咗，大家都排緊隊等~
唉，冇計啦，我梗係唔會成舊腫瘤咁依附住條血管(車龍)啦，兜個圈再排過啦~
過咗普天満宮，見到前面有好多車泊埋一邊，又俾我見到一千零一個空位，嘿嘿，邪惡嘅念頭即時浮現......
"處理"好部車就行過普天満宮~
去到普天満宮，第一件事梗係搵個鐘乳洞先~
不過可以行嘅地方都行過，都唔覺有相類似嘅嘢~
唯有問人啦~
我哋走咗去賣祈福用品嘅地方問，初時都唔係好溝通到，我索性寫漢字「鐘乳洞」俾佢睇，因為我記得佢哋嘅漢字都係咁上下~
佢一睇就明，跟住就俾表格我哋填，填完就帶我哋去~
原來門口喺成個寺嘅旁邊(之前都有到過)，但就冇標示度呢個就係鐘乳洞嘅出入口~
過咗度門，經過一條走廊，行呢條走廊已經覺得濕氣好重，再經過兩度金屬門先到~
呢度唔算大，不過就比金武觀音寺大，亦都比金武觀音寺好睇~
睇完鐘乳洞就出返去睇吓個寺~
下一站係「美國村」
雖然我哋唔好 shopping，不過首次到沖繩，點都要去行吓嘅~
嚟到美國村，搵咗個近摩天輪嘅位泊車，貪方便容易搵返咖車嘛，呢度咁大~
泊完車，就周圍行吓~
本來呢，就唔去 Sunset Beach 咖喇，啲雲厚到不得了，不過反正喺隔籬，就行落去行吓，到此一遊咁啦~
趁住黃昏時間，就去搭吓個摩天輪~
好多人去美國村都會去嘅グルメ回転寿司市場~
搭完摩天輪喺商場見到，我盡量都唔會叫呢啲嘢食，唔係幾忍心整爛佢......
搭完摩天輪，再影吓相就離開~
下一站係「大木海產物レストラン」
我同屎塔都鍾意食魚，去呢間嘢，就係為咗一嘗「牛油烤魚」嘅美味~
途經吊吊揈油站~
屎塔話未見過，其實我同佢去北海道時見過，只係佢唔記得啫~
到咗大木海產物レストラン，冇位泊車，見附近有個幾大嘅停車場，而且仲有勁多空位，就泊一陣啦~
行到去大木海產物レストラン門口，咦？點解入面係廚房嚟嘅？
原來我哋行過咗籠，大門口喺另一邊~
大木海產物レストラン嘅格局，都係一半塌塌米，一半普通檯櫈~
樓面只得兩個，忙到爆廠，我哋初時都有按鐘等佢哋嚟，不過都等咗好耐吓都冇人理我哋......
最後冇辦法，唯有見佢哋行過就舉吓手......
幾經辛苦先問到佢攞英文 menu，再幾經辛苦先落到單叫嘢......
牛油烤魚係時價，問實價錢要 1500 円，有點貴，不過唔緊要啦，沒有半刻猶豫就點咗~
嘩，堅係好食！牛油味香得嚟一啲都唔膩，唔會過頭，同條魚好夾，每口魚都有牛油同魚嘅香味，正！
跟餐嘅蜆湯，幾有鮮味~
寿司盛合
唔......未到話很讚，或者咁講，絕對合格，新鮮嘅，但唔會係嗰啲專做寿司嘅日本料理咁正~
跟餐嘅冷麵，想像到嘅味道~
條魚真係好味，離開時都仲回味緊~~~
下一站係「座喜味城跡」
夜晚再嚟，梗係為咗晚燈啦~
食完飯，時間尚早，我就心思思想去埋座喜味城跡睇晚燈，同屎塔商量完，就決定去行個圈，反正只係十分鐘車程，滿足吓無謂嘅心願亦不需太大成本吧~
嚟到座喜味城跡，連小貓三四隻都講唔上，得兩個人，一個坐喺城牆邊唔知做咩，另一個就影緊星軌，唔知行路行得太大力會唔會影響到個效果呢？
想靜靜地談吓情，呢度真係一流，人又少，又滿天星星，氣氛十分不錯~
睇夠就揸車返酒店，途經便利店，買咗啲宵夜同早餐，完結今日行程~
返到酒店，玩吓個按摩浴池，一路浸，一路睇美國村嘅夜景~
沒有留言:
發佈留言