泊 lyumachi 魚市場 → 与儀公園 → 護國寺 → 波之上海灘 → 波上宮 → 泊 lyumachi 魚市場 → 舊海軍司令部戰壕 → Tomiton → OTS (臨空豊崎営業所) → 那覇空港國內線
今日第一站係「泊 lyumachi 魚市場」
聽唔少人講話嚟泊 lyumachi 魚市場，要早啲，一晏咗就冇嘢食咁話~
所以我就安排一早就嚟到~
結果，只有一半舖頭開咗，開咗嘅都唔見有生蠔，我哋決定晏啲再嚟過~
下一站係「与儀公園」
那覇嘅櫻花名所~
我哋懷住零期望嘅心去与儀公園，因為我哋知道那覇嘅櫻花開得比名護遲，連名護嘅都未真盛開，那覇又點會見到盛放嘅櫻花呢~
一如所料，冇咩櫻花，見到有一兩棵上面有少少已經算係幸運~
影影吓櫻花，落起雨嚟，匆匆走返上車~
下一站係「護國寺」
沖繩歷史最悠久嘅寺廟~
本來諗住泊部車喺波上宮嘅，不過喺 OTS 攞車時，有啲資料提及波上宮車位係俾職員用的，一般人唔可以泊，所以我諗住嚟到附近睇吓點先~
不過嚟到呢度，兜咗幾個圈，唔覺有位可以偷雞泊陣，一係泊立體停車場，不過其實我哋只係停一陣，又唔想搞到咁煩~
結果，我哋都係泊咗入波上宮~
波上宮入口斜路有幾個車位，上面平地亦都有幾個車位，我見咁早，連波上宮都未開，我覺得泊一陣應該唔會阻到人~
泊車時，有個阿姐喺附近掃緊地，我決定，只要佢冇阻止我，就泊喺入口斜路車位~
成個過程順利，泊好車就行過護國寺~
門口嘅神像前，掛有嬰兒用嘅「口水肩」，感覺幾有趣，見識少嘅我哋，實在未見過咁嘅畫面~
由於可供參觀嘅部份實在唔多，所以都唔係逗留咗好耐~
下一站係「波之上海灘」
市區內嘅海灘~
喺海灘附近，見到咁樣嘅指示(下圖)，我哋決定去展望台睇吓先~
唔......展望完畢......
再行返落海灘~
海灘對開就係行車天橋，對我嚟講都真係幾特別的~
喺海灘留咗一陣，都諗住差唔多走人嘅時候，竟然俾我哋見到彩虹！
而且仲係好完整嘅一條~
當然，彩虹唔係咩好罕有嘅現象，只不過每次見到，都會忍唔住望多兩眼~
下一站係「波上宮」
一間普通廟宇，對我嚟講有點像國際通，唔係話真係點名要去，只係......唔去又唔捨得，為去而去吧~
對於唔係參拜嘅我哋嚟講，好快就已經「遊覽」完波上宮~
下一站再去「泊 lyumachi 魚市場」
再次到嚟，啲舖頭都開得七七八八，行咗一個圈，講唔上好吸引，諗返起上次去和歌山，吸引到得多，只恨自己個胃太細！
係咁易揀咗啲嘢食就坐埋一邊慢慢食~
魚生都幾新鮮，但講唔上鮮甜~
帶子都係，新鮮，但就係唔係好鮮甜，奇怪~
生蠔幾好，唔錯！
海膽美味，不過一板裡面，唔係隻隻都咁正~
唔知係咪準備有「解体」表現呢？
下一站係「舊海軍司令部戰壕」
本來如果去末吉公園的話，就唔會去呢個戰壕，不過那覇呢邊啲櫻花未開，所以就唔去末吉公園喇~
入壕前，先喺附近行吓~
再睇資料館~
之後就入戰壕~
戰壕內四通八達，如果冇現場嘅順路指示，比較易行錯路~
我哋參觀戰壕時，冇咩人，戰壕顯得格外陰森~
當時下士都被迫企住瞓，非常擠壓咁一個一個企晒喺度瞓~
當時軍人使用手榴彈自決時留吓嘅彈痕~
參觀完戰壕，個肚開始唔舒服，不過唔係肚痛，只係不適~
由於唔係肚痛，屎塔又冇事，我排除咗係之前啲嘢唔乾淨嘅想法，我想信係一早食咁多生嘢，自己頂唔順多~
上車休息咗一陣~
下一站係「Tomiton」
Ashibinaa Outlet 以外嘅購物選擇~
其實本來唔會嚟嘅，原來嘅行程係去「本家我物祖河食堂」食地道豬手麵，不過以我而家嘅情況，石垣牛阿咕豬擺喺我面前都食唔落啦~
休息咗陣，覺得情況許可，就開車去 Tomiton~
泊好車後，唔掂，真係好唔舒服，都係休息陣先~
如是者，休息到夠鐘交車都冇入過 Tomiton......
下一站係「OTS (臨空豊崎営業所)」
去呢度交車，同時享用機場接送服務~
由 Tomiton 去 OTS，好近好近，不過交車前，記得入返滿油先~
喺 OTS 隔籬有間油站，聽過人講，呢間油站啲油偏貴，在商言商，實在係無可厚非嘅~
不過佢賺我唔到幾多錢，因為我去入油時，支油針仲係指向滿油嘅，結果最後入咗大約 500 円而已~
入完油，職員指示我點行去 OTS，其實只係教我轉左，行唔到一百米就到~
駛到去 OTS 職員指定嘅地方停車，職員檢查咗唔夠兩分鐘，俾返張單我，搞掂~
跟住就話我知喺邊度搭車去機場~
OTS，由攞車到交車，啲職員嘅態度冷冰得像機器，我一啲都感受唔到日本人對遊客常有嘅友善同熱情，不過又唔係冇禮貌嘅~
搭穿梭巴士去機場，我全程進入休息狀態，希望爭取時間休息，精神可以快點復原~
講開呢程穿梭巴士，真係未坐過啲位咁窄嘅巴士，我同屎塔都唔係肥嘅人，都可以坐到完全唔郁得，肥少少嘅人，一定要一人坐兩個位先得！
到咗機場，辦完登機手續就行過去國內線~
過到國內線，一如其他人咁講，比國際線多嘢睇好多~
不過嚟嚟去去都係見慣見熟嘅嘢，冇咩驚喜~
如果真係要講驚喜，係價錢，因為有啲貨物我都記得大約價錢，喺機場呢度嘅價錢同喺國際通或其他地方見到嘅一模一樣~
仲以為喺呢度一定會貴啲添~
期間屎塔睇中咗個 Hello Kitty 小手袋，大過拳頭少少吧，只售 6xx 円！真係抵！
行經有間舖頭有售生嘅阿咕豬，屎塔想買啲返香港，我即時諗起薛家燕嗰句說話：攜帶沒有衞生證明的生肉入境是違法的！
我唔知道「衞生證明」嘅定義係點，係咪包裝上印有(咁當然係經過檢測啦)就已經可以，但係，冇理由博姐，作罷~
行咗一半左右，我開始頂唔住，要坐低休息，屎塔就自己行埋餘吓嘅部份~
屎塔行完就同埋我一齊去食嘢，不過呢，我又點食得到嘢吖~
屎塔食嘢嘅時候，我又全程瞓~
好嘞，夠鐘上機就行返過國際線，排隊過安檢排咗成半個鐘~
我見前面啲人除晒頸鏈手鏈，又拎晒啲硬幣出嚟先過機，我就有樣學樣~
不過去到過機前，個保安員俾返晒啲鏈同硬幣我，咁我就袋落鞋袋啦~
點知過機即響，俾女保安員就二話不說就搜我全身，係仔細到腋下同大腿內側都俾佢掂過！
其實我個人就唔係太介意嘅，不過我覺得有兩樣嘢可以做好啲囉~
1. 男搜男；女搜女
男搜女固然冇可能，我亦深信唔會發生，不過女搜男，其實係咪可免則免呢？
2. 搜身前作出口頭聲明
過機響，即時托高我雙手至水平位置，係，我即時意會到之後會發生咩事，但你要搜人身，喺合法侵犯他人身體前，係咪話聲俾人知好啲呢？
佢搜完我身就示意我可以繼續行，真係一個幾意想不到嘅經驗~
入到候機室，好自然，又係全程瞓，直至真係可以上機~
今次呢班機遲咗大半個鐘先起飛，冇所謂啦，回程嘛~
上到機又係即時瞓，除咗食飛機餐之外，全程都係瞓，唉，真係慘！
飛機餐又係嗰個包......
(後記：我第一次搭香港航空，我以為香港航空嘅餐就係包，點知之後見到唔止一個人搭香港航空去沖繩，係有正常飛機餐的，唔知點解會有分別呢？)
一直瞓到落機，謝天謝地，精神上好返好多！
好彩精神好返啲咋，因為等行李等咗差唔多一個鐘先有，印象中未試過咁耐的~
沖繩真係一個好地方，我很喜歡！
沒有留言:
發佈留言