Day 02：濟州島 → KT(租車) → 民宿(寄存行李) → 神秘的道路 → 性愛樂園 → 산골숯불왕소금구이(豚肉燒肉店) → Hello Kitty Island → 珍手食堂 → Seri World → 山君不離 → 산골숯불왕소금구이(豚肉燒肉店)
今日第一站係「濟州島」
出發前已經買咗機票，我哋搭嘅係濟州航空，起飛時間係 07:15，所以今早天未光就要出門口~
穿過地鐵再上火車站，好易就搵到機鐵月台~
到咗機場，指示唔算清晰，但花啲時間都唔難搵到離境櫃檯喺邊嘅~
去到櫃檯嗰層，又搵唔到濟州航空喺邊，我哋唯有由頭行到落尾咁去搵~
不過行到中段就知道喇，因為濟州航空嘅招牌橙色好起眼，離遠就望到~
不過佢位置喺最尾，始終都係要由頭行到尾......
成個離境大堂嘅櫃檯，人唔算多，唯獨濟州航空人頭湧湧，非常多人~
排到我哋，搞晒手續，職員俾咗張 label 我哋，叫我哋十分鐘後返嚟搵佢，我見其他人都冇呢啲嘢，我估佢哋對外國人嘅行李查得嚴啲，查清楚先會俾登機証我哋~
咁多人排隊，十分鐘後，我哋應唔應該直接搵佢，定又排一次隊呢？
到時先算~
十分鐘過後，櫃檯面前只有一組人，咁我哋等佢處理埋就拎返張 label 俾佢，佢就俾登機証我哋~
又一次不同嘅經驗~
上機喇~
成日以為濟州喺韓國最南邊，應該暖好多，落咗腳就知原來唔係，同首爾比都係差唔得幾多~
下一站係「KT(租車)」
KT 喺機場有接待處，不過手續就唔係喺機場搞，要搭佢啲穿梭巴士去佢哋位於機場附近嘅營業中心，約需十分鐘車程~
好快就搞掂手續攞得車，我哋租咗部 Kia - Morning，好細架，我哋三人 + 兩個大篋，出發前覺得啱啱好，嚟到就知道，原來都真係啱啱好，再放多件細行李都唔得......
不過其實都可以接受嘅，想平嘛，冇計啦~
David 個篋係 29 吋，我哋個篋係 28 吋，咁梗係放個 29 吋去尾箱啦，點知放唔落，爭少少，唯有試吓個 28 吋，28 吋就啱啱好~
咁冇計喇，David 要同佢自己個篋喺後座親密啲喇~
未喺韓國揸過車，初時有啲緊張，不過經歷過喺台中揸車嘅經驗，喺濟州呢度，尚算輕鬆~
初步印象，係呢度冇咩讓人文化，你入錯線，打一世燈都唔會有車讓，錯咗唯有繼續錯落去，冇人會俾機會你~
GPS 方面，螢幕夠大，反應唔錯，指示亦幾好，不過路遙知馬力，要用落先見真章嘅~
下一站係「民宿」
憑住 GPS 嘅帶領，好順利就到達民宿......附近......
我停咗喺條細街，其實都有少少阻人，不過我見周圍啲車都係求其泊，心裡面就好過啲，感覺冇咁罪疚~
而屎塔就去搵吓間民宿喺邊~
等咗都幾耐，終於見屎塔行返嚟，間嘢真係喺附近，仲有幾個免費停車場，不過係公家嘅，有冇位泊就睇運氣喇~
我哋去咗個最近嘅，有劃位嘅，滿晒，冇劃位嘅，都滿晒，幸好，喺呢個時候，有部車離開，不過係啲亂泊位嚟，唔理喇，照泊啦，泊一陣姐~
呢間民宿會連住三晚，希望唔會太差至好~
我同屎塔就一定會住私人房，而 David，一個人，為咗住平啲，出發前準備 book 住宿時，我哋問佢住床位介唔介意，佢都唔太介意，就試吓~
搞完手續，我同屎塔就正常咁俾一間房，而 David，除咗房鎖匙，仲俾咗個牌佢~
個牌嘅用途，就係佢入到房，揀張冇人用嘅床，再將個牌插喺床邊，以示床位已被佔用~
房內另有細 locker，僅僅夠放 David 個背囊，係要用力塞入去嗰隻~
就咁睇就普普通通，冇咩特別，都可以~
下一站係「神秘的道路」
喺神秘的道路，據說部車唔俾油都會向上斜嘅方向越行越快，其實說穿了，只係錯覺，望落係向上斜，實則係向下斜~
好神奇？其實又唔係，不過都想去現場探過究竟，想睇吓個錯覺有幾真實~
去到現場，已經有好幾部車玩緊，大家都係慢流狀態，的確，部部車都係向看似向上嘅斜路行~
自然，我哋都去試埋一份啦~
試咗幾次，結論係，望落條路係向上斜，但部車唔俾油又的確係會向前行~
不過咁，實則條路係向下就大家都知嘅，但就肯定唔算係咩斜路，因為我將部車停定，空波放 brake，部車係唔會郁，咁顯示佢嘅斜度非常低，低得不足以突破部車嘅組件之間嘅磨擦力~
要玩到佢越行越快(當然唔係衝住去啦)，一定要令部車仲有少少向前嘅慣性動力，先玩得到~
由於佢嘅加速力實在太低，其實都幾沒趣~
我哋後來放個水樽落地，一動也不動，原因係個水樽樽身唔係全圓形的，冇咩效果~
下一站係「性愛樂園」
一個以性愛為主題嘅公園，我自己就未參觀過類似嘅公園，所以就去參觀吓~
性愛樂園，就喺神秘的道路一百米範圍內，幾秒就到~
樂園分室外雕塑同室內博物館~
室外部份唔算太露骨，雖然雕塑本身絕非精雕細琢，甚至可以話求其，不過從意境出發，亦算係藝術品吧~
室內部份，有啲都幾露骨，有啲就幾有趣、幽默~
不過更有趣嘅係，我睇返啲相，室內部份，我同 David 冇影過相，屎塔就影得三張，一張大圍相，一張舖頭相，一張模型相，唔通係唔俾影相嘅？咁我又冇咩印象喎......
雖則室外部份唔算太露骨，不過都係揀少少貼出嚟就算，始終係比較敏感嘅話題~
遊覽完性愛樂園，本來計劃係去 Hello Kitty Island 嘅，不過時間晏咗，不如食晏先，反正咁樣更順路~
下一站係「산골숯불왕소금구이(豚肉燒肉店)」
喺網上面見到有人去完返嚟介紹，係一間好地道嘅黑毛豬燒肉店，基本上冇咩遊客會去，好似幾好咁~
其實我就覺得就算去黑豬一條街食，都唔會差，始終我又唔係食家，就算相差少少我係唔會分得到~
不過地道喎，少遊客會去喎，少咗份商業味道，梗係好啦~
聽報料人講，呢度唔容易嚟，好易入錯路口，我到咗 GPS 以指嘅目的地，見到同報料人嘅相一樣環境，咁我就知我冇行錯，但係點解間舖頭好似冇開咁嘅？
行近啲睇吓門口嘅牌，韓文字加 4:00 ~ 8:30，其實就唔難估到係開下午四點嘅，不過我哋唔係好想接受現實，見到舖入面有人，就行過去敲門~
有個大叔開門，不過唔係好溝通得到，屎塔走返去車度，打定輸數~
後來有個女仔走出嚟，識講國語嘅，呢個女仔，徹底咁將我哋拉返嚟現實，係呀，係開四點呀，而家冇得食咖喇~
個女仔好有禮貌，態度亦親切，仲叫我哋去附近行吓再返嚟~
我哋幾個坐返入車，我提議，今晚唔去 O-il 蔘雞湯店，反正噚晚都食過韓式蔘雞湯，晏晝玩完就返返嚟食黑毛豬~
其實行程係我計劃嘅，一般我改嘅行程，佢哋都冇咩意見~
咁午餐食咩好呢？我決定去珍手食堂，不過珍手食堂比較遠，所以我哋去埋 Hello Kitty Island 先再去~
下一站係「Hello Kitty Island」
呢個 Hello Kitty Island 真係勁靚、超夢幻，唔單止係咁，我仲覺得佢幾有心幾有誠意~
屎塔遊覽完，唔知會唔會痴咗線......
講多無謂(其實係冇咩好講)，貼相去吧~
下一站係「珍手食堂」
以我自己記低過嘅地方嚟計，Hello Kitty Island 附近係冇咩食肆，由於之後會去 Seri World，所以揀咗去珍手食堂，順路啲~
珍手食堂主要係食海鮮窩，睇相係相當吸引~
其實之後嘅行程都有安排去類似嘅食肆，不過唔理咁多喇，搞掂呢餐先，可能間間都有自己特式呢~
我哋叫咗三個鍋，分別係「鮑魚海鮮砂鍋」、「海鮮營養石鍋飯」、「海膽營養石鍋飯」
都等幾耐先上檯，因為即叫即做，睇住佢煲嘅~
兩個營養石鍋飯就真冇咩特別~
不過個鮑魚海鮮砂鍋真係不得了，用料極為新鮮，蝦同蟹都鮮味到不得了，肉又夠扎實，好好食，好好食，真係好好食！
其實隻鮑魚都好食，但鮑魚本身嘅鮮味唔會好出，所以反應嚟得冇咁誇張~ =P
不過咁，佢個湯底就唔係人人頂得住，幾鹹吓，而我覺得係佢嘅特式嚟，並唔係重手咗~
又要講返隻蟹，喺咁重味嘅湯底吓，仍然食到咁鮮嘅蟹味，冇因為個濃味湯蓋過啲蟹味，証明隻蟹真係好新鮮，好鮮甜！
呢餐本身唔喺計劃之內，無啦啦嚟咗，好有驚喜，回味無窮！
下一站係「Seri World」
Seri World 有幾樣嘢玩，高卡車、騎馬、迷宮花園、跳彈床(Euro Bungy)
而我哋嚟呢度，只會玩高卡車~
屎塔就唔會玩嘅，而我，其實都興趣不大，不過 David 想玩，冇理由佢自己一個玩咖，就陪吓佢~
出發前 David 話想玩四驅電單車同高卡車，二選一，其實如果只係諗我自己，我寧願玩四驅電單車，不過我唔放心 David 四驅電單車，因為操作不當係會翻車的，所以只好玩高卡車~
有時做人真係辛苦，一秒鬆懈就有機會奶嘢~
我喺 GPS 入 Seri World 個電話，正正常常咁有晒指示，由於個 GPS 一直都唔錯，於是我入完就開車，冇仔細睇~
一路行一路行，咁鬼耐都未到嘅！
由於都行咗好耐，並且唔想搞個 GPS，費時有咩嘢搞唔返轉頭，反正仲有唔係好耐就到，就繼續跟~
到咗 GPS 所指嘅目的地，嘩，完全唔係嗰回事，去咗某 Resort！
肯定錯啦！
我嘅功課記低咗兩個電話，咁就試吓入第二個，再對吓地理位置，今次應該啱喇！
半個鐘車程，變咗個半鐘......
喺度玩高卡車，近二百港幣玩十五分鐘，真係好貴，我真係唔想玩！
不過都嚟到，又唔想 David 自己一個人玩咁沒趣，瞇埋眼俾錢啦......
行到埋去車場度，冇人玩緊，亦冇客等緊，只係有幾個工作人員喺度吹緊水~
呢幾個工作人員對我哋嘅服務態度，真係差到爆~
黑口黑面，一言不發，唔係必需要開口嘅情況都絕不發出任何聲音，根本就當正我哋係仇人，只係為咗份工先為我哋提供最基本嘅服務咁~
高卡車，都係咁啦，不過今次有少少特別，我揸嗰部車係唔快得嘅，一快，車頭就會左右跳，我直情覺得我再加速係會翻車，只好就住揸啦~
而 David，風馳電掣，能收能放，著實比我預期揸得好~
興幸 David 唔係揸我部車，否則我真係擔心佢會出事，亦唔能夠盡興~
十五分鐘，當然係眨吓眼就過，不過屎過嘅呢十五分鐘，可能會比我哋長......
David 就開心到不得了，仲話如果唔係咁貴，真係想玩多次~
之後佢仲買咗張工作人員幫佢影嘅相~
幫佢影相嘅女仔，同細細粒真係餅印一樣，如果佢現身香港，應該會有好多人認錯~
不過又未必，佢嗰副嬲咗成村人嘅西面，應該冇人覺得佢係細細粒~
下一站係「山君不離」
山君不離，據說係一個世界罕見嘅火山口，不過太學術嘅嘢就唔講喇，總之就係一個火山口~
由於之前去 Seri World 行錯路，浪費咗唔少時間，所以而家去山君不離，係有啲遲，去到都可能就閂門~
但其實又有咩所謂呢，只要仲俾我哋入，起碼都有一段短時間行吓嘅，總比冇嚟過好吧~
嚟到喇，好冷清，售票員提醒我哋仲有半個鐘就閂門，冇問題，反正我知道嚟呢度只係睇火山口，半個鐘，夠喇~
入咗場要行一段路，往山上行，好快就到~
上到山頂已經係火山口~
睇完！
呢個時候，冬末，又未到春至，相信係全年景色最差嘅時候，所以除咗火山口，都真係冇咩睇~
不過個火山口又真係幾特別，成個火山口都係植物，仲要似一大片平地咁~
如果可以喺夏天以鳥瞰方式嚟欣賞呢個火山口，應該會幾靚~
下一站係「산골숯불왕소금구이(豚肉燒肉店)」
充滿期待咁回程返去燒肉店！
行車中途，我發現咗樣嘢，就係街燈一著，個 GPS 就會轉去 night mode，幾貼心~
我冇乜印象日本係咁，台灣都冇~
去到燒肉店，基本上選擇唔多，老闆娘介紹咗一輪，我哋最後點咗燒黑毛豬同冷麵~
老闆娘係中國人嚟，嫁咗嚟韓國，所以我哋可以用普通話交談，方便好多~
閒談間知道老闆娘來自哈爾濱，佢話佢唔喜歡咁凍嘅地方，就算韓國嘅冬天都比哈爾濱舒服~
佢對於近排有遊客到來感到非常好奇，我哋就話咗俾佢知都係從網上面睇到佢哋嘅資料~
講返食嘅嘢，燒黑毛豬，由老闆娘一手一腳燒嘅，佢話盡可能都會幫遊客燒，希望客人可以食到地道口味~
人多不能分身就冇計，幸好當晚客人不多，亦只有我哋呢檯係遊客，唔駛落手燒又可以食到地道口味，幸福！
面頭一粒粒嗰啲，我初時以為係洋蔥粒，原來係鹽嚟嘅~
一路燒一路剪開佢~
燒好之後，仲一人夾咗一舊俾我哋，又話睇到肥嗰啲，可以照食，食落口唔會覺得肥，真正嘅肥油已經喺燒嘅過程中流晒出嚟~
黑毛豬可以就咁食，亦可以用生菜包住嚟食~
真係好好食，肉爽有豬味，燒到微焦，香味更濃，直情有幸福嘅感覺~
佢推介嘅份量亦都啱啱好，而我食到飽時亦完全未冇膩嘅感覺，好食！
個冷麵本身就普通，不過當加咗 wasabi 之後(碗邊右側)，成個麵唔同晒，雖則未到話勁好食，但加 wasabi 前後嘅差別真係幾大，加咗 wasabi 嚟食，個麵不再普通~
食完飯，買埋明早早餐就返民宿，完結今日行程~
沒有留言:
發佈留言