《瞬間看地球》Stranger's Blog: 2015.03.24 濟州 (韓國第三天)

今日行程：
Day 03：牛島(環島遊) → 韓星食堂 → 城山日出峰 → Maze Museum → KAL飯店賭場 → 朴大監 → Tang Tang 炸雞店

呢間民宿係包早餐嘅，不過我哋今日好早出門口，所以就不能享用民宿嘅早餐~
一早起身，喺雪櫃拎個飯團出嚟，一咬，嘩，真係牙都崩，咁鬼硬嘅！
我哋之前都有買呢啲飯團食，一樣係放雪櫃，都冇咁嘅情況~
經我哋研究過，估計係呢度個雪櫃比較凍(嚟嗰時冇留意，冇調教過)，先導致有咁嘅效果~
我攤暖咗一陣，幾經辛苦先食得晒一個咁細嘅飯團，當然要嚙得好爛先可以吞，而屎塔就只係食到半個，佢話好難食~

食完嘢收到 David 電話，一早打嚟唔方好嘢......
佢喺電話度話俾我知唔見咗房 locker 鎖匙，咁好啦，我過去睇吓有咩可以幫到手~

過到去，重組案情，佢話我知放咗條鎖匙喺檯面，行咗出去對面洗手間，睇吓有冇人用緊，再返返嚟就唔見咗，只係短短幾秒~
又話唔覺房入面瞓緊嘅人有郁過，亦唔見有人入過房~
嘩，奇案呀！

其實無論如何，我唔到最後都唔會覺得條鎖匙係俾人攞咗~
如果佢講嘅係真嘅，冇可能有人攞到~
就算佢記錯咗細節，我亦好難相信會有人偷咗佢條鎖匙~

以佢嘅論盡性格，我十分相信，一係佢記錯放低鎖匙嘅位置，一係佢自己掃跌咗喺某處而自己唔知~
好啦，兵分兩路，儘管佢話已經搵過晒都唔見，我唔理，重新再搵一次~
我叫佢拉個背囊同篋出走廊，仔細啲再搵吓，我就搵櫃檯同附近位置~

我呢邊就確定真係搵唔到喇，佢就仲努力緊，佢自己嘅行裝，我就費事幫手摷嘞，睇住佢搵就算~
其實呢，就好小事，民宿方面實有後備匙嘅，係賠返少少錢囉，不過就實會影響玩樂心情~

最後，就喺佢個篋入面搵返條鎖匙，一天都光晒！

今日第一站係「牛島」
出發前，見到人哋去完返嚟啲相，好似幾好咁，反正之後都唔知幾時先會重臨濟州島，於是就左調右調咁塞咗入行程入面~

要去牛島，就要喺濟州島嘅「城山碼頭」上船，呢隻船亦係汽車渡輪，容許私家車一齊上船嘅~
而牛島上就有兩個碼頭，分別係「河雨木洞港」及「天津港」
由城山碼頭開出，到牛島上兩個碼頭，唔同日期，班次頻密度亦有所不同~

去到城山碼頭，頓時生起一陣迷茫嘅感覺，原來唔止有一間船公司，之前上網睇嘅資料，都冇提過呢樣嘢~
一入到去售票嘅地方，幾個櫃檯都有阿姐向我哋揮手，真係時運低啲都以為自己撞嘢......
咁是旦啦，就去最近嗰間，睇返啲時間同牛島碼頭，同我之前睇嘅資料完全唔同！
不過咁，我哋自己揸車，其實邊個碼頭上岸都冇所謂，而且時間上，嚟緊嗰班船係半個鐘後，係喺我預期之內，所以都冇咩所謂~

俾晒錢，等攞飛時，對方問我哋搭八點半船好唔好，我哋睇一睇時間，而家八點半喇喎，但對方話冇問題，咁，可以早啲過去梗係好啦，我相信上唔切船佢會換返九點飛俾我哋嘅~
三條友攞完飛一個箭步跑上車，而我就光速咁開車飛過碼頭(其實距離不足一百米......)

趕時間底下亂攝一張售票處嘅相~

去到碼頭，有人走過嚟，嗱嗱聲攞咗張飛，再指示我 U-turn，用尾倒落船度~
全部人嘅動作都話俾我知，要快！
咁我就盡量快少少，好小心咁倒落船度~
泊好車之後，仲有車倒入嚟，到最後嗰部直情唔駛佢倒車入，車前直入後即開船！

最細我哋呢部~

船程約十五分鐘~

船嘅上層有座位，不過咁大風，相信會上嚟坐嘅人唔多，尤其而家冬末仲係幾涼，加上海風都幾凍，所以一個人都冇~

上層放咗部扑傻瓜機~

下層有休息室，冇櫈嘅~

到達咗牛島之後，就去租三輪電動車~
40000 韓圜租兩個鐘，仲要交低一本護照作抵押，我哋只係租咗一部~
主要係屎塔同 David 玩，我就揸返自己車~
一來我唔係話真係好大興趣，二來，我玩電動車，咁部車邊個揸？
其實 David 同屎塔都有車牌，David 考牌後都未揸過車，先唔講我唔放心，其實佢自己都唔敢揸~
屎塔本來還可以的，不過佢未揸過左軚車，其實我都唔放心，都係自己揸啦~
三輪電動車，連司機可載兩個人，David 唔知係唔放心定係貪舒服，佢都係選擇跟我車~

遊牛島，我冇預定有咩地方會去，只係環島一圈，見到有咩想遊覽吓、參觀吓就停埋一邊落車遊覽~
大家都準備好晒就出發，屎塔先行，我跟尾幫佢擋一擋，見到有車要上就響 horn 提一提佢~

牛島隨影~

行咗唔係好耐，見到有個停車場，地方大又冇乜車，於是我哋就停低，俾 David 試吓部電動車先~

教咗佢點樣操作，有咩要注意，佢就開始試揸，喺停車場內兜圈~
行吓行吓，佢揸埋出停車場範圍，我哋見附近都冇乜車，都冇話好擔心，反正陣間佢都要揸出去~
見到佢咁樣，我同屎塔想法一樣：做乜鬼揸埋出去......

David 出咗停車場後就向左 U-turn，再直駛至停車場外邊嘅馬路~
馬路同停車場之間有一條高壆，壆嘅高度比香港見到嘅行人路壆仲要高~
我哋睇住 David 不停加速，正覺事態有啲唔尋常，佢 45 度角咁向住條壆不斷加速，就好似想自殺咁！
我哋當然係喝都喝唔住，「嘭」一聲，成部電動車頭轆撞埋條壆度，尾轆即時飛起，飛到半空時，全車向左翻側！

咁翻側法可大可小，我哋即時衝過去睇吓 David 點，不幸中之大幸，萬幸，David 自己扒返出嚟，起碼初步覺得冇咩大重傷先！
David 扒返出嚟之後，我哋梗係問佢有冇事，佢話冇事，佢唔似係順口講冇事，而我哋睇佢表面，都真係冇咩事，完完整整，衫褲冇破損，亦未見有皮膚擦傷~
確定佢冇咩大礙，我哋夾手夾腳扶返正部車，此時，有個健壯婆婆過嚟幫手，佢仲講咗幾句嘢，不過係講韓文，我哋梗係唔知佢講乜，只好講聲 thank you~

人冇事，咁車呢？
冇咩嘅，左側鏡飛脫，左鏡臂斷裂，左側鏡碎裂，左邊車殼花晒，車頂膠邊脫落，左尾轆軨凹咗，係咁姐......

追問因由當然係少不免，我哋問 David 做乜高速撞埋條壆度，佢嘅答案實在係令人震驚！
佢話睇唔到條壆！吓~~~~~~！有咩可能！但其實又係最可能嘅答案，見到條壆又點會係咁加速吖！
不過真係匪夷所思，有咩可能睇唔到條壆，條壆仲高過部 iPhone 6，有咩可能睇唔到......有咩可能......

扶返正部車，屎塔試過部車，話覺得怪怪地，叫我試吓~
我行咗個圈，以我未揸過部車嚟講，完全唔覺得有問題，究竟屎塔係因為心理影響定真係感到部車有問題則不得而知~

不過話時話，部電動車並不如我想像般容易駕馭，起油感敏度偏高，迫力差，車身穩定度低，完全冇安全感~
其實呢部咁嘅車，唔需要有車牌都揸得，真係太危險，尤其呢啲用手扭油筒嘅車，一慌亂就好易死扭油筒，真係好易出事！
島上仲要有工程，有泥頭車行走，危險指數爆燈！

最後我哋決定唔返去換車，免得再租另一部又要俾多次 40000 韓圜，反正我同屎塔都覺得部車可以繼續行，只係多加留意冇咗左側鏡嘅問題就得~
喺揸之前我都已經唔太放心佢哋租嚟玩，揸過之後，梗係仲擔心啦，只好千叮萬囑，要屎塔一定要小心，起油扭軚都唔好過急，我就盡量喺後面保護同提醒佢~
至於 David，莫講話我哋唔會再俾佢揸，佢自己都唔敢揸啦，跟我車，坐得舒服啲，定一定驚先啦~

牛島嘅風光都幾好，非常值得一遊~

屎塔揸住部電動車個幾鐘，我就擔心足個幾鐘，沿途都有不少驚險場面，並不是屎塔駕駛得唔好，而係從第三者角度，唔知佢想法時，總係覺得有啲動作係危險，其實一切都喺駕駛者預期之內~

部電動車就夠鐘，但我哋仲未上牛島峰，我哋決定還咗部電動車先，再揸車去牛島峰~
行吓行吓，我覺得未必夠時間喺限時內交到車，於是我就睇吓部車嘅 GPS，我發現有捷徑，不過就唔肯定我部車過唔過到，唯有見步行步，我睇 GPS 條路唔係特別幼，我相信應該冇問題的~
結果沿路都冇咩大問題，只係有啲位唔夠來回車一齊行，只好喺啲闊啲嘅位讓人過先，再自己過~

好嘞，醜婦終需見家翁，屎塔好英勇咁揸住部爛車去還車~
還車時，我哋冇出聲，等對方發現，因為我哋覺得對方實會作基本驗車，一定會發現的~
結果，個男嘅真係冇發現，俾返本護照我哋，正當我哋想話佢知部車有損毀時，個女嘅就已經發現咗~
點解唔俾我哋講先呢，搞到我哋好似呃佢哋咁......

好嘞，個男嘅接手處理，佢拎住一枝筆，一本拍子簿，一部計數機，一邊指住損毀嘅地方俾我哋睇，一邊寫低~
個男嘅似乎好雀躍，好似捉住咗一個搵錢嘅機會咁，其實又難怪嘅，整難人哋啲嘢，俾人劏都冇計，除咗零件，人工又係錢，幾日冇得租俾人又係錢......
總數嚟喇，承惠 250000 韓圜！
David 呢劑飽囉......

臨離開前，大家都去個洗手間先~
去洗手間都要講，梗係有事發生啦~
David 去完洗手間出嚟話大髀瘀咗一撻，但唔撳佢又唔痛，行路一啲問題都冇~
其實我哋都有啲擔心，有啲傷可能聽日瞓醒先浮出嚟，最怕梗係骨有事啦，不過佢話行路一啲問題都冇，所以暫時都唔會太擔心~

還咗電動車，一齊向牛島峰出發~
由於我冇記低任何牛島峰嘅定位訊息，所以呢次要靠人肉 GPS，韓版屎塔 1.0 beta
行吓行吓，去錯咗第二邊，一路行直至冇得再上先知......
beta 版嘛，係咁上下......

再行第二條路就行啱，去到牛島峰停車場泊低部車，之後仲要步行一大段路先上到峰頂~
先前 David 試車、炒車、仲有還車，花費咗好多時間，整個行程比預期遲咗，如果再行上峰頂，時間上當然會更遲，錯過咗班船就更遲~
經三人商議後，決定唔會走到最頂~
我呢，做功課時已睇過相，都係嗰啲景啦，上唔上真係冇所謂，反正嚟牛島嘅重點真係不在牛島峰~
佢兩個就覺得陣間都會上城山日出峰，牛島峰，上唔上真係冇所謂~
所以我哋只係去到山腰一個觀景嘅地方，冇上山頂~
(其實要支時自己嘅決定，自然諗到好多看似合理嘅理由......)

對岸就係城山日出峰~

牛島峰下嘅鯨窟~

出門時氣溫唔係特別低，不過嚟到牛島，好大風，加上溫度本身就唔係高，真係有啲凍~
回程時就買咗杯即沖咖啡，屎塔話好飲，我就唔飲咖啡嘅，唔識欣賞，飲咗淡，個人真係暖咗就真嘅~

呢度仲有酒賣，唔知點解硬係覺得係啲度數好高嘅酒嚟......

濟州島吉祥物？

山腳仲有馬騎，不過唔見佢有生意~

差唔多行到返車，David 話唔見咗個鏡頭蓋，我哋當然唔會上返山去搵，頂多望吓附近，再上返車仔細啲搵~
今次冇咁好彩，點搵都搵唔返......

遊覽完牛島，就去返碼頭搭船返過濟州島~

下一站係「韓星食堂」
韓星食堂，本本旅遊書都推介，我當然明白當中可能有啲商業成份，但我諗起碼唔會太差~
而且碼頭同城山日山峰之間嘅食肆，網上睇返嚟嘅資料，都係講呢間為主~

韓星食堂本身都有幾個車位可供泊車，不過我決定將部車泊喺城山日出峰嘅停車場先，再行過去韓星食堂~
因為我怕食完嘢先去搵位泊車未必有位，我而家去到如果冇位都可以自己等一陣，叫屎塔同 David 過韓星食堂先~

去到城山日出峰停車場，真係幾滿，初步睇落就一個位都冇，不過食飯時間，流動量應該會高，我有信心好快會有位~
車都未停定，就見到有車走，附近又冇車等緊，嗱嗱聲開過去泊~
泊好車就一齊行過去韓星食堂，好近，兩分鐘就到~

一坐低，疑似老闆就走過嚟介紹，態度不錯，佢推介個套餐俾我哋，嘩，個價比我預算嘅要多一倍，亦唔見得有咩咁特別，我哋自然係再慢慢睇吓先再算~
老闆雖然被我哋拒絕咗，但態度不變，雖然唔係覺得打從心底嘅友善，純粹係生意人嗰種笑臉，總好過反轉肚就係屎~

最後我哋點咗鮑魚砂鍋、海鮮薄餅、鮑魚粥~

鮑魚砂鍋，個樣同之前喺珍手食堂食嘅差唔多，都係同一類嘢嚟~
樣差唔多，食落卻差天共地！
湯底一樣係濃味，味道不及珍手嘅鮮甜，但還可以的，不過食食吓會食到水嘅質感，唔係湯，就好似用水沖朱古力粉，未攪得勻咁，有朱古力味，但又好似飲水咁~
湯底有咁嘅質感，真係好唔掂！
用料比湯底更差！啲蟹肉梅嘅！
至於鮑魚還好，不過味道不及珍手鮮~

海鮮薄餅，味道幾好，可以話係好食，不過個名就令人誤會喇~
成個薄餅，只有好少量嘅蝦肉，其餘都係魷魚，兩樣都係海鮮，佢又冇呃你喎，不過海鮮薄餅嘛，唔會諗到就係得呢兩樣料~

鮑魚粥，冇特別，不過不失，係料少啲~

前菜有碟咁嘅嘢，幾好食~

食到中途，David 見到部咖啡機上面有個 label 寫住「FREE」，佢好好奇想知，究竟係買咗一杯任添飲定係唔駛俾錢買，直情任飲呢？
嗯，其實我都有啲好奇，就問吓啲職員~
得到嘅回覆，真係可以就咁任飲，David 就當然即刻就走去斟返杯先，而我，當然都走去為屎塔斟返杯啦~
咖啡都可以任飲，對於活在香港嘅我哋嚟講，真係有夠神奇！

我個人嚟講，對啲一嚟就推介啲貴價套餐嘅食肆有啲反感，再加上呢啲咁嘅食物質素，呢間嘢真係差差差！
點解本本旅遊書都推介佢呢？如果話冇商業因素，真係比較難令人相信~
唯獨服務態度唔差，雖不至殷勤，起碼冇令人不滿，完全冇黑口黑面，有求必應，係呢樣嘢幾好~
如果之前冇食過珍手，對呢度印象都冇咁差，但點都唔會係好，而家有比較情況底下，就更加覺得呢間嘢好差！

下一站係「城山日出峰」
顧名思義，城山日出峰係睇日出嘅好地點，不過我哋就唔係咁熱衷於睇日出呢門玩意，同埋要凌晨就起身，咪搞~

食完飯，穿過停車場向前行就到城山日出峰入口，買咗飛就開始不停向上行~

直至山頂，到達火山口~

山頂風景梗係靚啦，我哋都留咗一段時間，不過呢度都幾多人，睇夠就走~

猩猩 VS 馬騮？

海龍王？

回程有第二條路落，附近都有不少講普通話嘅大嬸，佢哋真係好嘢，個個著住對高踭鞋，踏盡數之不盡嘅樓梯，完全冇問題，真係要俾個「LIKE」佢哋！

不停咁行，終於落到山腳，聽到廣播，不過講韓文嘅~
屎塔話見到人群開始向海邊行，我知喇，係海女表演！

我係有記低下午三點有海女表演嘅，不過嚟到完全唔記得，真係失敗！
好彩落到嚟咁啱差唔多時間，好彩......好彩......

海女表演，開始時係幾個海女唱吓歌，由於咁多位海女都有返咁上下年紀，令到我哋相信佢哋係真海女嘅說服力大增~

唱完歌仔，佢哋徒手潛落水四散，有啲都去到幾遠~

等咗一陣，去到好遠嗰位海女高舉手中捉到嘅生物，細看之下，係一隻八爪魚！
佢捉完放咗落籃，游返近岸，再展示佢嘅戰利品~

如果，只係如果，成件事係一場戲，佢哋拿揑嘅時間真係非常好！
太快就捉到，觀眾嘅期待情緒還未醞釀得夠~
太耐先捉到，呢啲唔算得係咩精彩表演，觀眾耐性相信非常有限~

而且，先由遠處嘅海女報捷，亦可能係一種鋪排，事關如果近岸嘅先報捷，遠處嘅海女，被關注度一定會大減，掉返轉的話，就遠近嘅海女都唔會被忽略~

經過遠處海女報捷後，部份觀眾已經開始離去，此時，近岸嘅一位海女又報告捉到鮑魚，一陣掌聲過後，人潮已經少咗大半~
之後，所有海女開始陸續上返岸，表演完結~

表演場地嘅另一邊，有啲地攤售賣海產，剛才被捉上岸嘅八爪魚同鮑魚，會唔會放埋落嚟賣呢？
我相信唔會嘞，一日兩場表演，又唔係真係游到出好遠，邊有咁多嘢捉？相信捉完都會捉返落海，留返下場表演再捉過~

臨走時見到個告示牌，嘿嘿，隻八爪魚究竟係唔係媒，心中有數啦~ =P

下一站係「Maze Museum」
主要係玩花園迷宮，Maze Museum 係濟州最大嘅一個花園迷宮，所以就揀咗嚟呢個~

嚟到之後，全部都係學生，好鬼嘈，我哋見啲學生未入場，我拉住屎塔，同佢講，快啲入去先，唔好遲過啲學生~

我哋手持迷宮地圖，研究咗一陣，其實就唔算複雜，我哋都能夠喺地圖入面理出一條可行嘅路線，不過係咪可以喺現實場地跟住嚟行就陣間先知~
我哋兵分兩路，David 自己行，我同屎塔一齊行~

呢度嘅迷宮其實係三合一，完咗一個就可以去第二個，之後就可以去第三個，彼此之間都有路直接離開~
迷宮一個比一個複雜，頭一個輕易完成，第二個有行錯路嘅情況，第三個就開始有唔知自己喺邊嘅情況~

由於啲學生係以光速飛快咁移動，所以有啲一早已經行完~
第三個迷宮有啲位好近看台，行完嘅學生就喺嗰度俾提示迷咗路嘅學生，嘈到不得了，煩到頭都爆~
喺眾多嘈吵嘅學生當中，我哋見到 David 嘅身影，佢已身處看台~

我哋扮唔知佢喺上面，雖然佢都有大聲叫，但佢一個人嘅聲音就算再大，點都大唔過上面幾十人嘅聲音，聽唔到都好合理吖~
上面嗰啲學生，係咁亂點下面啲人，雖然嘈啲，其實睇見佢哋都幾開心嘅~

到最後，我哋當然都走得出呢個迷宮，成為看台上面嘅一分子~

呢個時候，距離呢度嘅閂門時間約有一個鐘，有位大叔就走咗上啲圍牆上面，指示下面啲玩家點樣走到出口~

Maze Museum 隨影~

跟住我哋就走咗去上面小食部，買雪糕食~

離開前見到，佢對眼想點......好恐怖......

下一站係「KAL飯店賭場」
出發前，David 要求參觀韓國嘅賭場，邊間都冇所謂~
根據我嘅功課，韓國只有首爾同濟州有賭場，首爾我哋唔會自駕，行程亦冇去開賭場嗰邊，不考慮~
濟州市中心唔係好大，兜一兜過去賭場都唔會話好嘥時間，就呢間啦！

本來我計劃好聽朝先去賭場嘅，不過而家時間尚早，直接去食飯又太早，但預先計劃好或者可以加插嘅景點「茶喜然」又唔夠時間去，插一插賭場落去就啱啱好！

去到賭場，David 就自己入去，我哋喺車等~
約十分鐘過後，David 出返嚟，佢話賭場好細，完全冇氛氣~

嗯......咁首爾嗰間應該好啲嘅，只係冇諗過濟州呢間會爭咁遠姐~

講起首爾嘅賭場，第一次(十多年前)跟團嚟過韓國，都有入過賭場，唔記得係邊間，但肯定唔係 David 入嘅呢一間，咁照推斷應該係首爾嗰間~
我賭錢呢，至多都係六合彩或者老虎機，嗰次入賭場，諗住都玩兩舖老虎機，叫做入過賭場玩過兩手~
最後，我只係入過一次錢，拉過老虎機嘅拉桿一次就冇再玩，因為我第一次玩已經贏咗約一千元港幣，即刻收手，哈~

下一站係「朴大監」
朴大監出名食燒肉，不過我首次知道有呢間嘢，係旅遊書介紹佢嘅鮑魚粥~

朴大監嘅入口係喺一條好暗嘅巷入面，差啲到咗門口都唔知~

未開門已經好鬼嘈，原來有班為數十幾人嘅大陸客喺度，係好豪氣嗰隻，係咁拎住杯酒敬人嗰種，可以想像到有幾嘈~

我哋被安排到靠近大陸人嗰張檯，我哋彼此係要用力嗌出嚟先可以被對方聽到，現場真係好嘈，好嘈~
啲侍應亦都忙於招呼嗰枱人，放低菜牌喺我哋檯面就急急腳走咗去~

轉頭走過嚟問我哋要咩，面口勁黑，但我哋未諗好，話等陣先，佢唔耐煩咁走咗去~
不過呢次我哋體諒佢，佢哋真係忙到出晒煙，雖則話服務性行業唔應該係咁，但始終係人嚟，忙到咁，有啲脾氣都好正常~

到我哋想點菜嘅時候，自然係叫好耐先有人理，抵死~ XDDD
最後我哋點咗九孔螺砂鍋、烤鯛魚、鮑魚粥、海膽湯
點烤鯛魚時，佢話我哋三個人可以點大嘅，不過我哋都點咗四樣嘢，怕食唔晒，所以都堅持點細嘅~

我哋點嘅嘢未上檯前，有段小插曲~
有侍應放咗鍋嘢上我哋檯，仔細望，應該唔係我哋點嘅嘢嚟，於是我哋同佢講唔係我哋嘅，佢望望張單，跟住走咗去，咁我當佢去咗查單啦~
等咗一段時間，仲未有人拎走鍋嘢，於是我哋就同另一個侍應講，個侍應搖搖頭，乜都冇做就咁走咗去 ~
再等咗一段時間，仍然未有人拎走鍋嘢，我哋隔離枱客，兩個女仔，用國語講(唔清楚佢哋自己交談定同我哋講)話應該係佢哋嘅~
好啦，我哋又叫個侍應埋嚟，講佢知成個情況，佢終於都肯幫我哋拎返鍋嘢俾隔離檯~

九孔螺砂鍋
呢個幾好，螺肉幾好，蟹肉有鮮味，肉質亦可以，蝦夠新鮮，湯底不錯~