Day 04：東門在來市場 → 萬丈窟 → 茶喜然 → 表善日光海灘 → 始興海女之家 → 水上星球 → 涉地可支 → 容易食堂
一早起身，最最最緊要係睇吓 David 傷勢如何，幸好，比昨日還要好一點，雖只係好了一點點，但起碼可以放心地繼續去玩~
民宿嘅早餐，主要係方包，有芝士、果醬、花生醬等等，其實仲有雞蛋，不過就要自己煎，食完仲要洗廚具，算吧，食麵包都冇問題~
今日第一站係「東門在來市場」
呢個市場有齊濟州嘅地道手信，所以嚟呢度入吓貨~
其實本來都冇諗嚟，不過我見呢幾日都冇買過手信，再係咁落去搞唔掂，點都買啲嘢先~
嚟到市場，基本上冇咩正式停車位，不過見當地人個個都係就咁泊埋一邊，我又覺得我哋買完嘢就走，所以就有樣學樣~
入到市場，可能我哋實在太早嚟，只有幾間舖頭開咗，不過其實我相信，多數舖頭賣嘅嘢分別不大，因為，已經開咗嗰幾間都係賣啲差唔多嘅嘢~
行咗陣，買咗少少嘢就離開~
(後記：好彩喺度買咗啲手信，之後嘅旅程，都冇咩手信買到，韓國唔似日本，日本係幾乎任何景點都實有手信商店~)
下一站係「萬丈窟」
萬丈窟係世界上最長嘅熔岩洞窟，當中只有一公里長開放給遊人進入觀賞~
之前入過幾個鐘乳洞，雖然知道形成過程完全係兩碼子嘅事，但感覺環境都有共通之處，所以期待指數唔算高~
親身到過現場，想像一吓當時熔岩流過嘅情況，其實成件事係非常壯觀，係絕對值得一遊嘅地方！
地面凹凸不平，真係好易出意外，要好小心，好小心咁行~
由主熔岩柱流落嚟，向前推進時，漸漸被冷卻了~
行到盡頭就係熔岩流落嚟嘅源頭，至今仍然清晰可見其邊流動邊被冷卻嘅形態~
盡頭處並沒有出口，要沿路行返出去入口處離開~
下一站係「茶喜然」
茶喜然位於山上，聽聞上面風景唔錯，同埋有洞穴咖啡店~
買飛時，售票員告知，喺場內消費，可抵消入場券同等價值嘅費用~
咁又幾好喎~
入咗場，首先去到嘅係商店，嗯......通常商店都係擺到最尾，離開前嘅最後一站，唔通我哋行錯路？唔理啦~
行完冇咩嘢睇，就行咗去接連住商店嘅......算係博物館吧，茶嘅榑物館~
主要都係啲茶碗，冇咩特別~
之後就去洞穴咖啡店~
咖啡店入面，一個客都冇，只有一個店員~
我同屎塔分別叫咗熱嘅綠茶同凍嘅梅汁~
嗯，有啲失望，綠茶味淡，而且偏甜，就好似奶茶加多咗奶同糖咁~
梅汁就算幾好~
飲飲吓嘢就有一大團人入嚟，咖啡店旋即被坐滿了，咦，講廣東話嘅，原來係香港團，旅行社係新華~
飲完嘢就出去行吓個茶園，出到茶園先知，原來呢度有得玩 Zipline，不過始終係喺園內，唔算太刺激，過幾日我哋都會玩類似嘅嘢，不過係會喺河上面滑過，刺激得多~
David 話想行上去睇吓間屋仔有咩睇，我同屎塔就斷定間屋只係人哋工作嘅地方，所以冇咩興趣，咁啱喺附近見到韆鞦狀嗰啲長椅，啱晒，我同屎塔去搖吓休息吓，David 就慢慢行上去.....同埋再行返落嚟......
David 觀察完嘅報告，間屋重門深鎖(我加鹽加醋後嘅誇張措詞)，冇嘢睇~
茶園隨影~
下一站係「表善日光海灘」
去呢個海灘，其實只為食午餐~
事源屎塔個同事去完濟州返嚟，佢話喺呢個海灘附近食過一間餐廳，冇名的，海鮮好新鮮，又平又正，又有即開海膽，鮮甜美味，聽見都吸引~
不過由於冇確實地點，只係見到張相有個白色嘅帆布頂，所以就要過嚟兜吓，希望搵到啦~
嚟到表善日光海灘，放眼四周，都唔見有白帆布，我將部車泊低，向海灘方向行，打算喺海灘嗰度，望返過嚟，睇吓會唔會望到同張相有啲近似嘅環境~
結果都冇咩頭緒~
算啦，搵唔到都冇辦法，放棄，睇吓其他食肆，是旦搵間入去食嘢啦~
不過都睇唔啱，一係太普通，一係太貴~
就喺我哋都冇咩主意，打算離開時，屎塔指向遠處，話嗰度有啲似似哋，望落又似係，雖然冇白帆布，但形狀同格局都似係，於是我就揸部車過去，探索一下~
嗯，似喇，除咗冇白帆布，其他嘢都似，應該係呢度喇~
屎塔，你的摩擦力真強！
不過呢，呢度成個廢墟咁，舖頭就重門深鎖，裡頭凌亂不堪，直情有打鬥過嘅痕跡咁，唔知發生過咩事~
這下好了，目的地已達，心已死，可以離去了~
海灘隨影~
下一站係「始興海女之家」
即開海膽吃不成，為咗安慰吓自己，都搵間食海產嘢嘅地方食吓嘢啦~
食完嘢會去水上星球，打開地圖，順路嘅，有兩個地方可以揀，都係海女之家，是旦揀就揀咗始興海女之家~
到咗始興海女之家，一個客都冇，不過呢啲咁偏嘅地方，冇咩客都唔係好出奇~
呢餐一定要食生海產，彌補返食唔到海膽嘅遺憾~
我哋叫咗三樣刺身：海蔘、章魚、九孔螺
另外再叫咗蜆粥~
唔知點解，我哋對生海蔘冇表現得好好奇，就好似食開嘅刺身咁~
其實我哋揀嘅時候，係將注意力集中咗喺有漢字嘅刺身，而海蔘又係我哋熟悉嘅海產，所以就忽略咗生+海蔘呢個奇怪組合~
(其實呢個原因咁牽強，我自己都好難接受，但又係事實嚟......不過，陣間會發生一啲更奇怪嘅嘢......)
好嘞，刺身就好快上到~
章魚，好食！
九孔螺，好食！
海蔘，好惡食！亦唔覺好食！
咩叫惡食？就係嚙極都嚙唔開，食一片已經牙骹軟，要用臼齒不停咁磨爛佢先分得開兩邊，但係分開兩邊又點會夠？所以，食一片，要咬好耐先可以吞~
講真，初時食，就會認真嚙，但食食吓就求其，再食食吓就唔想食......
David 真係好嘢，食剩半碟時，我同屎塔投晒降，但佢話佢可以食晒佢！
我哋勸佢唔好食咁多，好難消化，陣間搞到個肚唔舒服就唔係幾好，不過佢話唔怕......
佢唔係吹水，佢真係講得出做得到！真係勁！
其實以上三樣嘢都係難消化嘅食物嚟，仲要係生嘢，真係腸胃差啲都搞唔掂！
蜆粥，唔錯，幾有蜆嘅鮮味~
(忘了弄點蜆肉在面頭再影相......)
呢碟前菜大家都很喜歡~
窗外~
先前提過，陣間會發生一啲更奇怪嘅嘢，就係，我哋食緊生海蔘時，係唔知碟嘢就係生海蔘，三條友搏命諗都諗唔到，自己叫過咩都唔知......
後來我走去魚缸睇吓有咩賣，先知嗰碟係海蔘嚟，三條友都冇腦嘅......
海女之家嘅對面，有間貝殼博物館，不過唔知點解，我哋三個都冇諗住入去參觀吓......
下一站係「水上星球」
其實我同屎塔都去過幾個相類似嘅水簇館，本來都唔諗住嚟，不過 David 就冇咩點去過，而佢又想參觀吓，就陪佢去吓~
我揀咗濟州呢個，因為見佢有海女同埋韻律泳表演，幾特別咁~
本來計劃好去「涉地可支」先嘅，不過之前去表善日光海灘搵餐廳用多咗唔少時間，我決定刪減咗呢個行程~
到咗水簇館，都係分唔同區域，慢慢行，慢慢睇咁~
中間就返啲時間睇嗰兩場表演，水簇館嘛，大概都係咁嘅模式吧~
海女表演，只係喺大魚缸嘅水面，徒手潛落缸底捉啲生物入網~
其實真係唔算係咩表演，但係諗深一層，海女表演，唔係咁樣，你又想係點樣呢？至少可能係濟州獨有~
韻律泳表演，算係幾好睇，不過唔係好齊，感覺有啲 hea......
(環境好暗，所有水中動態相都係朦，不貼了~)
同場加演海豚表演~
三條海豚一齊躍出水面頂波，咁都俾屎塔影到，好嘢！
每次睇呢啲海豚表演，總有啲唔同嘅表演動作，今次最特別嘅表演係躍出水面時已經無限轉體，到半空再運力拗腰打空翻，精彩！
表演以外，都係一般水簇館可以見到嘅生物~
遊覽水簇館時，發生咗一啲嚇親屎塔嘅小事~
行經海獅嘅水缸時，停留咗一陣，屎塔當時將手掌貼於玻璃上，突然，一條海獅高速游近，將口想咬屎塔隻手！
屎塔當時係完全唔知條海獅游近嘅意途，到條海獅將口想咬，都已經嚟唔切反應~
咁當然，又點會有事發生，都係嚇一嚇而已~
屎塔話，嗰吓係有啲驚，但事後更覺驚訝，因為通常睇水簇館，喺缸入面嘅海獅、豹、狗......等等，都同遊人都冇乜互動，疑似佢哋根本就見唔到遊人咁~
講起又好似係~
再之後，喺另一個海豚缸，有個小朋友又係好似屎塔咁，放咗隻手掌喺玻璃，有條海豚游過嚟用個咀係咁喺隻手度徘徊~
屎塔見狀，想話重施固技，可惜最終失敗~
不過有啲嘢，你唔刻意去做，反而會成功~
之前嗰個小朋友，隨手放咗杯飲品喺玻璃缸底嘅小平台，上面有支飲筒，好快就有條海豚游過嚟，用佢嘅咀巴，喺飲筒嘅頂部不停扭動，再次引起一陣騷動~
水上星球外隨影~
遊覽完水上星球，過咗午餐時間都有幾個鐘，諗諗吓，我哋個胃都算唔錯，食咗咁多又生又難消化嘅嘢都冇事，尤其 David，佩服！勁！
下一站係「涉地可支」
傳聞涉地可支上面風景不錯，亦有一間教堂喺上面，不過亦有傳聞呢間教堂已被裝飾成一間糖果屋~
其實嚟到呢刻，太陽都開始落山，走上去涉地可支，應該冇咩好睇，甚至可能唔俾上，但涉地可支就喺附近，走過去睇吓點情況，都冇壞吖~
結果走到上去，太陽已落山，天色已昏暗，真係冇咩好睇，而且上到嚟，停車場好似要收費，冇理由冇嘢睇都俾錢停車咖，所以我哋都打消咗念頭，走人~
掉頭走時，見到附近有處冇草嘅空地，於是我就泊咗入去，幾條友又行返上涉地可支，一場嚟到嘛......
行到返停車場，向住山丘方向行，多數人呢，就向下行，我哋就逆流而上，不過上到一少半，見到間糖果屋，但仲有一大段路先行到，依照而家天色轉暗嘅速度，我哋上到間糖果屋，應該都好暗好黑，實在無謂浪費體力同時間，回頭吧~
就係咁，我哋又行返去停車場那個冇落閘嘅閘口，亦唔見有職員，閘口處又有啲疑似收費表嘅東西，不過只有韓文，所以都唔肯定係咪收費表，其實究竟收唔收費嘅呢？真係一個謎！
下一站係「容易食堂」
容易食堂，根據旅遊書所介紹，主打辣炒豬肉，聽落幾吸引~
本來呢，係計劃好去「那些年美味」食晚餐嘅，不過那些年美味都係食嗰啲海鮮鍋，呢幾日，喺冇預先計劃下，都食咗幾餐呢啲海鮮鍋，而且每間都比唔上珍手食堂，係差好幾班，真係唔想再食，所以臨時轉去容易食堂~
容易食堂，一間好細間、非常唔起眼嘅舖頭仔~
我哋揀好食咩，叫嘢食嗰時，老闆係咁講嘢，佢講嘅係韓文，我哋當然唔明佢講乜，佢越講越勞氣，我哋就越嚟越無奈......
幸好，呢個時候，有位食客走過嚟幫手翻譯，原來辣炒豬肉要按人頭計，唔可以三個人但單叫一份~
咁都冇問題，就叫三人份，個老闆面色先冇咁難睇，又難怪佢嘅，雞同鴨講，講極都唔明，忟都好正常~
由於叫咗三人份，我哋都唔敢輕舉妄動，再叫其他嘢，睇定啲先~
點完菜，就有各式各樣嘅前菜上檯，仲有三碗白飯，我哋相信應該夠食，好彩冇再叫其他嘢~
辣炒豬肉上檯喇，好似幾好咁，除咗就咁食，仲可以用生菜包住其他配料同豬肉嚟食~
各有風味，幾好食，三條友夾完又夾，夾完又夾，認真不錯！
唯獨獨沽一味，有啲單調~
食到尾聲，阿老闆又走過嚟係咁講韓文，睇佢講嘢語氣同手勢，今次我哋估到少少，我哋估佢係評論緊我哋用公筷，對此有啲意見......
文化差異嘛，算吧~
(其實唔算又可以點......)
屎塔唔係好想食方包做早餐，所以返民宿前，買咗杯麵作為明早早餐，又買咗香蕉，完結今日旅程~
沒有留言:
發佈留言