《瞬間看地球》Stranger's Blog: 2015.03.26 釜山、首爾 (韓國第五天)

今日行程：
Day 05：釜山 → 甘川洞文化村 → 首爾 → NOLBOO → Lotteria

今朝一早就要去還車，過咗九點鐘還車可能要罰錢~

之前買機票過釜山，都幾掙扎，有兩班機揀~
揀早嘅，還完車剩返嘅時間唔多，要趕搭飛機，係好趕嗰隻，部車有啲咩事的話，連飛機都唔駛搭，所以冇揀到~
揀遲嘅，還完車就要等，等差唔多兩個鐘，但冇理由賭大細，所以都係揀咗班遲啲嘅~

入埋油，去到 KT 附近，GPS 顯示已經到咗目的地，但眼前嘅地方都唔似係，於是我哋就喺附近兜吓~
兜吓兜吓，去咗 KT 嘅後門，有個 KT 嘅職員，見到我哋戇居居咁，問我哋係咪想還車，跟住就教我哋點樣兜返去正門~
由於我哋買嘅係全保，交車時，職員只係睇吓油係咪滿就完成還車手續~

到咗濟州航空櫃檯，順利 check-in，機場又冇咩好行，就去閘口度休息吓，等上機~

一切順利，到達釜山機場，降落時真係有啲驚，直程好似 free fall 咁，離心力好大，以我自己經驗計，真係未試過~
觸地一刻，嗰個撞擊力好大，好 chok，直至機速減慢晒，個心先定啲~

到咗釜山，就去醫肚先，我選擇咗去「松亭」食豬肉湯飯~

由機場去松亭，搭一段輕軌(無人駕駛)，再搭一段地鐵到西面站就到~

在無人駕駛嘅列車上隨影~

到咗西面站，想喺一號出口出，搭慣香港地鐵嘅我哋，從來冇諗過會搵唔到想去嘅出口，嚟到呢度，真正遇到難題！
出咗地鐵，只有某啲出口嘅指示，但就冇 1 號，咁點算呢？
唯有行住先，見步行步~

行行吓，見到有個標示版，有晒成個站嘅路線圖，原來要去一號出口，一啲都唔容易，上到某層，再跨過另一邊，落返去再行去另一邊又上一層咁，超複雜~
喺我哋研究緊嘅時候，坐喺前面嘅大叔問：English？
咦，有救星喎，於是我哋就用 english 問佢點去 1 號出口，佢......佢竟然呆咗，我哋估佢其實唔識英文.......又或者係我哋連咁簡單嘅英文都表達唔到卦......
算啦，其實有圖示，實搵到嘅~
喺搵路嘅中途，搭過一部 lift，部 lift 非常有趣，要撳實你想去嘅樓層，部 lift 先會郁，一放手就停，一撳又郁返~

差唔多去到 1 號出口，雖然未能確定出口位置，但都幾有信心已經到咗附近~
就喺呢度嘅附近，我見到儲物櫃，非常心動！
喺我嘅計劃入面，搭車去甘川洞文化村之前，要處理好行李先，即係放喺儲物櫃~
我知道好多鐵路站都有儲物櫃，但未必個個站都有大型嘅，就算有亦唔一定有剩，所以我喺呢度見到有大櫃又冇人用，真係好心動~
不過西面呢個站，係兩條線嘅交匯站，站內大而複雜，萬一搵唔返個儲物櫃地點就盞搞，而且返嚟攞篋要刻意搭多幾個站，真係冇理由放喺度~

最理想呢，就放個篋喺土城站，因為我哋會喺土城站搭巴士過甘川洞文化村，不過土城站係細站，未必有大嘅儲物櫃，搏唔過~
由於今晚我哋會搭 KTX 過首爾，所以我選擇食完飯之後，就放個篋喺 KTX 站，咁樣就較為理想，如果到時冇位，可能真係要拎埋啲篋上甘川洞文化村......

幾經艱苦，終於都搵到 1 號出口，出咗地鐵站，行兩分鐘就到松亭~

到咗松亭，疑似老闆示意我哋將兩個大篋放喺收銀處對開，我唔知佢怕我哋拎埋位阻住人，定還是想我哋都坐得舒服啲，重點係，佢嘅態度好友善，我哋都好樂意照佢說話去做~

我同屎塔一人一碗豬肉湯飯，David 就叫咗豬內臟湯飯~
湯飯好快就上檯，老闆親自走過嚟教我哋點食，好細心~

豬肉湯飯，湯底夠香夠甜，但意外地唔算太濃郁，豬肉就幾有豬肉香味，唔錯~

豬內臟湯飯，David 話幾好~

呢兜嘢勁鹹！

食飽飽就去釜山 KTX 寄存行李~
我哋係搭地鐵到釜山站，再行過去 KTX 嘅，當我哋到咗釜山地鐵站，又見到有大嘅儲物櫃，就走去望吓有冇位，可惜冇位吖，咁啱有職員行過，就同我哋講可以去 KTX 度睇吓~
哈，始終都係要放喺 KTX~

到咗 KTX，我哋兵分兩路，我去地下，屎塔上二樓，David 睇住啲行李，各司其職~
我喺地下嗰層，好快就搵到有兩個可供用嘅大型儲物櫃，嗱嗱聲跑上去搵屎塔~
上到去見到屎塔揭緊啲櫃門，唔好理喇，地下有梗係放地下，方便啲嘛~
跟住就走去會合 David，拉啲篋去地下嘅儲物櫃~

呢度啲儲物櫃係冇鎖匙嘅，以指紋代替鎖匙，咁都幾好喎~

處理好兩個大篋，再租多個細嘅放埋啲非貴重嘅隨身物入去，屎塔就放埋件褸，仲問我放唔放，其實都好，氣溫比預期高，可以唔駛著褸都得~
最後就租咗兩大一細~

搞掂晒就輕輕鬆鬆咁行落地鐵搭車去甘川洞文化村~
落到地鐵，我見到地鐵站有得將 T-money 增值，為免陣間搭巴士去或回程唔夠錢，我決定大家都喺度增值先~

咦，我張 T-money 呢？
Shit！喺褸袋呀！件褸喺儲物櫃呀！
之前冇諗住放埋褸入櫃，所以都咩冇準備，就咁就放咗件褸入去~
點算好呢？

買單程飛？唔得，陣間搭巴士又溝通唔到盞搞！
買多張 T-money？都得嘅，但唔知點解又唔係好想，蝕就唔會點蝕，因為走上去開櫃再租都係要錢，呢個方法唔係特別蝕~
唔諗咁多喇，嘥時間，嗱嗱聲跑上去攞啦~

上到去用指紋開櫃，等咗幾秒都冇反應，唔通等我輸入櫃嘅編號？咁我就試吓入啦，入完細櫃編號之後個細櫃就開咗，掂！
攞返張 T-money 再入錢 lock 返個櫃，再嗱嗱聲跑返落去地鐵站~

搭地鐵到咗土城站，再行前百多米就到巴士站，有三條線都啱，1-1、2、2-2，等咗唔係好耐就有車，係小型巴士嚟~

架巴士都幾滿，我哋三個上到車，冇位坐，而且只能企喺貼門位置~
一開車，已經知道呢程車有排受，平路都 chok 到癲，陣間上山嘅斜路，肯肯定仲 chok......
不出我所料，去到上斜嘅路段，基本上所有站立嘅乘客，都一齊跳舞，喺唔需要彩排嘅情況下，都跳得齊到不得了，每個人嘅擺幅同姿勢都一模一樣~
可惜，有人甩咗 bit！
David 終於都頂唔住，失手了！
佢甩咗手，成個人撞落我到，其實我本身連自己都快要頂唔住，再加上呢一撞，我都有啲失咗平衡，不過為免撞落其他人度，我雙手雙腳用盡力去保持平衡，還好，不致撞落其他人度，只係破壞咗舞姿姐~
此時，司機開口說著我們聽不懂的話，望望佢嘅手勢，再望望佢嘅眼神，相信佢係叫 David 捉實啲......
其實我並不怪 David，多人到企都企得唔自然，連雙手雙腳都不能找到好嘅平衡點，再加上司機嘅駕駛方式，想扶穩都難~
再開車前，司機又說著我們聽不懂的話，我估佢大概係話：再嚟過！

成程車，我牢牢咁記住，見到綠色橋就撳鐘落車，結果我搖到差啲唔記得，過咗綠色橋再回望先醒起要落車~
不過唔怕嘅，呢個站肯定唔止我哋落~

落咗車，先唔入村住，因為喺巴士站向前行少少，就到所謂嘅觀景台，先預覽一下咁靚嘅甘川洞文化村~

跟住就入村慢慢行，喺村口一個藍色櫃檯，買咗份小冊子，呢份小冊子，除咗有地圖，仲有九格供遊人蓋圖章嘅方格~
而蓋圖章嘅地點，亦都喺地圖清楚顯示，只要到指定地點，蓋滿呢九個印章，就送明信片一張~
而其中一家蓋印點，亦會送明信片一張，即前後兩張~

我同屎塔對呢兩張明信片沒多大興趣，不過我就當佢係一條遊覽路線，俾自己一個方向去行~
講起遊覽路線，其實村內係有指示咖，指示方式係用魚嘅圖案，按照魚嘅圖案去行便可以~
不過網上見到嘅說法，多數都話跟唔到，行行吓就跟甩咗，所以我都冇打算跟住嚟行~

村內嘅中心範圍，主要係小商店同一啲文化或藝術展示區，而外圍就主要係民居~
如果跟住內圍一個倒 U 型嘅路徑行，唔駛地圖都得~
但如果要集齊九個印章，就算有地圖喺手，都唔係一件容易嘅事~
年終唔知有幾多人喺度迷過路呢？

終於，我哋都集齊九個印章，不得不讚賞喺網路上其他都一樣集齊九個印章嘅人，因為有兩個地點，著實不容易找到~
咁，係咪又要讚吓自己呢？其實我哋集齊呢九個印章，榮耀係歸於屎塔的~
事源，行到某個小路口，有一段望不清，向下迂迴又狹窄嘅樓梯，屎塔話佢想落去睇吓，叫我同 David 喺附近行吓等佢~
我唔知點解佢有咁嘅決定，不過我又覺得有時可能想自己一個靜靜地行吓都無可厚非~
等咗都有十多二十分鐘，佢上返嚟同我哋講下面冇咩睇，咁就繼續行~
行咗一陣，屎塔知我喺地圖搵緊其中一個蓋印點，於是就同我講，頭先落去行嗰陣經過其中一個蓋印點，於是就動身一齊去~
就係咁，呢個隱藏於民居中嘅蓋印點，不用刻意尋找，輕易到達~
而另一個難搵嘅蓋印點，亦喺我哋亂碰亂撞嘅情況下找到~

行夠了，時間啱啱好，差唔多到我預定要走嘅時間~
晏啲要搭 KTX 到首爾，時間要掌握得好啲，免得錯過咗班車就麻煩~

去到巴士站，等咗一陣就有車，而且一路都好順暢，比我預期早咗好多到 KTX 火車站~
返到 KTX 火車站，梗係攞返行李先~
攞行李時，我發現咗一樣嘢，算係我自己少少嘅運氣嚟~
開儲物櫃，要用指紋，我之前開櫃時，以為要輸入儲物櫃編號，原來唔駛咖！
原來係，你按一次指紋就開一個，至於開邊隻櫃，我估用家係冇得指定嘅，咁即係之前我開細櫃攞 T-money 時，真係靠運氣，三個櫃，一開就開中我要開嘅櫃，哈~

早咗咁多到 KTX 火車站，連月台位置都未有顯示，我哋就走去買嘢飲買雪糕食~
直至見到有顯示邊個月台，就走落去上車先，咁就可以放心盡情休息~

經過兩個幾鐘嘅車程，終於到達首爾~
我哋今晚會住東大門嗰邊，諗住搭地鐵過去嗰時，David 話唔見咗張 T-money，咁冇計啦，唯有買過張，又增值返 10000 韓圜......

過到東大門，去咗旅館先，放低晒啲行李，再輕輕鬆鬆行去食飯~

今晚我哋去食 NOLBOO 步隊鍋~
不過，當我哋去到之後，佢哋正在關門中......
我上網睇佢哋係閂十一點嘅，而家十點都未到......