Day 06：KT(租車公司) → 駱山公園(梨花洞壁畫村) → 草莓樂園 → 普羅旺斯村 → 名品石鍋雪濃湯 → 小法國村 → 江原道 → VONS 炸雞店
今日早餐係民宿提供嘅，都係一啲好簡單嘅早餐，方包呀，牛油呀，果醬呀咁，本來都幾乏味，不過佢仲有烚蛋，咁又唔同呀，正！
今日第一站係「KT(租車公司)」
由民宿過去 KT，不用一分鐘，正，多得屎塔揀嘅民宿~
其實今次租車，算係有啲挑戰，始終未試過喺首爾呢個咁繁忙嘅大城市揸過車，唔熟嘅環境、交通、車種，要一次過去適應，希望自己應付到~
今次俾咗部 Ray 我，其實之前喺街見到呢部車已經覺得好核突，估唔到自己有機會揸！
我個人覺得，呢部車襯呢隻色已經係最靚......
下一站係「駱山公園(梨花洞壁畫村)」
車就泊駱山公園，但其實目的就係去梨花洞壁畫村~
上山時見到呢個標誌，幾有趣~
上到停車場，個閘開咗，但係冇人，車場內一架車都冇，其實係咪唔駛錢泊車嘅呢？
唔理咁多，冇欄住就照入~
泊好車就喺村入面周圍行，冇地圖，冇目標，總之就係咁行~
私家車嘅天線~
喺村入面發生咗一件幾驚險嘅事~
有部小貨車，倒車時冇望清楚，車後有個女仔佢唔知，個女仔又背住部貨車影緊相，嗰刻我唔知嗌 STOP 好定嗌小心好，情急之下總之就大聲發音，自己發咗咩音都唔知~
我一手大力拍部貨車車尾，一手就想話拉開個女仔，不過由於我前一秒已經大叫咗一聲，個女仔其實都已經意識到有事發生，我唔需要掂到佢，佢已經閃避緊部貨車，其實部貨車尾已經掂到個女仔件外套，真係隨時撞低佢~
而部貨車喺我大力拍打車尾時已經慢咗落嚟，慢咗先停，並唔係即刻停~
個女仔向我講咗幾聲謝謝(普通話)，司機見個女仔行開咗就繼續倒後，冇表示甚麼~
喺村入面發生咗一件小趣事~
有四五個女仔喺一條有圖畫嘅樓梯度影緊相，不時互換姿勢、人物，自然花咗唔少時間，到後來佢叫我哋幫佢影張全體相，完事後又連聲道謝，之後就刻意走在一邊，我意識到佢係讓位俾我哋影相~
好嘞，我哋自然趁呢個機會影多幾張，不過我哋只係影條樓梯，影景，相中並沒有任何人物(我哋)
嗰幾個女仔當中有人話：噢，他們是專業的！(普通話)
我手持一部普通傻瓜機，真係想即刻收埋行開......
其實，淨影景又唔一定係專業攝影師嘅專利嘅......
攞車時，閘已落，有人喺收費亭，結果泊車係要俾錢嘅~
下一站係「草莓樂園」
草莓樂園，其實都唔知係咩地方嚟，佢喺一個大園區入面嘅一個地方，呢個園區入面有唔同嘅區域，總之就好似冇主題，有唔同嘅嘢喺同一個園區入面~
本來都掙扎嚟唔嚟好，雖然屎塔有話想嚟，但其實呢個地方都幾偏遠，偏遠到西北方嘅邊境咁滯，而且整個西北邊，係好少景點(於我而言)，如果淨係為咗呢個地方而嚟，淨車程以來回計，會白白冇咗兩個幾鐘~
兩個幾鐘車程，就係為咗呢個地方？
儘管我興趣唔大，但屎塔有興趣嘅，我一定會盡量安排~
幸好附近仲有普羅旺斯村，叫做順路啲啦~
差唔多到達時，仲見到軍車同軍人，真係好近邊境喔~
嚟到草莓樂園外嘅大園區，睇吓個園區地圖，我哋三個分別都睇過個地圖，完全搵唔到草莓樂園喺邊(我已經有草莓樂園嘅韓文名)，我開始懷疑係咪去錯咗地方，因為呢度有點荒蕪，感覺有點沙漠感~
不過如果話係去錯咗地方，我又堅信唔係，做功課 plan 行程時，喺地圖睇呢邊嘅園區地形都睇到好有印象，園區我一定冇去錯，只差草莓樂園係咪仲存在姐~
但我又死唔信冇咗，最主要因為功課係我做嘅，佢嘅官網我都上過幾十次，係有嘢更新過，唔會無啦啦冇咗！
我非常細心小心咁去搵，皇天不負有心人，終於俾我搵到！
原來佢啲韓文字款好特別，基本上唔細心睇，啲字同我功課上面啲字係好唔同，所以睇漏咗眼~
而我亦唔係喺呢啲變咗種嘅字款當中睇得出，我只係喺水牌當中，逐個字逐個字逐個認識......咁去對，對應返個數字代號就搵到~
行到去草莓樂園，係就係有好多大大小小唔同嘅草莓造型公仔，不過呢度真係有點荒廢 feel，可以改名做草莓荒廢樂園......
但係，佢又荒廢唔晒，呢度有三層，其中有一間小商店售賣草莓樂園嘅產品，上一層有類似幼稚園嘅幼兒中心，入面有二十多個著住校服嘅小朋友，咁當然仲有幾個教師啦~
不過三層地方裡面，最少九成嘅舖頭係冇開嘅，連電梯都冇開......
喺度看似冇咩好做，又唔知呢度究竟係做乜嘢嘅，不過嚟影吓相都幾好~
園區內隨影~
下一站係「普羅旺斯村」
嚟普羅旺斯村，被名字吸引係其一，環境係其二，但最底蘊嘅原因，可能係橫掂都去草莓樂園，搭多個普羅旺斯村，咁呢趟西北之旅就算係充實一點~
普羅旺斯村原來好細，而且全部都係商店，賣手造肥皂還好，賣衫？山長水遠嚟到行 boutique？唔係卦！
地方細、太商業、環境不如想像般優美，其實我哋對呢個景點幾失望~
土耳其雪糕，其實質感幾得意，我絕對有興趣再食，不過買到手之前要俾人玩，我就覺得好無謂，其實好趕客，所以我都冇買到~
原來呢度都係「來自星星的你」嘅取景地，嚟到先知~
下一站係「名品石鍋雪濃湯」
做功課時，唔知呢日 lunch 食乜，本來諗住冇選擇就隨心食，後來喺地圖度見到雪濃湯呢幾個字，所以就記低咗，一於嚟試吓，反正今次旅程冇機會飲雪濃湯~
喺 GPS 輸入資料時，GPS 搵唔到相關資料，無論用電話定地址都冇，咁冇計啦，唯有用自己嘅 offline map 去搵啦~
不過呢頭太偏遠嘅關係，個 offline map 都唔係好指細，我只能去到附近再自己搵~
開住部車兜吓，附近環境真係好熟，我相信我哋已經到咗間舖頭附近，不過就硬係唔見間嘢~
行行吓見到停車場，算啦，泊低部車，一邊行一邊搵，搵唔到都可以慢慢睇吓附近有咩食~
行吓行吓，越行越對路，似喇似喇，係呢條街喇，再行落啲，係喇係喇，同 google map 街景一模一樣喇，再行再行，哼，終於俾我搵到！
再睇返，電話號碼冇錯，只係個 GPS 嘅資料庫冇佢資料~
喺呢啲偏遠地方，有晒心理準備溝通唔到，亂叫嘢食~
我有雪濃湯嘅韓文名，嚟到對一對 menu，唔難搵到想叫嘅嘢，不過，menu 上唔只一項有呢幾個韓文字......
於是我就俾呢幾個韓文字個職員睇，佢又唔係好聽得明我哋講咩，我哋都諗住算，樣樣叫啲梗會中~
跟住個職員行開咗，由另一個職員嚟幫我哋點餐，可能怕鬼咗我哋~
另外嗰個職員一開口，咦，講普通話嘅！咁就掂啦！
佢同我哋講，有一項係「牛肉雪濃湯」，有一項係「牛排雪濃湯」，是旦啦，要晒佢啦！
前菜就唔少得泡菜啦，嘩，啲泡菜勁大棵，所以佢都有提供剪刀俾我哋~
牛肉雪濃湯，味道比想像中淡，不過幾清甜，好味道！
牛排雪濃湯，味道較濃，牛排即係排骨，整體不错~
下一站係「小法國村(小王子村)」
認識小法國村，係因為「來自星星的你」，屎塔指定要嚟，不過佢純粹因為覺得呢度靚，而唔係因為套劇~
去小法國村嘅路上，好孤獨又好無助~
車上嘅乘客瞓晒，孤獨~
行高速公路冇人幫手睇 GPS，無助~
其實行高速公路，GPS 個指標有一定延遲，而且資訊會比較多，車速亦高，實在係睇唔切所有資訊，好容易就錯，出錯出口~
我就係咁樣，出錯咗幾次路口~
離開咗高速公路，開始向山上進發，我哋都好懷疑，究竟係咪行錯路~
一路上山一架車都冇，而且仲係啲小山路，不過都係嗰句，唔信 GPS，仲有其他方法咩？死跟啦~
再一次証明，其實 GPS 都幾可靠嘅~
不過因為之前行錯咗幾次，最後比原定用多咗一個鐘先到小法國村~
小法國村呢度，比普羅旺斯村靚得多，亦冇咗嗰份商業味，呢啲先係我哋想去嘅地方~
呢度仲有可供住宿嘅地方，而喺呢度住有一個優勢，係一般遊人冇得享用嘅，就係夜晚開咗燈嘅景色，因為呢度夜晚係不對外開放的，只供住客~
不過住一晚唔平呀，所以我哋都冇諗過喺度住~
下一站係「江原道平昌郡大關嶺市」
去呢個市其實係去訂咗嘅酒店，主要係方便聽日朝早嘅行程~
呢次車程真係夠晒刺激！
由小法國村去大關嶺，唔行錯路都要兩個半鐘，我咁樣講得，自然係行錯咗唔少路啦！
由於經歷過下午數次行錯路嘅經驗，車上兩位乘客都盡量唔瞓，幫手睇 GPS，儘管係咁，仍然有出現行錯路嘅情況~
少少錯路不值一提，不過有一次，直情衝埋繳費閘，真係離晒大譜！
事源喺高速公路行緊，GPS 提示就嚟要離開高速公路，車上兩位乘客都有俾意見，但其實佢哋都以猶豫嘅語氣話好似唔係嚟緊呢個出口出~
由於佢哋之前都提錯過(我都有錯過)，所以今次我唔信佢哋，自以為是，自把自為，結果自作自受！
我出咗呢個錯嘅出口，落到底，係繳費亭，不過呢個繳費亭係冇人嘅，只有自動繳費，但我又冇申請，咁點算呢？
我落咗車，睇吓有冇啲咩可以做，我見到有個掣，疑似可以搵人對話，我深知言語上未必溝通得到，但都要試試~
結果係撳極都冇回應~
同車有人有個好邪惡嘅想法，呢個想法邪惡到佢自己講完都縮，我就更加係唔同意，絕對唔會咁做~
其實當下真係冇想辦法，一係退一係去，咁梗係去啦，一過個亭就有警告嘅響聲，我停咗一陣，冇事發生，咁冇計啦，只好繼續去~
過咗呢關，望望 GPS，嘩，路程加多咗成個鐘！而且眼前可見嘅都係小路，雖然頭頂係高速公路，不過車程要多成個鐘，我就幾肯定佢唔會帶返我上高速公路......
我真係唔希望呢件事係真嘅......
一路行一路行，唔係小路就係山路，暗到不得了，上落山次數分分鐘有七八次，每次都唔係上少少斜咁，係真正嘅上山，不停上斜，又不停落斜，除咗途經啲小鎮，沿途都好少車~
好彩最終都安全到達，成程車用咗超過三個半鐘，上次喺台灣揸四個鐘都冇咁刺激！
到咗酒店門口，我哋都大叫「格箍yen」(只有我哋三個先會明)
酒店門口有啲停車格，我就將部車泊咗入去，門口有個女人望吓望吓，我相信佢極期望我哋就係佢等緊嘅人~
我哋相認之後，就問吓佢部車係咪可以就咁泊喺度，佢話係，咁就好囉，夠晒方便~
呢間酒店嘅房超大，一廳一房，另有洗手間同浴室，個廳勉強夠兩個人一齊玩呼拉圈！
卸下行裝，出去食嘢喇~
下一站係「VONS 炸雞店」
原本我計劃好食「紫菜包飯天國」嘅，雖然遲咗嚟，但以我睇過嘅資料，仍然未過閂門時間，但會唔會到咗 last order 時間就唔清楚，就行過去睇睇~
行到過去，已經閂咗門......
究竟係我做啲功課唔可靠，但係網上面啲資料錯呢？唉，唔深究啦，少事嚟，咪食其他嘢囉~
不過望吓成條街，多數舖頭都閂咗門，唯獨有間 cafe 未閂，就走入去睇吓，點知除咗現成售賣嘅蛋糕之類嘅食品，就再冇其他嘢食~
一路再行落去，過咗迴旋處，成條黑暗嘅街，有一間舖頭有燈光，原來係炸雞店，喺冇選擇嘅情況吓，有炸食都算唔錯，好過食蛋糕仔吖~
入到去，有個外型幾唔錯嘅男仔招呼我哋，我哋就揀咗炸雞同燒肋骨~
我刻意提起呢個男仔，係因為佢實在太能夠引人注意，外型係唔錯，但可惜舉止有點 over，佢每一個動作都以「型」行先，連行步路都扮嘢過人~
佢拎支支裝汽水俾我哋時，就好有型咁喺檯與檯之間(卡位)嘅高屏風撞一吓，撞開個汽水蓋，再有好型咁放喺我哋檯面，上餐亦如是~
每一吓動作都耍帥，實在太超過喇，型都變唔型啦，唉~
講返食物，炸雞，比我哋喺濟州食嘅出色，炸得夠香脆，好味~
燒肋骨，非常不錯，不過始終係用燒汁整嘅，食得多難免有點膩~
食完嘢就行返酒店，完結今日行程~
沒有留言:
發佈留言