《瞬間看地球》Stranger's Blog: 2014.01.20 沖繩本島 (日本第六天)

今日行程：
海中道路 → 仲原遺跡 → 海中道路 → 嘉数高台公園 → 首里城跡 → 山城饅頭 → 玉陵 → 富久屋 → 識名園 → 知念岬 → 齋場御嶽 → ニライカナイ橋 → 猫　も遊べ喫茶店　毛玉 → 八重瀬公園

今日第一站係「海中道路」
唔知點解橋中間會成為一個景點，睇人影嘅相又個個都唔同，不過是旦啦，反正去仲原遺跡都要過呢條橋~

出發前睇過好多資料，話橋上面其實係唔俾停車嘅，但又會有好多人停車，只要停埋一邊就可以咁話~
去到睇情況啦，真係多人停嘅，咪停埋一份囉，冇咩人停嘅，就最好唔好咁做喇，我覺得......

去到海中道路，都唔見有車停埋一邊，一路行一路行，掛住談心，都冇影到相......
冇喺橋中間停埋一邊，但就見到有個牌指住「海中道路公園」(唔太記得係咪呢個名)，我哋就扭入去停低~

一邊係馬路，另一邊，自然係大海~

由於冇喺橋中心影過相，我哋打算去完仲原遺跡，返轉頭時過埋條橋再返轉頭，頂多只係用多十數分鐘~

下一站係「仲原遺跡」
古人嘅住所，據說有 2000~2500 年歷史的~

仲原遺跡位於伊計島，由海中道路去，睇地圖就唔算太遠，但其實行落都幾遠，好似行極都未到咁~

根據現場嘅說明，呢度應該有 22 間屋仔嘅，不過到而家就只剩幾間，有啲有頂，有啲冇頂嘅，咁我相信而家冇頂嘅，以前係有嘅~

喺度都逗留咗相當嘅時間，一來對呢度嘅遺跡幾有興趣，二來呢度都幾舒服~

下一站又係「海中道路」

勉強叫做影到「海中道路」的感覺吧~

又入返嗰個海中道路公園，去吓洗手間又周圍行咗陣~

附近就係「海の駅あやはし館」，不過興趣唔大，就冇刻意走過去喇~

下一站係「嘉数高台公園」
喺呢度又係可以眺望戰機升降，希望今日見到啦~

嚟到嘉数高台公園，一個泊車位都冇，其實又唔係冇，不過嗰啲位似係人哋啲私人位，唔係好敢泊，唯有等一陣，屎塔就自己上去遊覽吓先~
等咗十分鐘到就有位~

Well......等咗好一段時間，同噚日一樣，唔好話戰機升降，就連搵架會郁嘅戰機睇吓都冇......
算吧，睇嚟冇咩緣喇~

塔上外望~

附近仲有啲塔~

仲有「弾痕の塀」

之前提過話嚟到冇位，而家就變多咗十幾個位出嚟......
用得個「變」字，就梗係唔係因為有十多架車走咗啦~
交代吓現場環境先，現場係一排 L 位，背面係牆，前方係一小片空地，我走嘅時候就見到前方小空地有三架車以 L 位咁泊喺之前嗰排車嘅前方(我嚟時係冇呢三架車)，但就留有一定空間，唔會阻住人出車嘅~
我之前嚟到，又真係冇諗過可以咁樣泊，但其實有諗過都唔敢啦，好似亂咁泊咁......

下一站係「首里城跡」
琉球王國嘅象徵，一定要嚟拜訪吓，同埋會去埋收費區域~

嚟到停車場，兩小時泊車費為 310 円~
其實每次見到呢 310 円，心中都充滿疑問，個數咁伶仃，究竟係點嚟嘅呢？
咁當然唔會去深究啦~

首里城入面，有唔少有標誌性嘅地方可以參觀，不過對於好多遊客嚟講，可能只係經過見到，影張相咁就過咗~
而我哋，亦都係一個好典型嘅「好多遊客」，不過都大概知道邊度打邊度嘅，下面就講啲比較重點嘅地方~

泊好車，穿過遊客服務中心出返大街，首先到達嘅係「守禮門」

再嚟就係「園比屋武御嶽石門」
唔......出發前我係有睇過佢嘅歷史嘅，世界遺產嘛，但係坦白講，過目即忘，所以嚟到現場都冇咩想像空間......

再落就係歡會門~

之後醒起側邊仲有啲地方，可以去咗先，所以我哋就行返轉頭，行去「龍潭」
不過落龍潭嘅地方有人吊緊嘢，我哋等咗五分鐘先可以落去，期間啲工作人員都有同我哋講「すみません」，其實我哋一啲都唔介意，等一陣啫~

落到龍潭，唔......我又覺得唔駛繞場一周嘅，行咗一百米到就冇行喇~

上返去就到「弁財天堂」

行過啲就係「円覚寺」，不過不對開放的~

行返轉頭，穿過「久慶門」去返中心部份~

穿過咗久慶門，見到有個保安，佢拍一拍我膊頭，問我：Chinese？
嘩，咩事呀，答唔答你好......

講吓啫，梗係答係 YES 啦，原來，有個大陸阿嬸離咗團，迷了路，有啲徬徨，想睇吓我哋幫唔幫到佢啫~
經過幾句溝通，我哋當然唔係神仙，唔會知佢啲團友喺邊啦，不過知道佢係搭旅遊巴嚟嘅，我哋叫佢行返去旅遊巴停泊嘅地方等，咁就最安全，但咁就可能錯失咗遊覽首里城跡嘅機會了，咁都冇計咖~

期間佢不下五次，指住前方(正殿方向)，問嗰度有冇出口~
其實我哋都係第一次嚟，而且都只係行咗一陣，著實唔係太清楚，我哋唯有根據地圖，話俾佢知冇，反正呢度(地圖所顯示)得一個停泊旅遊巴嘅地方，我唔覺得會唔喺嗰度囉~

我哋好努力咁教佢點行點行，不過我知道佢冇留心聽，佢仍然覺得前方有出口，無論我哋點同佢講，佢都係一副極之猶豫嘅面孔，我哋可以講嘅都講晒，換嚟一句：前方會不會有出口？
我諗緊用粗口鬧佢定直情扯佢一巴好，結果梗係再次話佢知沒有然後走人啦~
真真正正冇你咁好氣！

轉身想繼續行時，又俾個保安截住，得喇，你想唔該我哋嘛，小事嚟啫~
但係其實佢想問我哋有冇門票......
因為我哋諗住行前去嗰度，原來係收費區嘅出口嚟......

咁我哋唯有行第二邊，途經「龍樋」

「瑞泉門」

「漏刻門」

跟住就到咗收費區對開嘅空地~

喺購票機度買咗飛就入去收費區喇~
入咗收費區，最吸晴嘅，梗係「正殿」啦，但其實又唔係靚得咁緊要嘅，吸引在有歷史背景吧~

本身我都唔知收費區仲有咩睇，不過我又覺得唔會收你 800 円，淨係得個正殿外貎睇~
原來仲可以入埋「書院‧鎖之間」

呢個世界真係細，我竟然喺書院‧鎖之間，見到我同事 Mink！
見到對方時，大家都呆咗半秒，好似唔係好相信咁~
傾咗幾句就繼續行程~

行完書院‧鎖之間，就到「北殿」

行完北殿就算係行完個收費區，喺先前差啲誤闖收費區度離開~

不過喺呢度嘅行程仲未完咖，仲有「金城町石疊道」
其實行去呢條石疊道都遠，又唔知有幾長，不過又唔一定要行晒嘅~

途中經過雪糕店，又買咗杯雪糕食，不過今次就唔知咩味，全日文嘅~
不過其實咩味都好，點都唔及得上北海道嘅雪糕，喺我哋食過嘅雪糕入面，北海道嘅雪糕係最無敵嘅~

終於都到嘞，行到覺得夠就折返~

下一站係「山城饅頭」
山城饅頭係首里嘅名物，饅頭內係紅豆餡，有百多年歷史，曾一度結業，至數年前再次營業~
我見試過嘅人都讚好，睇樣亦都相當不錯，所以決定一試~

山城饅頭距首里城不到十分鐘步程，而且位於大街，冇地方停車的，步行過去就最方便~
好快就搵到間舖頭，亦都好快由期待變成失望，再變成自責......

嚟到門口，大大隻字寫住：定休日
吓？我出發前對晒所有會去嘅地方嘅定休日，避開晒咖喎！
唔通佢個定休日改咗？一定係！
我再睇返自己記低嘅資料，資料顯示逢星期一為例休日~
星期一星期一，其實去旅行好多時都唔知當日係星期幾，呢刻我梗係唔想今日係星期一啦，係嘅話即係我自己疏忽嘛~
唉，不想承認亦必需承認，係我疏忽，星期一例休仲計劃星期一去，唉......
不過咁，諗返轉頭，就算出發前已經發現都好，其實成個行程都幾難掉，我諗我都唔會為咗山城饅頭而夾硬掉行程的~

呢張相係從網路上轉載過嚟嘅~

山城饅頭呢頭似係有錢人地方，環境同其他地方好唔同的~

下一站係「玉陵」
玉陵係琉球王國第二尚氏歷代皇室之墓，以開鑿岩壁而建成~

由山城饅頭，行條小路就到~

嚟到玉陵，啱啱走咗班學生，到我哋入去嘅時候，一個遊人都冇~
先入博物館~

再走到玉陵~
進入玉陵嘅呢度門特別矮，或許，用意在於要進入嘅人都恭敬咁低頭進入吧，唔知我有冇估錯呢？

玉陵~

雖然入場係要收費，亦當然唔可以入到墓穴之內，但我仍然覺得很值得一看，原因我就講唔出嘞~

下一站係「富久屋」
據旅遊書講，富久屋係好多本地人同西方人士都會嚟嘅食店，值得推介嘅係佢跟餐嘅豆腐，不過分分鐘要等半小時先有位咁話~

去完山城饅頭同玉陵，其實部車仲喺首里城，而富久屋亦都係步行可達，不過，佢有自己專屬嘅停車位，為咗方便食完就開車走人，更因為可以揸車走吓啲來回車輛擦肩而過嘅橫街窄巷，所以我都係決定揸車過富久屋~

嚟到富久屋對開嘅停車場，只剩一個空車位，我猶豫緊泊唔泊入去好~
因為眼見除咗富久屋，四圍都係住宅，我怕泊咗人哋個車位~
唔......又冇人可以俾我問，又啱啱有車走咗，我覺得都可以泊吓，於是我就泊咗入去~

泊好之後落車鎖埋車，有部車又駛走，有個女人喺二樓嘅露台係咁同我講嘢，我當然聽唔明，不過睇手勢就知佢叫我泊過去啱啱走咗嗰部車個位度~
咁嘅情況梗係照做啦，當我駛到去嗰個位嘅時候，見到地下有個富久屋嘅牌，咁當然，泊咗車之後就睇唔到嘅~
我泊好車就八卦周圍裝吓，原來只有幾個車位係富久屋嘅，咁我哋都算幾好彩......

富久屋~

入到去真係滿座，不過有一檯都應該準備走，等咗幾分鐘就有位~
呢度嘅座位一律都係塌塌米，雖然我唔鍾意坐，但其實幾有味道~

跟旅遊書咁講，叫咗兩個定食~
沖繩そば定食
沖繩そば著實唔係咩特別嘅美食，其實幾普通，不過我自己就百吃不厭~
呢度嘅沖繩そば不比其他食過嘅出色，但可以話一樣咁好食~

むじぬけ定食
根據旅遊書講，係豬腳嚟，雖然嚟到唔係，不過為免溝通困難，算吧，反正唔排除係旅遊書錯~
(跟餐嘅嘢一樣的)

跟餐嘅幾碟嘢，值得一提嘅係個芋物，幾好食，好香，不過一定要趁熱食先好食~
一定要提嘅係個豆腐，質感特別，似豆腐造嘅啫喱，但質感比啫喱更黏更彈，怪怪的，顏色白得有點過份，一少啖放入口，極香嘅豆味，而且冇乜甜味，我自己就很喜歡，很喜歡，足令我禁不住停下所有動作慢慢享受！

食食吓嘢仲有個似係啱啱識行嘅 BB 女行過嚟我度，哈哈，佢屋企人梗係嗱嗱聲執返佢過去同埋同我哋講唔好意思啦~

下一站係「識名園」
識名園係古時皇室作為休憩同接待外國使臣而建嘅，設計混合咗中、日嘅建築風格~

作為一個普通遊客，實在唔會有幾大嘅感受，只能當作係一個有歷史背景嘅公園去欣賞~

呢度有一棵櫻花，唯一一棵~

作為世界遺產，呢度啲水質其實都幾差~

下一站係「知念岬」
又係睇風景嘅地方~

駛入知念岬停車場，要好小心先得，因為停車場有啲貓喺度漫步~
泊好車就梗係玩吓貓啦~
呢度啲貓唔算太怕人，但又絕對唔痴人，你想摸吓佢都唔係咁易~

收埋晒啲手腳，成舊貓雲咁~

檔口主人拎咗啲嘢出嚟食，啲貓即時行晒埋去~

玩完貓就走落個公園度，不過呢度風景只屬一般~

遙望「ニライカナイ橋」

睇完風景又玩咗陣貓先捨得離開~

下一站係「齋場御嶽」
咁多本書介紹嘅齋場御嶽，主要都係嗰張相，本來都諗住唔嚟，不過去開知念岬，反正好近，就去睇吓~

出發前已經知道齋場御嶽嘅停車場已經不對外開放，不過我仍然會揸過去睇吓~
果然，通往齋場御嶽嘅路已經封咗，現場有人看守，可能只係俾職員同附近居民內進吧~

知道附近仲有個停車場，於是就泊咗過去，其實呢個停車場而家已經係齋場御嶽嘅俾遊客用嘅官方停車場，因為呢度有售票處，仲有圖教埋你點行去齋場御嶽~
只係......行去齋場御嶽要成五百米！

呢個位真係弔詭，又話呢度係入口，又話喺 500m 外......

沿途經過見到隻貓，呢隻貓見到我哋好似見到主人咁，我哋一蹲下，佢即刻擒上我哋度(分別都擒過上我同屎塔身)~
呢個時候有班年輕日本人，由於附近有圍牆，佢只望到我哋個頭，唔知佢哋會唔會以為我哋隨街方便緊......

其實都唔係好捨得走，不過都冇計咖，好唔忍心咁放低咗佢，繼續向齋場御嶽進發~

行到去齋場御嶽，買飛入場，首先要聽個講座(短片)，入到去又見返嗰班年青人，由進入到坐低呢段好短嘅時間，我倆都被成班人打量過~
睇完短片就真正遊覽齋場御嶽~

不過跟住呢班年青人行，有點煩厭~
齋場御嶽絕對係一個非常神聖嘅地方，現場就只有呢班年青人同我倆，佢哋沿途都高談闊論、喧鬧，完全將齋場御嶽地靈人傑嘅氣氛徹底破壞！
唔單止係咁，每逢去到一啲場內嘅重點位置，都裝模作樣，成班人嘻嘻哈哈，笑住扮打座、唸經！
之前嘅高談闊論，極其量只可以話佢唔尊重，但做埋啲咁嘅行為，絕對係褻瀆神明！
我真係覺得佢哋好過份，我唔明點解佢哋要入場參觀，為乜？

為咗避開呢班討厭嘅人，行到去分岔路口，我哋就走去另一邊先，返轉頭先行返佢哋行嗰段~
其中四個重要場所~

不過可惜吖，我哋行完呢邊分岔路再返轉頭行返入大路，見到佢哋仲喺度玩緊，一直跟佢哋去到最神聖嘅地方，亦即係本本旅遊書都用嗰個地方做介紹嘅地方~
我哋等呢班人玩夠走人先去遊覽~
呢度就係成個齋場御嶽最神聖嘅地方~
齋場御嶽呢度，一入場就已經好清涼，呢種清涼嘅感覺，嚟到最神聖嘅部份就更覺明顯~

艦砲穴~

原先覺得齋場御嶽冇咩睇，所以唔諗住嚟，嚟到都可以話的確又真係冇咩睇，不過我又真係因為我有入過嚟而高興，我都唔知點解~

睇完齋場御嶽，行返去攞車，又見到嗰隻貓，仍然係咁熱情，陪咗佢一陣就行返去停車場，買咗少少天婦羅~
拎住啲天婦羅，搵咗個有景嘅地方坐低食，不過食物嘅質素好一般，又唔熱~

下一站係「ニライカナイ橋」
覺得呢條 U 型嘅橋好靚，再加上沖繩嘅風景，美！

本來嘅計劃冇諗過要揸車行呢條橋嘅，只係諗住從高處賞景，不過 GPS 就帶我行咗呢條路，置身其中，感覺愉快~

U 型橋嘅末端有座小橋，觀景嘅地方就喺小橋上面~

小橋嘅左右方都有路上，不過有欄杆封住，車輛上不到的，放好部車就行上去~

Well......睇人哋嘅相真係靚得令人陶醉，可恨天色差，又已近黃昏，大打折扣~

呢張相係從網路上轉載過嚟嘅，咁先似樣咖嘛~

下一站係「猫　も遊べ喫茶店　毛玉」
貓 Cafe，唔知多唔多貓呢~~~

其實本來個計劃，睇完橋，仲有三個小城跡去嘅，不過之前掛住玩貓，玩到過晒時間，所以就冇時間去嗰三個小城跡~
唔緊要，早啲去貓 Cafe 玩吓貓都好~

呢間嘢叫「猫　も遊べ喫茶店　毛玉」，不過我所有嘅資料都刻意打成「遊べ喫茶店」，因為屎塔唔知道有一個貓 Cafe 嘅景點，算係俾個小小驚喜佢~
由於係玩驚喜，所以我非常渴望呢間嘢仲存在、存在之餘要營業中、營業中之餘要有貓、有貓之餘最好多貓、多貓之餘最好......
我知我真係好鬼貪心，我唔單只想俾個驚喜屎塔，同時都因為我自己都鍾意貓~

駕車中途，屎塔問我，呢間嘢食咩咖？
突如其來嘅一問，我都唔知點答好，雖然係 Cafe，我都冇理由答因為甜品好食，因為我倆都唔好甜嘢嘅~
我只好裝作自然，答佢唔記得，因為係幾個月前計劃落會去嘅~
幸好，佢冇再追問......

泊好車，見到個招牌，「存在」嘅願望達成！(此時屎塔一臉疑惑~)

跟住見到樓梯寫住商い中，「營業中」嘅願望達成！
而且又寫住 12 匹の貓，「多貓」嘅願望達成！
(其實本來我心裡面諗住有五六隻已經好正！)
(屎塔仲未發現呢間係貓 Cafe，可能佢以為只係以貓做主題嘅 Cafe，同埋可能佢冇留意 12 匹呢幾個字~)

上樓梯後按鐘，有個男人開門，門後仲有一度門，再進入前要用消毒液洗手~
開埋呢度門，嘩！我係咪發緊夢！痴線，成屋都係貓，環境完全係人哋屋企嚟，而且一個客都冇，意味住所有貓都係屬於我哋嘅！(此時屎塔先知係貓 Cafe，開心死佢！)
咁多隻貓，真係有種萬千寵愛在一身嘅感覺，儘量啲貓冇咩點理我哋......

入到屋入面，老闆介紹有啲咩食，仲話俾我哋知有最低消費，都啱嘅，個個嚟飲杯嘢跟住淨係玩貓真係搞唔掂~
叫完嘢食，卸下行裝，急不及待要去玩貓！

呢十二隻貓，其實有差唔多一半都只係掛住瞓，其餘嘅就唔算太熱情，但總括嚟講，當中有十一隻都唔怕人嘅~
唯獨有一隻，對我哋好奇，但又帶點害怕，想靠近我哋，但又總保持距離~

我趁有一個機會，佢靠得好埋，可以話掂到咁滯，我不動聲色，隔咗一陣，佢稍為退後，我覺得我可以做少少主動~
我以極慢嘅速度，手放檯面，慢慢伸手靠向佢，一路靠近佢，一路留意佢嘅眼神，初時都 OK，差唔多掂到佢時，佢突然出抓，抓咗我一吓，跟住即刻往後跑~
唉，任務失敗！

屋主仲好有心咁整咗啲空中走廊俾啲貓走嚟走去，咁當然，超肥嗰啲就冇份玩啦~

至於食物，不過不失，唔係特別精彩，還可以的~

喺食緊嘢嘅時候，有三隻貓陪我哋食~
有一隻一開始已經爬咗上屎塔大髀，痴人到不得了，一直到屎塔食完嘢都唔冇走開~
有一隻係咁喺我哋附近徘徊，行嚟行去，唔知做乜~
有一隻超為食，成日想食我食緊嘅嘢，我哋叫咗件芝士蛋糕，碟上面有啲 crean，呢隻貓見到啲 cream 更顯進取，老闆同我哋講佢好鍾意食 cream 的~

貓 Cafe 雜影~

總共玩咗兩個鐘，期間老闆成日有意無意咁觀察我哋，我明嘅，佢又唔識我哋，點知我哋點對啲貓~
呢兩個鐘真係好開心，真係好唔捨得走，不過唔走唔得，人哋就嚟收工喇~

下一站係「八重瀬公園」
呢個公園係南部比較有名嘅賞櫻場所，咁夜先嚟呢個公園，係為咗嚟睇晚燈~

嚟到現場，好暗，見到有條樓梯，可能上到頂先有燈睇卦~
成條樓梯嘅地方都有燈，希望晚燈唔係指呢啲啦，否則就真係嘥氣~