2015 韓國 - 事前準備

對韓國嘅感覺，普普通通，可以話係冇乜感覺，唔會想去，但又唔抗拒~
其實我十幾年前係去過韓國嘅，不過當時嘅韓國同而家比，肯定好唔同，而且當時又係跟團，真係去過邊都唔記得，淨係記得啲好零碎嘅片段~


同屎塔去旅行，絕少諗起韓國，但又唔係冇，至少諗起過一次，想去韓國賞櫻或者賞楓，不過都只係停留喺講過吓嘅階段，冇認真考慮過~

本來諗住今年去奧捷匈嘅，不過 David 問我哋一齊去韓國好唔好，我都掙扎咗好一段時間先有答案~
去咗韓國，今年就去唔到奧捷匈；去旅行用錢用大假，係咪值得用喺我哋冇咩大興趣嘅韓國呢；屎塔係我嘅完美旅遊拍擋，但係拍 David 去，又夾唔夾到呢？
其實都有想去嘅理由嘅~
David 話想去韓國，我都聽咗幾年，一直都冇去，亦都冇人陪佢去，雖然佢可以自己跟團去，不過如果同我哋一齊去，相信可以去多啲地方，我都想滿足吓佢對遊韓嘅願望嘅~
唔好講到咁偉大，一味為人著想，自己呢？
我同屎塔自己就應該計劃十次旅程都未必會去韓國，何不趁呢次被動嘅機會，去一次韓國呢？
就係咁，就決定同 David 一齊去韓國，三人行~

開始做功課，頭都大埋，韓國唔同日本，冇乜漢字，想估都冇得估，啲網頁又唔係太多有中文或英文版本，諗住用 google translate 啦，但係又好多網頁用 flash，即係冇得翻譯......
最大鑊係我最依賴嘅 google maps，用 google maps 睇韓國地圖，街景覆蓋相對少，首爾以外就更少，而且冇得點到點咁教你行，冇得睇距離同時間，作用真係唔大~
最後用咗 daum map，好好多！

撞啱 HK Express 做 Promote，$1 單程，不過由於我太遲先知，只係訂到 $700 來回(未連稅)，都好啦，算平，有啲嘢冇得強求嘅~
買咗夜機去，凌晨機返，唔計機程，有足九日嘅時間玩~

最後嘅行程，雖然有啲夾硬嚟，不過有啲地方，今次唔去，都唔知幾時，甚至有冇機會再去~
其中一個夾硬去嘅地方，係甘川洞文化村~
為咗佢，我刻意走去釜山，但我停留喺釜山嘅時間只有大半日，即係話，我喺釜山只有一個行程，就係甘川洞文化村~
我個人對於啲唔同顏色嘅屋仔有啲"辟好"，記得睇過一個網頁，羅列晒全球比較出名嘅彩色屋仔嘅景點，甘川洞文化村係其中一個我當時以為自己冇機會會去嘅地方~
所以今次去韓國，盡可能我都會安排去甘川洞文化村，所以就砌咗個唔太合理嘅行程~

另一個好想去嘅景點係旌善鐵道自行車~
本身都想去踩吓鐵道自行車，我知道喺韓國比較出名嘅有三個，而最遠嘅係旌善~
都係啦，我今次會去江原道，可謂有今生冇來世，趁呢次機會去旌善呢個就最好~
不過呢，玩旌善呢個有啲困難，我嘅行程係星期六去，據講星期六日公眾假期呢啲時間，一車難求，最好預先訂定位~
問題係，官網只有韓文，又翻譯唔到，不過呢個都只係小問題，唔係冇可能解決，更大嘅問題係，要用韓國嘅信用卡俾錢......
諗都唔駛諗啦，我真係冇朋友喺韓國住~
但我仲未放棄，我嘗試咗好多方法，例如打電話、搵觀光公社幫手、搵幫人訂票嘅人幫手、上網搵人幫手、搵旌善嘅旅遊局幫手，通通不得要領~
其實我有個朋友喺工作上同韓國有密切關係，不過我知佢好忙，唔想麻煩佢，所以唔到冇晒辦法我都唔想搵佢幫手~
係，我真係冇晒辦法，所以都唯有搵吓佢，睇吓佢有冇咩辦法可以幫到我~
喺呢個朋友仲未覆我之前，屎塔有日收到封電郵，係由旌善鐵道自行車公司寄嚟嘅！
嘩，又會咁嘅？我哋覺得係其中一間機構/公司接到我哋嘅查詢後，轉介咗去旌善鐵道自行車公司，對方再接觸我哋，至於係邊間就唔知喇~
對方嘅電郵內容大致係話，可以幫我哋預訂，叫我哋提供預訂資料~
咁我哋梗係嗱嗱聲將啲資料回覆返俾人哋，仲問埋如果當日落雨咁仲開唔開，不過寄咗過去之後，就再冇消息，都唔知佢收唔收到......
唔理得咁多，聽天由命啦~

南怡島係我哋一定會去嘅地方，儘管我哋去嘅時間係咩都冇得睇，冇雪冇楓葉冇銀杏，甚至連綠葉都唔多，夾唔到好嘅時間去，都冇辦法~
特別拎南怡島出嚟講，其實我係想講個 Zip-wire~
有畏高嘅我，去玩 Zip-wire 可以話係一項壯舉，不過我又覺得機會難逢，而且我都有信心唔會有咩危險性，決定試吓！

喺食方便，韓國食物嘅種類真係多，而且好多都好吸引，屎塔仲落咗命令，盡可能計劃好每餐都有指定要去嘅餐廳，唔想到時隨心食而錯過盡嘗韓國美食嘅機會~

今次去韓國，概念上濟州一定會自駕，其他地方呢？真係冇咩概念，但至少我諗首爾唔會~
最後，除咗首爾同釜山，其他地方都會自駕~

之前去韓國，見識過韓國人揸車嘅風格，印象真係唔多好，不過都十幾年，希望而家好啲啦~
濟州我就唔太驚，話晒好多人去濟州都係自駕，京畿道同江原道呢，希望冇問題啦~

出發前定好嘅行程：
Day 01：Siloam 汗蒸幕 → 酒店(寄存行李) → 大使館找換店 → 一品香 → 德壽宮 → 明洞聖堂 → N 首爾塔 → 全州中央會館
(宿：K-Pop Hotel Seoul Station)

Day 02：濟州島 → KT(租車) → 民宿(寄存行李) → 神秘的道路 → 性愛樂園 → Hello Kitty Island → 산골숯불왕소금구이(豚肉燒肉店) → Seri World → 山君不離 → O-il 蔘雞湯
(宿：YEHA GuestHouse Branch City Hall)

Day 03：牛島(環島遊) → 韓星食堂 → 城山日出峰 → Maze Museum → 朴大監
(宿：YEHA GuestHouse Branch City Hall)

Day 04：KAL 酒店賭場 → 萬丈窟 → 茶喜然 → 表善日光海灘(尋找朋友介紹食肆) → 涉地可支 → 水上星球 → 那些年美味
(宿：YEHA GuestHouse Branch City Hall)

Day 05：KT(還車) → 釜山 → 松亭 → 釜山火車站(寄存行李) → 甘川洞文化村 → 釜山火車站(取回行李) → 首爾 → NOLBOO
(宿：24 Guesthouse Dongdaemun)

Day 06：Issac → KT(租車) → 梨花壁畫村 → 草莓樂園 → 普羅旺斯村 → 名品石鍋雪濃湯 → 小法國村 → 民宿(江原道) → 隨心晚餐
(宿：Goodstay Daegwlnyeong Sanbang)

Day 07：大關嶺羊群牧場 → 阿烏拉吉 → 九切里(旌善鐵道自行車) → Sky Walk → 阿拉里村 → 酒店(春川) → 優味雞排
(宿：Chuncheon Tourist Hotel)

Day 08：隨心早餐 → 南怡島 → 首爾 → 貓頭鷹博物館 → KT(還車) → 民宿(寄存行李) → Thanks Nature Café → 特麗愛 3D 美術館 → TOMS CAT → 清溪廣場 → 農門家
(宿：24 Guesthouse Dongdaemun)

Day 09：Issac → 北村韓屋村 → 大瓦房 → 雞蛋餅 → Remicone → 廣藏市場 → 學林茶館 → 貝類倉庫 → 東大門閒逛

出發！