三光稲荷神社 → 桃太郎神社 → トヨタ博物館 → Baby Face Planet's (午餐) → トヨタ產業技術記念館 → Oasis 21 → Sunshine Sakae (摩天輪) → 世界の山ちゃん (晚餐) → APA Hotel 名古屋栄北 (住宿)
今日起身，發覺喉嚨仲痛過噚日，不過又未去到要睇醫生咁嚴重~
噚日問過啲藥食後唔會有睡意，出門前食一次藥先~
落到樓下，見到有啲人喺度執緊嘢，先記得今朝有朝市，啱啱收檔~
今日第一站「三光稲荷神社」
計劃去呢度，係因為附近冇咩地方好去，而呢個神社，有心型嘅繪馬，叫做有啲特別，就嚟攝吓時間~
話附近冇咩地方好去，其實唔係，附近有頂頂大名嘅「犬山城」，不過維修當中，就決定唔去喇，下次有機會先~
我哋步行過去神社，行經木曾川，都幾靚，喺度漫步都幾舒服~
遠眺犬山城~
三光稲荷神社~
喺參觀神社期間，聽到好大嘅飛機聲，抬頭望吓，見到幾架戰機~
戰機飛行速度好快，眨吓眼就喺視線範圍內消失~
屎塔反應快先影到~
隔一陣又有，隔一陣又有，有時三架，有時兩架，有時一架~
最後仲見到唔知係咪空中加油~
行到返旅館附近，又有一架，不過呢架唔係戰機，冇窗，但機身有日本國徽~
下一站「桃太郎神社」
明知個神社冇乜特別，但唔去又心思思......
下一站「トヨタ博物館」
呢個博物館，主要係展示汽車由最初至現代嘅車型同設備嘅演變~
雖然博物館名叫「トヨタ」，但展示嘅車款係不限於 Toyota 的~
短短五十年間，汽車嘅發展真係好快~
再過五十年後，會演變成點樣呢？
「トヨタ博物館」同之前喺福井參觀過嘅「日本自動車博物館」有啲相似~
展示嘅都係呢幾十年間嘅車型演變，不過而家呢間所展示嘅車型，年代有更舊嘅，亦有更近代嘅~
而且呢間係闊落好多，行得舒服啲~
不過話分兩頭，日本自動車博物館嗰種排到密密麻麻，360°都係車車車嘅感覺都係好正，係你怎樣看都看不完嘅感覺，就好似小朋友進入波波池咁，一進入館內已經感到興奮~
行到尾段，見到有部老爺車，上面有個小朋友喺度係咁扭個軚盤......
我承認，第一下我係覺得點解會有人容許有咁嘅事發生？(老爺車要好好保護嘛)
再望真啲，原來呢度有兩部車係開放俾遊人自由坐上去感受吓嘅~
講起展品(車)要好好保護，遊覽途中聽到閂車門嘅聲音~
我向聲音來源望過去，原來喺遠處有個男人走去開某展覽車嘅車門~
現場係有好多不准觸摸嘅圖示，呢個男人嘅行為係好離譜~
有時唔係話企喺道德高地去睇事情，唔係話「老師，佢出界」咁樣~
而係古董車係要好有心去保養先可以保存咁耐，一般遊人係唔應該去觸碰，更莫講話開門閂門呢啲咁有撞擊嘅行為~
下一站「Baby Face Planet's (午餐)」
呢度係電子化落單，自己睇自己落單~
由於我哋唔識日文，呢度個菜單亦有別於一般餐廳，所以都花費咗唔少時間去理解~
最後我哋叫咗個套餐~
プレミアムセット(スープ&ドリンクバー デザート付)
Premium Set for 2 with Soup & Drink Bar and Dessert
餐包兩款前菜兩款主菜，湯及飲品無限自取，甜品兩個~
エビとサーモンの生春巻き
Shrimp and Salmon Summer Roll
ムール貝の ガーリックソース
Mussel in Garlic Sauce
明太とろろオムライス
Mentaiko and Pounded Yam Omu Rice
グリーンアスパラの ジェノベーゼピザ
Green Asparagus, Genovese Pizza
湯及飲品就喺呢度自己攞，無限添飲~
味道方面，全部都係正常味道，唔會話好好食，亦絕不突出，普普通通咁~
會唔會因為走健康路線，調味方面會比較輕手啲，保守啲呢？
食到尾就叫甜品~
我哋叫咗一杯生チョコパフェ(Ganache Partait / 朱古力雪糕)同ストロベリーマウンテン(Strawberry Mountain / 士多啤梨雪糕)~
落單後發現價錢貴咗，但係個餐明明包埋甜品咖喎~
再仔細篤吓部機，冇點錯吖......
直至侍者送上兩杯朱古力雪糕......
我諗我哋知咩事喇......
餐包嘅，應該係二人前，即係要同一款二人份~
我哋點咗兩款，佢就當咗係額外加單~
即係話，兩杯朱古力係餐包埋，兩杯士多啤梨係額外加單~
我哋同侍者講咗一輪，不過我哋唔識日文，佢哋唔識英文，真係溝通唔到，冇計~
於是我哋就試吓喺部機度取消額外加嘅雪糕，得就得，唔得都冇辦法，始終係自己唔識睇，問題不在人家~
喺機度可以取消，之後仲有侍者同我哋確認一次取消咗，非常好~
喉嚨痛雖然冇惡化，精神亦冇乜問題，但又唔想放任不管~
查到附近有藥店，就過去睇吓有冇咩啱~
其實我就心思思想買噚晚喺電視睇到嗰隻喉糖嘅，因為佢講明係有藥性，咁一定比普通潤喉糖有效~
不過喺藥店搵唔到，索性問吓人喉嚨痛食咩藥好啦~
對方介紹咗隻成藥俾我，我就順便問埋佢可唔可以同感冒藥一齊食~
不過佢好似唔識答我，咁就無謂勉強佢喇~
唔知可唔可以兩隻藥一齊食，所以買咗呢隻藥就唔食感冒藥喇~
下一站「トヨタ產業技術記念館」
紀念館主要係講豐田起家嘅紡織業同由零開始製造一部車同佢嘅發展史~
嚟到記念館，準備買入場券之時，我突然醒起，買「トヨタ博物館」+「トヨタ產業技術記念館」聯票，比起分開買票，每位平 300 円~
我買トヨタ博物館入場券時忘記了，咁就睇吓呢度俾唔俾我就咁補錢當買返聯票啦~
結果一如所料，係唔得嘅，兩個人就咁用多咗 600 円......
我自己嚟講，覺得呢個館比較沉悶......
跟住我哋就去 APA Hotel 名古屋栄北 (住宿)，最主要係想放低部車先~
我去到先知道，泊車係要俾錢嘅，仲要成 2000 円一晚，最遲聽朝 11:00 要攞車~
早知係咁，我會做吓功課先，睇吓附近泊邊度可以平啲，甚至可以泊到聽日完咗行程先攞車都得~
不過而家就梗係費時煩，泊咗先再諗聽日點算~
以我哋唔行街嘅人嚟講，附近都冇咩好做，就去吓地標之一， Oasis 21~
地標嚟講，附近仲有「名古屋テレビ塔」，不過現時維修當中，暫不開放~
下一站「Oasis 21」
我哋冇行商場，只係上咗頂層行吓~
下一站「Sunshine Sakae (摩天輪)」
都係冇行商場，只係去搭摩天輪~
呢個摩天輪嘅最高點唔算好高，附近亦多高嘅建築物，我估計上面個景應該冇咩好睇~
不過屎塔每次搭摩天輪都表現得興致勃勃，有冇景都好啦，照搭~
行去摩天輪時見到有藥店，又走入去睇吓搵唔搵到電視廣告嗰隻喉糖先~
搵咗一陣就搵到，同時我見到今朝買嘅成藥，下面有行字寫住可以與感冒藥一起服用，咁就得喇，今晚瞓前一齊啪！
個景真係......
下一站「世界の山ちゃん (晚餐)」
炸雞翼係名古屋名物，就試吓~
呢間餐廳其實香港都有，香港嗰間我就未食過，既然嚟到名古屋，梗係食返原創店~
幻の手羽先
雞翼真係好食，夠晒惹味！
除咗雞翼，真係冇嘢啱食，夾硬叫咗呢刻唔係好想食嘅咖哩~
山ちゃんカレー (山咖哩)
名古屋カレー (山咖哩+豬內臟)
可能真係唔對呢刻胃口，覺得唔好食~
食完嘢就行返旅館，完結今日行程~
沒有留言:
發佈留言