今日行程：
繼續閒逛 Luxembourg，比較重點嘅景點有 Musée National d'histoire et d'art(National Museum of Art and History)、Chemin de la Corniche 同埋 Musée National d'Histoire Naturelle(National Museum of Natural History)，完咗 Luxembourg 行程就搭火車過去比利時嘅 Brussel~
間房有一個窗，窗內有一塊網狀拉......幕(唔知可唔可以叫做拉幕)，拉幕底有個鈎~
但其實窗底至窗台都冇任何嘢可以扣住個鈎，即係如果唔自己想辦法，個拉幕係唔可以固定，會自己縮返上去，完全冇私隱可言~
其實就算拉咗落嚟，都唔知外面望唔望到入嚟，至少入面望到出去，但外面遠望入嚟可能視野會好差都唔定，總之就算拉咗都冇信心~
間房超級四正，要換衫，一係出去洗手間換，一係匿埋喺窗邊嘅角落換~
真係未試過住間咁冇私隱嘅房......
今日早餐食晒成條方包加沙甸魚，又幾好食~
朝早氣溫比較低，得十幾度，但晏晝應該好熱，真係唔想著外套出去，決定頂住朝早嘅低溫，唔著外套~
好衰唔衰，等車等咗 15 分鐘，仲有啲風，凍到死吓死吓......
搭完巴士，要行一段路先到 Ascenseur Panoramique du Pfaffenthal(Pfaffenthal Panoramic Elevator)~
呢條電梯，主要係連接崖上同崖下嘅地方，但設計上就有啲似觀光用途，可以話係實際與觀光兼備~
期間經過見到呢座嘢，又幾靚，google map 顯示佢係一間長者中心嚟~
通過呢條通道，行到接近盡頭嘅右邊係 lift，盡頭嘅上下左右同正前方都係玻璃~
我哋係喺崖上搭 lift 落崖下，通道上好大風，雖然太陽出咗嚟，但氣溫仲未上升，凍到想死，好掛住件外套......
部 lift 都幾大部，同時俾幾部單車入都冇問題~
啲玻璃都幾污糟，而腳下嘅玻璃仲係花晒，基本上已失去觀光作用~
風景......還可以吧，值得到此一遊~
落到崖下再影返上去~
跟住就一路行到去 Musée National d'histoire et d'art(National Museum of Art and History)~
期間經過 Porte des Trois Tours(Gate of the Three Towers)~
私人泳池，正！
沿途隨影~
Musée National d'histoire et d'art(National Museum of Art and History) 開放時間係 10:00，我哋去到嘅時候係 09:30，喺對面搵咗個地方坐低 hea 咗半個鐘~
Luxembourg 啲建築，好多外牆都有呢啲好似字母咁嘅嘢，唔知有咩意思嘅呢？
呢個博物館有分免費同收費嘅展館，大部份係免費嘅，所以我哋只參觀免費嘅部份~
博物館入面有啲亂，路中有路，冇話點樣可以順住行~
成日會遇到行行吓又行返去已經睇過嘅地方，又有啲地方係要行過去確認睇過未~
唔算好好行，但都算有啲嘢睇~
同睇開嘅耶穌畫像好唔同~
竟然喺度有幅咁嘅畫！
唔係影出嚟，係畫出嚟！
不過簡介就冇提及香港~
參觀完博物館，就行去 Chemin de la Corniche~
Chemin de la Corniche 可以話係一條步道，呢條步道被盧森堡作家 Batty Weber 稱為 the most beautiful balcony of Europe~
步道環境同風景確實係相當唔錯，但講到係歐洲最美陽台就......我覺得有點過譽了~
跟住就行去第二部 lift，Ascenseur du Grund(The Grund elevator)~
沿途隨影~
我一直以為呢部 lift 都係有觀光成份，點知原來係冇，只係一部普通嘅 lift，連接崖上同崖下嘅部份~
Lift 口有座鋼琴~
落到崖下要走一條通道先到出口~
係時候去食 lunch~
沿途隨影~
我計劃好去 Bosso Luxembourg 食午餐，不過去到門口發現佢冇開，走去睇吓營業時間，就睇到張告示，店主原來去咗旅行~
今日係星期五，就算佢冇去旅行，星期五佢都只係做晚市~
而點解我會安排午市嚟呢？
我計劃好會去嘅餐廳，我係會上佢官網核實佢嘅營業時間，如果官網冇資料(係，真係有啲餐廳有自己網頁但冇營業時間......)，先從其他方向查探，例如 google 或 tripadvisor~
有兩點可以支持應該唔係我睇錯~
1. 佢門外寫嘅營業時間，字眼係用「Our new opening times」，有機會係我睇官網時，同而家個時間唔同~
2. Google maps 顯示，店家在六星期前更新過營業時間，而我的確係六星期前已經做好功課~
我好有理由相信，唔係我睇錯~
其實我都唔知點解打咁多字去講應該唔係我問題，係我問題又點？係我睇錯又點？的確係會發生，同埋冇乜大不了~
隔籬有間餐廳叫 Oscar's Bar，睇吓餐牌又 OK，就呢間~
Hot chocolate and gingle ale
朱古力普通~
Rumpsteak from the region with lime, ginger and coriander butter
又係叫 medium 但嚟到係 well done......
雖然係咁，件扒又幾好食，有牛味而且質感又唔算太差~
Giant bread-crumbed pork cutlet served with fries and pepper sauce
件豬扒真係夠巨型，大過塊面，不過佢係好薄身嘅，唔會話食唔晒~
味道相當唔錯，不過夾個 pepper sauce 好似麻麻地~
嚟到呢刻，已經完成晒我本身安排好嘅行程，比預期早咗兩個鐘，因為噚日去咗啲本來今日先去嘅地方~
而家有兩個選擇，一係喺度搵啲地方去吓，照原定時間搭車過 Brussel；一係就早啲搭車過 Brussel~
講到搵啲地方去吓，其實我係有一個景點，計劃行程時因為唔夠時間而捨棄咗，所以而家就決定去呢個景點~
沿途隨影~
Musée National d'Histoire Naturelle(National Museum of Natural History)
巨型蒲公英？
博物館就一般，可能當初決定放棄佢都係因為覺得唔算太吸引~
應該咁講，其實係適合小朋友多啲~
館內仲有條滑梯，好多小朋友爭住玩~
行完博物館，就要返住宿處攞返行李~
由於博物館係加插嘅，所以我唔知喺呢度點搭車返去，只好用本地個交通 app 查吓~
好衰唔衰，個 app 話連唔到 server......
我由開始做功課至現在，可能用個 app 超過 50 次，一直都好穩定，最多都係啲搜尋結果有啲唔係好正常，但連唔到 server 真係第一次~
而呢一次，就喺我真係好需要佢嘅時候先連唔到 server......
可以用 google map 嘅，不過經驗話俾我知，Luxembourg 呢度，用 google map 個參考價值唔算高~
算吧，我知道呢度行返住宿處唔遠，同埋今日冇噚日咁熱，其實行返去都冇問題嘅，而且好罕有地，我唔駛睇地圖都識行，就行啦~
沿途隨影~
由 Luxembourg 去 Brussel，正常係有直通火車，但唔知點解，係我呢日冇，可能有維修吧~
所以今日要去 Brussel，唯有喺住宿處搭巴士去 Luxembourg 火車站，轉巴士到比利時嘅 Arlon，再喺 Arlon 火車站轉火車到 Brussel~
落咗巴士，要行一段路先到火車站~
呢塊玻璃，到底發生了甚麼事？
雖然我喺 Luxembourg 加插咗博物館景點，但嚟到 Luxembourg 火車站嘅時間，仍然比我本身計劃嘅時間早咗好多，所以我都唔知去 Arlon 嘅巴士幾點有車，拖住個篋又懶得查，順其自然吧~
本來我諗住喺 Luxembourg 買啲嘢食，等搭 Arlon 至 Brussel 呢段火車食，但而家早咗咁多，就唔買嘢食住，等到去 Arlon 先買~
去到巴士站附近，見到有部 L50 號，去 Arlon 嘅車駛離巴士站，屎塔一個箭步，走去車前(當時巴士因為紅燈而停低咗)，問可唔可以上車，個司機示意要過對面上車~
原來個站喺對面，咁我哋就嗱嗱聲過馬路，走過對面，發現都幾多人等緊車~
正常啦，今日冇得搭火車~
就係咁，我哋比原定計劃早咗一個鐘上車~
沿途非常塞車，可能因為放工時間吧，我覺得有機會趕唔到去 Brussel 班火車......
差唔多到 Arlon，睇睇時間，咦，都應該趕到喎~
落咗車，有火車職員係咁嗌，但我哋聽唔明，唔理，快步行住先，到見到另一個職員再問佢~
原來最近嗰部火車就係我哋要搭嗰班車，上咗車都有五分鐘先開車，其實又唔駛營造到個氣氛咁緊張嘅......
上咗車先醒起一樣嘢，說好要喺 Arlon 買嘢上車食呢……
唯有到 Brussel 再算，反正會早一個鐘到~
本身係 21:30 先到，而家會係 20:30 到~
上到車坐低咗無耐，有個男仔行過，同通道對面個男仔好秘密咁交換咗啲嘢~
由於事發突然，我睇唔到咩事，但成個過程相當鬼崇，二人沒有交談，只有鬼崇地互相用單手交換咗啲嘢~
喺通道行過嘅男仔繼續向前行，行得好慢，佢一路行一路打量每一個乘客，同我都有眼神接觸~
直覺覺得可能係毒品交易，但我重申，我係睇唔到交換咗啲咩嘅~
到咗 Brussel-Central 火車站，經過見到有間嘢好似有得叮嘢食，唔諗咁多，就佢啦，我哋對食，真係可以好求其~
一次過食到泰國、印度、意大利菜，冇投訴啦！
食到 21:00 見佢落閘，我哋只好拎埋啲嘢食行出舖外面食埋佢~
其實佢俾多兩分鐘我哋就可以食完，不過阻人收工嘅嘢，會俾人燒......，梗係搏唔過~
食完嘢就行去住宿處~
沿途隨影~
呢間住宿，有私人浴室，但冇私人洗手間......
掉轉就試過，仲唔止一次，好似咁樣嘅，真係未試過~
講起呢個浴室，有兩樣嘢要講吓~
1. 面對住個浴室，花灑喺右上方向左固定出水，花灑頭係完全冇得郁嘅，度門採左右兩邊開合，但近花灑嗰度門係閂唔埋，花灑出水係會直接灑出浴室外地下，brilliant~
2. 浴室外係洗手盆，洗手盆上方有盞燈，採移動偵測自動開關，當個人喺浴室入面，而洗手盆冇人，盞燈係唔會著，amazing~
樓下有同一班人不停講嘢，附近又有個滑板公園，開窗就好嘈，但唔開窗就好焗，基本上一定揀嘈，因為焗真係太辛苦，呢間仲要住兩晚，excellent~
沒有留言:
發佈留言