今日行程：
【Stanley】Davy's fish and chip shop(Lunch) → Beamish Museum → 【Newcastle】Newcastle Castle → St Sushi(Dinner) → Soufflé Baby(Dessert)《Leonardo Hotel Newcastle Quayside(Accommodation)》
今朝一大早就要出門口，揸 5 個鐘車落 Newcastle 同屎塔匯合~
離開高速公路後，要行一段幾長嘅雙線雙程鄉間小路，我一路跟住部貨櫃車~
以該段路嚟講，Cars 限速為 60 mph，Lorries 限速為 40 mph~
但部貨櫃車一路行緊 60 mph，呢啲小路又窄又多彎，佢轉彎都唔係減好多速，佢揸到賽緊車咁~
危險係危險，但佢手車真係掂，我完全冇意慾去扒佢頭，我好開心咁保持住安全距離跟住佢~
我從來都唔想做頭車，因為我部車仔實在太冇力，每次過完彎後起圍都唔快，覺得阻住後面啲車~
期間有過兩部車扒部貨櫃車頭~
當然，我係貨櫃車後面部車，佢哋要扒部貨櫃車頭，首先要扒我頭先~
兩部車扒我頭時都係夾硬嚟，因為我預留嘅安全距離唔係俾人入嘅，所以如果有人進入咗我預留嘅安全空間，即係我要減速重新預留安全距離，其實咁樣係相當唔禮貌~
不過我又好理解，佢哋想扒部貨櫃車頭，必須要做呢一步~
喺呢啲路要扒部貨櫃車頭係一啲都唔容易~
貨櫃車闊，好阻視線，亦唔似得私家車咁可以睇得穿車前情況~
路窄多彎，貨車又夠晒長，要等一段相對長嘅直路先有機會扒頭~
當然，好似某啲台灣三寶咁，盲彎照扒頭就唔駛等囉~
(台灣好多嘢都好，就係駕駛環境真係恐怖，不過香港而家都唔爭得幾多，多咗好多入錯線逆線行車~)
等到長直路，又要好彩遇到冇對頭車~
遇到冇對頭車，仲有一個問題會左右決定~
第一部扒貨櫃車頭嘅車就遇到呢個問題~
第一部扒貨櫃車頭嘅，係部有啲馬力嘅私家車，試咗幾次先成功，而佢成功嘅呢一次，係以生命作賭注~
因為佢逆線扒頭時係遇上 blind summit，佢係完全睇唔到有冇對頭車，到接近 summit 時，佢係同部貨櫃車車頭平排~
呢個時候，我本能地減速，以免炒大鑊時需要急刹，幸好最後咩事都冇發生~
由於部貨櫃車一啲都唔慢，所以扒頭嗰部車好容易會錯判需要扒頭嘅距離同時間，而佢真係錯判咗~
第二部扒貨櫃車頭嘅，係一部小貨車，即係加速力唔會好快，所以佢試咗冇 20 次都有 15 次先扒到頭~
佢扒完頭竟然玩 brake test，搞到部貨櫃車要急刹~
其實部貨櫃車都冇玩佢，佢一直都開得快，並唔係因為部小貨車要扒頭先加速頂死佢~
咁樣玩 brake test，仲要玩部貨櫃車，好易出事~
我就一直保持安全距離，雖然我都逼住要減速，但就冇咩危險性~
呢兩部車扒完頭，又唔覺得佢哋飛咁快，根本佢哋一見到貨櫃車就覺得人慢，就一定要扒頭~
你話你好趕時間就話啫，又唔覺喎，其實真係冇需要咁危險都走去扒頭，分分鐘累死人~
我早屎塔十幾分鐘到 Newcastle，火車站外嘅停車場有限時免費，但我又唔知要等幾耐，就費事入去等，因為過咗限時免費都幾收得幾貴~
唯有喺附近兜吓，好彩嘅係附近有個細圈可以不停兜，兜到搵到位為止~
我兜咗三次，終於搵到位停~
屎塔話佢應該準時，咁我就 send 咗我停車嘅位置俾佢，因為都好近火車站，佢過嚟搵我都好方便~
初時係諗住匯合後去博物館入面食嘢嘅，不過咁啱停車嗰度對正間 cafe，就睇吓有咩食~
結果就唔係好啱食，唔諗咁多喇，開車去博物館先~
Beamish Museum
一個露天博物館，佔地廣闊，唔同地方設置唔同場景，由 1820 年至 1950 年嘅英國當代場景~
呢間博物館，上年 11 月嚟過，當時唔夠時間行晒，同埋張飛係年票嚟，所以決定今次再嚟行過~
入咗場之後，搵嘢食先~
我哋事前係決定咗入嚟食 fish and chips 嘅，主要係因為呢度冇乜選擇~
呢度有兩間 fish and chips，一間只做外賣，一間有堂食有外賣，我哋想坐低食，所以基本上得一間可以揀~
但由於做功課嗰個太懶惰，一心諗住嚟到先睇間嘢喺邊，咩都冇睇冇記低，咁啱呢度完全收唔到手機訊號，只好睇吓博物館嘅小冊子~
搵到兩間 fish and chips，但唔知邊間有堂食~
Middleton's Quality Fish and Chips
Davy's fish and chip shop
第二間有個 shop，所以我推算呢間係只做外賣，於是就搭巴士過去第一間，Middleton's Quality Fish and Chips~
落咗車之後先發現，原來今日閒日呢度好多人，95% 都係小朋友，應該係啲學校活動嚟~
行到去 Middleton's Quality Fish and Chips，我覺得我真係唔應該喺二揀一時做決定，應該交俾其他人，因為我做決定的話，係一定會揀錯~
呢間只做外賣呀~~~😭
今日撞正 heatwave，好熱，成 30℃，我哋真係唔想企喺烈日當空下食嘢~
而家只好再搭車去另一間 fish and chips，Davy's fish and chip shop~
不過由於呢度實在太多人，第一班車上唔到，等第二班車都等咗 15 分鐘，好熱呀~~~😭
幾經辛苦，終於去到 Davy's fish and chip shop~
佢主打當然係 fish and chips 啦，有分大份同細份~
初時諗住叫兩份細份嘅，但其實大家都熱到完全冇胃口，最後叫咗一份大嘅 share~
英國嘛，當然唔會期望呢度有冷氣，其實都一路食一路出汗~
但至少佢呢度冇乜太陽直射到入嚟，已經算好好~
Chips 呢，就勁稔，仲要有啲好有咬口，好難食！都唔知整完放咗幾耐！
Fish 呢，外面炸嘅部份一啲都唔脆，魚肉就超濕潤，濕潤到會發光，但味道就冇乜~
喺英國食嘢，就算係食亞洲嘢，我個人期望值都係 0~
我哋嚟嗰時冇乜人，食到中段越嚟越多人，仲有啲人要等食物，但至少可以食到新鮮即製嘅~
食完嘢就開始再行呢個博物館~
我哋發現，最好睇嘅部份，就係上次嚟嘅時候行嗰個區域，其他嘅都係普普通通~
但其實呢刻嘅感受，好受天氣影響，實在太熱，冇心機行，冇心機睇，冇心機影相~
我哋行到去一間小教堂，上咗閣樓，坐咗喺度休息~
休息到差唔多，屎塔話不如走囉，去旅館 check-in，休息到夠就去食飯~
好主意呀，我都唔想再多作逗留~
上次睇唔晒，係因為天氣預報話會落雨，所以走人~
今次睇唔晒，係因為太好天，又走人~😂😂😂
(唔知點解我呢刻我諗起湯文亮~🤣🤣🤣)
今次都算有少少驚喜~
我哋發現咗個煤礦體驗，佢係零宣傳，我哋行過見到有兩個人排緊隊，二人都手揸頭盔先知~
不過我覺得佢哋應該要篩選人入，因為個煤礦係真煤礦，高度時高時低，低時可以去到一米三，對老人家嚟講係比較辛苦~
去到盡頭又係大約一米三咁上下高，要聽講解，過程大約 5 分鐘~
喺咁嘅情況下，要屈曲身體 5 分鐘，係幾辛苦嘅事~
導遊有位坐，其他人就曲住企，我就唔理咁多，發揮兒時用踎廁時訓練返嚟嘅絕活，一於全程踎~
但其實一踎低已經覺得做錯決定，因為出咗汗，條褲「啜」住，搞到個膝頭好痛，所以我要控制住唔可以踎到底，呢 5 分鐘真係好痛苦~
我又唔想一踎低覺得唔妥即刻彈返起身，反正彈返起身一樣痛苦~
團隊入面有兩個老人家，個子矮少，但還未矮到得一米三，真係覺得佢哋其實辛苦過所有人~
小插曲，導遊講解途中，對講機傳來聲音，大意係做埋呢團可以收工~
其實係咪真係要搞到咁奇怪喺講解途中叫人收工呢？
呢隻雞啲頭毛好搞鬼~
喺課室場景入面有首詩，首詩第一句"In winter I get up at night"~
Hmm......why???
Beamish Museum 隨影~
Newcastle 呢頭好多斜路，我部車仔加上有乘客喺車同埋要開冷氣，好多時上斜二波都唔夠力，要轉一波，有時仲要熄埋冷氣......
我見過有人用同款車學車，可能覺得車仔易學啲，其實太冇力嘅棍波車，揸上手係好麻煩，轉波超頻繁~
對有經驗嘅人嚟講，當然冇問題，但對新手嚟講係有啲難度~
試諗吓上斜時二波唔夠力，想轉一波，一係轉得太慢，一入一波放極力子就死火；一係轉波時機唔啱，入唔到一波，狼狽非常~
咁又可以咁講嘅，新手都舞得掂咁頻繁嘅操作，日後大部份車對佢嚟講都唔會有問題~
去到旅館，初時對方搵唔到我哋 booking，仲要我哋出示證明俾佢睇~
再之後要我哋寫低全名，因為佢覺得可能係嗰啲 last name first name 甚至乎係 middle name 或者 other name 嘅問題~
之後佢都冇講啲咩，搞咗一陣就俾到房我哋~
從對方嘅表情，睇唔出佢係搵到 booking 定係安排到房俾我哋，反正佢睇到我哋嘅 confirmation，仲要俾咗錢~
從房中望出去嘅景，有被意外到！
住開平房嘅我哋，好少有咁好嘅窗景~😆
喺旅館嘆冷氣嘆咗個幾鐘先再出去行吓~
經河邊行去市中心，環境唔錯~
行經呢度，我哋見到高空處好多海鷗聚集，再望望地下，我哋必需以九秒九跑百米嘅速度通過~
啲雲亂得嚟好似一幅有藝術成份嘅畫~
沿途隨影~
Newcastle Castle
冇諗過入去，純粹因為係地標，就嚟到此一遊~
St Sushi
Ramune Original(Japanese Lemonade)/Coke
Beef Chilli Ramen
好耐冇食辣嘢，就叫咗呢個辣牛肉~
牛肉已經係薄切，都可以又鞋又韌~
拉麵入面加咗好多蘿蔔絲，根本食唔到食拉麵嘅感覺，味道亦相當普通~
Unagi Grilled Eel Ramen
鰻魚入口即化，其實係入口即散，魚肉一啲結實感都冇~
醬汁甜味一般，碗拉麵冇乜蘿蔔絲，反而加返少少分~
至於用餐體驗，本來叫 Calpis 飲嘅，佢話冇；本來叫多春魚食嘅，又話冇~
呢兩樣係我哋最先叫嘅，一開波連續叫兩樣嘢都話冇，喺顧客角度係幾掃興嘅事嚟，縱使呢啲嘢時有發生~
我哋係睇香港人拍嘅片，最後選擇嚟呢度食嘢~
該香港人話呢度有個女侍應係識廣東話，佢話可以用廣東話落單好親切~
而我哋呢，都覺得好親切，不過原因就同拍片者唔同~
我哋嚟到嘅時候，入面有三個侍應，我係有刻意留意邊個識講廣東話的~
假設以 ABC 嚟分別代表三個侍應，咁 AB 之間交談係用廣東話，但同 C 交談就用英文~
而 C 係主力做落單嘅，亦都係 C 同我哋落單嘅，所以呢刻我哋同 AB 冇任何交流~
我覺得好親切嘅係，全個用餐過程，AB 都係西面嘅，對咩人都係，就連 AB 之間對談時都係西面嘅~
咁當然，我唔係全程望住，只係間中留意吓~
到埋單時俾貼士，A 終於都露出曇花一現嘅笑容~
跟住人哋話好嘅就去，有時唔係話盲目相信，只係無論點揀都有可能中伏，咪試吓囉，叫做有個目標~
好食就錦上添花，唔好食亦冇乜大不了，都係一個回憶~
Soufflé Baby
先前喺 St Sushi 落單時叫多春魚，對方話冇時，屎塔已經決定唔改叫其他嘢，留肚食甜品~
呢間 Soufflé Baby 就喺 St Sushi 隔籬，根本有人入 St Sushi 前已經睇中咗~
Pistachio Soufflé
Soufflé 唔算好輕盈，有部份仲好似食蛋糕咁~
以打正旗號主打 Soufflé 嚟講，相當失敗~
仲有嘅係，佢上面嘅醬太多太甜，好似食緊好多醬嘅格仔餅咁，一口都係醬~
甜味過重嘅關係，其實唔係好食到開心果嘅味道~
Matcha Bingsu
上網查過先知係韓式刨冰~
叫咗個抹茶味，上面會配一個椰子味雪糕~
椰子味雪糕個味道完全搶晒抹茶味，我刻意食晒啲雪糕再細味個抹茶刨冰，終於都食到淡淡嘅抹茶味~
珍珠唔夠煙韌，中心仲有點實，其實好勉強先食得晒佢~
我本身唔鍾意飲凍飲食冰類嘢，但我超鍾意呢種刨冰嘅口感~
刨冰被製成非常幼細嘅短針狀，口感非常綿密，入口集體溶化嗰種感覺好過癮~
尤其喺咁熱嘅天氣下，寧捨舒暢~
兩份嘢都比想像中大，睇 menu 感覺冇咁大份咁多料，絕對違反商品說明條例~
食完嘢就行返旅館~
沒有留言:
發佈留言