2019.11.02 高山、宇津江 (日本第三天)

今日行程：
宮川朝市 → 高山陣屋 → 宇津江四十八滝 → 政かつ (午餐) → 高山昭和館 → 上三之町 → 東山遊步道 → 上三之町 → 山武商店 (晚餐) → Sora-AMA Hostel (住宿)



今日第一站「宮川朝市」

今日一早就行去宮川朝市~
不過我哋對朝市興趣就普通，都係朝聖心態~

沿途風景~

嚟到朝市，飲返杯咖啡先~

呢杯咖啡，杯身係曲奇，飲完咖啡，可以食埋隻杯~

杯內本身已經有一層糖，遇上熱咖啡就會溶埋一齊~

斟完咖啡就拉花，大功告成~

我就唔飲咖啡嘅，屎塔就話咖啡普通，曲奇杯仲普通，不過咁樣飲咖啡又幾得意嘅~

跟住就食咗串飛驒牛~
第一次食飛驒牛，都幾好食~
不過食到最後有渣......
而且都真係幾貴，一串三粒，150 円一粒，即係一粒牛要大約 HKD$11......

最後，買咗四粒章魚小丸子，為充饑多過為食~
屎塔覺得幾好，我就覺得普通，冇乜章魚香味~

宮川朝市及附近隨影~

下一站「高山陣屋」

行過去時見到呢兩隻動物，唔知咩嚟呢~

沿途風景~

高山陣屋門外就係「陣屋朝市」~
不過我就冇打算行~

高山陣屋~

呢舊木喺咁凍嘅天氣，摸落去又真係暖暖地，我摸嘅地方已經係冇太陽曬到嘅地方~

我已經唔記得點解會安排嚟高山陣屋，而家睇完，更加唔明白，照計我應該冇興趣......

睇完就行返去停車場攞車~
經過見到，幾靚~

下一站「宇津江四十八滝」

宇津江四十八滝開放時間係 10:00，我 10:20 到達，但最前排嘅停車位只剩返一個，我諗呢度都幾多人嚟~

嚟呢度，冇諗過有紅葉睇，嚟到先知原來都有啲~

宇津江四十八滝，係咪有 48 個瀑布就唔知，有名稱嘅就有 13 個~

不過我哋就唔打算數住 13 個瀑布嚟行，總之跟住條路行上去再行返落嚟~

上到頂，完全係另一個天地，好似世外桃源咁~

上嚟嘅時候，中層有個觀景台~

樹林入面有舊大石，成隻船咁~

呢度環境非常正，人再多，瀑布聲再大，心境一樣寧靜~
喺呢度，我只係發現到兩個外國人，就係我同屎塔，其他聽到嘅，一概都係講日文嘅~
其實呢度絕非甚麼秘境，但唔知點解只有本地人嚟~


下一站「政かつ (午餐)」

揸車返返去高山市，不過去到目標停車場，價錢同我事前睇嘅又唔同，係爭幾倍價錢，梗係唔泊~
咁就只好周圍兜吓~
不過高山市人多車多，都幾惡搞~

兜咗兩個圈，價錢合理啲嘅都滿晒......
再兜吓唔同嘅街，經過條橫巷，有個停車場，好細，只可泊到四部車，我見到仲有個車位~
睇睇價錢，喺呢區嚟講，算係可接受範圍，即刻扭入去~

呢個場有 24 小時最大收費~
我計吓數，我完咗今日行程後攞車，同我聽朝先攞車，收費係一樣~
咦，咁可以諗吓聽朝先攞車喎~

政かつ~

海老定食~
蝦好食，炸粉薄，蝦肉飽滿又有蝦味~

ロ—スカツ定食~
豬扒較乾，但個汁非常不錯~

下一站「高山昭和館」
今次旅程，有機會去到嘅昭和館有幾間，高山昭和館算係比較大嘅一間，所以就揀咗嚟呢間~

呢間昭和館，絕對係我哋去過嘅，最有心嘅一間~
入面啲舖頭係可以俾人行入去嘅，好正~
入面啲古董我覺得係真古董嚟，但又冇任何提醒字眼話唔准觸摸~

其中有一間，係醫療室嚟，製作認真到，一行入去就聞到消毒藥水味，好驚喜！

另外仲有間戲院，係真戲院，有電影播放中~

又有間房放咗四部經典遊戲機，可以隨便玩，正！
灰機就真係古董機，紅白機就係近年新出好細部，唔知幾多遊戲合一，內置埋喺部機入面嘅~

好正好正，非常有心嘅一間昭和館~


下一站「上三之町」

上三之町係幾有特色，不過實在太多人，穿過便算~

途經著名排隊寿司店，馳名三款飛驒牛寿司，不過要排長龍就算了~


下一站「東山遊步道」
我揀咗一段東山遊步道嚟行，全部係寺廟，主要係希望碰上紅葉+寺廟呢個組合，一定非常漂亮~

沿途風景~

宗猷寺~

善応寺~

法華寺~

天照寺~

東山神明神社~

素玄寺~

洞雲院~
(已荒廢？)

大雄寺~

雲龍寺~

東山白山神社~

屎塔就冇去到「東山白山神社」，佢行到有啲攰亦有啲悶~
係嘅，冇紅葉嘅情況下咁樣行寺廟，覺得悶亦唔出奇~
似乎今年紅葉真係開遲咗，嘥晒，今日如果遇到見頃，一定行到唔捨得走~

屎塔就喺下面等我~

其實仲有「栄鏡院」同埋「久昌寺」，不過搵唔到入口，當然我哋亦冇好認真去搵，隨心就好~

東山遊步道隨影~

東山遊步道呢度，遇到嘅遊人，99% 都係外國人，係西方國家嗰種外國人，唔知點解會有咁嘅情況~
不過咁，本地人，要行都等遲吓先嚟，等紅葉開多啲先~

我行完之後，匯合返屎塔，不過時間尚早，我都坐低，一齊休息吓先~


下一站「上三之町」
我哋再次返去上三之町，睇吓呢啲時候會唔會少人啲，同埋著咗燈嘅上三之町係點~

人係比較早前少咗啲，不過仲係好多人~

喺附近見到間銀行，入面有啲好顯眼嘅橫樑，相信同高山嘅歷史建築有啲關係吧~

而家五點幾，冇咩做，就行返去部車度休息陣先~

返到部車度，就要諗吓係咪聽朝先攞車~
呢個停車場距旅館約有十分鐘步程~
今晚嘅旅館同噚晚係同一間，但基於安全理由，我哋今朝都將所有嘢放返上車，當然包括個篋~
即係話，唔揸車走，就要手拎所有嘢返旅館，聽朝一早又做返相同嘅嘢~
所以我決定都係揸走，反正旅館嗰邊停車場都算平~


下一站「山武商店 (晚餐)」

行到正門，奇怪，點解好似冇開咁嘅~

望真啲，門口寫住營業時間 10:00 ~ 6:00~
冇理由，我上佢官網睇過，明明開到 21:00~
再講，收咁早？唔係好合理喎~

我唔信，於是行去側邊睇吓~
原來地下係商店就早收，餐廳就喺側邊上，營業中~

一入到去，就有位大叔好熱情咁招待，我估佢就係老闆~
佢不停講解俾我哋聽，喺度(指住雪櫃)揀牛肉，邊啲係 tenderloin，邊啲係 A4，邊啲係 A5~
又話每人要加 480 円 seat charge，可以免費任食另一邊嘅食物~
另一邊嘅食物主要係用嚟燒嘅蔬菜，仲有生果同布甸~

佢講嘅時候係咁拍我背脊，想表示友好？但又好唔自然~
不過好快就俾屎塔拆穿佢，其實佢貼咗個山武商店嘅貼紙喺我背脊......

揀肉呢，我都冇乜概念，揀 A5 囉，大細就......
我記得有時食美牛都食到 200g，所以就揀咗塊 414g 嘅 A5~

上檯時，有種誇張嘅感覺，好大隻碟(看看木筷子便可看出比例)！
佢切開晒一條條，不過一每條都係好大條，其實我就麻麻地咁樣，不過入鄉隨俗啦~

呢度係用炭火直燒的~

第一啖，真係好食！
我覺得係同佢灑咗啲胡椒上啲肉面有關~

不過呢，感覺上食其他和牛冇咁油膩，唔通飛驒牛特別好脂肪？還是我第一次咁大條燒嚟食呢？
睇返隻碟，其實都見到條肉不停有油流出，一碟都係油~

第一舊食得好開心，第二舊都唔錯，第三舊開始已經冇乜感覺~
第四舊......感覺已經好膩，冇辦法，實在食咗太多油~
再食落去都係為咗唔好嘥嘢~

我哋都有一邊燒牛，一邊燒蔬菜，試圖中和返和牛嘅油膩感，不過最終都失敗~
不過啲蔬菜係幾甜，本身係唔錯~
(後記：有朋友教，食和牛，幾飽都要食飯，吸吓油~)

屎塔早就投降，我就都仲食到~
食到最邊嗰三舊，95% 係脂肪嚟，想食都冇嘢可以食~

之後就一人食咗一杯布甸~
布甸嚟講，可以話係我哋喺日本食過最唔好食嘅......
所以都冇衝動再食~

七千幾円咁大塊頂級和牛，看似幾抵食，不過加埋 seat charge 同消費稅，埋單都要九千幾円~
我又唔會話佢貴，但亦唔係網路講到好平咁~
單一部位，仲要佢最邊好一部份其實係冇肉食嘅......
純睇價錢，唔覺得喺價錢上比味藏同丸明有幾大優勢~

今日係星期六，紅葉季節，但佢都係得三台客，嗯......奇怪~

離開時，見到周圍都係我頭先被老闆貼咗喺背脊嘅貼紙~
相信都係佢貼完人，人哋搣返落嚟貼上去咖啦~
咁樣偷偷貼喺人哋背脊，佢可能覺得無傷大雅，但我個係就不甚喜歡~

返到旅館，沖完涼，屎塔話唔係好舒服，但又講唔出邊度唔舒服~
咁唔舒服就最好休息多啲同飲多啲水，於是我就落街買咗支大水返嚟~
希望瞓醒乜事都冇啦~