Krýsuvík (地熱區) → KFC (Lunch) → Blue Lagoon (藍湖) → Olsen Olsen (Dinner) → Comfort and Rest (住宿)
今日早餐係酒店提供，都係一般嗰啲西式早餐，冇特別~
食緊早餐嗰時，阿飛問我可唔可以車佢去搵帽，當然冇問題啦~
噚晚去咗兩個地方，先去第一個地方先~
不過行行吓行錯路，變咗去第二個地方方便啲，所以就去咗第二個地方嘞~
去到第二個地方，由於我係司機，視野比較好啲，離遠我已經見到有舊嘢喺地下~
直覺覺得好有機會係阿飛頂冷帽~
我停好車，阿飛一開門，點知真係！
失而復得，阿飛梗係開心啦！
錯有錯著，打尖去咗第二個地方，反而即刻搵到，正！
今日第一站 Krýsuvík (地熱區)
沿途風景~
到咗 Krýsuvík，視線範圍內一個人都冇~
心型嘅洞~
日出~
準備回程時多咗啲人~
成個區域，無論眼見有冇冰面，都一樣係好跣，每行一步都要好小心~
回程時，媽咪就跣咗一吓，向前仆~
就係落呢個梯級~
腳就冇扭親，但手腕落地先，眼見媽咪捉住隻手，狀甚痛苦......
咁大家都有少少緊張，但又覺得俾佢休息一陣，睇吓會唔會好啲先~
媽咪係一個好堅強，好忍得痛嘅人，但今次，過咗五分鐘，痛楚一啲都冇減退，睇到媽咪嘅表情，我哋都知道事態應該有啲嚴重！
我哋唯有好小心咁扶媽咪上車先~
媽咪上到車話想睇醫生，其實大家都覺得有咁嘅需要，屎塔更即刻話要去急症室，都啱呀，如果骨有事，真係要盡快求醫！
打開 Google Map，附近有間疑似醫院，即刻過去睇睇~
去到走去問吓，原來呢間係安老院嚟~
細問之下，對方叫我哋去機場附近，有間醫院，仲話埋個地點俾我哋知~
沿途風景~
途經一間教堂，不過而家要盡快送媽咪去醫院，其他嘢唔諗喇~
到咗醫院，我落低晒啲人先，再喺附近搵個位停低~
由於我唔知我停緊嘅位係咪合法嘅，我就唔離開車喇，有屎塔有飛珊，乜都夠，我去都幫唔到啲咩~
趁有時間，我就要諗吓之後嘅行程~
本來今日冇行程係冇所謂，但我 book 咗今日下午一時嘅 Blue Lagoon (藍湖)，就算取消都想同人講聲先~
最後我覺得唔會搞太耐，就打電話去睇吓可唔可以改到時間~
雖然就算趕得切都未必會去，始終係濕水活動，媽咪都未必可以參與，但我又唔想太衝動直接取消~
打電話去想改到下午三時，對方話只有二時或四時先有位，咁諗都唔駛諗，四時啦！
趁而家得閒，整吓啲一直都想整嘅嘢先~
左尾轆泥擋有舊好大嘅冰痴住，好貼地，都有少少擔心行車時撞到舊冰而整爛個泥擋，於是我用個冰鏟試吓整甩佢~
不過舊冰痴得好實，就好似同個泥擋喺同一個模度啤出嚟咁~
不過冰呢，用個鏟刨吓佢，總會整得甩少少......少少......
其實我都整到有啲放棄，諗住整多幾吓就算~
就係呢幾吓，可能有啲發脾氣，大力咗少少，我整爛咗個冰鏟，斷開了兩截......
冰鏟爛咗，要賠都應該唔會天價，但我聽日先還車，如果要用嘅時候冇得用都幾麻煩~
我決定去超市睇吓買唔買到~
上網查到附近有間 Bónus，即刻開車過去睇睇~
入到去行咗一個圈都唔見有，直接問職員~
原來擺咗喺收銀外面嘅特價處，我入去嘅時候冇為意~
ISK 159，大約 HKD$10，平！買！
我停返部車喺醫院外空地，我忍唔住喇，走咗入去睇吓媽咪點樣~
根據佢哋講，照第一次 X-ray，睇到媽咪右手斷咗手腕骨同有骨移位~
醫生幫佢局部麻醉，之後扶正再固定，再打石膏~
等石膏固定後，再照一次 X-ray，確定骨已被扶正在正確位置，手術成功，大家終於都放心啲~
期間我哋一直有聯絡芝妮(屎塔表妹，旅遊保險搵佢買的)，完全按照芝妮嘅指引去做~
最主要係要有 X-ray 片同醫生紙，而醫生紙上必需要有意外造成嘅字眼~
我哋睇睇張醫生紙，上面冇任何說明係意外造成，只好再同醫生講講~
醫生話，上面寫有 s52.5，係環球通用嘅意外代碼，呢刻只好信佢~
而 X-ray 影像係儲存喺光碟的，有齊呢兩樣就應該可以向保險公司索償~
芝妮亦有提醒，一定要醫生寫明患者係適合乘搭飛機，否則可能會過唔到安檢~
搞掂晒就出去俾錢，盛惠 ISK 65700，大約係 HKD$4100~
咁又幾平喎！仲以為遊客去醫院睇醫生一定係天價~
睇完醫生俾埋錢，對方冇俾藥我哋，亦冇任何表示，咁唯有問吓佢~
對方俾咗個號碼我哋，話拎住個號碼去藥房就可以攞到藥，之後仲話埋俾我哋知邊度有藥房~
生活喺香港嘅我哋，睇完醫生，喺同一個地方就可以攞藥，係好理所當然嘅事~
雖然我都知外國好多地方係醫藥分家，不過呢刻又唔醒起~
我哋查過，只係需要 3 分鐘步程，咁就其他人喺車等，我同屎塔行去藥房攞藥~
去到藥房，俾咗個號碼佢，對方好似有啲疑難咁，好似搵唔到相關資料~
咁佢就開始問吓啲細節嘢，得知我哋唔係本地居民，就話要去醫院填返份表先可以攞藥~
返返醫院，一五一十講返俾前台知，佢哋又好似唔知有呢份表咁......
最後就問返原本處理開媽咪嗰位護士，不過呢個護士態度好差，直情係唔想理我哋咁~
跟住就叫我哋等陣~
等咗 10 至 15 分鐘，佢行返出嚟話，唔需要食藥......
搞完一場大龍鳳，原來係我哋一廂情願以為實有藥食~
不過又奇怪，斷骨理應好痛，止痛藥都冇？
不過我又唔係醫生，醫生有分數啦，佢唔開藥自然係有原因嘅~
好嘞，睇醫生嘅事，喺冰島嚟講係暫告一段落，跟住就係返到香港要盡快睇骨科~
下一站 KFC (Lunch)
先前去醫院時經過 KFC，飛講笑話好想食，其實食咗咁多餐西餐，應該大家都好想食 KFC，所以一致決定，就去 KFC~
去 KFC 都好，因為時間開始緊張，怕趕唔切去 Blue Lagoon~
去到 KFC，冰島文嚟，見到(其實係估到)有個四人餐，就要佢啦~
四人餐好似咁少咁，但最後我哋五個人都食飽飽......
下一站 Blue Lagoon (藍湖)
浸溫泉呢，我自己就相當麻麻，而 Blue Lagoon 嘅入場費都幾貴，所以今次我不加思索就決定唔入場，佢哋幾個自己入去開心啦~
至於媽咪......佢自己應該有分寸咖喇，仲有三個人睇住佢，應該冇問題嘅~
到咗 Blue Lagoon，遲咗十分鐘，我相信應該唔會唔俾入嘅~
去到入場處，望住佢四個好開心咁行入去，我就到此止步~
唔入去浸溫泉，一樣可以遊覽吓 Blue Lagoon~
Blue Lagoon 分兩邊，一邊當然係俾人浸嘅溫泉區，另一邊，就係唔俾人浸嘅非溫泉區......
所以我就行去唔俾人浸嗰邊~
水真係幾藍，非常少人，天又清，可惜係時間晏咗啲，天色好暗~
行完就返入餐廳休息等佢哋~
原來餐廳外有個露台可以望到池入面~
終於等到佢哋浸完~
事前好多人話 Blue Lagoon 超多人、水只係微溫、水嘅顏色唔係好藍~
訪問過啲團友，佢哋話唔係，人唔算太多、水夠熱、亦都係藍色，最尾呢點我都知呀~
人唔太多，相信因為而家係淡季吧~
跟住就去 Comfort and Rest (住宿)，佢哋去 check-in 時，我就查吓安排好陣間去嘅餐廳狀況~
Google 顯示間餐廳 Closed，咁就索性問吓房東有冇咩介紹~
房東建議我哋去 Olsen Olsen~
佢話 Olsen Olsen 係快餐店，但用料新鮮好味~
嗯......聽完帶點懷疑，但就冇乜猶豫，反正有開就得......
屎話我知個房東識少少廣東話！好意外！
下一站 Olsen Olsen (Dinner)
Olsen Burger
With cheese lettuce, tomato & secret sauce
味道幾好，但有點乾~
Olsen Kafari
Tender pieces of pork with lettuce, whole kernel corn & BBQ sauce
呢個比較普通~
Olsen Beefsteak
180gr with bernaise sauce, mushrooms, country style fries & salad
今次終於有問要幾熟~
我哋要 medium，不過嚟到我哋覺得係 well done......
不過咁，塊扒又幾好味，冇預期(well done)咁差~
Mozzarella cheese sticks (8 pcs.)
芝士唔夠軟身，味道還好~
快餐嚟講，相當不錯~
食完嘢就返住宿處休息~
其時，上網睇到有人話燈塔嗰邊有極光，阿飛即刻出去 hot tub 嗰度望吓，佢話真係有少少~
咁就事不宜遲，出發去燈塔~
不過媽咪就最好唔好出去喇，佢受嘅傷一啲都唔輕，應該盡量休息多啲，同時要減少戶外活動，避免再次受傷~
最後屎塔陪媽咪，我就開車同珊飛去燈塔~
去到燈塔，係就係有嘅，不過肉眼睇係非常暗，影相就好啲~
(現場實在太大風，呢張已經係最清......)
現場好大風，好凍，睇夠就諗住去一處冇咁光嘅地方齋睇~
不過去到目的地就已經冇晒極光嘅蹤影~
而且廣泛地方多雲，撤退~
沒有留言:
發佈留言