《瞬間看地球》Stranger's Blog: 2019.01.24 冰島 (Iceland) (歐洲第十四天)

今日行程：
Snorkel in Silfra (浮潛) → Þingvellir Tourist Infomation Centre (Lunch) → Þingvellir (古議會國家公園) → Austurstraeti、Bankastræti、Laugavegur (購物大道) → Perlan (珍珠樓) → Staff Kitchen and Bar (Dinner) → Hótel Vellir (住宿)

今日第一站 Snorkel in Silfra (浮潛)
通常濕身嘅活動我都麻麻，不過陪屎塔玩吓囉~

Snorkel in Silfra，浮潛於歐洲美洲版塊之間，咁獨特嘅體驗，其實又真係幾值得去玩吓嘅~

為咗呢個活動，我哋特意帶埋個救生員去~ XDDD

呢個活動，參加者如果係 60 歲或以上，就要提供醫生証明，証明參加者適合玩呢項活動~
而媽咪就啱啱需要提供証明先可以玩~
但其實，佢係最唔需要証明嘅一個，因為，佢嘅職業係一位救生員~
我哋四個呢，全部唔熟水性，今次我哋靠晒媽咪~ XDDD

天都未光就去到 Þingvellir (古議會國家公園)~
泊好車就諗住去自助售票機買泊車券，點知所有機都停用~
我知道除咗現場買，仲可以上網買，不過上佢個網買完，出咗錯誤訊息，話我已經買咗......
點可能呀！唯有再試，試咗幾次都係咁，唔理喇，你話有就有~

浮潛之前，一定要去個洗手間先~
點知，最近嘅洗手間冬天停用......

就喺呢個時候，有位外籍女仕問我喺度有咩睇有咩做......
吓？身為遊客，竟然對呢個國家公園冇認識？
呢個國家公園係遊客必到嘅地方，你會唔會去香港旅行但唔知香港嘅夜景好靚？
佢之後話，佢去機場時經過，見到都有啲人，所以想問吓呢度有咩做~
其實都真係好難講得通......
咁我話佢知我哋準備去浮潛，佢 oh 一聲，再講句 thank you 就上返車走人~

行過去集合處沿途~

去到集合處得一部車喺度~

我哋見到附近有洗手間，就行過去~
不過全部都鎖咗......
我相信晏啲會開返，我相信落水前，個個都需要解決咗先，所以冇理由唔開~

返返去部車度，有個人走埋嚟，我俾啲預約資料佢睇，原來佢就係我哋嘅領隊~
我哋問佢邊度有洗手間，佢都係指住鎖咗嗰邊，佢話晏啲會有人開~

車越嚟越多，十部都有，全部都係做浮潛(或深潛？)嘅~

我哋暫時冇咩做就喺洗手間外等，等咗陣真係有人嚟開鎖~
一有人嚟開鎖，人龍就開始形成~

水溫大約在兩度上下，我哋需要自備薄嘅保暖衣同褲，再著佢提供嘅一件式保暖衣，當然最後要著埋佢提供嘅 dry suit~
件 dry suit 都幾難著，領隊幫我哋逐個逐個著，雖然係佢工作之一，不過我見佢都幾好心機，值得一讚~
著好晒衫就聽佢講解，聽講解時，手掌同腳掌都勁凍，凍到冇晒感覺......

講解完就每人拎住自己對蛙鞋同潛水鏡行去落水處~
去到落水處，領隊叫我哋自己吐啲口水落潛水鏡入面，再搖勻佢......
對住呢個行為，我真係好抗拒，真係冇其他代替品咩......
當然，抗拒都要做，否則個鏡會好朦~

我雖然叫做識游水，但真係好耐冇游過~
不過，我都知浮潛就冇咩好驚嘅，dry suit 入面有空氣，個人自然會浮~
所以雖然有少許緊張，但就完全冇驚嘅心情~

落水位~

落咗水，其實個感覺係，想落深啲都好難......
可能因為重心問題，一係面向水底，一係面向天，其他方向係比較難，尤其想直身就更加難~

喺水面睇，其實都幾好笑~ XDDD

水入面勁清，又藍又綠咁，好靚~
由於啲水係非常清，好清楚睇到兩個板塊間嘅裂縫~

成個過程，水流非常慢，就算係逆流都唔算游得好辛苦~
潛咗幾耐冇計過，大約 45 分鐘啦~

上返水，又要拎住對蛙鞋行返去集合處~
可能個人比落水前攰，覺得今次拎住對蛙鞋行好攰~

返到集合處，第一時間除返晒啲衫俾領隊先~
之後領隊就沖熱朱古力俾我哋，仲有曲奇食~
不過睇佢沖朱古力嘅手勢，真係慘不忍睹......
落粉落到周圍都係~
又大力攪拌，攪到瀉晒~
又落勁多朱古力粉，飲到底全部都係溶唔晒嘅粉嚟~
不過咁諗啦，我哋攰，其實佢都攰，仲要服侍你班大帝，原諒佢啦~

下一站 Þingvellir Tourist Infomation Centre (Lunch)

行返去攞車時嘅沿途風景~

遊客中心入面有間速食店，大家行咗個圈，唔知係食物唔吸引定真係如大家口中所講，唔係好肚餓，只係買咗好少嘢食~

下一站 Þingvellir (古議會國家公園)

Þingvellir 好大，我就冇計劃行晒佢，甚至只係行好少部份，一來冇時間，二來其實有興趣嘅部份唔多~

頭先食嘢嗰度叫 Tourist Infomation Centre，而家呢邊就叫 Visitor Centre~
由 Visitor Centre 開始行，好快就到觀景台~
遍地白雪，真係幾靚~

跟住向法律石方向行去~

望返轉頭~

途經另一個觀景台~
不過呢個觀景台嘅入口就比較跣~

面向方向同之前觀景台係一樣，只係身處地方唔同而角度不一樣而已~

繼續行~

見到支冰島國旗即係到咗法律石喇~

嚟到法律石呢度開始有少少雪~

喺呢度望出去~

國家公園就行到呢度~
再講，雪開始大，其實都係時候要離開~

雪越落越大，到我哋行到返車時，能見度已經唔夠五十米~
剩餘嘅時間，我哋可以返雷市行街，亦可以去 Kerið Volcanic Crater (火山口)~
兩者時間相約，不過咁嘅天氣，大家都唔係好想去 Kerið Volcanic Crater~
雖然我哋都明白 Kerið Volcanic Crater 嗰邊天氣未必係咁差，去到都係一小時後嘅事，隨心吧，想返雷市行街，就去行街~

上車前，有個外藉男士問我，佢想睇湖，係咪免費，又問要行幾耐，又問咁嘅天氣個景仲靚唔靚~
其實，大雪到你連我個樣都睇唔清咁滯，個景靚唔靚你都唔會睇到......
我就答佢，咁嘅天氣，咩都睇唔到，佢話咁佢都係離開~

下一站 Austurstraeti、Bankastræti、Laugavegur (購物大道)

開車時能見度好低，同前面幾架車一齊行緊 30km/h~

途中遇到有車跌落路邊，救援中~

沿途風景~

沿途一路跟住上圖部紅色車至雷市，部紅色車跣咗好多次胎，每次都救到冇事，技術高超！
我懷疑佢部車係兩驅車，所以先咁跣~

泊好部車喺教堂就去行街~
行到去我計劃好今晚會去食晚餐嘅 Old Iceland Restaurant，發現價錢比預期要貴好多~
呢幾條街，要揀餐廳絕對有大把選擇，決定一路行一路再揀過間~

條街其實好多嘢行，不過我哋(我同屎塔)真係唔多鍾意行街，所以我哋自己再去多次 Perlan (珍珠樓)，之後再返嚟匯合~
觀景台有裝修工程，期間入場免費~
不過今日天色都係差，冇後面山景做襯托~

回程就去 North66 匯合佢哋~
到門口時，有條冰柱喺我身邊掉下，入面啲職員好緊張咁跑出嚟問我有冇事~
好坦白咁講，我有啲遲鈍，完全唔識驚，可能唔係生活開喺呢啲咁凍嘅地方，冇咁嘅警覺性，發生咗亦唔感覺到啱啱執返條命......

行多一陣就去食嘢~

下一站 Staff Kitchen and Bar (Dinner)
捨棄咗 Old Iceland Restaurant，揀咗 Staff Kitchen and Bar，價錢喺呢度嚟講「相對」便宜，反正間間啲食物都係差唔多，食間冇咁貴嘅~

餐前叫咗啲酒飲，我同屎塔都唔飲酒嘅，不過見佢哋飲得咁開心，我試飲咗一啖，冇乜感覺......

Risotto
Wild mushroom risotto with confit cooked duck.
鴨肉意大利飯普通，冇特別~

Salmon
Tourched salmon, beets, quinoa and leek veloute.
三文魚藜麥一般，成碟嘢味道好似有啲唔夾咁~

Staff-Burger 150 gr
Beef hamburger served in brioche bun with bacon, cheddar cheese, iceberg salad, bacon-jalapenjo jam and truffle majonese. Served with fries.
芝士漢堡係一貫嘅好味道~

Beef Tenderloin 200 gr
Served with marinated mushroom, almonds and cauliflower purré.
牛扒其實幾好，但由於噚晚嗰件真係幾好食，有啲被比下去~
冰島絕少問件牛要幾熟，食咗咁多餐好似得之前一間有問~

餐廳洗手間入面有兩幅咁嘅嘢，好意外~

喺街見到部車俾雪蓋住~
其實喺日本都見過好多次，但每次見親都覺得好有趣~

食物嚟講，有牛嘅兩樣比較好，其他普通，重點係，工作人員態度有點不友善，個個都係黑面嘅~

之後開車去 Hótel Vellir (住宿)~

返到住宿處，大家都忙於整理行裝，但大家都有間斷咁望吓窗外，睇吓有冇極光~
直至某時，輪到阿飛望嘅時候，佢話好似有，但由於地面太多街燈，隔住玻璃其實睇得唔係咁清楚，於是佢就跑落街睇吓係咪真係有~
探子回報，極光出現了，我哋全部人求其著件外套就衝落去~

極光，係有嘅，不過好暗，要好留心先見到~
不過慢慢就開始強返啲，相係比肉眼清楚~