Kirkjufellsfoss (教會山瀑布) / Kirkjufell Mountain (草帽山/教會山) → Ocean View Point (觀景台) → Ólafsvíkurkirkja (教堂) → Ingjaldshólskirkja (教堂) → Skarðsvík Beach (黃金沙灘 / 白金沙灘) → Saxhólar Crater (偽火山口) → Londrangar View Point (怪物海岸) → Bárðar Saga Snæfellsáss Statue (幸運石雕) → Gatklettur (海蝕洞) → Buoakirkja Black Church (黑色教堂) → Ytri Tunga Beach (海豹聚集地) → Galito (Dinner) → Akranes Rooms (住宿)
今日行程有點緊，因為我想一日行晒 Snaefellsnes Peninsula (斯奈山半島)，希望順順利利~
今日第一站 Kirkjufellsfoss (教會山瀑布) / Kirkjufell Mountain (草帽山/教會山)
我哋住嗰度係可以望到 Kirkjufell Mountain，不過呢個角度睇到嘅就唔似草帽喇~
去到 Kirkjufell Mountain，烏雲密佈，我都分唔清係未天光定俾雲遮住晒~
諗住行過去瀑布嗰邊，不過條路好多冰，已經分唔清係路定係水面嘅冰~
只好慢慢行，一邊行一邊評估~
行到中間，見到 Kirkjufell Mountain 倒映於水面~
Kirkjufellsfoss 有一半已經結咗冰~
呢個角度係經典影相位~
由呢邊望出去~
天開始光返啲，人亦越嚟越多，人多到冇可能再影一張風景相係影唔到人~
早嚟就烏雲，遲嚟就多人，都唔知邊樣差啲......
上面呢條路被雪完全覆蓋，都唔知本身係闊係窄，地面亦相當跣，所有動作都要好小心，要讓人過讓人行係好唔方便~
所以見多人上緊嚟，我哋就決定離開~
下一站 Ocean View Point (觀景台)
呢個位，我喺網上面只係見過一個人有提及，我見佢影嘅冰掛又幾靚，所以去望吓~
沿途經過一個湖，水面波平如鏡~
嚟到 Ocean View Point，係就係有冰掛，不過同人哋幅相爭好遠，人哋幅相靚好多......
不過呢個位望吓海又真係幾正~
下一站 Ólafsvíkurkirkja (教堂)
附近風景~
下一站 Ingjaldshólskirkja (教堂)
時間比預期早，臨時加插的~
見人哋影得好靚的，但我哋點都影唔到人哋嘅效果......
下一站 Skarðsvík Beach (黃金沙灘 / 白金沙灘)
冰島多數沙灘都係黑沙灘，呢個沙灘，冇雪嘅時候係黃金沙灘，有雪嘅時候係白金沙灘~
沿途見到有條柱狀物，好高，唔知有咩用途呢~
沿途風景~
原來個沙灘唔係純金黃色，係夾雜住黑色同黃色，就係因為咁，個沙灘就有唔同嘅紋理，好靚！
下一站 Saxhólar Crater (偽火山口)
時間仍比預期早，繼續臨時加插~
去到 Saxhólar Crater，冇一個好明確嘅停車位置，淨係見到有一部車停低咗~
而部車嘅位置望落似係一個堀頭路，兩旁厚雪，連就咁一手 u-turn 都唔夠位~
不過都冇辦法，反正已經到盡頭，入得嚟嘅都係停車，唔係通過，都唔怕話阻住條路嘅~
最緊要唔好懶，一定要掉咗頭先，否則陣間有車頂住要掉頭會好大鑊~
Saxhólar Crater 原來都幾高，仲可以行上去，事前我係唔知道，功課做得太差了吧~
條路一啲都唔好行~
靠右，比較安全，但雪有點深，好難行~
靠左，梯外面已經係山坡，比較危險，但有前人行過嘅腳洞，相對易行啲~
上面主要都係一啲怪石，同坑洞~
附近有啲其他比較矮嘅偽火山口~
喺山頂向外望~
落山時見到有兩部旅遊車(一車坐十多人那種)到咗，成廿多人上緊嚟，我哋落山途中都要企埋一邊，俾位佢哋上咗先~
落到山，見到我部車俾嗰兩部旅遊車頂住走唔到，不過我都唔太擔心，因為兩部車都有司機喺度~
我行埋部車度，其中一個司機問我，係咪今日全日都喺度......
其實呢個問題真係有啲唔合邏輯，當然我冇講啲咩，我只係話佢知我準備離開~
跟住佢就指點我：嗱，我就點郁部車，佢又點郁部車，跟住你(即係我)又點郁部車~
其實，佢講嗰個方法我唔係好同意，不過算啦，咪聽佢講囉，走到就得~
下一站 Londrangar View Point (怪物海岸)
沿途風景~
到埗後，見有有張檯，我哋就拎啲自備午餐出嚟，諗住坐低食~
行到埋去先見到張檯同張櫈都滿是積雪，唔理喇，撥吓佢照坐低食~
我自己就心急，行咗上去視察吓環境先~
可能因為個行程係我計劃嘅，順理成章，當然做埋帶隊，但始終我都係未嚟過，就想偷少少時間去視察吓環境先~
上去觀景台都有一段路要行，一來一回仲要行雪地，其實都有啲攰，不過起碼肯定地點冇錯先~
返返落嚟，食吓嘢，之後就一齊行上去~
Londrangar 呢個怪物海岸，真係好特別，有啲雪點綴吓，好有層次感~
另一邊，相對怪物海岸嗰邊就爭啲，但其實都幾唔錯~
下一站 Bárðar Saga Snæfellsáss Statue (幸運石雕) & Gatklettur (海蝕洞)
行車途中見到彩虹~
沿途風景~
Bárðar Saga Snæfellsáss Statue，我估大約有九層樓高~
再向海邊行~
有條幾完整嘅彩虹~
再行遠啲就到 Gatklettur~
附近風景~
下一站 Buoakirkja Black Church (黑色教堂)
沿途風景~
Buoakirkja Black Church 設計簡約，黑色嘅外牆，加上舖滿白雪嘅屋頂，漂亮~
附近風景~
下一站 Ytri Tunga Beach (海豹聚集地)
沿途風景~
入口處有個牌介紹，咁肯定冇去錯地方先~
不過呢度嘅環境，人係行唔到咁出，就算有都未必睇到，而我哋用相機影到最遠都完全唔覺有海豹~
不過其實都預咗，網上面得到嘅訊息係冬天遇到嘅機會比較低~
等到日落都冇發現，走人~
下一站 Galito (Dinner)
本來計劃去嘅餐廳係 Gamla Kaupfelagid，不過，我哋食飯前到住宿處 check-in 先，同對方傾咗兩句，對方對 Gamla Kaupfelagid 呢間餐廳好有意見~
話份量少，唔好食，服務差，都踩得幾盡，唔建議我哋去~
跟住就推介咗 Galito 呢間俾我哋~
其實邊間都冇所謂，既然佢咁講，我哋就去 Galito~
Cheese Burger - French fries and cocktail sauce
肉有點乾，同呢十日食到嘅漢堡有幾大差距，但味道還不錯~
Langoustine Tagliatelle - Langoustine, Langoustine-sauce, rocket salad, cocktail tomatoes & parmesan cheese
小龍蝦好食，個麵都唔錯~
Grilled Veal Rib Eye - Curly french fries, truffle bernaise & vegetables
牛扒好好食！有牛味，肉夠腍，汁又好味，正！
Galito Fresca - Parma-ham, mozzarella, tomatoes, rocket salad & parmesan cheese
正常嘅好味道~
整體唔錯，果然冇介紹錯！
今晚喺冰島好有機會睇到極光，大半個冰島都天晴~
極光指數雖然唔高，不過從唔同渠道得返嚟嘅消息，就算極光指數低，見到極光嘅仍然大有人在~
大家喺住宿處沖完涼就出去追極光~
我喺 app 度睇到已經有幾處地方有人話睇到極光~
不過可惜，雖然大半個冰島都天晴，但我哋就喺嗰細半個天陰嘅區域~
我哋嘗試揸車向冇雲嘅地方進發，都行咗半個鐘有多，不過去到都係烏雲蓋頂~
放棄了，總不能揸幾個鐘車去追，又揸幾個鐘車返住宿處~
隨緣吧~
今日發現咗一樣嘢，由進入 Snaefellsnes Peninsula 開始，明顯比北部多返好多車~
個對比係非常明顯，相信係因為好多人只係遊南部同草帽山，所以呢邊明顯多好多車~
沒有留言:
發佈留言