Blönduóskirkja (鯨魚教堂) → Hvitserkur (大象岩) & Seal Watching (觀賞野生海豹) → Bakki Restaurant (Lunch) → 59 Bistro Bar (Dinner) → Grundarfjordur Guesthouse and Apartments (住宿)
今日第一站 Blönduóskirkja (鯨魚教堂)
冰島有部份教堂，設計獨特，非常值得欣賞~
Blönduóskirkja 係其中之一，而且仲好出名~
被稱為「鯨魚教堂」，大概係因為呢面嘅設計吧~
教堂冇開(還是未開？)，不過唔緊要，醉翁之意不在酒~
下一站 Hvitserkur (大象岩) & Seal Watching (觀賞野生海豹)
去 Hvitserkur 條路，有機會因路況不佳而封路~
如果去唔到 Hvitserkur，等於去唔到 Seal Watching 嘅地點，因為佢哋喺同一個地方~
Seal Watching 嘅地點仲有兩個，不過就比較唔順路~
開車前睇過路況資訊，確定冇封路~
沿途風景~
Hvitserkur，有人叫大象岩，有人叫犀牛飲水~
觀景台呢度，有條唔似路嘅路落到去~
不過呢條路，就算係夏天冇積雪，都屬於危險級數，冬天有積雪，真係唔好行~
當然我哋都冇行落去~
離開觀景台，行返去停車位置，再行遠少少就有路可以落到沙灘~
中途，喺高處，有人話見到有兩隻疑似海豹，大家都企定定係咁望~
不過可能一瞬即逝，剛才話見到嗰個都再搵唔返海豹嘅蹤影~
落到沙灘，不停望，都唔見，再等吓~
等等吓，終於見到喇！
見到一隻，佢明顯對我哋好好奇，同時亦好有戒心~
佢望住我哋，望一陣就潛返落水，隔一陣又上返水面再望住我哋~
好似扑傻瓜咁，喺右邊望完，縮返落水，隔一陣就喺左邊再出返嚟，時近時遠~
當然，係咪同一隻就唔清楚喇~
不過我覺得，一係就冇，如果有嘅，冇理由得一隻咁少~
等咗一段時間，終於見到兩隻一齊露出水面~
不過器材太低級，比較難影到清晰嘅相~
呢張就影到佢露出水面比較多嘅身影~
之後等等等都係差唔多，我就自己行過去 Hvitserkur 嗰邊~
回程時，我見佢哋幾個好似喺度跳緊舞咁，手舞足蹈好似好興奮咁~
可能係想吸引啲海豹游近啲卦~
行吓行吓，嘩！原來水面有成十隻咁多！不過一舉相機就潛晒落水......影唔到了~
附近風景~
下一站 Bakki Restaurant (Lunch)
餐廳係酒店餐廳，推門入去，一個人都冇~
時間係有點晏，所以我懷疑餐廳係休息中~
跟住有個人行出嚟，我哋問佢餐廳係咪仍然營業中~
對方話係，跟住帶我哋入去餐廳~
入到去，見到啲櫈翻轉晒放喺檯面......
真係唔好意思，但又係對方話營業中......
對方有禮、主動、殷勤，呢刻都冇咩好諗，只好以有禮態度回應對方嘅專業~
佢慢慢咁擺放餐巾同刀叉，有種堅持自己專業嘅感覺~
對方可能好樂意去服務我哋，只係我哋自己有種意外地強迫人服務自己嘅心態，有點不好意思~
選擇不多，三主菜一沙律~
Dish of the day
Lobster Rigatoni, soup of the day is included
(自已求其譯嘅，總之就係小龍蝦長通粉，對方係講 Lobster 的，其實係小龍蝦~)
爆鹹，除咗鹹味，咩都食唔到！
Baconburger
180gr. beef burger, egg, bacon, BBQ sauce, cheese and french fries
件漢堡牛夠晒厚，亦都係一貫牛肉漢堡嘅美味~
Lobster Pizza
Homemade pizza with lobster, bell pepper, onion, cheese and sauce
好普通，同時亦都係太鹹~
Side Salad
Mixed salad with some dressing
反而沙律幾好，可能係因為食完咁鹹嘅嘢，再食啲咁清新嘅嘢，一定好食~
下一站 Bjargarsteinn mathus、Laki Hafnarkaffi、59 Bistro Bar (Dinner)
係，食完 lunch 就去食 dinner~ XDDD
因為呢程車要成四個鐘甚至更耐，去到目的地都可以食晚餐了~
沿途風景~
呢程車，開車唔係好耐，啲乘客已經瞓晒，山狗就唔知點解錄錄下冇錄到~
所以呢一段嘅風景，沒有留下記錄，可惜~
近黃昏時，天氣轉差，係突然轉差，差得好快，烏雲蓋頂，開始大風大雪~
大風大雪，由黃昏至到天色全黑，冇減弱過，相反，係越嚟越大~
行經 54 號公路，天全黑，風大雪大，拐了一個左彎後嘅直路，見到有個人喺馬路上，雙手舉高大幅度搖擺，似乎係想求救~
以我嚟咗冰島十多天嘅觀察，冬天嘅東部至北部，唔計城市同小鎮，真係可以好耐都冇一架車經過~
我十分相信事發地點都係好少有車經過，唔知對方等咗幾耐......
現場嘅路有點窄，我後面亦有一部車尾隨，我緩緩減速，亮著危險警告燈，盡量靠右慢慢停下~
後車係一部小貨車，亦有跟隨一併停下，司機(下稱冰島男)落埋車~
我同屎塔阿飛三個落車睇吓咩事，阿珊同媽咪就留喺車，畢竟現場環境非常惡劣，如非必要最好留返喺車上~
求救嘅係一個台灣人(下稱台灣男)，原來佢部車跣咗落左邊嘅斜坑，動彈不得，車上還有佢老婆同八歲女孩~
佢見我哋落車，即刻訴說佢嘅情況，同想我哋點做~
方法只得一個，就係嘗試推返部車上嚟~
冰島男望咗兩眼，覺得行唔通，著台灣男打電話求助~
台灣男話想試一次，希望冰島男願意幫忙，冰島男亦一口答應~
我哋幾個用盡力氣，推~~~
結果同冇用力係冇分別，完全唔郁！
冰島男覺得冇得救，再次著台灣男打電話搵救援~
可惜，現場係冇訊號......
天呀，推車冇用，電話都打唔到，現場環境又惡劣到不行，怎辦......
冰島男建議，載三個台灣人離開現場，找個安全地方再求救~
冰島男的車有兩個空位，佢話佢載兩人，叫我哋載一人，一齊離開~
可惜，我哋部五人車，已經有五個人，實在冇辦法再載多一個人......
冰島男唯有喺唔太願意嘅情況下叫三人上車~
可能始終關係到法例問題先至唔太願意，但為咗幫人，超載都係迫不得已~
事情發展到呢度，我哋都唔多作逗留，盡快上車離開呢個危險地方~
下圖係事發地方，紅圈係台灣男車子墮進斜坑嘅地方~
想像一下，現場全黑，左右兩側係咩環境完全睇唔到~
加上非常大風雪，兩眼都睜唔開，又怕有車駛過收掣不及會被撞到~
就算阿珊同媽咪喺車上面，我都一樣唔放心~
所以我係一刻鐘都唔想多逗留，決定好由冰島男載台灣男一家離開後，我哋都冇猶豫，盡快上車離開~
去到餐廳附近，其實大家都未肚餓，未想食嘢住，咁就去咗 Grundarfjordur Guesthouse and Apartments (住宿) 先~
安頓好之後，再休息咗一陣~
有諗過去超市買啲輕食就算，不過睇返時間，超市早就閂門了~
之後上網睇吓 Bjargarsteinn mathus 收幾點，諗住就返時間去食嘢~
點知，Bjargarsteinn mathus 正值 Winter Break，冇開度！
哎吔，今晚會唔會餓死咖！
即刻上網睇吓附近有咩食~
得返兩間餐廳未閂~
一間係 Laki Hafnarkaffi
一間係 59 Bistro Bar
搵好資料就即刻出門口，費事連呢兩間都閂埋~
由於 Bjargarsteinn mathus 就喺住宿處附近，都有走過去睇吓，一如網上告示，Winter Break~
跟住就去 Laki Hafnarkaffi，有燈有人，又未過營業時間，掂啦！
推門入去，對方話正在準備閂門，因為冇客，所以提早關門......
人哋講到咁，唔通賴死唔走咩......
咁好啦，去 59 Bistro Bar 啦~
呢間係最後一間，都閂咗門就要食乾糧做晚餐喇......
去到 59 Bistro Bar，燈火通明，好多客喺餐廳入面，放心晒~
由於我哋仍然唔肚餓，五個人入去叫少少嘢又唔好意思，一於買外賣返去食~
我哋只係買咗一個大 Pizza，Mexican Tortilla Chips Pizza
由於我唔鍾意食墨西哥玉米片，所以真心覺得唔好食~
同埋，就算唔講味道，講質感，夾咩？？？
除咗 Pizza，仲有之前喺超市買咗嘅乾糧~
Chocolate Donut 幾好食~
今晚天氣差，不用等極光了~
沒有留言:
發佈留言