Víti (火口湖) → Vogafjós Farm Resort (Lunch) → Hverfjall (惠爾山火山口) → Dimmuborgir (黑色城堡) → Skútustaðagígar (假火山口) → Dalakofinn Restaurant (Dinner) → Guesthouse Storu-Laugar (住宿)
今日如常地，喺出發前睇吓啲天氣同路況，發現通往 Dettifoss (黛提瀑布) 嘅兩條路都封咗，去唔到了~
去 Dettifoss 嘅兩條路，分別係 864 號公路，可以去到 Dettifoss 嘅東面；另一條就係 862 號公路，可以去到 Dettifoss 嘅西面~
864 呢，冬天一定會封的，但 862 就睇情況而定~
去唔到 Dettifoss，就要諗吓有咩地方可以去~
睇返我所做嘅功課，我決定去 Víti (火口湖)，咁之後嘅行程都唔駛郁~
本身冇諗住去 Víti，係因為冬天好多時都只係睇到積雪，睇唔到火口湖，所以冇諗住去~
既然而家有時間多出嚟，一去無妨~
今日第一站 Víti (火口湖)
今日個月亮又大又圓~
今日冇乜雲，不過風就有點大~
經過 862 公路嘅入口，顯示已關閉~
去 Víti，必定會經過 Krafla Power Plant (發電廠)~
條管成個龍門咁，幾有趣~
過咗 Krafla Power Plant 再行前啲就到 Víti 入口，不過封咗路~
雖然係封咗路，但只係封半條，我哋見有遊人自遠處落緊嚟，亦有遊人嚟到泊部車喺附近望一望個牌就行上去~
唔通只係車唔可以上，但人可以？
一場嚟到，就跟住上~
沿途有啲路面有積雪，有啲跣腳，大家都要好小心咁行~
不過行上去呢段路，風景幾好，唔為 Víti，只為行上嚟都值~
上面呢度好大風~
吹到啲雪一層層，好特別~
條路凹凹凸凸，如果揸車上嚟都幾惡搞~
一如所料，Víti 舖滿積雪~
回程撞啱日出~
五個火柴人~
下一站 Daddy's Pizza (Lunch)
沿途風景~
去到 Daddy's Pizza，疑似冇開~
行去門口望吓，門口貼咗張告示，告示話關閉至一月底......
咁就要睇吓附近有咩食喇~
喺 Google Map 度睇到附近有間餐廳，仲顯示係營業中，就過去睇睇~
下一站 Vogafjós Farm Resort (Lunch)
餐廳一個客都冇，但見有人做緊嘢，唔知道係冇客定唔開~
我哋向對方說明來意，對方話未必可以服務到我哋，因為陣間有一個 50 人嘅團嚟，要問問廚房先~
等咗一陣，對方話可以入座，咁就好喇，唔駛再搵地方食嘢~
坐低後，就每人俾一隻碟，隻碟幾靚~
今次只係叫咗三樣，因為唔係好揀到，不過食完會叫甜品~
Cured Wild Goose
With crowberry cream cheese, caramelised onions and homemade crackers
一開頭淨係食鵝肉，真係麻麻地~
呢個 caramelised onions，就咁食直情係抗拒~
不過，將 Goose、caramelised onions、homemade crackers、crowberry cream cheese 四樣嘢夾埋一齊食，完全係另一回事，雖講唔上好好食，但至少可以話係唔錯，味道好獨特~
Vogafjós Beef Burger
160 gr beef from our farm with homemade bread, our own Mývatn mozzarella, onion, tomatoes and sauce
Served with potato with cheese, fresh salad and our own Mývatn salad cheese
牛肉漢堡，真係唔識分，個個都差唔多，一貫冰島食到嘅高水準~
Vogar Sandwich
Homebaked bread with our own Mývatn mozzarella, tomatoes, leek, ham, vegetable sauce and fresh salad with Mývatn salad cheese
呢個三文治又係，係預期嘅味道，唔錯~
Vogafjós Cake
Homemade chocolate cake with pecan nuts and caramel
味道唔錯，但係個質感我自己麻麻地~
反而旁邊啲 cream 好好味，係意外地好味！
Homemade cakes of the day
Apple Cake
味道一般，同埋個質感我自己麻麻地~
反而旁邊啲 cream 好好味，係意外地好味！
下一站 Hverfjall (惠爾山火山口)
睇相唔覺，Hverfjall 其實好巨形~
香港喺世界地圖上只係一點，甚至冇影；一個人喺 Hverfjall 上，情況都係差唔多~
Hverfjall 入口有告示，講明再入的話，可能會遇到困難，如果需要叫拖車，費用將會很昂貴！
我哋猶豫咗一陣，決定見步行步，跟住車胎痕行應該冇問題~
雪有點深，但覺得還可以~
去到一處彎位，雪再深啲，諗緊仲前唔前進好，因為我身處嘅地方可以停到幾部車，諗緊好唔好就擺呢度，行入去~
不過我見到入面有部普通 SUV，又有胎痕可以跟住行，就試吓~
一進入較深雪嘅彎位，即時被困，四輪空轉，完全行唔到~
好彩，倒車係可以嘅，咁就唔再搏喇，就倒車停返喺之前可以擺到車又唔阻人嘅地方，開始步行~
由呢度行入去，要行大約一公里~
圖中呢部就係我之前見到入面嗰部車，其實過咗個深雪彎位，係完全冇問題，過到就係......
過咗部車，繼續行~
好大風~
結咗冰嘅路面，底下係水，唔小心踩咗上去，可能會跣倒，可能踩穿冰面，濕腳或拗柴，可能咩事都冇......
收費洗手間~
行到嚟山腳，睇睇指示牌先~
指示牌呢邊，雪深達膝，寸步難行~
指示牌所示嘅，我之前都知道~
就係有兩條路上山頂，一邊長啲，但冇咁斜~
一邊短啲，但就斜啲~
其實一開始我已經揀咗條冇咁斜嘅，如果要行條短啲嘅，要由部車度開始轉右行，我哋而家係轉左~
我哋到達嘅時候，有兩個人開始行上去，除咗佢哋，就只有我哋~
今日好大風，現場積雪亦深，難怪冇乜人嚟~
我哋都猶豫過行唔行上去好，最後都係決定繼續，行慢啲小心啲，再邊行邊評估啦~
就咁望上去，唔係好斜亦唔係好高~
初時望上去覺得好似有條路，但其實行上去先知，係冇路，又或者俾雪蓋住睇唔到~
條路唔算好斜，但點講都係一條斜路，路面唔係碎石就係積雪，每一步都係失平衡後再調整重心先令自己唔會扭親或跌親~
加上大風，其實真係每行一步都危險~
好不容易先行到近頂，先前上去嗰兩個外藉人士，好心提醒我哋千萬要小心，上面大風得好緊要~
佢哋話佢哋都只係可以企出去影一張相即時縮返埋嚟，都唔敢逗留~
喺而家呢一個位，因為地形關係，有遮擋物，所以冇咁大風~
亦因為地形關係，再上的話就要爬上去~
我哋都知道再上話，危險度係倍增~
因為一過咗呢處遮擋物，啲風真係大得可以用變態嚟形容~
如果唔係有人上過去而又落得返嚟，真係覺得啲風可以將成個人吹走！
由呢度望出去，感覺都幾高~
風雖然大，不過都係一陣陣，當然，唔係極大風嗰時其實都係極大風，只係冇咁變態......
我哋趁冇咁變態嗰時就爬上去，爬到半路，塊面勁痛，啲雪好似一支支針咁打埋塊面度！
呢個時候，聽到阿珊叫咗一聲~
原來阿珊頂帽俾風吹走咗......
阿珊本身戴咗冷帽，冷帽外仲有大褸嘅帽，啲風吹開大褸頂帽，再吹甩頂冷帽，啲風真係好癲！
好辛苦先爬到上頂~
我除右手手套，打算影相時，將手套放腋下夾緊(自以為夾緊)，影完相發現唔見咗......
可見範圍都唔見，亦冇人見過佢被吹走，我諗係太大風，吹走嗰吓係好快，所以冇人見到~
我哋五個人，全部都係背住座山，因為啲雪打埋塊面度痛到頂唔順~
要等冇咁大風嗰刻(可能只係一兩秒)，回頭偷望一吓就要縮返嚟~
頂多影到咁樣......
其實呢，我自己就想行出啲望吓嘅，一場嚟到嘛，影張相留個回憶都好吖，我覺得小心啲應該冇問題~
不過我知現場三位女士都會阻止，所以最後都冇咁做~
我都明嘅，行出幾米先望到入面，但行出幾米就係最應風嘅地方，係危險嘅~
我哋五個而家背向住都唔敢點郁，驚一郁就吹走個人咁~
不過既然唔會再行出啲，就無謂停留喺一個咁危險嘅地方喇~
趁啲風冇咁變態嗰時起身回程啦~
回程呢，真係點上嚟就點走，就好似倒鏡咁，扭返轉面爬返落去~
扭轉面呢吓，真係......身處高峰，嚐盡雪針，暴風的加冕~
其實落仲危險過上，幾經辛苦，最終返到落山腳，真係鬆一口氣~
屎塔要去收費洗手間，不過要入去都唔容易，啲雪深到去屁股咁滯！
要爬住又潛住咁先入到去......
回程行返去部車度~
行返去時，我好留意四周，因為我覺得，阿珊頂帽同我隻手套，有機會喺度搵得返~ XDDD
結果......冇發現......
其實有都俾雪覆蓋咗，唔會喺面囉~
下一站 Dimmuborgir (黑色城堡)
所謂城堡，其實係地底岩漿被推到地面以上，冷卻而形成嘅不規則岩柱~
天色已經暗咗落嚟，時間比我預計嘅遲，不過都冇辦法，一月嘅冰島，日照時間實在太短~
嚟到停車場，又睇吓啲指示牌，原來分咗好幾條路嘅~
不過，一來時間問題；二來其實睇十座岩柱同睇一千座岩柱可能都係咁上下嘢，所以，我哋決定行條最短嘅~
唔嚟到現場真係唔知，原來啲岩柱係咁大舊，同埋範圍咁廣~
無論從地質角度，或是從奇特角度，再或者係從藝術角度，都非常值得嚟現場感受吓~
呢個時候嘅呢一個景，真係正，成幅畫咁~
下一站 Skútustaðagígar (假火山口)
睇人哋啲相呢，Skútustaðagígar 冬天有積雪其實冇咩好睇，只係反正順路就嚟望吓~
天色呢，就好暗咖喇，如果唔係順路，應該都唔會刻意嚟~
途經 Mývatn (米湖)，冇咩特別~
到咗 Skútustaðagígar，現場睇同人哋啲相好唔同，都幾得意喎~
外面望吓就算，天都暗到咁，唔行入去喇~
下一站 Dalakofinn Restaurant (Dinner)
三餸一湯~
Icelandic Soup
Homemade traditional Icelandic soup, with mutton meat and assorted vegetables, made with our recipe, served with our homemade bread and butter
個湯幾重羊味，但唔算好好飲~
同埋個湯都唔平，同下面個 Chicken Ciabatta 同價......
Dalapizza (16")
Pizza with sauce, cheese, pepperoni, pineapple, mexico cheese and sun-dried tomatoes
個 Pizza 好食！
我哋叫 12"，佢整咗 16"，佢話收我哋 12" 價錢，問我哋介唔介意，梗係唔介意啦！雖然最後有點飽，不過都係食晒！
Dalaburger
120g hamburger with cheese, lettuce, bacon, fried edd and hamburger sauce
普遍嘅好味道漢堡~
Chicken Ciabatta
Pan fried chicken breast in ciabatta bread, with lettuce, cucumber, tomatoes and mustard sauce, served with french fries
個雞胸唔錯~
食完嘢就去 Guesthouse Storu-Laugar (住宿)，完結今日行程~
今晚天氣差，不用等極光了~
沒有留言:
發佈留言