Stokksnes (天空之鏡) → Eggin í Gleðivík (蛋蛋港口) → Bulandstindur (金字塔神山) → Seyðisfjörður (小鎮) → Fjalladyrd - Modrudalur á Fjollum (住宿)
今日出發前，大家都出咗去個小山丘度瀡餐飽先~
今日第一站 Stokksnes (天空之鏡)
其實冰島嘅天空之鏡，周圍都有，只係大多數都要細心去搵，仲要等合適條件先會出現~
但位於 Stokksnes 嘅天空之鏡，一來唔需要去搵，二來唔難預到出現天空之鏡嘅條件，當然啦，要好靚好靚嘅天空之鏡，就要碰碰運氣喇~
今日天色唔算好，但起碼冇落雪或落雨，我覺得有機會出現天空之鏡~
行行吓見到隧道，但個方向同導航有好大出入~
冇計，行錯都要繼續行落去先~
過咗隧道個景都幾正！
不過方向肯定係錯咗，只好搵個合適嘅地方掉頭~
好彩呢條隧道唔駛錢嘅~
掉頭再過返隧道，仔細睇住個導航，原來我錯過咗條小路~
呢條小路路面係冰面，有啲跣~
行行吓見到幾隻冰島馬~
冰島真係處處是風景，好靚~
離遠見到隻冰島馬，我本來已經揸得慢，而家要再慢啲，以免撞到隻馬~
隻馬真係走過嚟我哋度，我只好停車~
玩咗一陣，隻馬行到去車側，用個屁股對住我哋，我哋又開咗窗，真係驚佢馬有三急，我即刻開車走人~
Stokksnes 呢邊嘅呢座山，又名蝙蝠山，因為兩邊山角好似隻蝙蝠耳咁~
入去呢個地方，係要俾錢嘅，就係去呢個 Viking Café 度俾錢~
ISK(Kr)800 一架車......咪住，ISK(Kr)800 一個人？
我之前上網睇，唔止一個人講話 ISK(Kr)800 一架車咖喎！
嘩，ISK(Kr)800 一個人，貴就唔算好貴，只係突然間貴咗四倍覺得難接受啫！
俾完錢，對方俾咗張地圖我哋，好簡單咁講解咗個地形~
呢度其實都幾靚，唔為天空之鏡都值得嚟~
泊好車，我就行快兩步去探吓路先~
去到一處黑沙灘，有啲絕望~
天空之鏡，應該要有平靜嘅水面，但而家呢刻天色唔好又大風，放眼遠望，完全睇唔到有平靜嘅水面~
睇嚟，要遇到天空之鏡，唔係好樂觀~
但行到嚟呢度，除咗走落沙灘，其實都冇咩路行，遠處有人影緊相，唔理喇，行落去睇吓先~
行到去人哋影相嘅位置，真相大白！
一直以嚟，以為要有平靜嘅水面，例如湖面，先會出現天空之鏡嘅想法係錯誤嘅！
走到落嚟沙灘，先發現，水浪延伸至沙灘上，再倒回去時，在沙面上留有一層薄薄嘅水，呢層水面，沒有受現場大風嘅太大影響，勉強算係平靜，於是就可以反映出蝙蝠山嘅倒影，是為天空之鏡！
見到天空之鏡後，我即時打電話通知佢哋~
天空之鏡，著鮮色衫嚟影相，效果非常之好！
今日個條件已經唔係好，但天空之鏡個效果一啲都唔差，所以我主觀地相信，喺呢度見到天空之鏡嘅機率應該唔會低~
如果條件好時，相信可以倒映出完整並且清楚嘅蝙蝠山~
海浪一個又一個咁衝上沙灘，有時啲浪大到會衝到我哋企緊嘅位置，要即時逃跑，所以我哋盡量都要搵一個人負責睇浪，以免被浪衝倒~
我哋企嘅位置比較入，就算被浪衝倒都不至於有咩危險，但整濕晒對鞋就唔好啦~
啲浪衝上嚟時，有一種抹鏡嘅效果，沙面嘅所有痕跡都即時被熨平，新嘅鏡面又再出現~
我哋都玩咗好耐，影咗非常多嘅相，玩玩吓突然落雨，一落雨水面就唔平靜，完全冇咗鏡面效果~
不過只係落咗一分鐘就停咗，繼續玩！
之前我自己走落沙灘時，佢哋見到天色咁差，覺得天空之鏡未必出現，行經途中見到有個平靜嘅小水面，當係天空之鏡頂住先~
玩到夠晒皮就揸車離開，去返 Viking Café 去個洗手間先~
回程時影嘅，好似一幅畫咁，似畫出嚟多過係現實環境~
下一站 Eggin í Gleðivík (蛋蛋港口)
所謂蛋蛋港口，係 Djúpivogur 當地有位藝術家，喺當地一個港口，樹立咗 34 顆鳥蛋嘅雕飾，每顆鳥蛋都係當地唔同品種嘅鳥類嘅蛋~
其實喺計劃旅程時，我係剔除咗呢個景點，因為今日嘅行程本來就係有點趕，不過屎塔話想去，咁就安排去埋啦~
由 Stokksnes 去 Djúpivogur，以冬天嘅路況，車程要差唔多兩個鐘~
離開南部向東部進發，路況明顯比南部具挑戰性~
彎道較多，地勢較高又近海，有時上到斜路頂後係急彎，非常危險~
揸咗差唔多兩個鐘車，只係遇到過兩部對頭車，真係少車得有點不可思議，好似去咗一個冇人存在嘅地方~
睇嚟，冬天環島嘅人，比想像中少得多~
沿途風景~
Eggin í Gleðivík~
睇睇吓又落雨，落咗兩三分鐘就停咗，再出太陽，所以就見到彩虹了~
下一站 Bulandstindur (金字塔神山)
離 Djúpivogur 不遠嘅地方，有個可供停車嘅位置，就可以清楚望到呢座仿如金字塔嘅神山~
Well......所謂清楚望到，只係講地理位置，天氣呢......就睇運氣喇......
等咗五分鐘，好少少~
算吧，反正順道經過先會嚟，到此一遊算吧~
下一站 Seyðisfjörður (小鎮)
東部嚟講，其實冇邊一個小鎮真係好想去，但係我又唔想一日下來就只有揸車，最後就揀咗去 Seyðisfjörður~
由 Djúpivogur 去 Seyðisfjörður，車程要成三個鐘~
本來就唔駛嘅，有條路係 1 號轉去 939 再轉去 95 公路，咁就兩個鐘到就到~
939 號公路，有人稱之為冰島最美公路，不過冬天行 939 其實係幾危險，我初時唔知，到全部行程定晒先知，所以就決定睇情況再算~
今日，939 號公路封咗，唔駛花心神去諗行唔行喇，冇得揀，要行條長啲嘅路~
所以今日行程一定有所延誤，但唔去 Seyðisfjörður 又有時間多，亦有少少唔甘心，所以都係去啦~
沿路都有唔少危險位，不過只要唔好揸咁快，喺某啲位真係要識得收，望清楚安全先繼續行就得~
其中最緊要係去到斜路頂一定要慢車，因為斜路頂後可以係直路，亦可以係急彎，更加可以有人有馬有羊有其他生物或死物，一定要望清楚先好行~
沿途風景~
行到中途，全車人都瞓晒，當然唔包括我啦~
而喺呢段車程入面，山狗原來冇運作到，我都係事後先知~
啲人瞓晒，山狗又冇錄到，所以中間有一段風景，完全冇任何記錄......
乘客瞓醒後嘅沿途風景~
下圖係 Egilsstaðir 附近，距離 Seyðisfjörður 最近嘅小鎮，即係我哋就嚟到~
特別提起 Egilsstaðir，係因為原來由 Egilsstaðir 至 Seyðisfjörður 呢段路，係喺山腰上面~
雖然係山腰，但其實都相當高，有啲彎係 U 型彎，彎外係乜都睇唔到，只係見到天空，係咪懸崖其實都唔係好清楚~
再加上山上非常大風，又落緊大雪，有啲路面仲結咗冰，感覺係幾驚險~
落斜時去到某處，突然有一堆厚雪，好彩我唔係行得快，不過都係收唔切有少少衝住入雪堆，還好我睇住前人留下嘅胎痕行，跣咗兩嘢就冇事，行返直線~
過咗呢度，屎塔問：陣間係咪都要行返呢條路去住宿處？
我先愰然大悟，係喎，回程時咪天黑？漆黑一片行呢條路危險程度一定倍增~
不過我相信只要識得慢，識得避開危險嘅路面，問題應該不大~
去到 Seyðisfjörður 時，天已全黑，我哋去咗 Seyðisfjarðarkirkja (教堂)先~
教堂前係一條彩虹小徑，不過冬天通常都被雪覆蓋掉~
我揀咗嚟 Seyðisfjörður，除咗教堂，其實仲有一個景係幾靚嘅~
不過天都黑晒，心目中嘅靚景係唔會存在~
一場嚟到，都走過去行吓，叫做嚟過存在過吧~
本來想睇嘅景，係教堂呢邊嘅屋仔，加上背後嘅山景，倒影在水中~
不過而家水面有部份結咗冰，冇結冰嘅亦都因為大風而不平靜，就算有日照時間嚟到亦唔會睇到倒影~
就影張相記念此時此刻吧~
原來嘅計劃，約 1630 會完成 Seyðisfjörður 嘅遊覽，所以唔會喺度食晚餐~
由 Seyðisfjörður 至住宿一段都搵唔到餐廳，所以原來嘅計劃係自已煮~
雖然而家係五點幾，但食晚餐略嫌太早，所以就維持原來計劃，自己煮~
我同佢哋去咗超市先，再自行返教堂揸部車過超市~
入咗超市，問吓職員最近洗手間喺邊，佢教咗我去~
於是我就同團員講，我自己揸車去探吓路搵洗手間先，轉頭返嚟~
當我去到超市員工所指嘅地方，閂咗門，冇得用佢個洗手間，咁唯有喺地圖睇吓附近有啲咩，再揸車過去睇睇~
我哋已經幾個鐘冇去過洗手間，嚟緊仲有一段路程，所以我哋喺 Seyðisfjörður 呢度，一定要去咗先~
最後搵到間油站快餐店，寫明如非顧客，洗手間 ISK200 一個人~
都好，起碼有得解決先，或者陣間一人買啲嘢就可以免費用，陣間先算~
我再揸返車返超市，知道今晚會整小龍蝦湯、小龍蝦、雞搥同腸仔，嘩，夠晒豐富！
買完嘢就去返間油站快餐店，我哋每人買一樣雪糕，咁就可以免費去佢個洗手間~
搞掂晒就起程去 Fjalladyrd - Modrudalur á Fjollum (住宿)~
開車時係落雨，不禁令我心情有點緊張~
要知道結咗冰嘅路面遇上落雨，係可以好跣~
不過經過呢幾日嘅經驗，我相信只要小心啲，係可以駕馭到~
上到山路，由落雨變落雪，落雪好呀，能見度低唔緊要，唔好太跣就得~
不過山頭啲風仲大過嚟嗰陣，啲雪被吹到打橫過嘅~
有驚無險咁過咗呢個山頭，成個人鬆晒！
繼續行繼續行，左轉離開 1 號公路，導航顯示仲有七公里~
一路行一路行，左右乜都冇，一間屋都冇，究竟七公里後係咪真係會有可供住宿嘅地方？
如有，點解會去到咁入先有呢？奇怪~
行咗七公里後，真係有屋，有幾間屋，有一間仲應該係接待處嚟，咁都放心啲~
我哋走近接待處，有燈但冇人，門又鎖咗，敲門又冇人應，只好打俾佢~
響咗好耐終於有人接，係個男人嚟，我哋說明來意，對方乜都冇講就收咗線......
咁嘅情況下，只好再打多次~
呢次，再打通咗之後，即刻變唔通，擺明係拒絕接聽~
呢刻我哋都唔知點算好，徬徨之際，有個男人走出嚟，原來佢就係頭先接電話嗰個男人~
個男人黑面到呢，好似我哋半夜先到，嘈醒佢咁~
網頁明明話 check-in 時間至到 2100，我哋打俾佢嗰時係 2030，係，2030 絕對唔算早，但至少我哋冇遲過你定好嘅時間，嚴格嚟講，我哋冇問題喎......
不過唔理佢啦，佢鍾意黑面就黑飽佢~
間屋呢，有幾間房，除咗房間，其他都係共用空間，不過今日得我哋五個住客，所以，成間屋都係我哋嘅~
不過間屋有點殘舊，燈光昏暗，乾淨程度雖算滿意，但就冇一種好乾淨嘅感覺，可能因為有點殘舊令人有種錯覺吧~
放低晒行李，Chef Daisy 開始動工，仲有二廚三廚~
今晚呢餐真係不得了，非常豐富，辛苦晒珊飛同媽咪~
味道當然係非常棒啦，樣樣都好食！
今晚天氣好差，不停落雪，極光無望了~
沒有留言:
發佈留言