Glacier Adventure (Vatnajökull Blue Ice Cave) → Humarhöfnin (Dinner) → House on the Hill (住宿)
今日早餐由住宿提供，都係普通嘅西式早餐，不錯~
今日唔計食嘢，只得一項活動，就係 Blue Ice Cave (藍冰洞)~
我哋冬天嚟冰島，重點兩樣嘢，其一係北極光，其二就係藍冰洞~
藍冰洞存在於冰川內，有大有細，由於係自然形成，因此形狀同位置每年都有可能唔一樣~
一般較易去到嘅都係細啲，我哋就揀咗個大啲但遠啲嘅~
一來當然係貪佢大啲，二來會少啲人，三來佢都有少少冰川健行，咁就可以一個團有晒藍冰洞同冰川健行~
後記：網上睇到有人話報咗呢個藍冰洞團就唔駛報冰川健行，今日完成咗之後，可以肯定，兩個團睇嘅嘢完全唔同，兩個都好值得報，不過我哋時間唔夠，二選一，一定揀藍冰洞~
要去藍冰洞，不論大細遠近，都一定要跟本地團先去到，我揀咗 Glacier Adventure~
其實冇咩特別原因揀佢，主要係先入為主，個個去遠嘅都係揀佢，之後先見到有其他推介~
無論跟邊間都好，全部都係正面評價，咁跟邊間都冇問題啦~
根據呢個藍冰洞團嘅介紹，成個過程係咁：
30 分鐘車程
90 分鐘健行
藍冰洞 (可能唔止去一個)
90 分鐘健行
30 分鐘車程
全程約需 6 小時，所以喺體力上係有啲要求~
更重要係......中途冇洗手間的......
由於中途冇洗手間關係，食早餐時都唔敢飲咁多嘢，同埋確保每人要去多次洗手間先去報到~
呢間博物館係博物館，係接待處，亦係餐廳，我好懷疑，Glacier Adventure 都係喺博物館呢度~
我去完洗手間，等其他人嘅時候，出門口望吓，原來今次估錯，Glacier Adventure 喺另一間屋度~
門口有兩部四驅車，唔知陣間係咪坐其中一部呢~
入到去報到後，佢就為我哋分配裝備~
我哋即時同佢講埋要租鞋~
睇佢表情，可能覺得我哋唔需要，不過都冇講啲咩，淨係話租鞋 ISK1000~
冇問題，我出發前問咗，所以都知價~
有成四五個鐘喺戶外，真係怕自己對鞋防跣防水唔太足夠，呢啲錢唔好慳~
裝備有兩樣~
冰爪、類似攀山嘅繩，套喺下半身嘅，不過佢話今日應該用唔著，穿上身備用~
其實就仲有一樣嘅，就係行山用嘅手杖，不過佢又話今日唔需要用，但如果有人想攞都可以~
既然佢咁講就唔拎啦，未拎過咩~
不過導遊話佢會拎，至少可以俾我哋影相咁話喎~
個團呢，最多可以八人，我哋嚟到時已經有四個人準備緊，加埋我哋五個就九個，初時我以為係同團~
到我哋準備好晒，另有導遊帶嗰四個人出發，而且裝備有少許不同，咁我諗佢哋係行冰川卦~
好嘞，我哋準備好晒，導遊又唔出發，等咩呢？
此時有兩位西方女土進入，原來我哋要等埋呢兩個先出發~
等呢兩個人準備好就出發嘞~
不過佢哋冇租鞋，目測佢哋對鞋同我哋自己著嚟嘅差唔多~
出咗門口，正正就係上藍白色嗰架四驅車，正！
初時就係行馬路嘅，行行吓就轉咗落去啲望落唔似路嘅地方~
沿路非常顛簸，普通車係一定行唔到~
導遊沿路都有講解吓冰島同藍冰洞嘅嘢~
亦都有講佢而家行緊嘅係真正嘅路嚟，並不是 offroad，因為冰島係禁止 offroad 的~
到咗停車場，我哋係第二部車~
落咗車，佢叫大家先套上冰抓~
之後派頭盔，佢話可以唔戴住，陣間入山洞先戴都得~
今日天色都幾差吓，不過應該感到興幸，落雨可能會取消，大風雪都可能會取消，而家如期出發已經好好~
導遊拎行山手扙係有用嘅，因為佢要一路行一路探路，因為沿途都有好多冰洞，一唔小心就會跌落去~
不過導遊話，今日嚟講，佢唔係第一團，所以跟住前團步行過嘅痕跡係安全嘅~
可能為咗安全，亦為咗保持住個警覺性，佢仍然係有邊行邊用手杖探路~
沿途大大小小嘅冰洞~
越行越熱，今日喺衣著上真係奶晒嘢！
前幾日收到 Glacier Adventure 傳嚟嘅電郵，提醒要準備嘅衣著，主要都係要保暖同防水~
於是我哋都預咗可能會好凍，結果......越行越熱，行到出汗咁滯......
行山行個半鐘，相信對好多人嚟講唔係咩問題，我對自己亦有信心~
不過，行嘅係雪地，則另當別論~
攰又唔係話好攰，只係喺雪地上咁行法，其實幾難行~
再者，行行吓，冰抓係會結住一舊冰，一踏落去嗰吓，係會頂住腳掌，都幾唔舒服，仲要係咁行~
解決方法有二：
1. 行一陣就整走舊冰
2. 除咗對冰抓佢
其實後者絕對唔係一個可行方法，冇咗冰抓仲難行！
唯有行一陣就整走舊冰，行一陣又整走舊冰......
導遊指住上面嗰團，佢笑住話嗰個導遊行得好快~
其實我覺得我哋嗰個導遊都唔慢呀，可能佢成日行唔覺自己快~
沿途風景~
行行吓見到呢個地方，我哋都覺得應該係佢喇！
肉眼睇唔係好藍，只係少少少少藍~
導遊指示我哋扶住條繩落，梯級係人工造出嚟嘅~
個洞入面一個人都冇，正！
就咁睇唔係好藍，不過靠近望就會藍啲，影相調吓啲設定就更加藍，同埋唔同相機影出嚟嘅色都好唔同~
導遊話唔可以過呢條繩~
咁就唯有就咁影埋去啦~
啲冰面全部都一個個窩形咁~
睇到中途就有其他團嚟，本來都冇乜嘢~
但睇睇吓，見到另一團導遊同團員越過咗條繩~
唔係唔可以越過咩？
不過係導遊帶領下越過定係團員越過先我就唔知~
我哋本來都冇諗住過去，但睇睇吓，我又見到我哋嘅導遊同同團嘅西方女士越過咗條繩~
喺咁嘅情況下，我哋自然都過埋去~
導遊話今日天氣唔算差，所以行入少少冇問題~
呢幅冰牆，如果有密集恐懼症都幾驚~
雖然同想像有啲距離，肉眼睇唔係真係好藍，不過真係一啲啲角度~
有啲就咁望都睇到藍色，有啲就冇，可能同光線反射角度有關吧~
點都好，都係一個好奇妙嘅自然景觀，非常值得到此一遊~
跟住就繼續行~
原本我哋都唔知係回程定點，總之跟住導遊行~
行行吓就去到另一個藍冰洞~
不過導遊話，嚴格嚟講，呢個唔算洞，上年就仲係，今年已經唔算係洞了~
喺度見到個結咗冰嘅微型瀑布，大約只有一呎高~
再行前啲，就去到要彎身先可以入到去嘅洞穴~
導遊話，上年呢度係好低，入唔到的，今年先可以入~
入去之前，放低隨身物品，戴好頭盔，同時派咗幾盞燈俾我哋~
唔夠一人一盞，到時唯有互相照應~
頭段還好，只係烏低少少就行到~
之後嗰段，比前段低得多，有啲位仲低過條腰，烏低晒身之餘，仲要屈膝咁行，行得超級辛苦！
有時左邊先有位行，有時右邊先有位行，所以沿途都過咗好幾次水路~
有啲係薄冰，一踩就爛，下面係水，有啲冇結冰，真情係小溪咁~
我哋覺得呢 ISK1000 租鞋真係抵俾，我哋都幾肯定嗰兩位西方女士對鞋濕晒！
過咗呢啲咁矮嘅地方，係一個垂直嘅冰洞，地方唔大~
導遊刻意踩爛啲冰面，我估佢係為免有人唔知係薄冰而踩咗落去~
導遊冇咩做，開始堆雪人~
入嚟之前放低咗隨身物品，意味住，離開時係要走回頭行得好辛苦嘅路......
幾經辛苦終於出返嚟~
再繼續行~
行行吓，阿珊話唔見咗手套，咁我就沿路行返轉頭幫佢搵~
行返去啱啱嗰嗰藍冰洞，有一團人，可能佢哋見我搵緊嘢，就開口問我係咪搵緊手套~
咁樣問得，當然係搵得返啦~
我行返轉頭，佢哋剛剛穿過呢隻藍冰眼~
過咗呢隻眼，我哋就喺一個小山丘上，小山丘下係一個鑽石沙灘~
呢個鑽石沙灘，一般遊客係去唔到嘅~
落呢個小山丘，有兩條路，一邊係行落去，一邊係瀡落去~
呢度好正，冇咩人，個景正都不得了~
回程就沿住湖面行返去~
湖面好平靜~
沿途風景~
離開湖面，開始行上斜，雪有點深~
導遊行行吓指住路邊一處黃色的雪說：Yellow snow
說實在，真係好難避免，咁多個鐘冇洗手間......
導遊又話，有啲細啲嘅藍冰洞易啲去，但可能會有大約二百人排緊入去......
咁我寧願花一日時間辛苦啲去睇個大啲又冇乜人嘅~
仲有個冇乜人嘅鑽石沙灘呢~
雪地行上斜，非常消耗體力~
中段開始，屎塔已經出現體力不足情況，要行吓抖吓~
最後要食幾粒可樂糖吊命......
我自己呢，未上斜之前，其實都冇乜嘢，亦唔覺肚餓~
中段開始覺體力下降，但還可以，去到尾段，都真係邊緣，最後都冇乜嘢捱到返車~
呢個團真係唔可以睇少，對體力有一定要求~
尾段開始落雪，算非常幸運了，回程先落雪~
捱到去部車到，好似見到救世主咁~
上車前還返晒啲裝備俾佢~
佢份工真係唔易做~
我哋行咁多，佢就行咁多~
我哋冇食嘢，佢又係冇食嘢~
我哋冇去洗手間，佢又係冇洗手間~
佢仲要照顧同行嘅安全，又要揸車~
不過佢可能真係操得多，見佢都好輕鬆~
開車時落雪，中途變落雨~
導遊話好跣，其實我哋都感受到，係跣咗好多次，而且回程比嚟嗰時更顛簸~
返到去，大家第一件事當然係排隊去洗手間啦~
呢度亦有免費嘅 coffee/tea/chocolate 提供~
大家去完洗手間，飲埋杯嘢，休息咗陣就離開~
下一站 Humarhöfnin (Dinner)
Höfn 有兩間比較出名食小龍蝦嘅餐廳，一間係 Pakkhús Restaurant，一間係 Humarhöfnin~
原本我計劃咗去 Pakkhús Restaurant，不過最後去咗 Humarhöfnin~
去 Höfn 途中，行行吓突然跣咗一跣，個個都感受到，拜四驅所賜，即時已經找回循跡，有驚無險~
去到 Höfn，經過有個小山丘，有人喺山丘上瀡緊落嚟，阿珊想玩，不過最後都冇去到~
去餐廳之前，去咗 Nettó (超市)入貨，見到傳說中嘅冰島發酵鯊魚肉，不過我哋唔係好敢試......
去到 Pakkhús Restaurant，好似冇開門，但明明今日唔係休息日，於是就落車走過去睇吓~
原來有漏水問題，所以冇開~
咁冇計啦，唯有去 Humarhöfnin~
Humarhöfnin 成個幻彩揈香江咁款，不停有唔同顏色嘅燈照住間廳~
打開 menu，選擇不多，唔理喇，貴都唔理，想食就叫~
A Grande mix of whole langoustine and tails
One whole langoustine (150gr) and tails (300gr) grilled w/butter, parsley and garlic. Served w/salad, tomatoes and basil. Fresh bread, pink langoustine sauce and black magic sauce.
蝦身同蝦尾喺味道上有少少唔同，雖講唔上鮮甜，但都算係幾好食~
Whole langoustine
3 whole langoustine, grilled w/butter, parsley, and garlic. Served w/salad, tomatoes and basil. Fresh bread, pink langoustine sauce and Black magic sauce.
味道同上，只係份量同配搭不同~
Langoustine pizza
"9" pizza w/garlic langoustine, tomatoes, olives, red onion, feta cheese and rucola.
蝦肉味道唔係好突出，但整體係好食嘅，尤其配搭咗火箭菜，好夾~
Lemon sole
Lemon Sole served with lemon sauce, capers, ovenbaked potatoes and salad.
味道相當普通，似喺快餐店食到嘅質素~
埋單時送咗幾片朱古力俾我哋~
佢個小龍蝦係幾好，難怪馳名中外，不過冰島嘅餐飲，普遍都係唔錯，要食到一樣高嘅水準，我相信唔難~
食完嘢就去 House on the Hill (住宿)~
途經又去返之前經過嗰個小山丘，注定阿珊有得玩，不過阿珊猶豫咗一陣都係話唔去~
就係經過呢一輪嘅對話同猶豫，我分咗心冇睇到導航，行錯路了~
左兜右兜，原來，House on the Hill，就係喺個小山丘上！
呢鑊真係迫住阿珊要瀡餐飽！
Check-in 完，整頓好晒啲嘢，珊飛媽咪就出咗去瀡，我同屎塔就選擇休息吓~
今日天氣唔錯，望到星星，不過極光指數好低，睇 app 亦冇人有報告有發現，最後倦極入睡了~
沒有留言:
發佈留言