Skeiðará Bridge Monument (斷橋遺跡) → Hofskirkja (傳統古式教堂) → Glacier Goodies (Lunch) → Fjallsárlón Glacial Lagoon (小冰湖) → Jökulsárlón (傑古沙龍浮冰湖) → Diamond Beach (鑽石沙灘) → Hali Country Hotel Restaurant (Dinner) → Hali Country Hotel (住宿)
今朝早嘅差天氣，可能係由噚晚延續到今朝~
今日第一站 Skeiðará Bridge Monument (斷橋遺跡)
行車中途，阿珊話漏咗件衫喺酒店~
陣間其實會走返回頭路，會經過酒店，所以陣間可以返去攞返~
到咗停車場，前面部車有個男人走埋嚟，指一指我哋嚟個方向，問天氣如何，是否可以安全行車~
當然係答佢可以啦，因為我哋就喺嗰邊嚟，只係天氣差啲啫~
Skeiðará Bridge Monument (斷橋遺跡)
下一站 Hofskirkja (傳統古式教堂)
沿途風景~
據說冰島只剩下六座古式教堂，以呢座為最古老~
下一站 Glacier Goodies (Lunch)
去 Glacier Goodies 時會途經 Fosshotel Glacier Lagoon，順便去攞返阿珊件衫~
返到去，原來仲未執房，好輕易就可以攞返件衫~
途中屎塔喺車向外望，見到呢度，以為有天鵝~ XDDD
天氣越嚟越差，能見度開始下降~
風雪中的 Fosshotel Glacier Lagoon~
風雪越嚟越大，能見度越嚟越低~
轉咗入小冰湖條路，好厚雪，剩係見到兩旁嘅黃色杆~
有諗過放棄，但又見到入面有車，就跟住胎痕慢慢駛入去，見步行步~
最後都入到去停車場，但白茫茫一片~
其實咁嘅能見度，真係懷疑仲睇唔睇到小冰湖......
唔理喇，食咗嘢先，不過都唔知 Glacier Goodies 有冇開~
原來門口大大隻字寫住「WE ARE OPEN！」
入到去見到服務員，就問吓佢，仲可唔可以去到小冰湖~
對方話可以，只係有點跣，要小心行~
呢間嘢，我見佢有廚房嘅，平時有咩食物提供就唔知，但今日呢度只係得速食，同埋湯~
Lunch 食簡單啲冇咩所謂~
叫咗幾樣嘢，有 Salmon，有 Cheese & Ham，有 Homemade Muffin~
樣樣都唔錯~
下一站 Fjallsárlón Glacial Lagoon (小冰湖)
嚟冰島旅行，相信無人不知 Jökulsárlón (傑古沙龍浮冰湖)~
但喺呢個著明嘅冰湖附近，有個小冰湖叫 Fjallsárlón Glacial Lagoon~
呢個小冰湖，都有好多人知道佢嘅存在，但會去嘅人似乎唔多~
食完嘢行出去，嗯......係咪確定真係要行？
如果係，咁呢個決定係咪喺神志清醒時作出嘅決定呢？
我唔知，淨係知，既來之，則行之......
一路行，從天而降嘅雪，越嚟越多，地面嘅雪亦越嚟越深，深到過埋膝頭，唔理，總之要行~
其實可能行完乜都睇唔到，都要行！
終於，終於唔係白茫茫一片~
終於都見到冰湖了~
啲冰好大舊！
唔駛走回頭路，條路線係行一個圈返返起點~
下一站 Jökulsárlón (傑古沙龍浮冰湖)
駕車離開時，因看不清路面，意外地駛進厚雪中，再次被困了......
有了先前的第一次經驗，我哋稍為清理吓四條胎附近嘅雪，就開始推車，不過唔成功......
不停嘗試，不停清理積雪，重覆咗幾次，終於脫離困境~
其實喺同一時間，不遠處都有部車被困雪堆中，不過，佢哋大鑊過我哋好多~
我哋部車在平地被困，我哋都幾有信心可以脫困，只係時間問題~
反觀對方，佢哋部車係跌咗喺路旁嘅小斜坡，要脫困，比我哋困難得多~
當我哋搞掂咗之後，由於能見度太低，喺車望出去係睇唔到胎痕，於是屎塔就喺條路度做指揮，引領我行條啱嘅路線~
駛經另一部被困嘅車旁，我哋決定落車幫手，雖然我哋完全冇信心，但又唔想就咁走咗去~
對方係三個年輕男士，來自柬蒲寨，面部表情，只有絕望同無助~
我哋重施故技，清理積雪，推車，失敗，再嘗試~
之後有多一位外藉人士加入幫忙，可惜始終失敗~
其實我哋係有一點進展，至少部車郁到兩尺，不過每次郁完，因為斜坡關係，原地再跣返落斜坡底，有時比原先跌得更深......
其時，有兩部大腳八經過，佢哋係入緊停車場，我哋都希望佢哋可以幫忙，因為揸得大腳八，極有可能係本地人，相信點都比我哋經驗多~
可惜，佢哋冇停低，泊好車亦都冇行過嚟......
之後再有多兩部車嘅人加入幫手，都係唔得，每次上返啲，最後都打橫跣返落去~
其實我心裡面已經放棄，咁多人都推唔返部車上嚟，我諗都要叫拖車先得~
就喺呢個時候，先前揸大腳八嗰兩個人行過嚟幫手~
佢哋一個上車掌軚，一個喺車外指揮，試咗五六次，成功揸返部車上條路！
果然係本地人先夠經驗！好嘢！
不過如果早啲出手就好啦......
嗰三個柬蒲寨少年，面露喜悅表情，講咗好幾次 thank you，我都替佢哋開心，我自己都困過兩次嘛......
搞完自己部車，再搞人哋部車，冇咗一個鐘有多~
搞自己部車唔耐呀，搞佢哋嗰部先耐，但幫到人又好值得~
(其實我哋都幫唔到人哋，可能我哋唔落車幫手，最後都係揸大腳八嗰兩個人搞掂......)
搞掂晒，大家都上返車，我後面部車個司機叫我讓佢行先，佢帶路~
啱嘅，人哋有經驗，佢行頭，我跟佢行，對大家都好~
上返公路，能見度仍然好低~
好彩去到近 Jökulsárlón 時，能見度高返啲~
到咗 Jökulsárlón，都有唔少人~
原來可以咁近個湖，而且仲幾大，可以行到好遠~
湖邊有個小山丘，可以走上去望吓~
由於救車用咗好多時間，我哋都唔能夠好好咁喺呢度行吓，好可惜，我真係好唔捨得離開~
但再唔離開，天黑前就去唔到鑽石沙灘，冇計~
下一站 Diamond Beach (鑽石沙灘)
Diamond Beach 上面嘅冰塊，就係由冰湖嗰邊經水流漂出大海，再俾浪沖返上沙灘~
一舊舊冰塊，用 Diamond 嚟形容，真係好貼切~
不過由於不停咁落雪，啲冰面都係雪，所以其實 Diamond 嘅效果唔係咁出~
天色差，不停落雪，冰面亦鋪滿雪，完全反映唔到 Diamond Beach 嗰個意境，不過我仍然覺得呢度好正，好值得嚟~
雪越嚟越大，都係走人，趁仲有啲光，將摸黑上路嘅時間減少~
跟住我哋就去 Hali Country Hotel (住宿)先~
Hali Country Hotel 呢邊，確實地點係有啲模糊，唔同地圖所顯示嘅位置都有少少偏差，或者係成個地區都屬於佢啦，去到自然知道~
去到附近，見到有間好特別嘅嘢，我都有啲印象，係一間博物館嚟~
我哋冇停車，繼續行，想搵咗接待處先~
途經一間黃色屋仔，阿珊話好靚~
邊行邊留意，可能太黑嘅關係，去到最入都冇咩發現，唯有落車問吓人~
對方話接待處喺博物館嗰度......哈~
去到接待處搞完手續，佢話沿住大路行落去，黃色嗰間就係~
正正就係阿珊話好靚嗰間，合晒佢河車！
下一站 Hali Country Hotel Restaurant (Dinner)
其實又係博物館嗰度~
叫咗四樣嘢~
Arctic Char from the farm Hali
steamed Char served with potatos, salad and garlic sauce
味道有啲似三文魚，幾好食~
Plokkfiskur - Icelandic traditional fish stew
served with salad, brown bread and sauce
雖然個主角係魚，但食落唔係好似，味道都幾好~
Meat balls
with potatos, red cabbage, served with gravy and homemade rhubarb jam
味道好特別，唔算好好食，可以啦，但味道真係特別~
Pork schnitzel
served with grilled potatos, salad and Béarnaise sauce
嗯......如果合埋眼食，會以為食緊麥樂雞~ XDDD
食完嘢就返房，今晚厚雲，而家仲落緊大雪，極光無望，可以早點瞓了~
沒有留言:
發佈留言