今日行程:
Bruarfoss Waterfall (藍瀑布) → Gullfoss Kaffi (Lunch) → Gullfoss (黃金瀑布) → Geysir (間歇噴泉) → Strokkur (史杜古亞間歇噴泉) → Arabær Holiday Home (住宿)
一早起身,睇睇氣溫,-6 度,終於都凍返啲!
咁講唔係因為我好想凍,而係,唔該唔好再落雨喇,係落都落雪好喇!
淋雨淋咗兩日,真係夠晒皮!
團友中有位識煮嘢食嘅朋友確係好,阿珊 - Chef Daisy,一早就用焗爐整返熱啲薯條俾大家食,真係唔該晒!
睇住個天慢慢光,好靚~
玻璃上面有啲雪花~
車嘅玻璃都結晒冰~
今日第一站 Bruarfoss Waterfall (藍瀑布)
傳說中有著 Tiffany blue 嘅顏色嘅瀑布~
呢個瀑布,位處於私人土地內~
據聞因為經常有遊人胡亂泊車,導致阻塞道路,所以當地地主決定封鎖道路,未經批准,不可進入其私人道路~
呢條路唔行得,仲有第二條路,不過嗰條就難行啲,泊好車之後要步行前進,而且有機會要行泥濘地,全程要行大約一小時~
不過如果冇得揀,要去都係要行~
但其實又唔係冇得揀嘅,可以好似我哋咁,租住當地地主嘅住宿,自然可以駕車進入其私人道路內,以比較近及好行嘅路前進到 Bruarfoss Waterfall~
出發前幾星期,又有消息傳嚟,唯一一條路(泥濘地)都禁止進入,不過係禁止汽車停泊但可以步行入內還是連步行入內都禁止則眾說紛紜~
有人話剛行過冇問題,但又有人話咁樣係擅闖禁地,真係唔知邊個先真~
之前有人話喺我哋而家住緊嘅小木屋行過去只需 20 分鐘,我用手機地圖就顯示要 24 分鐘,咁我諗半個鐘內可到達啦~
沿途風景~
喺途中我哋發現有部車泊低咗,嗰刻都有諗過其實我哋係咪都可以揸車嚟呢度泊低先再行,咁就唔駛行咁遠~
不過又咁諗,如果揸車過嚟,就會錯過好多沿途嘅風景,同埋泊車呢邊係咪另一個人嘅私人土地又唔知,都唔知係咪真係可以咁做啦~
噚晚女戶主話今朝可以帶我哋到 Bruarfoss Waterfall,不過我哋覺得咁樣好似好麻煩人,我哋有地圖喺手,其實自己行都得,所以婉拒了~
我唔知佢帶我哋去嘅意思係揸車定行路,但無論點都好,其實點都唔及得而家咁自在,可以慢慢欣賞沿途風景,而家咁就最好喇~
先前諗住半個鐘會到,結果行咗九個字先到,我又唔覺得係因為掛住影相造成,可能我行錯路都唔出奇......但明明我跟住個地圖行......一個謎......
傳說中嘅 Bruarfoss Waterfall (藍瀑布)~
水源照計係一樣,唔明點解中間藍色,兩邊嘅就冇色~
同埋所謂 Tiffany blue,現場睇係冇咁藍,影相就會藍啲~
不過唔理佢係咪好藍都好,我覺得個瀑布都好值得嚟,好特別~
仲有,可能我哋團友中冇專業攝影人士,影唔到嗰種立體感,現場睇瀑布底嘅石層係立體好多,睇相係睇唔到~
欣賞夠就回程~
部車啲玻璃結晒冰,即刻著車,開最大風力吹一吹啲玻璃先~
再用冰鏟慢慢地嘗試逐少逐少咁鏟吓啲冰,大約五分鐘就可以開車了~
開車去返接待處先~
接待處呢邊風景好正呀!
交返鎖匙,男戶主問我哋有冇興趣去睇冰島馬,梗係有啦!
男戶主就係揸呢架嘢帶我哋去,我哋跟住佢尾,呢架嘢原來都唔慢~
冰島馬~
冰島貓~
我哋五個都係貓奴,所以表現得對隻貓嘅興趣仲大過冰島馬,真係失禮晒......
不過都好多謝佢咁好人帶我哋去睇冰島馬~
下一站 Gullfoss Kaffi (Lunch)
其實即係 Gullfoss (黃金瀑布)嗰邊嘅小餐廳~
沿途風景~
途經 Geysir (間歇噴泉),非常多人,希望陣間回程去嗰時冇咁多人啦~
到咗 Gullfoss (黃金瀑布),見到兩部車,好正~
Gullfoss (黃金瀑布) 呢邊都多人,始終係嚟冰島必到嘅 Golden Circle (黃金圈)~
我計劃行程時將黃金圈分開咗,唔喺同一日遊覽,係有啲唔順,但就到時間,最緊要自己覺得 OK 啫~
餐廳同商店都係呢間嘢入面~
買咗幾個包同幾碗湯 share 嚟食,餡料不外乎係芝士雞肉火腿三文魚等等~
呢啲包,想像中嘅味道啦,OK 嘅,不過呢度賣得都幾貴,明嘅,旅遊區嘛~
坐喺窗邊,窗外嘅風景夠晒正~~
下一站 Gullfoss (黃金瀑布)
去 Gullfoss,要行一小段路,呢段路有啲位都幾跣,要睇住行,避開結咗冰嘅地方就冇問題~
行到中間,就分開咗兩條路,一條樓梯向下,一條斜路向上,我哋落咗下面先~
Gullfoss 真係好勁,好壯觀!
瀑布分咗兩層,水量非常大!
瀑布可觀性固然係極高,瀑布以外嘅環境其實都非常正!
瀑布呢邊比起餐廳嗰邊少好多人,可能主要係啲旅行團咁啱到用餐時間~
跟住就行返上上層,呢個角度同下層稍有不同,感覺上呢邊正啲~
下面瀑布側嗰條小路,冬天封閉,但上面就仍然開放,可以行前啲去欣賞呢個瀑布~
太陽剛好開始落山,瀑布嘅水花喺斜陽嘅照射下,變成金黃色,此乃黃金瀑布名字嘅由來~
瀑布前方及部份山頭都變成金黃色了~
回程再影返全間餐廳及商店,都幾靚~
下一站 Geysir (間歇噴泉) & Strokkur (史杜古亞間歇噴泉)
沿途風景~
Geysir & Strokkur 係喺同一個地區嘅兩個間歇噴泉~
Geysir 從前係一個非常活躍嘅間歇噴泉,可能因為地殼活動嘅關係,漸漸已經變得好少噴發,有說好間中先會噴發一次~
而 Strokkur 大約每十分鐘就噴發一次,所以可以話係一定睇到,不過噴發規模(高度)就遠遠不及 Geysir 當年活躍時壯觀~
我哋啱啱到嗰時,有個導遊(我覺得佢係)臨噴發時會大嗌,百嗌百中,佢真係經驗豐富,不過我哋未及埋位佢已經離開......
在場每個人都舉著相機等待佢噴發嗰刻,好多時舉到隻手冇力佢都未噴,到頂唔順放手佢就噴......
呢刻有腳架用係最幸福嘅事情,不過我哋五個都冇......
我哋當然都有試吓睇吓有咩跡象睇到佢係即將會噴,不過企位唔夠好,真係睇唔到,冇計~
唯有撞手神啦,實撞到嘅~
佢有時會連噴兩次,有時真係等足十分鐘先噴一次~
同埋唔覺得好勁,據聞 Geysir 以前噴高佢幾倍,咁就真係夠晒勁~
日落時份~
跟住就去 Bónus (超市) 入貨~
Bónus 據聞係冰島最平超市,所以如果就到,我都實去 Bónus~
沿途風景~
嚟到 Bónus,覺得時間有點早,可考慮自己煮,最後大家都同意,所以就喺呢度買齊晚餐材料~
超平 Pizza!左邊約 HKD$13;右邊約 HKD$17,平成咁,我哋就買咗個最平嘅嚟試吓有幾難食! XDDD
一人一支冰島甜筒~
味道同香港嘅冇乜分別~
好嘞,嚟冰島玩,其中一樣不確定嘅事情即將有答案嘞,就係去自助入油,係咪可以用到自己張信用卡俾錢呢?
自助入油嘅油站,用信用卡付款,係要入 PIN code 的,但香港嘅信用卡一般都係冇 PIN code 呢樣嘢~
最直接就梗係打去銀行問啦,不過銀行嘅答案我早已知道,一係答冇,一係就話,如果四個位就試吓 0000,如果係六個位就試吓 000000 或者提款卡密碼~
網上面更加有人話,開通海外提款之後,用提款卡密碼就得~
其實關於海外提款呢,我就半信半疑,始於碌卡就係碌卡,提款就係提款,完全係兩回事嚟......
不過咁,信咗又冇蝕嘅,梗係跟住做啦~
臨出發前又上網問過,我用緊嘅三張卡,有冇人成功俾到錢,有人話得有人話唔得......咁呀......我都有後著嘅~
第一晚入油,就揀間有 Service Station 嘅,真係俾唔到錢都可以入 Station 俾錢~
嚟到 N1,成個入油過程極為簡單,有晒指示,唔會唔識~
我哋先試 DBS,螢幕出現「Techical error」,吓?咁新穎?未聽過呢個情況喎......
入多次都唔得,又試吓另一張 DBS,結果一樣......
好,唯有試吓 SCB,順利認到張卡,PIN code 入 0000,成功!
咁就得啦,起碼之後去 N1 都有信心先,其他油站再算~
之後就去 Arabær Holiday Home (住宿)~
Apartment 嚟,都夠大,好滿意~
我哋入屋時有隻貓走咗入嚟,正!
Chef Daisy 同媽咪忙完一輪,有嘢食喇~
樣樣都好食!(除咗一樣)
第一次食阿珊煮嘅嘢食,有啲料到!
係有一樣失咗手,就係個 Pizza,真心唔好食......
(好明顯係個 cheap cheap pizza 本身問題啦~ XDDD)
食唔晒啲意粉,又留返聽朝做早餐~
今晚多雲,星星都冇粒,極光無望了,早啲瞓啦......
標籤
- 2008 日本 ~ 大阪、札幌、小樽、登別、函館、東京 (9)
- 2008 香港 - 大嶼山、愉景灣 (1)
- 2009 中國 ~ 北京 (6)
- 2009 中國 ~ 長隆 (1)
- 2010 中國 ~ 東部華橋城 (1)
- 2010 日本 ~ 滋賀縣、大阪、京都、神戶、和歌山、白濱、奈良 (10)
- 2010 台灣 ~ 台中、台北 (10)
- 2012 歐洲 ~ 意大利、梵蒂岡、瑞士、法國、西班牙 (24)
- 2013 台灣 ~ 台中、清境、高雄、墾丁 (9)
- 2014 日本 ~ 沖繩本島、座間味島 (10)
- 2014 台灣 ~ 台中、南投 (6)
- 2015 日本 ~ 福岡、大分、熊本、宮崎、長崎、佐賀 (9)
- 2015 韓國 ~ 首爾、濟州、釜山、坡州、加平、平昌、旌善、春川 (11)
- 2016 日本 ~ 大阪、神戶、香川、德島、高知、愛媛 (7)
- 2016 歐洲 ~ 德國、奧地利 (17)
- 2017 日本 ~ 東京都、橫浜、江ノ島、箱根、富士五湖、靜岡 (8)
- 2018 日本 ~ 北海道 (道央、道東) (10)
- 2019 日本 ~ 名古屋、白川鄉、高山、金澤、上高地 (13)
- 2019 歐洲 ~ 冰島 (17)
- 2021 United Kingdom ~ Aberdeenshire (3)
- 2021 United Kingdom ~ Edinburgh (3)
- 2021 United Kingdom ~ Edinburgh/Aberdeenshire (4)
- 2022 歐洲 ~ 捷克 (10)
- 2022 歐洲 ~ 瑞士、意大利、列支敦士登、法國 (14)
- 2023 歐洲 ~ 盧森堡、比利時、荷蘭 (9)
- 2023 United Kingdom ~ Isle of Skye (3)
- 2023 United Kingdom ~ London (3)
- 2024 日本 ~ 宮城県、岩手県、秋田県、青森県、山形県、福島県、栃木県、千葉県 (12)
沒有留言:
發佈留言