Hið íslenzka reðasafn (冰島陰莖博物館) → Sólfar (太陽航海者) → Harpa (音樂廳) → Kolaportið (市集) → Icelandic Street Food (Lunch) → Dómkirkjan í Reykjavík (雷克雅未克主教座堂) → Alþingi (冰島國會大廈) → Ráðhús Reykjavíkur (市政廳) → Tjörnin (托寧湖) → Skólavörðustígur (購物大道) → Efstidalur II (Dinner) → Brekkugisting Holiday Home (住宿)
今日第一站 Hið íslenzka reðasafn (冰島陰莖博物館)
其實我對呢個博物館唔係話好有興趣，不過話晒係世界唯一，一場嚟到冰島，就去睇吓啦~
大家準備好就拎晒啲篋落車，點知今次點放都放唔晒落車，噚日明明都好容易，唔知點解會咁......
搞咗十幾分鐘，終於都搞掂~
而家氣溫係 2 度，但我哋都覺得好熱......
為免又唔記得點放，影低佢~
由於今日係 Reykjavik 市一日遊，全部都係步行，所以我就將車泊咗喺 Hallgrimskirkja 先~
再一次嚟到 Hallgrimskirkja，不過係唔同時份，天色昏暗再加上教堂著咗燈又幾靚~
影完相就開始向 Hið íslenzka reðasafn 進發~
行咗無耐就開始落雪，唔係好大，但都幾密~
氣溫始終唔係太低，啲雪落到件褸度好快就溶~
經過見到，幾靚~
雪越落越大，冒住大雪，終於嚟到 Hið íslenzka reðasafn~
間博物館好細，真係一眼見晒，不過叫做見識吓，比想像中值得嚟嘅~
我幾鍾意佢洗手間個門柄個設計，幾有心思~
仲有間小商店~
下一站係 Sólfar (太陽航海者)
沿住海邊行過去，風唔算大，雪就有點密，整體還好~
Sólfar (太陽航海者)
到此一遊吧~
下一站 Harpa (音樂廳)
行過去嘅時候，見到啲堆疊石仔，據說喺冰島都幾常見~
用意，有說以前係為咗辨別方向，現在係祈求幸福，不曉得是真是假~
Harpa (音樂廳)
我同屎塔對呢啲新式建築嘅興趣都係普通，冇乜感覺~
下一站 Kolaportið (市集)
呢個市集星期六日先開，撞啱今日星期六，有開，就去行吓~
不過部份網上資訊係話冇乜嘢行，我只係覺得，撞啱今日開，又順路，咪走去睇吓~
行咗個圈，其實都唔係冇嘢睇喎，連我咁唔行街嘅人都覺得可以行吓~
下一站 Icelandic Street Food (Lunch)
呢間嘢，Facebook 嘅亞洲 group 或者係外國 group 都大把人推薦，話個羊肉湯好好飲，仲話可以免費 refill，所以就去試吓~
行到門口，原來間嘢好細，入面滿晒座，不過佢話可以拎過去隔籬兩個舖位嗰間 Bar享用~
原來佢最主要賣嘅係羊肉湯同貝殼類海鮮湯，可以用麵包裝，另外可以加麵包，仲有啲甜品~
團友入面，冇咩人係大胃王，烏蠅腸就有唔止一個，本來諗住叫四個湯加一個甜品，不過由於係可以免費 refill，為避嫌起見，我哋最後都叫咗五個湯~
不過諗深一層，佢主要都係湯，其實唔會怕太多食唔晒~
甜品諗住叫 Pancake，可惜賣晒~
賣晒唔緊要，佢仲有幾款迷你甜品係免費任攞嘅，我哋就攞咗十件(好細件)，每人兩件試吓~
落單時佢會問你叫咩名，到攞得時就會叫名~
外面落緊雪，拎住啲湯要喺冇遮冇擋嘅情況下行過問 Bar 度，啲湯一定有雪入咗去，不過都冇辦法~
五個湯，加咗兩份麵包，仲有啲甜品~
兩款湯都非常足料~
羊肉湯~
真係幾好飲，勁重羊味，反而羊肉本身就冇乜味~
貝殼類海鮮湯~
非常濃郁，好好飲，蝦都 OK，其他料就麻麻地~
兩個湯我都講唔出邊個好飲啲，真係兩個都好好飲！
飲飲吓，啲湯喺個底度漏出嚟~
如果要 refill，佢會點做呢？就係咁嘞~
我哋初時以為 refill 只會 refill 湯，因為覺得冇咁著數，點知，refill 一樣有湯有料，正！
唔怪得咁多人推薦，又好飲又抵飲，有時唔係話著數咗就好開心，而係成件事令人好窩心，好滿足~
甜品方面......個反差真係夠晒大，兩款甜品都只係食到沙糖，甜到不得了，每一啖都食緊溶唔晒嘅沙糖......
不過為免浪費食物，仲要係人家好好咁免費任你攞，點都要食晒佢~
下一站 Alþingi (冰島國會大廈)
Alþingi 對面的小廣場~
下一站 Dómkirkjan í Reykjavík (雷克雅未克主教座堂)
下一站 Ráðhús Reykjavíkur (市政廳) & Tjörnin (托寧湖)
Ráðhús Reykjavíkur 就在 Tjörnin 的湖畔~
團中幾位女士見到湖邊嘅天鵝呀海鷗呀鴨呀就好開心~
如果天氣好啲，呢個湖加埋周邊嘅環境，應該相當靚~
湖邊有個雕像，唔知有咩寓意呢~
見到呢度啲錶位，諗起以前香港嗰啲~
下一站 Skólavörðustígur (購物大道)
我見仲有啲時間，就加插少少行街時間俾佢哋~
揀行呢條街，因為呢條街行到底就係 Hallgrimskirkja，可以去攞返部車~
睇報導，呢間 Handknitting Association of Iceland 賣嘅都係真冰島羊毛嘅製品~
因為原來，喺冰島有啲售賣羊毛製品嘅，並非用冰島嘅羊毛，不過售價平一截，一分錢一分貨，豐儉由人~
另外入咗 Icemart，行完咁滯先發現有隻貓喺度！
原本計劃好今晚都會去返噚日間 Bónus 入貨，但噚日去完覺得選擇唔算多(自己想買嘅嘢)，咁啱喺呢度有間超市，就入去呢間，睇吓買唔買到想買嘅嘢，買到就唔駛刻意再去搵超市~
呢間其實係細過噚晚嗰間，不過我哋都係買生果同早餐，其實要買就實買到嘅~
經過呢兩日(其實係日半)喺 Reykjavik 嘅遊覽，其實都真係有點悶，不過對於食就真係幾驚喜~
今晚終於都離開首都，向冰島其他城市進發，開始環島遊，希望餘下嘅行程有更多驚喜等住我哋去經歷~
離開首都，我哋先去 Brekkugisting Holiday Home (住宿) check-in 咗先~
開車前，用手機 app 睇吓沿途路況先，確定沒有封路先開車~
個 app 話俾我哋知，沿途有啲路段係「Spots of ice」，有啲係「Slippery」，但風速唔算高，所以小心點係冇問題嘅~
我不得不承認，第一次喺冰島雪駕(離開首都計)就安排喺冇日照嘅時間，係不智，係冒險，仲要遇著今晚嘅壞天氣~
但我有信心，只要夠謹慎，揸慢啲，係冇問題~
真真正正揸到離開首都，走到上雙線雙程嘅一號公路，非常暗，有點跣，仲落緊雪，能見度低得可怕，有時條路仲幾窄~
路面有積雪嘅地方，可以反映車燈就冇咁喑~
冇積雪嘅地方，未能反映車燈就真係好暗吓~
動魄驚心咁揸咗個幾鐘車，幸運地安全到達 Brekkugisting Holiday Home 嘅接待處~
以僅僅一次經驗嚟講，路況「Spots of ice」及「Slippery」唔算太可怕，不過如果加上好大風，又可能係另一回事~
比較可怕嘅係黑暗中加上落雪，能見度變得非常低，真係要好小心好小心好小心~
基本溝通過後，由男戶主駕車帶我哋去住宿嘅地方，估唔到都有一點路程，唔怪得佢要揸車帶我哋去~
今晚住嘅係小木屋，所有團友都好鍾意~
我對住宿呢方面要求真係唔高，只要有私浴私廁乾淨企理就滿意~
下一站 Efstidalur II (Dinner)
揸車去到 GPS 帶嘅目的地，一啲都唔似餐廳，唔通去錯咗？
原來我哋去咗間餐廳嘅背後，係農場嚟，唔怪得啦~
餐廳正面~
呢餐可以話係第一餐傳統嘅餐廳~
之前嘅 ROK，每樣都係細細碟，一人起碼叫兩碟，形式同傳統餐廳有點不同~
Sægreifinn 主打係龍蝦湯同串燒~
Icelandic Street Food 主打都係湯~
我哋非常肯定，叫五樣係會食唔晒，所以只係叫咗四樣~
Icelander's Burger
- cheese, egg, bacon, red onion, lettuce and bernaise sauce
呢啲咁基本嘅材料，係想像到嘅味道，一定唔會唔好食，但又唔會有咩驚喜咁囉~
Skyr Burger
- our melted feta, skyrsauce, lettuce, red onion and fries
呢個都 OK~
Meatzza (like pizza but no bread, minced beef instead)
- rhubarb/chili sauce, our fetacheese, peppercheese and cheese, served with fries and salad
以免治牛肉代替 pizza 底，概念上可能係幾特別，其實食落就都係普通嘢，但味道係不錯~
Beef Tenderloin
- potatoes, vegetables and salad
差唔多 HKD$400，得到咁嘅一碟牛扒，覺得件扒有點細，真心覺得唔係太值，可能呢啲就係冰島嘅物價吧~
件牛扒都幾有牛味，同埋整得幾好，唔錯~
最後我哋都係食唔晒，食剩晒啲薯條，用個密實袋帶走，聽朝用焗爐整返熱佢做早餐，唔好嘥~
樓上有樓上嘅人食嘢，樓下有樓下嘅牛食嘢~
之後就落咗樓下買雪糕食~
呢間餐廳環境幾好，食物還可以，滿意啦~
返到住宿處，留意吓個天，竟然冇雲，仲見到星星，唔知有冇機會見到極光呢？
我哋幾條友，輪流一得閒就去望吓，可惜到最後都唔見有......
其實我知，捕捉極光，梗係坐定定望住個天最好，最為有時極光只係出現好短時間~
之但係，其實大家都有唔同嘅嘢要處理，再者，大家都攰喇，其實花費唔到咁嘅精力同時間坐定定去等極光，隨緣吧~
沒有留言:
發佈留言