Vík i Myrdal Church (教堂) → Laufskálavarða (祝好運石頭塔區) → Skaftáreldahraun (熔岩地形) → Fjaðrárgljúfur (羽毛峽谷) → Hundafoss (瀑布) → Svartifoss (斯瓦蒂瀑布) → Hof 1 Restaurant (Dinner) → Fosshotel Glacier Lagoon (住宿)
今日一早珊飛兩個都好忙，阿飛負責煮公仔麵俾咁多個人食；阿珊負責預備吞拿魚蛋沙律三文明作為今日午餐~
辛苦晒~~~
今日第一站 Vík i Myrdal Church (教堂)
食完早餐，屎塔問我有冇時間上多次教堂上面個墳場，想喺天光前上去行吓~
當然冇問題啦~
開車前，未天光，幾靚~
上到墳場，景色同有日光時好唔同~
下一站 Laufskálavarða (祝好運石頭塔區)
沿途風景~
今日好好天，天色好靚~
去到應該要停車嘅位置，地圖上有路，但現實冇......
再行前咗唔知幾多，有條小路，出入口好闊，就扭入去停埋一邊再算~
最後，決定放棄~
一來附近真係冇位停，可能停車嘅位置被雪掩蓋掉，鏟雪車亦唔會鏟嗰啲位~
二來，Laufskálavarða 都俾啲雪覆蓋得七七八八，只係見到好少好少石頭嘅顏色，就算入去到都冇用，乜都睇唔到~
今日好好天，但現在氣溫只有 -8 度，一落車嗰吓真係感覺到凍，係嚟冰島咁多日，感覺最凍嘅時刻~
呢邊嘅風景，只有雪地同日出前嘅天色，但感覺已經好正，去唔到 Laufskálavarða，喺呢度周圍望吓都好滿足~
下一站 Skaftáreldahraun (熔岩地形)
倒車離開時，發現後波鏡頭濛晒，落車睇睇，原來被冰封了，處理過後就冇問題~
沿途遇上日出~
去到 Skaftáreldahraun 積雪好厚，但有胎痕，跟返啲胎痕行，跣吓跣吓咁都行到~
落車後，見到有小便嘅痕跡，依推斷，應該係男人嚟......
可能有時都會想啲人真係野外去完都搵雪封返佢，但諗諗吓，封咗就睇唔到，睇唔到，其他人就有機會踩落去......
其實如果真係冇辦法要就地解決，都應該去啲冇乜人會行到嘅地方，而唔係就喺個停車場中間去......
走上觀景台，一大片一舊舊嘅青苔，幾得意~
據聞呢啲青苔要生長到咁嘅規模要過百年，所以冰島呢度係禁止所有人以任何方式破壞佢哋，包括最基本嘅踐踏~
下一站 Fjaðrárgljúfur (羽毛峽谷)
出發前幾日睇到消息，因為保育關係，Fjaðrárgljúfur 要封閉兩星期，就係啱啱好係我哋去呢兩星期......
不過呢，條路係順路嘅，就去睇睇，因為唔知封路封到有幾出，有冇可能去到峽谷口望吓呢？
反正去到真係封咗，都只係花好少時間，唔會怕浪費好多時間去一個入唔到嘅地方~
轉咗入小路，見到有三部車，有兩個人喺部細走上另一部車，嗰兩部車就繼續行，我哋就跟住佢哋行~
我估計部細車唔係四驅，所以有咁嘅決定~
行咗都有一段路，終於嚟到封路牌，冇得再前~
我駛埋一邊，讓嗰兩部車掉頭先~
跟住到我掉頭，掉到一半，部車被雪卡死了......
無論點做都係動彈不得......
此時，相信係呢度嘅管理員走埋嚟，一位身材高大嘅女士，佢圍住部車行咗一圈，就走到車頭推車~
屎塔同阿飛見狀就即刻幫手推，我就入後波俾油後~
幾秒後，部車郁喇，成功脫離當前困境~
我哋每位都向呢位女士道謝，真係好多謝佢！
嗰位女士就係喺呢部車走落嚟，直覺覺得佢係呢度嘅管理員~
下一站 Svartifoss (斯瓦蒂瀑布) & Hundafoss (瀑布)
去唔到 Fjaðrárgljúfur，就要搵地方去，我將本來聽日去嘅 Svartifoss 調上嚟，而家去~
其實去 Svartifoss，朝早去就好啲嘅，不過我選擇唔多，順其自然吧~
Hundafoss 呢，就唔係特別話要去嘅，只係去 Svartifoss 一定會經過啫~
沿途風景，壯麗！
我將部車泊咗喺國家公園停車場，呢個停車場係收費嘅~
不過兩部收費機都壞咗，唯有走去旅遊中心俾錢~
俾完錢，去埋洗手間，就喺車上食 lunch~
Lunch 係阿珊今朝整嘅吞拿魚蛋沙律三文明，好食！
Svartifoss 位置喺山入面，預計單程要行 45~60 分鐘，唔算好遠~
行咗唔係好耐，就見到啲令人後悔嘅事情~
我見到有個更好嘅泊車地點！
近啲，又唔駛錢，但就冇洗手間~
點都好，如果出發前發現，我應該會選擇泊喺呢度~
沿途風景~
行到開始有斜路，部份係雪面，部份係冰面，要上冰爪了，否則行唔到上去~
再繼續行，行到 Hundafoss 了~
Hundafoss 有部份結了冰，對面有個觀景台，回程時走對面路，應可去到~
再繼續行~
行行吓，屎塔走上嚟鬧我，話我行咗條難行嘅路，明明有條易嘅唔行~
我掛住睇手機地圖，又真係冇為意，但其實，都行咗一半，唔算難行喎......
回程行返條易嘅落去囉~
再繼續行~
離遠望到 Svartifoss 了，不過睇嚟仲有一段路要行~
終於行到，呢個瀑布好獨特，周邊有倒掛嘅六角柱，瀑在底有六角柱狀嘅石頭~
直覺覺得，瀑布底嘅六角柱石頭，其實係從六角柱下半部份，斷裂掉下的，事實唔知係咪咁呢~
回程巧遇日落~
回程行另一條路，即係易行啲嘅，就會去到 Hundafoss 嘅觀景台~
原來，我哋上嚟嗰時，企出去嘅位置，喺呢邊睇返係咁牙煙，之前行出去真係唔覺~
日落後嘅天色，加上雪地雪山，好靚~
跟住就去 Fosshotel Glacier Lagoon 先~
呢間嘢係今次旅程中最貴嘅一間，冇辦法，附近選擇唔多~
去到 check-in 時，見到有「Aurora Wake Up」服務，即刻登記埋，免費的~
登記時，傾吓偈咁問吓對方，覺得今晚會唔會有？對方答：「極光指數唔高，應該冇......」
雖然冇人能夠準確預測，但本地人都咁講嘅時候，機會真係好低了~
下一站 Hof 1 Restaurant
呢間係一間酒店餐廳嚟，其實 Fosshotel Glacier Lagoon 都有自己餐廳，不過太貴喇，唔係好捨得，於是就過嚟呢間食~
出發前幾星期，喺網上面有人提醒，去 Hof 1 Restaurant 要預約，否則有機會冇位，於是我哋就預約咗七點~
而家六點鐘，冇咩做，就早啲過去睇吓俾唔俾入座，唔俾都冇問題，可以周圍行吓，大半個鐘好快過~
我哋六點三到咗，問佢可唔可以入座，佢同同事傾咗陣，話唔可以，因為六點半有團，所以都係要等到七點先可以~
其實......六點半有團，同我哋而家或者七點先入座有乜嘢關係......
如果因為唔夠位，咁，六點半嘅團嚟到，七點都未走咖喎......
可能係廚房唔得閒，我唯一諗到呢個啫~
不過點都好，人哋話唔得就係唔得，人哋有人哋嘅考慮，唔需要下下解釋~
所以佢話七點先入得，我哋都冇意見，七點就七點~
我哋出去行咗個圈，又真係冇咩行，我同屎塔就入返去接待處坐~
接待處個服務員就俾兩份 menu 我哋睇住先，真係細心~
之後其他人都返入嚟，我哋又俾份 menu 佢哋睇~
睇睇吓，服務員話我哋可以入座喇~
當時大約六點五到啦~
食物都係叫咗四樣~
Today's special
Baccala with barley risotto and vegetables
魚唔錯，個 barley risotto 好啱我胃口，所幾鐘意呢個~
Homemade steak pie
Beef cooked until tender in a rich red wine sauce, topped with a puff pastry lid, finished with vegetables, creamy mashed potatos or fries
麻麻地，牛肉冇乜味~
Chicken and chorizo pasta in a rich tomato sauce, served with garlic bread and salad garnish
普普通通，不過不失~
Spinach burger
Grilled spinach burger served on a homemade rosemary bun, finished with salad, garnish and fries
淡而無味~
試過咁多間餐廳，暫時呢間係比較差~
食完飯，行出門口，我見到兩條光，於是就用相機影吓~
係有兩條好暗，但綠綠地嘅光~
呢兩條光，唔肯定係咪極光，只可以話，如果唔係極光，就解釋唔到係咩光嚟~
餐廳對開呢度係比較光，我哋走去第二度冇咁光嘅地方再影一次~
好暗好暗，但我覺得係極光嚟~
不過就算係極光都冇意思，我唔係想遇到，想影到，我係想親眼好清楚咁見到，所以我仲當自己未見到極光~
繼續停留喺度都冇意思，不如快啲返去，拎埋腳架準備吓~
返到去，準備緊嘅時候，電話響，原來係 Aurora wake up service，不過佢話唔係好強~
跟住就到阿飛拍門，佢話極光出現了，叫我哋快啲出去~
不過腳架個雲台唔見咗，有腳架都冇用~
唔理喇，出咗去先算~
一出門口，不得了，好清楚，雖然唔係滿天都係，但我滿足了~
相就比較濛，冇計啦，冇用腳架~
影緊極光嘅時候，有人玩航拍，真係夠晒自私，咁樣個個都影到你部航拍機~
我啲相咁濛都影到部機啲光，人哋有腳架又影得好嗰啲，可能連部機都影到~
真係好痛恨呢啲自私精！
極光持續咗大約 20 分鐘就冇咗，散場~
返房後十幾分鐘，阿飛又拍門，佢話又有~
真係多謝阿飛~
返房嗰十幾分鐘，我搵返個雲台，屎塔終於有腳架用，不過現場都幾大風，所以有腳架都係濛，呢樣就冇辦法啦~
今次仲清楚過頭先，有時仲有兩條，再加上冇人玩航拍，冇咗航拍嘅嘈音，正！
今次持續咗十幾分鐘，而且開始多雲，同天氣預測一樣，九點幾開始多雲，到半夜都係，睇嚟今晚都冇乜機會再見到了~
雖然呢間係今次旅程中最貴嘅，不過睇到極光，即時覺得超值！
但其實我哋睇到極光，主要係阿飛嘅功勞，哈~
極光俾我嘅感覺，好夢幻，佢係不停郁動嘅，就好似一啲你知道冇惡意嘅外星生物嚟到地球同人類打招呼咁，有點感動~
有一樣嘢特別要講講嘅，隔籬有個地盤，有幾盞大光燈，非常光猛，喺極光出現時，燈係熄咗嘅，值得一讚！
沖完涼出嚟，越嚟越多雲，月亮呀星星呀，全部都睇唔到~
隔多一陣仲落雪雨，可以瞓了~
沒有留言:
發佈留言