《瞬間看地球》Stranger's Blog: 2019.01.11 冰島 (Iceland) (歐洲第一天)

終於嚟到今日，正式起程嘅呢一日~
其實我內心係壓力多於興奮~
行程係我編嘅，固然會有啲壓力，怕編得唔好，始終每人嘅旅遊步伐同想睇嘅嘢都唔同，難以滿足所有人~
再者，冰島嘅天氣難以捉摸，隨時會刮大風雪，導致道路封閉，需要臨時更改行程，不過呢樣冇得預，見步行步吧~
不過呢幾位旅伴，我都覺得係相當不錯嘅旅伴，問題就應該冇乜嘅~
自駕，今次要喺深冬到冰島自駕，唔擔心就假嘅，壓力都大咖，不過只要小心啲，相信都冇乜問題嘅~

飛機行程：
HKG(0100) → CPH(0600) 12HR0MIN
CPH(0815) → KEF(1040) 3HR25MIN

今日行程：
Lagoon Car Rental (租車) → Rok Restaurant (Lunch) → Hallgrimskirkja (尖頂白教堂) → Perlan (珍珠樓) → Sægreifinn (Dinner) → Valdís (雪糕店) → Blue Luxury Apartments (住宿)

第一次坐 SAS，冇咩特別，都係正正常常咁~
到咗 Copenhagen(CPH)，搞好晒轉機手續，向閘口進發時，經過間髮型屋，店外嘅燈箱畫面，係大家都熟識嘅「加油仔」！

到咗閘口，趁有時間，又身在歐洲，即刻試吓啲電話/上網卡先~
五個人用，就買咗五張電話卡，共有四款~
買唔同款，就係為免有邊款用唔到都唔駛攬炒~
結果，五款都用到，好似都幾可靠喎~

再搭多幾個鐘機，終於嚟到冰島喇~

呢刻冰島氣溫大約八度，同埋落緊大雨......
希望關於冰島嘅傳聞係真，「落雨唔緊要，等多十分鐘再看看」

行行吓，阿飛發現漏咗嘢喺飛機，即刻跑返上機攞，好彩都攞得返~

到拎篋時，阿飛發現佢個篋爆咗角，決定向在場職員提出索償~

今日第一站 Lagoon Car Rental (租車)

出到大堂，已經見到有個年輕男人，手持 Lagoon Car Rental 嘅牌等緊我哋~
呢個男人，目無表情，招呼都冇打一個就用手勢叫我哋跟住佢走~
這也難怪，我哋真係比正常遲咗出嚟，可能佢真係等咗好耐~
呢個男人行得幾快，我哋拖住個篋係要追住佢行，否則真係會唔知佢行咗去邊~

Lagoon Car Rental 嘅公司，離機場約十分鐘車程，所以要坐呢間公司嘅車過去~
到咗之後，對方已經做好晒佢哋事前可以做嘅嘢，例如份 form 已經列明部車邊度有花痕，我哋揸住份 form 出去部車度對一對，冇問題的話，簽個名，再影印証件，問埋駛唔駛加購保險，係咁多~
成個過程比想像中快得多，因為真係冇乜交流，冇提醒喺冰島揸車有咩要注意，冇提醒邊啲地方要小心，冇 hard sell 保險，由頭到尾，都只係講必需要講嘅嘢，其他嘢一律冇講冇問~
其實呢，「冇提醒喺冰島揸車有咩要注意，冇提醒邊啲地方要小心」，呢樣嘢係我去邊租車都冇講嘅，只係網上面，啲人話喺冰島租車都會講，覺得有啲同人哋嘅經歷唔同啫，其實係完全冇問題~
保險方便，我向租車公司買咗最基本嘅保險，全保就......實在太貴，而且全保都有啲項目唔包，所以我轉而向第三方保險公司投保，保障範圍比租車公司嘅全保更大，只係如果要索償的話，手續一定會麻煩啲，隨遇而安吧~

同我哋處理手續嘅，同喺機場接我哋嘅，係唔同人，不過都係年輕男人，態度亦完全一樣......
究竟係冰島人，係咁樣嘅一貫冰冷態度，還是個別事件呢？我自己呢刻感到嘅係不屑~
不過效率就真係一流~

態度好與壞就唔影響旅程，部車嘅好與壞就可以好影響~
表面上部車好企理，佢話車身有花嘅地方，我都唔係全部睇到有~
外表同內籠一樣乾淨，胎嘅狀態就咁睇落相當不錯~

我預約嘅車係 2017 Kia Sportage，通常俾嘅都唔係同一款車，其實俾咩車我都冇所謂，放得落行李就得喇~
今次佢俾嘅，正正就係 Kia Sportage，係咪 2017 款就唔知喇~

試好晒啲基本掣，可以開車喇~
左軚唔難適應，反而係 SUV 要啲時間適應，因為未揸過 SUV，覺得空間感比較難掌握~

可能因為現場雨有點大，大家都冇認真咁用相機記錄住 Lagoon Car Rental 同部車嘅樣......

下一站 Rok Restaurant (Lunch)

開咗上公路，雖然雨一直落，不過部車其實幾好揸，唔難適應，同埋，只係落雨，又唔係落雪，所以都冇乜關係~

由於食完飯之後會去 Hallgrimskirkja (尖頂白教堂)，我當然揀間近教堂嘅餐廳啦，車就泊喺教堂旁邊嘅免費停車場~
成個 Reykjavík，最為人所知嘅免費停車場，一定係教堂呢邊嘅停車場，而且仲幾大吓，不過車都多，所以都要兜吓先搵到位~

操控部車上路，唔難，不過駕駛左軚車泊位，一直都係我嘅弱項，仲要泊 SUV......真係比平時要用多兩手先得......

Rok Restaurant

呢間餐廳嘅 menu 上，建議每人 order 2-4 碟，即係份量唔會多，不過我哋都怕食唔晒，就叫咗 10 碟~

ROK salad with avocado dressing, and caramelized hazelnuts
沙律普通，冇咩特別~

Wild mushroom risotto with fresh parmegiano and red wine sauce
Risotto 我一向麻麻，所以覺得普通~

ROK "Plojjfiskur" Traditional Icelandic fish pie with cheese, hollandaise and rye bread
魚幾滑，味道唔錯~

Cured reindeer with blue cheese, almonds and burned butter
馴鹿......唔好食，又鹹......

Chicken skewer with grilled paprika and garlic served with hummus, lemon and herbs
雞好食，又滑~

Duck confit with bacon, potatoes and bourguignon sauce
鴨真係好食，係鹹咗啲~

Steak with chimi churi, roasted potatoes and aioli
牛扒好食，就咁食同點醬食都好食，各有風味~

Flavoured lamb rib eye with smoked peppers and mint, served with fresh coleslaw and spicy hummus
羊好好食！好重羊味，但唔係羶味，肉又夠嫩！係呢餐最好食！

環境好，服務好(友善、自然)，食物好，非常好！

下一站 Hallgrimskirkja (尖頂白教堂)

雖然食飽飽，個人應該會暖啲，而且溫度有成八度咁「高」，不過落緊雨又大風，都覺得凍~

呢座教堂真係成座穿梭機咁，好特別~

趁人唔多，上咗塔頂先~
上塔頂要搭 lift，再上一層樓梯~

風景唔算得上好好，不過一場嚟到，上塔頂都係指定動作吧~

教堂內部，比較簡約，都幾靚~

遊覽完教堂，仲係落緊大雨，都真係冇乜心機周圍行吓，匆匆走返上車算數~

下一站 Perlan (珍珠樓)

嚟到 Perlan，繼續大雨，最後大家決定唔出去觀景台喇，出去都應該冇咩好睇~
Perlan 呢度，本身係一個博物館，不過我冇計劃參觀嘅，幸好佢有啲商店可以行吓~

跟住就去咗 Bónus (超市) 入吓貨~
Reykjavík 市中心呢邊嘅 Bónus 外邊嘅停車場，係收費停車場，嚟到呢刻仲係要收費嘅時間~
我泊好車，就同屎塔去買票泊車，佢哋就入去行住先~
呢部機真係奇怪，當然好可能係我哋唔識用啦，撳嚟撳去都撳唔到理想嘅泊車時數，一係 68 分鐘，一係就到聽朝(泊到聽朝係因為過咗收費時段，所以可以泊到聽朝，呢樣我知)，真係人都癲~
兩條友已經俾雨淋到濕晒，唔搞喇，就泊 68 分鐘啦！

買完嘢就開車過 Blue Luxury Apartments (住宿)，去到附近唔係好搵得到，屎塔就落車去搵，之後電話再匯報情況~
雖然我都揸咗好多年車，不過方向感實在一般，幸好屎塔同阿珊啲方向感都幾好，靠佢兩姊妹，終於到達 Blue Luxury Apartments~
本身 book 呢間住宿時，個網話泊車要 8€，嚟到問佢可以泊邊，對方話街邊位都可以，免費的，就喺對面有個位，正~

休息到差唔多時間就出發去食晚餐~
晚餐我冇安排到喺住宿附近食，因為今晚要去食幾乎係旅客都會去嘅餐廳~

下一站 Sægreifinn (Dinner)

據聞係全世界最好嘅龍蝦湯~
不過，飲食嘅嘢，每人口味不同，哪有最好？而且，睇評價，真係一半一半，唔緊要啦，呢啲嘢，係要自己親身試吓嘅~

入到餐廳，揀咗嘢食，俾埋錢先搵位坐~

好快就上咗個湯~
即刻試吓佢~
飲一啖湯，再食一啖龍蝦，呆咗......
完全唔係飲開嘅龍蝦湯嘅味道~
相信係因為冰島嘅所謂龍蝦，其實係小龍蝦 Langoustine，味道同想像中嘅有出入自是正常~
湯係濃郁嘅，但味道則算不上驚為天人，去到全世界最好飲嘅龍蝦湯吧~
其實我覺得當中可能存在誤會，可能係用中文嘅旅客，錯誤地用上「龍蝦」呢個字，而非「小龍蝦」，令人心中想像與事實不符~
不過如果用全世界最好嘅小龍蝦湯嚟形容......又好似怪咗啲~ XDDD
剛才食咗一啖小龍蝦肉，竟然係入口即溶！
食蝦類，竟可入口即溶，一般如我等唔識煮唔識食嘅人，會覺得「梅」，事實係「梅」還是品種問題則不得而知了~