Icelandic Horse World (騎冰島馬) → Seljalandsfoss (Lunch) → Seljalandsfoss (水濂洞瀑布) → Skógafoss (彩虹瀑布) → Sudur Vik (Dinner) → Sólheimahjáleiga Guesthouse (住宿)
今朝我見大家都忙，於是自告奮勇，整返熱噚晚食剩嘅意粉~
我呢，就真係冇乜點煮過嘢食，係識煮飯，由米煮成飯嗰種煮飯，煮吓公仔麵咁囉~
不過我諗翻熱應該冇乜難度，一路煮一路攪等佢唔好黐底就得啦~
看似一樣好簡單嘅工作，其實都唔係咁簡單......
係呀，冇黐底呀，仲成功翻熱咗，食得嘅，不過啲意粉斷開晒......
今日第一站 Icelandic Horse World (騎冰島馬)
呢間有 Winter Sunrise Tour，其實冇話刻意揀呢間，只係就行程，見到佢有個咁嘅 tour，所以就 join 咗呢個 tour~
好多要預先 book 定嘅活動，都有要求早 15 - 30 分鐘到~
可能係我睇錯又或者有啲混亂，我以為呢個都要，於是我就早咗 30 分鐘到~
到咗一處地方，有幾間屋，但見唔到任何公司名字~
我連係咪到達咗啱嘅地方都唔肯定，不過呢度確係似養馬嘅地方~
我係用 Offline map 去導航，唔係用電話或地址，事前我係做晒 bookmark 查晒地點睇埋街景，基本上出錯機會係好低~
我哋行近一間屋，度門有個窗，入面有光，於是就探頭望吓~
入面冇人，不過係個馬廐嚟，咁應該冇去錯地方~
見佢有個電話，話有需要可以打俾佢~
如果我確定我哋冇去錯，係唔需要打俾佢，等夠鐘先再算~
但如果唔係呢度呢？咁我就要即刻動身，去返啱嘅地方，反正呢度寫明開 0900，而家都 0910 了，所以最後都係打咗呢個電話~
喺電話度，確定我哋冇去錯地方，跟住有人出嚟開門~
之後就帶咗我哋去 Cafeteria(佢哋係咁講的)，請我哋飲熱飲~
佢叫我哋休息吓先，準備好就再叫我哋~
我哋好明顯鍾意貓多過馬，喺度見到隻貓，不停同佢玩~
冰島馬明明就係非常可愛嘅品種，不過次次都俾貓搶晒風頭~
馬廐~
唔知係咪為我哋準備嘅馬~
佢哋準備好，就到我哋去準備~
我哋要著佢嗰件連身外套、手套、面巾、頭盔，所有嘢都係佢哋提供~
陣間就喺呢個場度練習吓先~
大家都準備好，就行入練習場，佢問我哋關於騎馬嘅經驗，結果係媽咪跑出，原來媽咪騎過馬，唔知一次定兩次~
其餘四個就一次都未騎過~
佢首先教我哋點上馬，同埋點落馬，再教我哋點樣俾指令隻馬，其實聽落都簡單，希望操作時都一樣咁簡單啦~
到大家都準備好，就開門出去喇~
開門嗰陣先知，原來出面又大風又大雪~
總共有三個導遊帶我哋五個出去，一個最前，一個最後，一個就喺側面~
計埋一前一後導遊，總共七隻馬係要連成一線咁行，當然唔可以超越導遊啦~
其實係唔應該超越任何一隻馬，只係有時啲馬唔係真係可以完全控制到~
我嗰隻，係都要貼住前面嗰隻，係馬鼻掂住馬尾咁貼，有時仲想扒頭~
成個過程就係，有馬偏離，趕佢返入隊，有馬扒頭，就不停俾指令佢要佢停~
其實呢，真正控制啲馬嘅，係前方嘅導遊~
因為啲馬係會自動跟住前面隻馬，前面行佢就行，前面停佢就......多數會停~
所以導遊話俾我哋試吓跑一小段，其實係佢俾指令佢自己隻馬跑，其他就跟住跑，我完全唔覺得我係控制到隻馬......
喺騎馬嘅過程入面，風越刮越大，雪亦越下越大，啲雪已經變成一支支針~
啲雪針打埋塊面度係好痛，眼不能睜大，每個人嘅鼻水都不停流~
原來，面係可以凍到冇感覺都感到被雪針打到疼痛非常，夠矛盾吧，就是除咗痛感，已經冇其他感覺~
前方環境除咗因為睜不大雙眼而看不清楚，其實咁嘅風雪，任你可以睜開雙眼，都一樣睇唔清環境~
我唔知其他團友享唔享受個過程，我就真係捱住完成，想快啲完~
佢開始時有講過，想佢影相可以提出，但其實我覺得唔係幾好意思開聲，好似叫人做嘢咁，再加上咁嘅環境，我哋辛苦，佢哋一樣辛苦，更加唔好意思開聲~
結果最後就只係影咗一張團體相......
返到馬廐，佢就同我哋逐一同返之前騎嗰隻馬影相~
之後又請我哋飲熱飲，亦歡迎我哋留到想走先走~
下一站係 Seljalandsfoss (水濂洞瀑布)
我哋會喺 Seljalandsfoss 嘅快餐車買嘢食作為午餐~
離開馬廐時都好大雪，天色幾差吓~
初時能見度麻麻地，一路行，能見度開始高返啲，以為細雪咗，原來唔係，只係由落雪變咗落雨，都幾大吓~
到咗 Seljalandsfoss，一落車，嘩，好大風，好彩大家都有扶住度門~
我知道呢度泊車係收費(幾個月前免費)嘅，泊好車就去買飛先~
張飛拎到上車已經濕晒，冇計，照放喺車頭~
個停車場地下係爛地嚟，凹凹凸凸加上落大雨一定好多水氹，又大風又大雨又要避水氹，個個都好狼狽~
離開咗停車場，向住瀑布行係有條小斜路，唔係好斜，初時都冇乜嘢，但係越行越難行，因為越近瀑布，結冰情況越嚴重~
佢係有條繩俾遊人扶住上嘅，不過其實扶住條繩都係好難上，雖則要上就實上到，但問題係過咗呢條小斜路，都仲有啲路要行，而嗰啲路就冇得扶嘅~
我哋決定返轉頭，落車攞冰抓同雨褸~
就喺返轉頭嘅時候，屎塔跣低咗......
好彩冇乜事，呢條友真係好鬼麻煩！
攞冰抓同雨褸其實都有好大困難，全部嘢喺晒篋入面，現場環境實在冇辦法打開晒個篋去攞~
最後，幾經努力先攞到三對冰抓，雨褸就攞得晒五件~
咁冇計啦，我哋決定分批上，珊飛媽咪上去先，我同屎塔食嘢先，之後對掉~
快餐車~
買完之後，要放返好啲嘢先，由於大風大雨，我哋手腳都比較慢，原本放喺檯面嗰兩個包，被風吹返入去個快餐車入面......
而嗰個工作人員又唔知去咗邊，唯有等吓~
等咗一陣見佢返嚟就攞返個包~
都係嗰啲包啦，都係嗰啲味道啦，午餐，填飽個肚就算~
食完嘢見冇咩做，我見上面呢度都有人泊車，於是我就落去揸部車上嚟，佢哋陣間可以匿上車，唔駛淋雨~
落到去攞車時，見到有部 Van，尾門被風吹爛咗！
佢隻左尾門，原本只可以開 90 度，而家可以開到 180 度了......
而且我見佢閂唔返埋......慘了......
上返去後又等咗幾個字，都未見佢哋返嚟，有啲擔心佢哋有咩事，於是屎塔就 whatsapp 問吓佢哋~
好彩都有人應，同埋冇事發生~
喺等緊佢哋嘅時候，快餐車上嘅杯蓋架連埋入面成百個杯蓋一拼被吹倒，跌晒落地下~
阿工作人員唔知喺邊度閃出嚟，執返地上啲嘢，我見到就幫手執啲~
天氣有機會好轉，雖然呢刻仲係好差~
遠處有舊唔知係咪垃圾斗，個側門吹到嘭嘭聲~
地上面嗰個宣傳牌正呀，咁嘅設計好適合冰島天氣~
至於個垃圾桶點解喺半空......我都唔知，我都係睇相見到咋......
Seljalandsfoss (水濂洞瀑布)
旁邊嘅植物都結晒冰~
其實入得呢個瀑布，就算係冇落雨都預咗濕身，只係我哋未入已經俾雨淋到濕晒，瀑布嘅水花已經不算甚麼~
喺瀑布背後，見到有幾個人冇著冰抓，真係好嘢，冇冰抓都入到嚟，不過真係好危險！
遊覽完呢個瀑布，真正可以測試到我哋啲防水裝備嘅表現~
件褸同條褲其實算交到功課，雖然都係濕晒，但明顯係濕得慢，同埋冇話滲晒落內層~
始終咁大雨，又淋得耐，我諗除咗膠質雨褸，真係咩衫都濕~
鞋就......徹底地慘敗......冇計，其實同衫一樣，要透氣唔焗，係唔可能完全防水~
下一站 Skógafoss (彩虹瀑布)
咁嘅天氣，應該睇唔到彩虹了~
嚟到 Skógafoss，天氣冇咁差喇，細雨咗，但當然唔會奢望見到彩虹啦，都冇陽光~
瀑布右邊有條路可以行上去瀑布頂~
今日呢兩個瀑布可觀性都幾高，我個人就比較喜歡 Skógafoss~
本來我嘅計劃裡面，仲有下一個地方想去，就係 Skogar Museum~
不過我哋全部人都濕鬼晒，所以我提議唔去 Skogar Museum，直接去住宿處~
反正我原本按排去 Skogar Museum 都係為咗攝時間，興趣唔大的~
大家都覺得冇問題，就直接開車去 Sólheimahjáleiga Guesthouse~
去到 Sólheimahjáleiga Guesthouse，我哋間房喺二樓，二樓其實可以話係閣樓，係斜屋頂嘅部份~
由於有一邊都係斜嘅，所以好容易撞到頭，阿飛入嚟無奈已經撞咗幾次~
同埋呢間房住五個人係有啲勉強~
其間聽到啲奇怪嘅聲音，向窗外望一望，原來落雹！
不過只係維持咗幾分鐘~
下一站 Sudur Vik (Dinner)
叫咗四樣嘢一齊食~
Pizza, topped with pepperoni, ham, mushrooms, onions and pepper cheese
好食~
Chicken breast served with sweet potato fries, fresh salad and creamy mushroom sauce
肉唔會鞋，個汁又好味，相當不錯~
Caprese with parma ham and rucola, topped with homemade basil pesto
幾樣嘢夾埋啲 ham 一齊食係幾好食~
Homemade beef burger with bacon, caramelized onion, camemvert, tomatoes, lettuce, mayonnaise and Dijon mustard, served with potato wedges
好食~
整塊咁嘅嘢喺度，唔通有咩事發生過？
埋單之後仲送咗幾片朱古力俾我哋~
食完嘢就去入油，再次試吓張 DBS，結果一樣，之後都係用返 SCB 算~
入完油就去 Kr,- (超市)入貨，隔籬有間 Icemark，大家又喺入面行咗陣~
回程時天氣相當惡劣，一時大雨，一時大雪，同埋好大風~
今晚又係多雲，唉，日日都係咁，點搞呀......
沒有留言:
發佈留言