Snow Dogs (雪橇犬) → Goðafoss (眾神瀑布) → Akureyrarkirkja (阿克雷里大教堂) → Noa Seafood Restaurant (Dinner) → Brynja (雪糕店) → Hestasport Cottages (住宿)
今日早餐係酒店提供，選擇唔多，但整體還算可以~
今日第一站 Snow Dogs (雪橇犬)
喺冰島，有得玩雪橇犬嘅地方唔多，好似得三四間~
睇過資料，無論價錢同活動內容，都相去不遠~
所以都冇話特別想光顧邊間，順住行程去決定就好~
通常呢啲要預約嘅行程，都要預早 15~30 分鐘到(各家公司要求不同)~
今日呢間約咗 11:00，即係最好 10:30 前到~
途中見到個指示牌~
由於路面非常暢順，結果我哋好早就到咗，到達時間為 10:05......
再加上同對方傾咗幾句，原來唔需要提早到，即係我哋差唔多早咗成個鐘到......
對我哋自己嚟講，早到唔係問題，周圍行吓睇吓，時間好快過~
但對人哋嚟講，早到成個鐘係妨礙咗佢哋，人哋又要照顧你，又唔可以好自在咁做準備工作......
啲狗狗見到有車到，全部起鬨，瘋狂咁吠，瘋狂咁轉圈，非常興奮！
喺等對方為我哋準備嘅期間，我哋見到有隻狗狗食同伴嘅糞便......
等對方準備好，就帶我哋去著佢哋嘅裝備~
主要都係連身衫同眼罩~
之後都係等，喺等嘅時候，我哋隔住個籠，同啲狗狗玩咗一陣~
我哋拎住對手套遞高，佢哋會跳；我哋喺籠外跑，佢哋會跟住跑~
之後就去雪橇度準備，佢哋會揀幾隻狗出嚟，繫上雪橇繩度~
喺咁做嘅同時，我哋要負責踩住個煞車器，因為繫咗上繩嘅狗會不停係咁向前跑，係咁拉住個雪橇向前 chok，唔搵人踩實個雪橇就麻煩了~
上得越多狗，就越要用力踩，否則真係會俾啲狗狗拉郁個雪橇~
揀狗狗嗰時，啲狗狗再次興奮起嚟，隻隻都好似話：揀我啦揀我啦~
雪橇犬個樣真係好可愛~
我哋五個人，分兩架雪橇，加上每架雪橇都有一個工作人員，即係一架三個人一架四個人~
狗狗呢，三人雪橇就用八隻雪橇犬；四人雪橇就用九隻雪橇犬~
繫好晒狗狗，要甩開雪橇嘅扣時，係甩咗五分鐘！
因為全部狗狗係咁扯，扯到甩唔到扣！
我睇住都覺牙煙，因為個工作人員企咗喺架雪橇前面，啲狗狗係咁扯，當佢一甩到個扣時，如果我又踩唔實架雪橇，咁架雪橇就會被啲狗狗拉郁而會撞到個工作人員~
我同屎塔拼命咁踩實雪橇個 brake，其實我哋都只係僅僅夠力，架雪橇係 chok 吓向前少少，chok 吓又向前少少~
想開始去時，突然超大風雪，大到所有人要入屋避吓先~
當然，入去之前，工作人員會鎖返好啲嘢先~
只要冇人喺度，啲狗狗就冇再扯~
工作人員話等十分鐘~
果然，十分鐘過後，天氣明顯好轉~
我當然知道佢哋唔係神啦，而係大家都知道冰島天氣多變，亦變得快，相信等一下就會有改變啫~
一開始，啲狗狗非常起勁，瘋狂係咁跑，好似脫繮嘅野馬咁，所以一開始係幾有速度感~
不過跑咗一陣就開始慢落嚟，但仍然不減佢哋想跑嘅衝動，仍然非常落力~
向前跑咗唔係好耐就調頭~
期間啲狗狗有啲異動，唔係好肯行，又一齊望向右邊~
原來佢哋見到有隻雀仔~
真係好眼！
過程中會有數次休息~
休息過程中，工作人員做咗一啲調動~
先前提過「三人雪橇就用八隻雪橇犬；四人雪橇就用九隻雪橇犬」
而家變成「三人雪橇就用七隻雪橇犬；四人雪橇就用十隻雪橇犬」
遇到上斜位，每車都要搵一個乘客(連同工作人員即係兩個人)幫手推，否則啲狗狗會拉得好辛苦~
回程囉~
呢張相，感覺好似由朝玩到黃昏咁，其實係日出嚟~ XDDD
返到去之後就入咗間狗舍，係狗狗起居飲食嘅地方~
入面本身有幾隻狗狗，工作人員再帶埋頭先嗰 17 隻入嚟，熱鬧到不得了！
啲狗狗又熱情，不停穿梭於眾人之間，好似好開心咁~
一時間沉沒咗喺啲狗狗之間，我哋個個都好興奮！
都玩咗相當嘅時間，係時候動身去下一站了~
從消費者嘅角度，呢次活動，相當昂貴~
大約 HKD$2000 一個人，我哋五個人就成萬蚊~
連埋中途多次休息時間(狗狗要休息我當然明白)，感覺好似玩咗大半個鐘~~
大半個鐘就冇咗一萬蚊，感覺真係燒銀紙咁~
不過，從服務提供者嘅角度，養咁多隻雪橇犬，成本一定相當高~
所以呢，於我而言，真係試一次就夠~
我哋喺車上面食埋自備嘅午餐就出發去下一站~
下一站係 Goðafoss (眾神瀑布)
沿途風景~
到咗 Goðafoss，嘩，風大到不得了，企都企唔穩！
想要有個好啲嘅角度去欣賞，就要落梯先~
不過條樓梯已經結晒冰，變成一條冰面嘅斜路......
可以想像到，係冇可能向前就咁行落去~
我哋唯有背向樓梯，用雙手緊緊咁扶住扶手，背向跣住落~
其實真係有啲危險，輕則會扭親手，重則當然係跣低......
一直以為 Goðafoss 係有返咁上下大嘅瀑布，原來比想像中細得多~
靚都幾靚嘅，不過可能真係同想像中爭幾遠，有啲失望~
瀑布有兩邊，要走過另一邊係有啲步程~
但而家啲風大到留多一秒都唔想，更莫講話要行一大段路過對面~
大家都想盡快返上車避風，所以就冇行過對面了~
Goðafoss 附近風景~
下一站 Akureyri (阿克雷里)
主要係去 Akureyrarkirkja (阿克雷里大教堂) 同埋行吓街~
沿途風景~
Akureyrarkirkja (阿克雷里大教堂)
教堂唔算特別，但由教堂望出去嘅風景就相當不錯~
跟住就去行吓街~
呢邊條街唔算長，好快就行晒，其實都係嗰啲嘢~
反而條街就幾靚~
嚟到 Akureyri，又點少得影吓呢度嘅心型交通燈~
日落時份，個天又變成粉紫色~
想做嘅做晒，食飯又太早，就去超市入貨~
呢度間 Bónus 好大間~
本來諗住時間咁早，今晚晚餐好唔好自己煮呢？
不過呢度去住宿處都有一段路程，又覺得唔係咁好，作罷~
下一站 Noa Seafood Restaurant (Dinner)
餐廳門口有「欢迎光临」幾隻中文字，唔知係咪成日有團嚟呢~
可能時間尚早，餐廳一個客都冇~
我哋坐低咗，睇緊菜牌時，廚師行咗過嚟~
佢知道我哋來自香港時，表現有點興奮~
原來佢 23 年前當兵時，喺香港駐守過半年~
佢仲話好鍾意香港~
佢個麵包加埋冰島著名嘅 Skyr，好好食！
呢間餐廳以魚為主，所以我哋叫咗兩魚兩肉~
The Catch of the Day - Wolf fish
Pan fried and served with potatoes and salad, finished in a cream sauce with dill lemon and grain mustard
好好食！有魚味，佢個 cream sauce 都好正！
Cod Fillet finished in butter the classic Icelandic way
鱈魚都好食~
Beef short ribs, slow cooked in Icelandic malt and star anise with potatoes and salad
個牛好好食，夠晒腍味道又好~
Slow braised Icelandic lamb shank, in a rich sauce with potatoes and salad
羊就普通咗啲，不過不失~
今晚呢餐好滿足，不過價錢就有點貴~
下一站 Brynja (雪糕店)
呢間雪糕店，唔係玩雪糕口味，係玩 topping~
口味只有朱古力、雲尼拿同士多啤梨~
Topping 就好多，唔同 topping 唔同價錢，又啲又玩組合，其實有點亂，唔知佢點計~
不過唔理喇，雪糕啫，收得你幾多錢吖~
跟住就去 Hestasport Cottages (住宿)
Akureyri 夜晚路旁有啲六角形燈飾，都幾特別~
我哋首先要去佢嘅接待處，佢放咗封信喺門外信箱，信內有鎖匙同地圖，照住佢指示，好容易就去到~
之前去入油時，喺佢間小超市度買咗盒雪糕，呢盒雪糕喺香港好似好多年冇見過了，都幾好食~
今晚天氣差，不用等極光了~
沒有留言:
發佈留言