今日行程：
The Colinton Tunnel → Calton Hill → City Art Centre → ALBA Bistro(Lunch) → Forth 1 Big Wheel → Christmas Market (East Gardens) → Ice Skating → Light Night Installation → Old Town → Christmas Tree Maze → Christmas Market (West Gardens) → Bonnie & Wild at St James Quarter(Dinner) → Holiday Inn Express Edinburgh
為求天光就開始行程(日照時間太短)，我決定朝早六點就開車，落到去第一個景點，應該開始天光~
出發前，睇咗 Edinburgh 天氣報告，今日兩點開始落雨，落到深夜先會停......
而我哋今次嘅主要目的，係感受聖誕氣氛，睇吓燈色，全部都係室外~
今次真係唔係好夠運，唯有希望唔會落好大啦~
今日第一站：The Colinton Tunnel
一條廢棄咗但又充滿壁畫嘅鐵道隧道~
去到目的地，泊好車，拎部相機出嚟諗住影吓相，咦？對唔到焦嘅？
搞極都搞唔掂，屎塔又幫手睇吓~
佢搞完，有進步呀，撳實幾秒就對到焦......
但係要撳實幾秒先對到焦，點影......
唔通天氣太凍 short 咗？冇理由，冰島 -11 度，北海道 -16 都冇事，而家只係 0 度，點會有事~
到最後，唯有出絕招，回復原廠設定，呢招真係萬試萬靈，通常都掂，部機正常晒~
我冇戴手襪，隻手好凍，但其實還好，完全覺得冇問題，我覺得係做而家呢份工練返嚟，習慣晒~
行到去隧道，見到壁畫，其實唔止係壁畫，有啲仲係好似木板咁嘅畫板咁痴上去~
不過個感覺其實有啲一般，唔係幾係我杯茶，唔係話真係好鍾意，但都值得到此一遊嘅~
附近環境~
下一站 Calton Hill
市中心一個小山丘~
上次去 Edinburgh 已經去過，不過係夜晚，今次屎塔指定要朝早去一次~
今日餘下嘅旅程，全部都係步行，所以就要搵個停車場放低部車先~
仲記得上次去 Edinburgh，因為個停車場個網頁冇解釋清楚佢啲條款，搞到我蝕咗 £11(其實係用唔到佢個優惠)，今次我知點做喇！
一心諗住今次泊返呢個場，不過穩陣啲，我實會再上佢個網睇多次~
今次，佢個網頁已經冇咗當時嘅優惠，唔知係之後都唔做，定臨近聖誕，所以唔做~
點都好，總之我就再次用唔到嗰個優惠，激死！
要近市中心泊部車全日，預咗貴，最終搵到兩個停車場，價錢一樣，泊全日 £22，就揀個位置好啲嘅，個場叫 Q-Park OMNI~
泊好車就行上去 Calton Hill，沿途好多亞洲面孔，偷聽吓佢哋講咩語言，全部講普通話，好多都係大陸人，而且都係年輕人~
我相信，呢啲都係嚟讀書嘅，而大學又放假，所以約埋一齊去玩~
山上面，佔咗最少五成係亞洲人面孔，除咗有啲聽到佢哋係講普通話，感覺上聽唔到嘅，從衣著去判斷，都似係大陸人，真係好多~
不過又咁講，住喺度嘅，唔會成日上嚟嘅，少本地人又好正常~
上次夜晚嚟，其實睇唔到啲咩，今次就睇到喇，睇到晒成個城市，個景都幾好~
下一站 City Art Centre
一個免費入場嘅藝術中心~
沿途隨影~
本來呢，我哋係去 Museum of Edinburgh 嘅，免費入場，有人話好多嘢睇~
點知，去到見全館都冇著燈，心知不妙啦，冇開，原來 17/12 開始已經休息，休到出年 4/1~
我通常做功課，都會盡量睇吓有冇官方網頁，再睇吓啲收費同入場時間~
呢間都唔例外，我睇嗰時大約係 10/12，我完全冇見到官網話 17/12 ~4/1 暫停開放......
咁冇嘅，一係人哋有講，但我大意睇唔到；一係真係佢冇講囉......
咁講真，後者機會係細啲嘅，點會唔講吖，爭一星期咋喎，冇理由仲唔通知~
但係如果話係我睇唔到，我又唔岔氣，我明知聖誕，一定會睇清楚啲開放時間~
唉，唔知呀，總之好失望.......
Edinburgh 已經冇咩想睇，仲要呢個預咗兩個鐘俾佢，而家冇得睇，都唔知有咩做......
再睇吓佢個通知，另一部份話 City Art Centre 25/12 先開始休息~
咦，即刻睇吓 City Art Centre 喺邊先~
步行可達喎，唔駛諗啦，梗係行過去睇吓啦~
沿途隨影~
行到去，咦？又係免費入場喎，仲好似幾大，應該多嘢睇~
向上有三層，可以影相；另外仲有一層地庫，因為版權關係，唔可以影相~
呢幅畫主題係 Birthday Party，但我有種中秋節嘅感覺~
油畫以外，我並不感興趣，或者可以話唔識欣賞~
未入嚟之前，展館好似好大，但入面其實冇想像般大~
更甚嘅係，展品相當少，好多展品都係佔據一大幅牆或一大片空間的~
例如以下展品，一個比網球還少的冷球，就以一整幅牆來呈現，我相信係藝術嘅一部份，只係我唔識睇~
至於地庫，主要係視覺作品，有畫有攝影有雕塑作品~
相當唔錯，可惜唔俾影相~
下一站係 ALBA Bistro(Lunch)
本來計劃好係去 Circus Cafe Bistro 嘅，不過而家地點唔同咗，費事走回頭路，反正只係一間普通餐廳，就不如向下一景點進發，沿途再睇吓~
喺日本，邊行邊搵食，真係易如反掌；但係喺 Scotland(其實我深信成個 UK 都係)，真係一啲都唔容易，因為其實啲嘢唔算好啱食，同埋價位一啲都唔低(速食店除外)~
諗諗吓，不如去返上次嗰間......唔知點形容，總之係一間大家都記得，食 Fish & Chips 嘅餐廳~
(其實要食 Fish & Chips，我深信直徑一百米範圍內實搵到，係唔知點解行咁遠走去呢間......可能有個目標好過漫無目的咁搵~)
沿途隨影~
其實只記得位置，叫咩名就唔記得，嚟到先知叫 BERTIE'S~
可惜，門口寫住 Catch up at 5pm......又摸門釘~
最後揀到唔想揀，見到呢間有 pasta，價錢相對可接受，就揀佢~
ALBA Bistro
Spaghetti Alla Carbonara
Pasta with egg yolk, bacon, garlic sauce, parmesan cheese
意粉份量少，用叉捲兩嘢已經冇咗半碟，但以咁少份量嘅意粉嚟講，bacon 算多~
不過成碟嘢係冇味嘅，望落係 creamy 嘅，但完全聞唔到亦食唔到奶油香~
連 bacon 都冇乜味，總之成碟嘢就冇味~
Angus Cheese Burger
Scottish beef burger topped with melted cheese and served with chips and salad
漢堡不過不失，正常味道，但已經係今餐最好食！
Calamari
Deep fried squid rings served with tartare sauce
屎塔好鍾意食魷魚，我喺 menu 見到，已經鎖定一定要叫~
不過，一叉落去已經深知不妙，好硬！
啲粉厚到不得了，如果蒙住眼嚟食，係食完都感受唔到有魷魚質感，味道亦完全冇，即係食完都唔知咩嚟！
我淨係食到好硬嘅粉！真係未食過咁差嘅魷魚圈！
呢餐埋單 £33.5，喺呢度出街食嘢嚟講，唔係特別貴，但單純講用咁嘅錢食啲咁嘅嘢，真係好唔值~
呢度嘅天氣報告，感覺比香港嘅準，食完飯出嚟，落緊雨，同今朝睇到嘅預報，時間一致~
下一站 Forth 1 Big Wheel
只要去嘅地方有摩天輪，我多數都會安排乘搭，屎塔喜好之一~
沿途隨影~
個摩天輪唔大，即係唔會去到好高，未上已經知唔會有咩睇，再加上落緊雨，冇乜期望~
下一站 Christmas Market (East Gardens)
聖誕嘛，就算我哋唔好 shopping，都應該行吓聖誕市集，感受吓聖誕氣氛~
市集主要係食店 + 精品店~
可惜，雨勢唔算小，真係極為掃興，咩 mood 都冇晒~
下一站本來係要入黑先開始嘅，但由於 City Art Centre 完成時間比預期早，更加由於冇乜心情行市集，而家離天黑仲有最少一個鐘，要搵啲地方去~
一路係咁落雨，真係好沮喪，諗住搵個商場行吓，但其實大家都深知，根本唔係想嚟行商場~
下一站 Ice Skating
最後，去咗臨時搭建嘅溜冰場，睇人溜冰~
呢度，封咗一段馬路，搭個溜冰場，面積都算大，主要係夠長~
大人細路都玩得開心，眼見多數都識溜冰嘅，只係有啲唔係好叻嘅，有時會跌低~
天氣咁凍，有啲人仲著短裙溜冰，好勁！
唔識嘅，或者冇乜信心嘅，可以租用呢啲椅嚟扶住溜~
中間有個看台~
下一站 Light Night Installation
只係一個草地上嘅燈色，反正喺市中心，就去睇吓~
我哋喺溜冰場睇到開始天黑就行過去 Light Night Installation 嘅地點~
沿途隨影~
去到好似未開燈，我哋就搵咗個地方一邊避雨一邊等~
等到差唔多，就行過去，其實冇乜特別~
下一站 Old Town
Old Town 上次當然有行過，今次就係去睇吓有冇啲咩燈色咁~
下一站 Christmas Tree Maze
用聖誕樹砌成嘅迷宮~
Christmas Tree Maze 位於 West Gardens，呢度有另一個市集，亦有少少機動遊戲~
Christmas Tree Maze，比想像中好，除非有超乎常人嘅記憶力，否則，必定迷路~
純粹搵出口的話，的確係單調咗啲，所以佢加插咗啲小玩意，就係要喺入面搵到七個 hidden letters，咁離開時就會有份小禮物~
出口呢，一早就搵到，但為咗搵晒七個字母，兜兜轉轉，來來回回咁行~
期間撞口撞面都係嗰幾組人，大家係咁兜，係咁同對方講 sorry，因為成日喺轉角位遇見~
NSNAOMW(佢個 N 字係點印都係錯方向嘅......)，究竟係咩字呢？
屎塔好嘢呀，好快諗到，係 SNOWMAN，答中咗，工作人員就送咗兩包仔糖果俾我哋~
呢邊市集比 East Gardens 細，冇乜嘢睇，機動遊戲亦冇乜看頭，我哋都冇乜興趣周圍行~
俾雨淋咗成日，其實身心俱疲，唔想行喇~
West Gardens 隨影~
下一站 Bonnie & Wild at St James Quarter(Dinner)
見到某 Edinburgh 谷有人推介，就去試吓~
St James Quarter 係商場，而 Bonnie & Wild 係商場內嘅 Food Hall~
一入門口就有人問你想行吓先定想坐低~
我哋第一次嚟，就想行吓先再決定~
對方話如果想坐低就要返嚟搵佢~
咁即係唔可以自己見到位就坐啦~
周圍行，主要搵兩間餐廳，一間係 The Gannet，一間係 Creel Caught~
喺 The Gannet，我哋想叫 seafood platter~
喺 Creel Caught，我哋想叫 fish tacos & seafood platter~
兩間都有 seafood platter，就諗住喺同一間叫，就揀咗喺 Creel Caught 叫晒佢~
Creel Caught Platter
Smoked salmon, prawn Marie Rose, smoked mackerel pâté, hot smoked Loch Etive sea trout, olives, cornichons, celeriac Arran mustard slaw, brown bread
呢碟嘢，算係海鮮拼盤？睇落唔及引，食落呢？會唔會有驚喜？
係完全冇驚喜，而且係非常失望！
味道唔係難食囉，只係極之普通，叫得海鮮，真係唔期望會係咁~
Fish Tacos
Chipotle mayonnaise, shredded lettuce, avocado dressing, pico de gallo
唔知佢係咩魚，但算係有啲魚味，還可以，係細舊咗啲~
我同屎塔都好鍾意食魚，最好食梗係蒸魚，所以，炸魚嚟講，好難可以滿足我哋~
(補充：睇 The Gannet 時，我係有睇到個 seafood platter 有 scallop；但睇 Creel Caught 時就冇留意佢有咩，有人推介嘛，見到 seafood 就狗衝，有時啲嘢，都唔知點解會咁決定，有 scallop 都唔揀，錯晒......)
食完飯，喺第二個出口離開商場，咦？一種好熟識嘅感覺湧上心頭~
哦~~~上次等阿朱嚟同等佢夠鐘上巴士嗰度，我都曾經喺呢個位存在過超過一個鐘~
下一站 Holiday Inn Express Edinburgh
今次揀住宿，真係想揀間有早餐食嘅，但唔想只係提供多士同牛油嗰啲早餐，呢間應該滿足到我哋~
而我哋訂住宿訂得比較遲，選擇唔多，呢間個地點唔好，但唔計地點，佢算係唔錯~
咁我哋自己揸車，地點方面，只要唔太遠，其實都可以接受~
如果要泊佢個停車場，要額外俾多 £5~
本來呢，我哋晚歸早出，泊街其實都冇問題，不過呢區治安好似一般，泊佢個停車場穩陣啲，又唔係貴~
去攞車時(泊咗全日嘅嗰個停車場)，去部票機俾咗錢先出車，不過有啲意外~
入咗張泊車飛落部機度，俾埋錢，到佢出飛時，喺出口頂住咗出唔到嚟......
相信係張飛俾雨水整濕咗，唔夠直身，就喺出口度頂住出唔到......
我哋撳機上面個掣求救，對方問明情況後冇咗聲，唔知係咪會嚟幫手定點~
我哋鍥而不捨咁試多幾次整張飛出嚟，又用信用卡嘗試撩佢出嚟，最後佢自然排出！
我哋再撳掣通知返對方，搞掂~
今日由食完午餐開始，直至去到酒店，都一直落住雨，完全冇停過，好攰，好攰，今晚應該好好瞓~
沒有留言:
發佈留言