《瞬間看地球》Stranger's Blog: 2022.12.03 瑞士 (Luzern) (第一天)

2022年12月26日星期一

2022.12.03 瑞士 (Luzern) (第一天)

今日行程：
瑞士【Luzern】Lozärner Wiehnachtsmärt(Lucerne Christmas Market) → Oh Wow! Thai Take Away(Dinner) → Altstadt(Old Town) → Kapellbrücke(Chapel Bridge) → Backpackers Luzern(Accommodation)

同上次一樣，未夠凌晨三點就要出門口去等巴士~

屎塔呢幾日腸胃有啲不適，希望佢可以快啲好返~

順利到咗荷蘭 Amsterdam，即刻試吓個電話訊號先~
今次同上次唔同，我哋用緊個台，唔包瑞士，所以出發前就買咗兩張電話卡~

一張係 Tesco £10 有 30GB(咁啱有優惠)
一張係 EE £10 有 5GB

為求穩陣，兩張卡一定要購至唔同電訊商~

試咗一輪，屎塔張 Tesco 冇問題，我張 EE 就上唔到網~
根據指示，打上 EE 熱線，獲告知，要喺英國開咗漫遊先可以用，而家咩都做唔到......

£10 事少，呢次旅程冇數據用事大......
但其實又唔係好大鑊嘅，我可以 offline 做到嘅嘢都準備好，係有時臨時改行程要查吓交通啫，咁都仲有屎塔~
而家唯有試吓可唔可以用屎塔部機 share wifi 俾我~
好彩可以，不過 hotspot 係好唔方便，第一唔係咁易連，第二部機一唔用，熄咗螢幕就會斷，第三再連過係要屎塔熄咗佢再開返先 search 到先再連過~
即係每次用完，到下次要再用嘅時候就要屎塔嘅協助先再用到~
莫講話成日要佢協助係好麻煩嘅事，佢個人成日處於休眠狀態，冇理由叫醒佢幫我連 wifi~
不過算啦，冇得上網，絕大部份時間都冇問題嘅~
瑞士買一張唔平呀，好似要 £20，我已經蝕咗 £10，唔係好值得再俾 £20~

到咗瑞士 Zürich 機場，要去櫃員機撳啲現金用吓~
我唔單止要撳瑞朗(CHF)，仲要撳歐羅(EUR)，因為今次旅程會到一到意大利同法國小鎮，唔知會唔會遇到唔收卡嘅情況，尤其喺法國會行聖誕市集~
其實我哋有 €50 現金喺身，就係上次喺 Praha 住宿退返嗰 €50，不過始終驚唔夠用，反正就算歐羅撳多咗，將來都實有用，有得撳就撳定啲先~

都仲未入境已經見到 Crédit Suisse 櫃員機，佢顯示可以撳 CHF(Fr) & EUR(€)，不過到入咗張卡時，就只有 CHF 可以揀，冇 EUR~
再睇吓，個匯率好差，係，機場預咗差，不過我又唔需要即刻做決定，或者入咗境先再算~

入咗境之後，只係見到 Crédit Suisse，預咗個匯率係一樣，結果都係一樣~
不過又唔係撳得多，都俾咗一次機會，就喺度撳~
結果又有驚喜喎，佢顯示會扣幾多 GBP，但實際係扣少咗，計返個匯率同市價差唔多，奇怪~

屎塔腸胃不適，飛機上提供嘅三文治，佢只係食咗部份麵包，所以佢今日其實冇乜點食過嘢~
雖然佢冇胃口，但點都要食啲嘢嘅~
我哋走去超市度買嘢食，由於佢只想食啲冇乜油嘅嘢食，又想攜帶方便，就揀咗包類似燕麥咁嘅餅乾~

冬天去旅行，預咗天氣唔會好好，陰天係正常，只求唔好落雨，一係落雪好了~
不過呢，今年嘅瑞士係暖冬，非山區嚟講，要落嘅，一定係雨~
就算唔落雨，非山區都好大機會冇雪景~
為雪景而嚟，但預咗好多地方都冇雪，都失望咖，不過人生就係咁~

而家喺機場搭火車去 Luzern 先~
有 Swiss Travel Pass 真係好方便，睇啱邊班車直接去月台等車就得，乜都唔駛做~

喺火車開咗盒燕麥餅乾嚟食，相當麻麻......

今晚喺 Luzern 呢間住宿，喺呢次旅程距離火車站最遠嘅一間，要行成 16 分鐘，拖住個大篋就要更耐~
冇計，今次旅程支出真係大，我哋一向對住宿同食要求唔係好大，所以唔想花太多錢喺呢方面，留返啲錢下次旅行好過~
為咗平啲，只好出此下策~

我哋 16:20 到咗旅館，不過 17:00 先有人可以處理 check-in，但就可以入去坐低等~
16:30 就有人返嚟，等咗唔係好耐就可以開始 check-in~

上房放低晒啲嘢就開始今日行程~

今日第一站 Lozärner Wiehnachtsmärt(Lucerne Christmas Market)
Luzern 有兩個聖誕市集，呢個係其中一個~

市集話大唔大，話細唔細，都幾多人，而且裝飾好靚，氣氛相當好~
呢個市集都幾多嘢睇，有部份係賣嘢食嘅~

我哋本身都唔係好掃街，屎塔咁嘅狀態就更加唔可能掃街，冇喺市集食嘢，所以行完市集就去第二度食嘢~

下一站 Oh Wow! Thai Take Away(Dinner)

離遠睇以為係七仔~

呢間泰菜有少少快餐形式，要喺樓下點咗菜先去搵位~
好多菜式都有圖，真係花多眼亂，喺英國少食亞洲嘢嘅我，樣樣都想食~
屎塔就慘啲，佢只能揀啲清啲嘅嘢食，不過佢話由於冇乜胃口，唔會話好想食又唔食得，所以都冇咩所謂~
咩邏輯？

屎塔揀咗 Tom Kha，貪佢清清哋，仲有碗白飯，問咗佢話唔辣嘅，就揀佢~
千揀萬揀，又話唔辣，點知係冬陰功味，只係椰汁味重啲，偏甜多過辣，但唔係唔辣囉~
同埋個樣真係爭得遠，話佢俾錯咗第二樣都唔出奇，但睇返菜單，冇其他嘢係咁嘅樣，我相信係冇俾錯~

菜單個樣係咁~

現實個樣係咁~

我就揀咗 Kao Pat 配 Shrimp~
唉，我揀 Shrimp，佢俾咗 Chicken，費事煩又要等，唔換啦~
個樣又係兩回事嚟，不過公平啲講，一個蝦一個雞，唔同樣就梗咖啦，但啲色澤就......

菜單個樣係咁~

現實個樣係咁~

話就話快餐，都等咗好耐先有得食~
佢得兩個人做嘢，樓下四個位面壁，樓上十六個位，全場爆滿，全部都係未有嘢食~
呢二十個人，總共係六組人，我哋係第三組，已經算好幸運，第六組到我哋走先有嘢食~
仲未計外賣，真係踢晒腳~

期間樓下啲煮食嘅味攻到上嚟，唔知佢整緊乜，有一半人係咁咳~
坐窗邊嘅人就開咗啲窗，隔咗一陣叫做好啲~

重點係，好唔好食呢？
又話唔辣點知辣，叫蝦又俾咗雞，但都真係嬲唔落，因為兩樣嘢都好好食！
我哋喺英國都有食泰菜，但真係止吓癮而已，呢間嘢啲泰菜唔錯，係偏鹹，但可接受~
由於我叫蝦佢俾咗雞我，其實埋單佢係會收多咗我 Fr1，咁我當然唔會同佢計較，尤其喺瑞士嚟講，呢餐 Fr33 真係平到笑呀！

下一站 Altstadt(Old Town)
舊城上次嚟過，今次係想睇吓近聖誕有冇咩燈飾~

舊城區冇乜燈飾~