《瞬間看地球》Stranger's Blog: 2022.12.04 瑞士 (Weggis、Rigi、Stoos、Luzern) (第二天)

今日行程：
【Weggis】 → 【Rigi】 → 【Stoos】 → 【Luzern】Rudolfs Weihnacht(Rudolf's Christmas) → Soul Chicken(Dinner) → Backpackers Luzern(Accommodation)

今日第一站 Weggis

噚晚早瞓，兩條友一早就起咗身，由於時間鬆動，兩條友 hea 到不得了，出門口時就趕頭趕命，我哋幾乎要跑去碼頭~

沿途隨影~

去到碼頭又搵唔到 7 號碼頭，只係搵到 1-6，諗住行去售票處問吓，經過 2 號碼頭，見到有工作人員就問吓佢~
佢一路打手勢叫人上船，一路講 Weggis，其實佢係冇正式答到我哋~
但由於佢咁講，我哋就上船先，因為隻船就開~
我哋上埋船佢就閂閘，我哋真係最後一秒先上船，差啲趕唔切~
上到船，見到其他工作人員，我又問一次，今次確認隻船係會經 Weggis，安心晒~

今日天氣好差，好大霧~

沿途隨影~

頭先上船時好衝忙，而家先留意到隻船原來咁靚，渡輪嚟咋喎~

去到 Weggis 係落緊雨，本來計劃都有諗住去湖邊行吓睇吓景，而家天氣咁差就算了~
我選擇咗嚟 Weggis，其中一個原因，係因為由 Luzern 去 Rigi 嘅其中一條路線，就係搭船經 Weggis 再搭鐵路上 Rigi，乘機搭吓船~
(不過之後改咗行程，唔去 Rigi，但過嚟 Weggis 再去下個景點，方向都係啱的，所以就保留 Weggis 嘅行程~)
另一個原因，係我喺網上面見到一張相，都幾靚，所以就想嚟行吓~
(張相有版權的，就唔貼過嚟)
張相最靚嘅地方係有雪景，遠山同啲屋頂都有雪，成個小鎮嘅畫面唔錯~
不過嚟到呢度係一啲雪都冇，陽光又冇，所以個景就普通啲~

就喺眼前嘅山坡見到草泥馬，深啡色嗰隻對我哋好好奇，望咗我哋好耐~

另外有兩隻羊，未見過啲毛色咁樣嘅羊，好似好奇怪咁~

天氣好差，不停落住雨，睇睇天氣報告，廣泛地區今日都係落雨，想話改吓行程去啲天氣好啲嘅地方都冇選擇~
本來行程係去 Stoos，之後搭吊椅上 Fronalpstock~
我哋未搭過人哋去滑雪會搭嘅吊椅，而 Fronalpstock 風景又唔錯，所以儘管要成 Fr29 一個人，我都選擇上去，而捨棄免費嘅 Rigi~
睇過 Fronalpstock live cam，天氣唔多好，我決定唔去 Fronalpstock，改去返 Rigi~

Weggis 隨影~

下一站 Rigi

由 Weggis 去 Rigi，要搭一程吊車，一程齒軌鐵路~

沿途見到呢張巨型彈床，好想跳落去~

一臉認真嘅牛~

雨中慢步十幾分鐘，終於行到嚟吊車站~

希望座山夠高可以穿過雲層，否則上到去連你眼望我眼都望唔到......

持 Swiss Travel Pass 係免費乘搭，出發前做過功課，知道係唔需要換飛，就好似搭火車咁~
不過既然等緊車，有時間，就走去問吓，確認一吓也好~
結果係唔駛換飛，入閘時出示 Swiss Travel Pass 便可~

準備騰雲駕霧~

天氣差都仍然覺得好靚~

唔知啲雲(霧？)有幾厚呢......

穿離雲層嗰時，成個車廂充滿驚嘆聲~

坐完吊車，就要轉搭齒軌鐵路~
通常呢啲情況跟住人潮行就冇死，我亦都暫時關閉大腦，冇乜留意附近環境及指示，跟大隊行~
點知跟大隊行，跟咗入去做 Spa......，我哋仲排埋隊，排排吓覺得唔對路先知，好戇居~XDDD

醒覺之後就行返條正軌~
要穿過平台先去到鐵路站~
儘管我哋已經穿過雲層，不過呢度仍然係落緊雨~

呢度好有仙境感覺，好正~

呢度向下望有個露天溫泉，頭先啲人就應該係去呢度，池水入面都有唔少人~

鐵路站呢邊都幾靚~

部車個設計同配色好正~

喺鐵路站呢度，都幾多人，唔通上面天氣唔錯？
我冇睇過上面天氣，因為無論如何我都會上去~

沿途風景~

上到嚟冇落雨冇落雪，天唔算好光，但感覺唔錯~
周圍都係雲海，可以話幾正，但由於只係見到雲海，風景變化就唔大~
雖然係咁，我哋仍然覺得好值得上嚟~

下一站 Stoos

由 Rigi 去 Stoos，要搭幾程車~
一程齒軌，一程火車，一程巴士，一程纜車~

另一部齒軌列車，都靚~

沿途風景~

上 Stoos 嘅纜車，號稱全世界最斜纜車之一，最斜個位達 47.7º~

搭呢程纜車係包含喺 Swiss Travel Pass 之內，但同 Rigi 唔同，搭呢程車係要到售票處出示 Swiss Travel Pass 換飛的~

搭乘世界最斜纜車係咩感覺呢？係冇感覺！
因為佢個車廂係會保持水平狀態，就好似摩天輪咁，無論你去到邊個位，乘坐感都係冇變~
而佢比摩天輪定得多，基本上全程嘅乘坐感同坐普通速度嘅火車喺平路度行係冇分別~
而且佢好快就會入隧道，出隧道後好快就到站，基本上可以睇景嘅時間唔多，再加上今日能見度低，成個過程就好似搭緊一部有座位嘅 lift 咁~

一離開車廂就見到呢個景，成個天空之城嘅過山車咁，好正！

離車站不遠處有個斜坡，有幾個小朋友喺度玩雪兜，好不開心~

呢度有間小教堂~

有個好細嘅湖，似係人工湖~

湖中有個唔知咩設施~

我有嘗試過落去，不過真係唔掂，落去條斜路面結晒冰，跣到只能用手力保持平衡~

不過其實都唔駛落去睇嘅，用相機 zoom 嚟睇吓，似係足浴？

隻貓非常黐人，一見如故咁~
不過佢對狗嘅警覺性非常高，離三十米遠有隻狗，佢即刻匿埋~

期間見到上 Fronalpstock 嘅吊椅，真係好有衝動搭~
不過佢回程尾班椅係 16:00，而家係 15:05，行去車站嘅時間，加埋可能要等車，上到去可能都冇乜時間要即刻返落嚟~
而且上面好可能都係睇雲海而已，呢 Fr29(兩個人就 Fr58)非常不值得花，好快就打消念頭~

Stoos 冇咩特別嘢睇，只係一個山區小鎮，美麗而寧靜~
去旅行梗係想要晴天，但此時此刻絕對唔算好嘅天氣，絕不比晴天遜色~

Stoos 隨影~

行夠就搭返纜車落山，轉巴士同火車返 Luzern~

下一站 Rudolfs Weihnacht(Rudolf's Christmas)
喺 Luzern 嘅另一個聖誕市集~
幾多人，氣氛唔錯~

下一站 Soul Chicken(Dinner)
一間主菜只有雞，並且選擇好少嘅餐廳~

屎塔腸胃仍然不適，走去食炸雞，事後應該會比死更難受~
不過佢覺得計劃咗嚟呢間就呢間，最多就住嚟食，食多啲 side dish，雞就去皮~
佢自己身體，佢自己最清楚，同埋其實出發前買咗藥，有需要都有藥幫吓手~

去到餐廳，條街一個人都冇，但入面係滿座，老闆叫我哋出門口等~
此時，有人好識做，同老闆講佢哋走喇~

呢間餐廳個 menu 好特別，印喺張黑膠碟度嘅~