《瞬間看地球》Stranger's Blog: 2022.12.06 瑞士 (Mürren、Wengen、Spiez、Thun) (第四天)

今日行程：
【Mürren】 → 【Wengen】 → 【Spiez】Schloss Spiez(Spiez Castle) → 【Thun】Eurasia Thai Restaurant(Dinner) → 【Spiez】la belle vue Boutique Hotel(Accommodation)

我哋對住宿要求唔高，一般好少貪個景而俾貴啲去租住，因為我哋喺房時間唔多，所以覺得唔值得~
喺冇特別要求有房景情況下，今日呢間對開個景係幾唔錯，而今日天氣又好，要再三記錄吓~

旅館包早餐的，但就要去第二間旅館度食，印象中都好似冇試過咁樣~

出去之前，我哋刻意去返噚晚入唔到嗰度門，試吓個感應器~
一如所料，係成功嘅~

食早餐嘅地方喺 Hotel Jungfrau，行過去一分鐘到，好近~
過到去，見有三個人離開，佢哋著晒同一款運動服裝，似係制服嚟，手上都拎住滑雪用品~

早餐八點開始，我哋到嘅時候係八點過少少，咁嗰三個人唔食早餐？定還是已經食完？
早餐選擇少，啱食嘅就更少，而且好似已經有人享用過咁~
之後望到其中一張檯，真係有人喺度食過嘢，咁應該係嗰三個人了~

我哋由八點食到九點，全場就只有我哋兩個，好可能，呢間旅館都係得嗰三個客~
我哋睇得出，工作人員係等緊我哋食完就準備收嘢，所以，兩間旅館加埋應該係得五個人入住......

今日第一站：Mürren
今日，我決定唔跟計劃好嘅時間走，因為噚日遲咗上嚟，天氣又唔好，趁今日天氣唔錯，又行吓個鎮~
不過其實個鎮好細，行嚟行去都係嗰啲地方，但係覺得今日咁好天，就咁走咗去有啲可惜，所以都唔諗咁多，行到夠先走~

天氣好就係好，不過太陽並沒有射到入鎮，成個鐘都係喺山頂頂邊~
冬天日照短，照射方位同夏天自然唔一樣，其實佢會唔會全日都只係掛喺山頂頂邊呢？
我係有啲想等佢照到入嚟先行嘅，但如果佢唔會照到入嚟，又或者幾個鐘後先照入嚟就唔等啦，所以最後都冇等~

噚晚搵門嘅時候就經過呢度，夜晚係冇燈冇光，雪上面就係我哋嘅足印~

途中近距離見到直昇機運嘢，唔知咩嚟呢~

見到呢個噴嘢位，唔知噴咩，又唔知有咩用~

完全冇太陽照射到入嚟，成個鎮都好暗，但無損閒逛 Mürren 嘅興緻~

閒逛期間，屎塔終於開齋跣低，雪地對佢嚟講真係超高危，但亦因為雪地，跣低咗都完全冇受傷~

行到夠就返旅館 check-out~
呢個時候，太陽終於都照到入小鎮~
不過都唔打算留低喇，否則今日餘下行程就要減好多~
有太陽同冇太陽又真係爭幾遠~

原來喺吊車望返轉頭個景都唔錯~

呢個景又係正~

下一站：Wengen
瑞士最美小鎮之一~

上嚟時要搭兩段吊車，落去亦都一樣~
喺轉吊車時，有個亞洲女仔用廣東話走埋嚟問我哋係咪香港人，不過原來佢唔係香港人，佢係馬來西亞人，佢自己嚟瑞士玩兩星期~
去到 Lauterbrunnen 時，佢話佢去 Interlaken，而我哋係去 Wengen~

沿途隨影~

嚟到 Wengen，有一樣嘢係首先要解決嘅，就係個篋~
我哋唔會喺 Wengen 度住，唔可以寄存喺旅館~
瑞士鐵路站，好多都有儲物櫃，上網可以查到邊個站有，而 Wengen 係冇顯示有，咁即係冇啦~
上網查過，有人用過一個方法，不過呢個方法實在唔太好，但我哋真係冇辦法，所以都係諗住用呢個方法~
不過去到 Wengen，原來係有儲物櫃，仲可以放到我哋個 28 吋篋有凸，正！
租用儲物櫃要 Fr7，我哋冇散紙，就走入售票處將紙幣打散佢~

其實啲儲物櫃有啲殘，應該存在咗好耐，但唔知點解官網同網上都搵唔到有講有儲物櫃，甚至有人話要用一啲唔係幾好嘅方法安放行李~

Wengen 同 Mürren 唔同，Wengen 係一個大鎮，隨街嘅人都似係居民，基本上視線範圍內一定有人，唔似得 Mürren 咁，多數時候都係冇人喺視線範圍內~
個鎮都好似幾唔錯，始終都係被稱為瑞士最美小(其實唔小)鎮之一~

今日冇安排午餐，就去超市買嘢食先，陣間睇吓喺邊度適合坐低食~

Wengen 有點大，唔可能行得晒每個角落，當然亦冇需要~
我事前就搵咗幾個地點，個景算係唔錯，而藉住去呢幾個觀景點，亦可以當行吓個鎮~

沿途隨影~

明明到咗第一個觀景點，但點解好似完全冇嘢睇咁嘅？

原來過咗呢個小山丘就會見到~
雖然只係一堆屋仔，但個畫面幾唔錯~

期間聽到啲聲，原來係呢架嘢~

有啲肚餓，但實在搵唔到合適地方食嘢~
今日太好天，有得坐嘅就曝曬；陰嘅地方又冇得坐~
只好行去下個地點再沿途睇吓~

沿途隨影~

期間，終於俾我哋搵到個位，唔曬又有得坐，即時開餐~

食完嘢就行去下一個觀景點~
呢個觀景點夠晒開揚，成個山谷盡收眼底~

不過由於對住個太陽對到正一正，都唔係留咗好耐就離開~
就喺呢個時候，我哋見到先前遇到嗰個馬來西亞女仔！
佢唔係話去 Interlaken 咩？點解會喺度出現？
佢話上網睇過，Wengen 好似都幾好，所以過嚟睇吓~
Wengen 地方算幾大，又會咁蹺喺同一時間同一地點遇上~

跟住就去第三個觀景點，其實都有猶豫去唔去好，因為由呢度行過去，要成 23 分鐘~
而且呢個點我唔係好確定喺邊，可能去到唔係我想去嘅地方~
不過今日天氣咁好，就算去到冇靚景睇，喺 Wengen 行吓都係好，所以都係去~

沿途隨影~

地下啲雪一伏伏咁，唔知雪下面係點嘅呢？

去到個觀景點，雖然身在高處，但除咗樹，就係樹，完全冇景的......
冇景到連一張相都冇影到~ XDDD
不過沿途風景相當不錯，絕對值得行呢一趟~

呢度雖然有張椅，不過上面都係雪，想坐陣都唔得~

研究過地圖，我冇信心去到我想去嘅地方，就算去到都要行好遠，作罷~

下一站：Spiez
Spiez 係一個幾唔錯嘅小鎮，不過喺瑞士嚟講，就相對冇咁大吸引力，我哋嚟呢度，只係為求方便行程~

本來個行程係喺 Spiez 搭船過 Oberhofen am Thunersee，Schloss Oberhofen(城堡)就喺碼頭附近~
而呢班船，一日只有一班，以而家呢個時間，我哋係趕唔切搭呢班船~
不過 Schloss Oberhofen 對我嚟講係可去可唔去嘅地方，反而將時間用咗喺 Mürren 同 Wengen，非常值得~

喺 Spiez 嘅房景，都幾唔錯~

天色開始暗，湖景或 Schloss Spiez(城堡)只能二揀一~
湖景，以而家嘅天色就應該......算把啦，再講，湖景喺今次旅程都有，但 Schloss Spiez 就全瑞士只有呢度有~
所以而家要趁仲有微光，行吓 Schloss Spiez 先~
不過冬季不開放入內參觀的~

城堡呢度都有個位可以望吓湖景~

Spiez 隨影~

下一站：Thun
十年前嚟過 Thun，但冇行過市區，淨係去過湖邊，我睇人哋相見夜晚嘅 Thun 都唔錯，反正有時間就過嚟行吓~

本來行程係喺 Spiez 搭船過 Oberhofen am Thunersee，之後再搭巴士過 Thun，而家冇去 Oberhofen am Thunersee，就直接喺 Spiez 搭火車過 Thun~
本來計劃，過到 Thun 係黃昏，不過今日遲晒，過到 Thun 天已全黑~

行去聖誕市集時，經過間大型商店，入去行咗個圈，屎塔見到一樣喺英國想買但唔捨得買嘅嘢，而喺呢度平大約 10%(竟然！)~
不過佢仲係唔捨得買，一來平咗但都唔係平，二來怕運到返英國會爛晒~
最後，喺我慫恿之下，買咗~

行到去 Weihnachtsmarkt Thun(聖誕市集)，明顯收晒檔......
明明網頁話收 19:00，而家 18:00 都未夠喎......
之後經過出入口，見到張海報，雖然係德文，但齋睇日期，唔難估到係 7/12 先開始，而今日係 6/12......

係喎，我有啲印象喎，今晚嚟應該唔係為聖誕市集，今晚嚟純粹係為行吓 Thun 啫~
再睇返我自己計劃好嘅行程，係真係冇安排今晚嚟睇聖誕市集嘅，只係我自己嚟到好自然就走咗去市集所在地~

呢刻其實我開始有啲掙扎，因為，我安排咗聽日有日照時間嘅時候再過嚟 Thun，主要係因為有雪嘅 Thun 幾靚~
但而家嘅 Thun 係冇雪，聽日仲過唔過嚟好？再算吧~

而家就唯有去食嘢先~
沿途隨影~

今晚泰菜~
Eurasia Thai Restaurant

Thuner Hahnenwasser & Holunderblütensirup
前者係來自 Thun 嘅水，後者唔知咩嚟，望落只係一杯水加咗類似薄荷葉咁嘅葉，飲落係有少少清新，但唔多，同飲清水分別唔大~

Tom Yam Gung
Hot and sour soup with prawns, mushrooms, tomatoes, chili, coriander, lemongrass, lime leaves
冬蔭公，睇落唔似，聞落係似嘅，但食落又似是而非，辣同酸味同食開嘅唔同，仲有好多洋蔥喺入面，麻麻地~