今日行程：
【Kandersteg】 → 【Blausee】 → 【Thun】Döner Stop Thun(Lunch) → Schloss Thun(Thun Castle) → Weihnachtsmarkt(Christmas Market) → 【Zermatt】Hotel Bahnhof Zermatt(Accommodation)
今日第一站：Kandersteg
今次旅程，Blausee 係其中一個我想去嘅地方，而 Kandersteg 喺 Blausee 附近，亦見網上有人推薦，所以就一拼遊覽~
今日 Spiez 天氣麻麻地~
噚晚唔記得買今日早餐，喺火車站買咗兩個新鮮牛角包，好食！
等火車時坐定定，越坐越凍，但又冇理由起身跳舞咖......
搭火車時，一路上天氣變化好大，天氣報告話 Kandersteg 係晴天，希望真係啦~
Kandersteg 真係晴天，不過低層比較大霧，同埋太陽又係俾山遮擋住~
冇陽光都冇辦法，總唔能夠每個地方都等到有陽光先遊覽，要咁做的話，每日嘅遊覽時間實在太少~
錢有限，時間有限，等於陽光都有限~
一離開火車，已經感覺到呢度氣溫比 Spiez 低，嗰種寒氣撲面而來~
體感覺得明顯凍咗，實際相差可能有五度或更多~
睇返氣溫，而家大約係 -5℃
Kandersteg 唔大，亦沒有景點，都係閒逛吓~
呢度四面環山，環境相當不錯~
喺 Kandersteg 附近有個地方叫 Oeschinensee(情人湖)，係一個幾靚嘅湖，一般會去呢個湖嘅人，都係經由 Kandersteg 搭吊車去~
不過喺我哋嚟嘅呢段時間，吊車做緊年檢保養，所以我哋就冇去~
唔搭吊車其實可以行，單程個幾鐘，想環湖(要上落山)的話，單程要兩個幾三個鐘~
喺咁嘅氣溫下，我冇信心可以活著到達，仲有回程呢，所以就冇諗住去~
馬身上嘅毛比較短，真係唔知佢哋覺得凍唔凍~
以咁嘅角度嚟飛行，唔知係咩機呢~
就係睇到呢個景吸引咗我哋嚟~
Kandersteg 隨影~
行到夠，又未夠鐘搭車，就走入火車站個售票處嘆吓暖氣先，出面真係好鬼凍~
上網睇啲人話 Blausee 只收現金，我而家身上嘅散紙唔知夠唔夠，穩陣啲，喺度唱多次錢先~
差唔多時間，我哋由火車站售票處(圖以外左邊)行出嚟，圖中左邊架旅遊巴咁啱同架公共巴士同色，又喺個巴士站牌隔離，初時我哋以為左邊嗰架車係我哋要搭嘅車~
架公共巴士後面拖住個箱，唔知咩嚟呢~
下一站：Blausee
一個夏天同冬天都有截然不同、湖水呈藍色嘅夢幻小湖~
呢個景點我係幾期待，睇人啲相，夏天同冬天都靚，係我今次計劃行程必定會加入嘅地方~
沿途隨影~
Blausee 停車場冇乜車，入口處亦冇乜人，呢個時候果然係瑞士旅遊淡季~
入場費要 Fr8 一個人，相信真係好靚先會收費都有人嚟~
畢竟呢度係瑞士呀，絕大部份靚景垂手可得，不用收入場費零距離接觸，仍然大把人願意搭火車轉巴士俾入場費入嚟參觀，由此可知一二~
行到去個湖度，What the......
如果要數喺我自己去過嘅地方而又覺得失望嘅，呢個絕對係其中之一，並且會係排名比較高嘅位置......
瑞士嚟講，呢個景真係普通到不得了，免費都唔值得嚟(當然係講緊呢個時份)~
呢 Fr8 嘅意義在於令我知道佢呢刻嘅景色夠晒特別，係特別普通......
(頭盔 mode：做功課時只係搵到夏天同冬天嘅相，咁十二月算係冬天嘛，可能今年凍得遲啲，所以......)
離開時，到閘口出唔到去，細心閱讀指示，先知要去另一邊(圖中左邊紅圈)撳掣先可以開閘~
可能撳完只有一秒時間離開~ XDDD
下一站：Thun
今日又去返 Thun，本來都諗過唔嚟，不過行程上冇乜好改~
今晚會過 Zermatt，我哋聽日有一整日時間喺 Zermatt，已經多得滯，所今日實在唔想提早過去~
剩返嘅時間又唔係多，實在冇乜選擇，不如就照原本計劃行事算了~
巴士站隨影~
到咗 Thun 就去食嘢先~
Döner Stop Thun
每次搵速食見到 Kebab 都好有興趣，因為從未失望過~
今次都唔例外，兩樣都好食~
Cevapcici Dürüm
Döner Pita
食完嘢就周圍行吓~
Schloss Thun(Thun Castle)
冬季只有星期日先開放三個小時，夾唔啱時間，就喺外圍行吓~
當然唔少得今日先開嘅 Weihnachtsmarkt(Christmas Market)~
冇雪嘅 Thun，講唔上好靚，不過攝時間嚟講，非當不錯~
下一站 Zermatt
去 Zermatt，可以以一個較近距離觀看 Matterhorn(馬特洪峰)~
喺細個咩都唔知嘅時候，對 Matterhorn 已經有兩個印象~
1. 馬特洪峰，好細個已經聽過呢個峰，喺邊？唔知；喺邊度聽返嚟？唔知，剩係肯定聽過馬特洪峰呢個山峰~
2. 三角朱古力，好細個已經食過三角朱古力，對包裝上嘅山峰圖樣非常有印象，但細個時唔知呢個就係馬特洪峰~
而家時間比預期早，查吓火車班次，可以搭早一班車返 Spiez 攞返行李~
到咗 Spiez 之後，我要返去旅館攞返行李，再返返火車站~
不過咁啱去 Spiez 呢班車延遲咗 15 分鐘先到，要搭到嚟緊嗰班車去 Zermatt，我只有 17 分鐘時間~
純計單程步速，要 7 分鐘，有上落斜同樓梯，回程仲要拖住個篋，不過如果攞篋過程順利的話，我相信行快少少係趕到嘅~
無謂兩個人一齊趕，我對瑞士治安亦相當有信心，就留屎塔喺火車站等我，我自己行快兩步返去攞~
最後行得快得滯，返到火車站仲有大把時間~
今晚呢間旅館，係我印象中住過最近火車站嘅旅館，正正喺火車站對面，過條馬路就係，好方便~
唔知係因為淡季，定因為多數遊客都會 book 啲望到 Matterhorn 嘅旅館，越近入住日期，Zermatt 住宿嘅選擇越少，但我今晚住呢間真係入住前任何時候都 book 到~
一間咁方便嘅旅館，價錢喺 Zermatt 嚟講係相對平，啱晒我哋~
Check-in 時，旅館收我哋 Fr4 一個人城市稅，明明 book 嗰時係 Fr3 一個人，問一問對方，原來加咗價~
我個人覺得 booking.com 或旅館方面應該要喺入住前提我哋，避免呢啲尷尬情況出現~
Zermatt 係無車城，但唔係真係冇車，係未經許可，唔可以駕車進入~
喺 Zermatt 呢度，主要交通工具都係呢啲電車仔~
去 Co-op(超市)買明日早餐時，見到網上經常有人講嘅烤雞~
去咁多次 Co-op 都冇見過，相信唔係間間有得賣，今次終於見到~
不過我哋冇打算買~
買完嘢就行去觀景點~
呢個觀景點喺半山，又凍又斜路又無數咁多級樓梯，堅係辛苦，一路上一路有人小~ XDDD
幾經辛苦，上到嚟，意外地得一個人喺度，而佢都準備走了~
睇得出佢好滿足，佢一個人，但笑住走~
今晚天氣好到不能再好，冇雲冇霧，真係非常難得！
瑞士山王 Matterhorn 就喺眼前，配合埋咁清嘅天空，勁正！
好奇怪，咁好天，咁正嘅觀景點，又唔係秘景，全程都係得我哋兩個，唔通真係咁怕辛苦？
到我哋差唔走嘅時候就見到有兩對人行上嚟，落山時又見到幾個~
落山時屎塔話不如搵餐食 Co-op 烤雞，我都同意，反正我哋並沒有很喜歡食瑞士菜~
咁就今晚去餐廳，聽晚食烤雞，咁揀係冇原因的，純粹求其決定~
而家就行去 Hotel Restaurant Derby 食晚餐~
去到見到冇咩人，睇睇 menu，又冇乜興趣咁~
由於本身預咗兩餐晚餐喺 Zermatt，而家一餐食 Co-op 烤雞，變咗可以喺我計劃好會去嘅兩間餐廳當中揀一間~
對 Hotel Restaurant Derby 冇乜興趣，就去另一間，呢間叫 Grampi's~
Grampi's 叫做多啲選擇，亦相對冇咁貴~
去到 Grampi's，已經滿座，仲有約十個人等緊，放棄~
屎問我有冇 plan B，我話不如食烤雞，聽晚早啲再嚟 Grampi's~
屎塔話好喎，我話不過唔知超市閂咗未，睇吓時間，仲有 17 分鐘閂門，趕得切有餘，只怕去到賣晒啫~
去到見到仲有三四包，我哋就攞咗兩包，再加個沙律~
旅館名為 Hotel，但實質係 Hostel，有廚房，廚房有位置俾人用餐，我哋就係喺廚房食~
雞唔錯，係少少鹹咗啲，但幾嫩滑，名不虛傳~
沙律唔知要另外買沙律醬，冇買到，而家乾啃好難食......
Zermatt 隨影~
沒有留言:
發佈留言