《瞬間看地球》Stranger's Blog: 2022.12.08 瑞士 (Zermatt、Täsch) (第六天)

今日行程：
【Zermatt】Gornergrat → Stefanie's Crêperie(Lunch) → Blacknose Sheep Farm → 【Täsch】 → 【Zermatt】Grampi's(Dinner) → Hotel Bahnhof Zermatt(Accommodation)

今日一早就去捕足金黃 Matterhorn~
喺 Zermatt，日出時，會由 Matterhorn 頂尖照起，慢慢地越照越大面積，形成金黃色嘅 Matterhorn~

捕足金黃 Matterhorn，似乎都係好多人嚟到 Zermatt 好想做到嘅一件事情~
唔知係咪因為做功課時睇得太多，我自己其實冇乜話好想睇到影到，只係覺得人做我又做，反正有時間~
而且今日咁好天氣，唔做又好似對唔住呢個運氣~

口講覺得冇所謂，但如果今日天氣唔好，睇唔到的話，可能會覺得遺憾也說不定~

對於捕足金黃 Matterhorn，喺 Zermatt 鎮上，有好幾個街知巷聞嘅地點，我哋揀咗其中一個開始等~

開始焫著~

一路等一路等，其實又悶又凍，但唔等又好似有遺憾咁......
初時我哋都覺得奇怪，點解得我哋兩個冇其他人嘅？
之後留意到，原來啲人喺晒前面條橋上面~
我做功課時都有留意到橋上面嘅觀景點，不過最後揀咗我哋本身企緊嘅位作為開始~
而家覺得有啲悶，又見到橋上面有啲人，不免好奇想過去睇吓~

我哋先喺橋底望吓~

上去橋面~

橋嗰度有好啲嗎？我個人覺得都係差唔多~
望住個山峰慢慢變金黃，其實冇乜感覺，而且望 Matterhorn 望到有啲悶，真係夠晒皮，好想轉移吓視線~

睇完金黃山峰，趁天氣仍然大好，坐齒軌列車上 Gornergrat 先~
沿途隨影，都係離唔開 Matterhorn~

就喺呢度搭齒軌列車上 Gornergrat~
來回 Fr88(約 HKD$750) 一個人，我哋有 Swiss Travel Pass 就半價，即係 Fr44，都幾貴~

我知道右邊個景好啲，但上到車時，唔記得留意行車方向，唯有求其揀一邊~
一開車，我錯喇，我坐咗左邊，但右邊已經冇空位......
不過二揀一嘅情況，我絕大多數都係揀錯嘅，只係正常發揮~

沿途隨影，同樣，都係離唔開 Matterhorn~
究竟係我哋經常影到 Matterhorn，定係見親 Matterhorn 都影呢？

上到嚟 Gornergrat 都係睇風景而已，同埋又係 Matterhorn......

其實都仲有啲嘢可以喺山上做嘅，不過有啲就要睇季節~
喺 Riffelsee 睇 Matterhorn 倒影，不過冬天因湖面結冰並且會鋪滿雪，係唔會睇到倒影，所以我哋冇去~
喺 Rotenboden 附近有個 photo point，係喺 google map 度搵到嘅(而家冇咗)，不過睇 Matterhorn 嚟講，都真係夠晒皮，所以我哋冇去~
喺 Rotenboden 健行落 Riffelberg，而家山上得 -12℃，積雪又厚，咁嘅情況下健行應該幾辛苦，所以我哋冇去~
喺 Rotenboden 玩雪橇滑落 Riffelberg，不過仲未開放可以玩，所以我哋冇得玩~
喺 Riffelberg 附近可以搵到黑面羊嘅蹤影，不過只限夏天，冬天全部落晒山避寒，所以我哋冇得見吓佢哋~

所以上到嚟都真係純睇山景，呢度係幾正嘅，今日又超級好天，縱使車費唔平，都仍然覺得好值得上嚟~
喺度逗留咗一個鐘就落山~
沿途隨影~

落返 Zermatt，就去返噚晚個觀景點，我幾鍾意嗰個觀景點，一個夜晚一個朝早都咁好天，完美~

Matterhorn 個山形真係好特別~

完咗呢個觀景點，基本上剩返嘅時間都冇乜嘢做~
又唔可以話冇嘢做嘅，只係興趣不大~

喺我嘅行程入面，仲有一個觀景點未去，而家就去~
跟住地圖行，會經過人家嘅私人地方，諗住兜路行，但又發現地圖上有條路，現實係冇嘅，所以最後都係冇去到~
其實我哋冇盡力搵，睇 Matterhorn 都睇到夠晒皮，去唔到個觀景點真係冇所謂~

跟住就行去 Hinterdorfstrasse，一條滿有古建築嘅街道~

唔知點解間間屋都要攝塊石喺啲柱中間~

本來行程係去 Stefanie's Crêperie 食 pancake，不過仲有半個鐘先開門，唯有周圍行吓先~
其實如果之前個觀景點可以去得到，時間真係啱啱好，唔駛等呢半個鐘~

Matterhorn Museum，持 Swiss Travel Pass 可免費入場，不過佢只開星期五六日，又係夾唔啱時間~

附近有間 Crédit Suisse，櫃員機顯示可取 EUR，又試吓佢~
點知同機場一樣，入咗卡入去就顯示只可以攞 CHF~
都唔緊要嘅，其實我覺得唔係真係咁需要撳現金歐羅，只係可以嘅就準備啲，冇嘅就由佢~

差唔多夠鐘就行返去 Stefanie's Crêperie~

據講呢間係人氣長龍店，不過開門呢刻就只有兩個人排隊，就係我同屎塔~

我本來諗住要 Noccialata 配 friut of the day，不過今日 friut of the day 係藍莓，好似唔係好夾，都係揀返香蕉算~
店主問我知唔知 Noccialata 係咩嚟，我話本身唔知，但上網睇過~
佢話味道同 Nutella 差唔多，but nicer~

屎塔揀 strawberry jam，本來諗住再加 strawberry，不過有時啲 strawberry jam 好重味，始終未食過唔知重味定輕味，所以都係冇加 strawberry~

網上對呢間嘢有好高評價，坦白講呢，就好食嘅，但 pancake 咪又係咁，冇咩特別，絕對係想像中嘅味道~
又話人氣又長龍，我估佢喺 Zermatt 係獨市，而且即叫即整係需要時間，咁就好自然會係人氣加長龍店~

食完嘢就行去 Blacknose Sheep Farm，網上面啲人叫黑面羊，雖然英文係 Blacknose Sheep~
冬季一星期只有一日開放，但我哋夾唔啱呢日，而且係成個活動咁要俾入場費，又有點貴~
我哋只係想見吓，冇打算參加活動，所以其實預咗睇唔到黑面羊，只係藉住行過去農場，行吓 Zermatt，反正冇咩做~

行到去農場，唔好話黑面羊，連人都冇一個，放棄~

本來諗住行過對面行吓啲村落，不過又好似冇咩好行，呢刻真係冇咩好做~

好多人嚟 Zermatt，除咗上 Gornergrat，仲會上埋 Matterhorn Glacier Paradise，但我哋就冇上~
一來冬季日照時間較短，如果一日內去晒 Gornergrat 同 Matterhorn Glacier Paradise，係一件好趕嘅事，而我只係安排咗一日喺 Zermatt~
二來上 Matterhorn Glacier Paradise 來回價錢為 Fr95 一個人(約 HKD$800)，有 Swiss Travel Pass 就半價，即係 Fr47.5，問題係，一定要有實體 Swiss Travel Pass 先可以有半價，但我哋上網買嘅其實只有 Mobile Swiss Travel Pass，佢網站講明唔接受 Mobile Swiss Travel Pass，即係冇半價，我唔知有冇辦法可以搞到張實體卡，但其實個景點本身我哋都唔算好感興趣，有時間又唔係貴都話，而家兩樣都唔係，所以唔會上~

Zermatt 對我嚟講唔係一個好迷人嘅城鎮，但要一睹山王 Matterhorn，嚟 Zermatt 係最普遍又容易嘅選擇~
有啲地方，去完會回味，想一去再去，而 Zermatt，對我嚟講，真係一次就夠~

Zermatt 隨影~

而家只係下午兩點半，已經進入完全冇嘢做嘅狀態，我提議不如搭火車去下一個站行吓，反正我哋搭車唔駛錢~
屎塔都好贊成~

由 Zermatt 出發後第一個站係 Täsch，Täsch 係好多人落腳嘅地方，因為一般汽車唔可以進入 Zermatt，自駕嘅旅人，好多都會選擇放部車喺 Täsch，再搭車過 Zermatt~
可能亦因為咁樣，火車都有 shuttle，用作來往 Zermatt 與 Täsch~

Täsch 火車站附近真係冇咩好行，睇睇地圖，離火車站約 20 分鐘步程，有個湖，雖然我哋十分確信個湖已經結咗冰，反正冇嘢做，就照行過去睇吓~
沿途風景都算唔錯，但喺我哋睇咗咁多咁正嘅風景嚟講，就變咗唔算太吸引我哋~
不過攝時間嚟講，OK 啦~

行到夠就搭返火車返 Zermatt~
返到 Zermatt 就去超市買明日早餐，之後再返旅館休息~
等到差唔多時間就出門口去食晚餐~

今晚去返噚晚去到冇位嗰間 GramPi's~

GramPi's 開六點，我哋六點正到達，唔知會唔會都係冇位呢？
會都冇辦法，已經做咗我哋可以做嘅~
經理睇咗一陣資料，睇佢有啲苦惱，唔通真係咁旺場，六點嚟到都冇位？
佢睇完走埋嚟，話有一張檯，但八點要交檯，問我哋有冇問題~
兩個鐘？你上菜夠快的話，一個鐘夠啦~

Ginger ale & Tomato juice