2024 United Kingdom - 事前準備

本來今年諗住六月去挪威，咁啱屎塔屋企人諗住今年過嚟探我哋，所以就諗不如一齊去挪威啦~

初頭講話挪威加英國，講講吓就變咗齋挪威，又講講吓變咗唔去挪威，但亦由於時間關係轉地點的話，六月係趕唔切~
最後變咗十月至十一月先一齊去玩，定咗去西葡~

咁，年中我哋自己去邊好呢？時間又有啲急，不如近近地蘇格蘭啦~

關於蘇格蘭，我一直知有條旅遊路線叫做 North Coast 500(NC500)，500 意思就係條路線大約 500 英里~
就佢啦，夠晒近呀~

其實呢，我對 NC500 興趣唔係真係好大，不過我又覺得，住得咁近，其實遲早都會去潮聖吓，不如就今次啦~
NC500，好多景都係沿岸景，其實都真係睇過好多，冇乜新鮮感，不過，未去過未必知咁多嘅，可能有新發現呢~
同埋可以出海觀鯨魚，睇海鸚鵡，都好吖~

做吓功課，住宿選擇唔多，而且貴得有點意外，真係想縮......
不過而家唔去，遲吓肯定仲貴~
仲有食嘢，喺英國出街食，一向貴夾冇期望，咁梗係講緊好普通嘅餐廳啦，肯俾錢冇話冇好嘢食嘅~

上次去 Eilean Donan Castle 摸門釘，今次兜遠少少再去返~
屎塔話想去埋尼斯湖，好啦，又兜遠少少去埋啦~

好多人話去 NC500 標準要去七日，而我自己，book 咗兩個船嘅項目，兜埋去 Eilean Donan Castle 同尼斯湖，仲有計埋屋企來回時間，都係七日~
可能我哋對啲沿岸景真係睇夠，唔係每個景點都有興趣去吓，就算會去嘅，都未必會留得耐~

由於係特定嘅旅遊路線，景點呢，都係嗰一堆，只係揀啲有興趣去嘅，同埋揀順時針行定逆時針行~
多數人係行逆時針，因為佢哋話西岸精彩過東岸，逆時針玩就會越玩越精彩~
我自己呢，就覺得順逆都差唔多咁唔精彩......
不過我知道好一部份路係單線雙程，如果多數人玩逆時針，我走去玩順時針，盞玩死自己，所以都係跟大路，逆時針咁玩~

今次做功課明顯懶到出汁，勁求其，可能真心覺得唔會太期待~
點都好，一切準備好就出發~