今日行程：
Beinn Eighe → Coire Dubh Carpark → Bealach na Gaoithe Viewpoint → Loch Diabaigas Airde Viewpoint → Shieldaig Bar & Coastal Kitchen(Lunch) → Shieldaig → Applecross → Duirinish → Pizza-Mia(Dinner) → The Legend of Saucy Mary Hostel(Accommodation)
今日第一站係 Beinn Eighe~
不過，呢個係一個意外嚟~
只係因為自己做嘅功課有錯誤，本來冇計劃嚟，但錯誤放咗落行程度......
嚟到現場先問自己，點解我會嚟呢度？跟住睇返啲功課就知係自己出錯~
咁一場嚟到，都行個圈啦~
跟住就去 Coire Dubh Carpark~
特登去個停車場，因為啲人話喺度會見到 stag~
喺停車場入口已經見到 stag，不過望嚟望去都係得一隻~
其實成個過程係好 sad，只係得呢隻，睇佢啲皮毛，狀態唔係幾好咁~
地面有啲紅蘿蔔，佢只係聞但唔食，我唔知佢係唔食紅蘿蔔定係冇胃口~
再者，每逢有車經過停車場，佢都會望，好似好有期望咁，佢一定好寂寞~
後記：幾日後，睇到新聞，隻 stag 已經過身，因為太多人餵啲唔適合佢食嘅嘢，導致佢啲牙壞咗，唔係好食到嘢，威脅到佢健康，結果就係生存唔到落去~
停車場對開環境~
我覺得今日時間應該相當鬆動，所以加插咗兩個觀景台~
途中見到隻鹿仔~
臨時加插嘅兩個觀景台，即係個景未夠好到排入行程，只係時間有多又就腳先會選擇去~
再加上天氣唔好，能見度低，就更普通~
Bealach na Gaoithe Viewpoint
Loch Diabaigas Airde Viewpoint
呢個去到時係落緊大雨，喺車等咗一段時間，趁雨細咗啲先衝出去影吓相，可以話係相當冇意思~
跟住就去 Shieldaig Bar & Coastal Kitchen 食午餐~
推門入去，滿座咁濟，但又完全冇人理我哋~
等咗一陣，就自己上樓上，但當我哋想上樓上嘅時候就有人制止，話樓上唔開，跟住繼續無視我哋......
仔細咁望吓，原來樓下有張細檯，係比較難睇到，咁有位就得啦~
又等等等，等咗好一陣子先有人俾 menu 我哋~
計吓時，由推門嗰吓開始計，到有食物上檯，超過一個鐘......
講起鐘，佢個鐘又幾特別~
Cappuccino & Hot Chocolate
屎塔話杯 cappuccino 好好飲~
Monkfish Scampi
Served with curried Mayonnaise, fries, salad
外層好脆，餡料足，同時食到有魚同蝦味~
佢個 curried Mayonnaise 相當好味，我唔係咖哩 fans 都好鍾意~
美中不足唔係好夠熱~
Baked Scallops, chorizo, tomato+basil
帶子半生熟，連埋啲配料一齊食好特別，好好食~
啲配料味道幾 strong，但又好夾帶子個味道，好有驚喜~
寫 blog 呢刻，同個旅程已經相隔咗差唔多四個月，我仍然記得 curried Mayonnaise 同帶子上嘅配料個味道~😋
食完嘢就行吓 Shieldaig 呢個小鎮~
個小鎮好細，就係得海邊呢條街~
跟住就去 Applecross~
Applecross 主要係講緊一個路段，喺 NC500 嚟講，係相當出名嘅路段，但就唔係人人適合去~
進入 Applecross 路段前，會有個路牌，講明唔適合學神、大車同 Caravan~
Applecross 路窄，多單線雙程，亦有幾斜嘅斜路，學神固然唔適合行，我覺得新手都唔適合行~
大車唔適合行，我覺得冇力嘅車仔其實都唔適合行~
對於我部車仔嚟講，路窄唔係問題，斜路先係問題~
有啲路二波都唔夠力，要落一波，如果遇著有對頭車都幾大鑊，停咗車後，我都唔知起唔起到步~
好彩嘅係，行經比較斜嘅斜路時，冇遇過對頭車，真係非常幸運~
上到高地時，就算有避車處，讓車都幾有挑戰性，條路實在太窄，加埋斜路，真係好惡搞~
沿途風景係幾唔錯，可惜大霧，不過呢刻冇落雨已經好感恩~
沿途冇咩位可以停車，呢段路作為遊車河係幾好，想落車影吓相就比較難~
之後諗住去 Reraig Forest，不過差唔多到時，有個「Private Road」路牌，咁梗係唔入啦~
唔通成個森林都係私人嘅？🤨
想去呢個森林，因為網上面有人話會見到好多唔同種類嘅動物，不過冇啦，私家路......
沿途隨影~
時間有多，就攝個 Duirinish 去睇吓高地牛~
中途行經一條小路，都幾靚，不過最靚最多花嘅部份影唔切相~
Duirinish......一隻牛都冇......
我睇好多人 post 都有高地牛喺度自由活動，點解到我哋就冇！
好彩呢度環境都算唔錯~
跟住就去 Pizza-Mia 食晚餐~
Soup of the Day
普通雜菜湯，正正常常~
Spicy Buffalo Wings
麻麻地，又唔熱~
Beef Lasagne
主角唔係牛肉，係芝士，夠晒多芝士，正~
Chicken Caesar Wrap
可能胃口一般，呢個冇食到，留返聽朝做早餐~
呢間嘢好好生意，多數做外賣，喺我哋食緊嘢嘅時候，有好幾個人埋嚟落單都唔接，生意好到要推單，我哋嚟遲啲都冇得食~
雖然唔算係咩美食，但與其俾五六十鎊食普通嘢，不如二三十鎊食街邊檔，如果有得揀的話~
食完嘢就開車去旅館~
今晚呢間旅館，係揀無可揀嘅情況下 book 嘅~
想住嗰區一間合理價錢嘅都冇，夾硬住遠啲~
住遠啲其實都冇選擇，價錢合理嘅(英國嚟計)，就只有 Saucy Mary's Hostel 一間可揀~
睇到 Saucy Mary's Hostel，好似有啲印象咁嘅？
睇返之前去 Isle of Skye 嘅 blog，原來上次嚟過食晚餐，伏到不得了，發誓唔會再食~
去到接待處，冇人喺度，但有字條話 check-in 可打上面個電話~
咁就打俾佢啦，DLS，接待處入個電話響，當然係冇人接，成件事真係好X英國！
其實接待處呢度，已經有兩組人等緊，我估佢哋之前都打過個電話......
等咗若干時間，終於有人返嚟，可以搞 check-in~
餐廳唔會再食，旅館亦盡量唔會再住......
因為佢個環境真係幾差吓，入到房，令我聯想到電視劇入面，香港啲賓館......
房勁細，細都唔緊要，又唔係未住過細房，勁殘舊呢吓慘~
Share bathroom 又簡陋~
唔怪得剩得佢有房......
呢間都要成 £1xx 晚，所以我上面話「價錢合理」「英國嚟計」~
英國旅遊嗰部份係好貴，食住行都貴！
對於呢間旅館有點抗拒但冇辦法，唔捨得俾錢住貴嘢，頂硬上啦~
沒有留言:
發佈留言