今日行程：
Eilean Donan Lookout → Eilean Donan Castle → Summer House → Upper Falls → The Boathouse Restaurant(Lunch) → KFC(Dinner)
旅館質素差，係咪會影響到連住客都質素差？
晨早六點幾，啲人喺走廊行嚟行去，又大聲講嘢，嘈住晒~
如果我要咁早起身，我會放輕腳步同盡量唔講嘢啦~
上次去 Eilean Donan Castle 時，因為有 event 而暫停開放，今次就刻意兜遠少少路，再嚟一次~
去城堡之前，上去 Eilean Donan Lookout 先~
上次嚟嘅時候係有啲秋色，今日當然冇秋色，仲要天色差~
跟住就去 Eilean Donan Castle~
去到停車場，有人指示泊邊，仲指示埋幾時扭軚幾時回直，結果泊到貼住條邊，我嗰刻都唔知點好，再泊過又好唔俾面，唔泊過又影響隔籬個位，最後都係算，佢又冇出聲~
去買飛時，售票員問我哋來自邊度；入場俾飛保安時，保安又問我哋來自邊度~
照計都應該好多華人面孔會嚟咖，點解好似咁新奇咁呢？🤔
城堡唔算大，早嚟亦唔算多人，不過入面唔可以影相~
其實入面就......冇乜特別，可能睇城堡睇得太多~
不過佢個廚房勁正，有好多唔同嘅食材模型，用具，假人~
尤其啲食材模型，好多細節位，係好用心造嘅模型，呢部份係相當有驚喜~
城堡外圍~
離開城堡時，原來已經好多人~
行吓個商店，見到有 gelato 賣，£2.65 一球，又幾抵食喎！一人一球啦！
Chocolate & Scottish Tablet
Scottish Tablet 唔知係咩嚟，屎塔話甜甜哋......
跟住就去 Summer House，去 Summer House 只係去睇風景，同 Summer House 冇咩關係~
沿途隨影~
泊好車後行去 Summer House，不過搵極都搵唔到，有少少想放棄，反正唔係咩令人大開眼界嘅風景~
刻意回頭時走另一條路，睇吓有咩睇，點知就見到 Summer House~
由 Summer House 裝出去嘅風景~
之後再過上圖見到嗰條橋影返過嚟 Summer House~
出返大馬路過對面就係 Upper Falls~
跟住就去食嘢~
就住順路，我揀咗去 Ford Augustus 呢個地方食嘢~
餐廳呢，我就記低咗兩間，本來計劃係去間遠啲嘅，不過今日淋雨都淋到夠晒皮，而家仍然落緊雨，真係唔想再行~
近嗰間就喺附近，不過都會沿途睇吓有咩啱食就入去，反正喺呢度真係唔會期望有咩好食，是鬼旦~
附近餐廳唔算太多，多數都冇開......
有開嘅都人山人海，見到有間門口冇咩人潮，就入去睇吓~
入到去，樓上樓下都滿座，真係淋雨淋到好疲累，唔想再行，寧願等吓~
等咗大約五分鐘，有個男人揹住個小朋友入嚟，其中有四個食客坐喺張六人檯度，邀請呢位男士坐低，話佢哋就走~
我哋呢刻係真係好唔高興，但人家帶住個小朋友就等於拎住個王牌，除咗自己張度氣吞返落肚，其實都冇咩可以做~
我哋決定走，走去後備嗰間餐廳~
DLS，明明佢 facebook 資料顯示而家係營業時間內，但嚟到又係冇開！🤬
成X日都係咁！已經普遍都係又貴又普通，甚至唔好食！都好似唔休做咁！🤬
休唔休做唔X關我事，唔好成日俾啲假資料人啦！一間又係咁，兩間又係咁！🤬
我就唔X信間間都係臨時有事呀！玩 NC500，想食餐晏仔都咁鬼難！🤬
揀無可揀，唯有去本身諗住去嘅 The Boathouse Restaurant~
呢間少少偏離市中心，希望因為咁而有位啦~
寫住 Open 咖，不過我真係冇乜信心，只要未去到親眼見到，我都唔會信~
The Boathouse Restaurant
(雖然有車路到，但其實係私家路嚟~)
終於，終於有開又有位喇~😭
午餐選擇唔多，唔緊要啦，最緊要有得食~
Hot Chocolate & Ginger Beer
Soup of the day - Lentil
Served with a warm roll & butter
個湯好蓉，味道偏甜，還可以~
Beef Burger
Cheese Burger
兩個漢堡嘅分別就係 Cheese Burger 係多啲芝士，其他都係一樣~
個塊漢堡扒表面有點乾，但咬落去係有肉汁爆出嚟，幾好食~
窗外風景，呢度就係頂頂大名嘅尼斯湖~
呢個角度睇當然麻麻地，不過除非真係有水怪啦，否則都係個好普通嘅湖~
本來行程上仲有 Loch Ness View Point Fort Augustus，不過都係睇尼斯湖，而且嗰度睇嘅角度同呢度唔差太遠，又落緊雨，都費事去~
食完嘢，係時候回程歸家~
回程我安排咗行小路，睇吓會唔會有不一樣嘅風景~
結果係一路上都有唔錯嘅風景~
呢堆牛應該少見陌生人，佢哋見到我哋即時作出戒備狀態~
沿途遇到兩次高地牛~
後記：
NC500，係一個唔去又心思思想去嘅地方，但去咗又覺得......都係咁啦~
今次去玩七日，有六日都落雨，去 NC500，天氣係好重要，絕大部份時間都係戶外景點，真係超掃興~
NC500，俾我最深刻嘅印象，係駛費！
去一個星期 NC500，已經等於我去瑞士兩星期嘅 50% 駛費~
即係話，去 NC500 嘅駛費係等於去瑞士嘅駛費~
但係，去瑞士要買機票，NC500 唔駛~
去瑞士交通費好貴，火車呀，上山纜車呀，NC500 自己揸自己車，已經唔駛租車，只係要俾油費~
去瑞士有唔同嘅地方要俾入場費，博物館呀，城堡呀，景區呀，NC500 就少得多~
以此推論，NC500 嘅住宿同餐廳，係絕對貴過瑞士~
我個人覺得一啲都唔值！
沒有留言:
發佈留言