2024 西班牙、葡萄牙 - 事前準備

今次旅程嘅起始，我可以話係被動~

事源係阿珊，因為 facebook 出返上次我哋一齊去冰島嘅相，所以今年初貼咗啲相喺群組，就係咁，觸發咗今次家庭旅行嘅開端~
而我同屎塔打算今年年中去挪威，所以就問佢哋一唔一齊，就咁就成團~

而且佢哋仲想過埋嚟英國我哋屋企，但其實我懷疑佢哋有冇咁多時間~
不過呢啲係後話，計劃住挪威睇吓點先~

講吓講吓，發覺佢哋對挪威興趣不大，其實我同屎塔都覺得挪威好似唔算太吸引，但年中唔去北歐又怕太熱，同埋如果加多啲其他地方重新計劃，我又冇咁多時間~
所以講吓講吓，不如秋天先去，可以揀去其他地方都唔怕熱~

去其他地方呢，又要夾大家，我同屎塔冇所謂，去過可以再去，但媽咪其實去過好地方~
最終傾好，去西葡~
珊飛同媽咪都未去過西葡~
而且阿飛係球迷，去西葡實啱佢~
我同屎塔未去過葡萄牙，西班牙亦只去過好少地方~
所以，一錘定音，就去西葡~

不過去西葡嚟講，就去唔到英國，得兩星期實在去唔到咁多地方，最後都係放棄英國~

初時定咗十月頭，但阿飛請唔到假，所以最後定咗十月尾~

阿飛想揸車，所以一定要包含自駕環節~
同埋家庭遊，自駕就方便佢哋好多，又舒服啲，唔駛成日拎住啲篋上上落落~

西班牙去葡萄牙，路程好遠，雖然我知好多人都會咁玩，但異國還車唔係間間租車公司容許，容許嘅都太貴~
同國還車，即係要由西班牙揸去葡萄牙再回程返西班牙還車？單程我都嫌遠，莫講話來回~
所以，我決定，西班牙自駕，異地(不是異國)還車，搭飛機過葡萄牙，再自駕，異地(不是異國)還車~

西班牙太大，太多地方想去，我又唔太知佢哋嘅喜好，計劃時真係好難取捨~
我又唔可以不停咁問佢哋呢個有冇興趣呀？如果去呢個就去唔到嗰個咁~
最後，我決定，拿唔定主意時，就照自己喜好去決定~

喺我計劃好晒去邊個城市時，阿珊同我講咗兩樣嘢~
第一係，阿珊公司裁員，佢只會工作到九月尾，所以會有時間去玩耐啲，而媽咪已經退休，當然亦有時間玩耐啲~
所以就變咗，兩星期西葡，一星期我哋住嘅城市(但我同屎塔會返工，佢哋自己去周圍行)，再車佢哋去玩五日 Glasgow 及 Edinburgh，阿飛冇咁多假，完咗西葡行程就自己返香港~
(後記：阿珊被裁，賠償兩個月人工，但其後公司話有另一職位，十二月開始，咁即係阿珊十月同十一月係出有薪假，真係柳暗花明又一村，恭喜恭喜~)
第二呢，就係珊開始對行程有啲想法，想有啲海邊小鎮，好好彩，我係安排到嘅，最後安排咗喺西班牙同葡萄牙都有海邊小鎮~
(後記：好多謝阿珊提出海邊小鎮，加咗行程，就會有地方要捨棄，根據今次同佢哋去玩嘅觀察，捨棄咗嘅地方，正正會係佢哋唔感興趣嘅地方~)

西葡遊客非常多，好多景點係需要預先買定入場券，係要指定時間入場，咁樣對旅程嘅彈性會大打折扣，但係都冇辦法，有啲景點唔買定係一定去唔到~

夾飛機方面，如果我哋同佢哋同日到，我哋係會遲過佢哋到，雖然唔多，但費事要佢哋三個等我哋，所以我決定早一日到~


預先計劃嘅行程如下：
Day 00：【西班牙】Barcelona《Hostal Delfos(Accommodation)》

Day 01：【西班牙】Barcelona《Casa Gràcia(Accommodation)》

Day 02：【西班牙】Barcelona《Casa Gràcia(Accommodation)》

Day 03：【西班牙】Barcelona → Peníscola《Hotel Marina(Accommodation)》

Day 04：【西班牙】Peníscola → Albarracín《Posada del Rodeno(Accommodation)》

Day 05：【西班牙】Albarracín → Cuenca → Consuegra《Apartamentos Oncemolinos con desayuno(Accommodation)》

Day 06：【西班牙】Consuegra → Segovia《Hostal Don Jaime(Accommodation)》

Day 07：【西班牙】Segovia → Madrid《Ok Hostel Madrid(Accommodation)》

Day 08：【西班牙】Madrid → 【葡萄牙】Lisboa《Mouraria Lisbon Soul Apartment(Accommodation)》

Day 09：【葡萄牙】Lisboa《Mouraria Lisbon Soul Apartment(Accommodation)》

Day 10：【葡萄牙】Lisboa → Sintra《Sintra 23(Accommodation)》

Day 11：【葡萄牙】Sintra《Sintra 23(Accommodation)》

Day 12：【葡萄牙】Sintra→ Azenhas do Mar → São João das Lampas《Azen Cool House(Accommodation)》

Day 13：【葡萄牙】São João das Lampas → Óbidos → Porto《Morar Apartaments Porto(Accommodation)》

Day 14：【葡萄牙】Porto《Morar Apartaments Porto(Accommodation)》

Day 15：【葡萄牙】Porto

出發！