今日行程：
【Barcelona】Casa Vicens → McDonald's(Lunch) → Hospital de la Santa Creu i Sant Pau → Mercat de Sant Josep(Mercado de La Boqueria) → Àncora Restaurant Boqueria(Dinner) → La Rambla → Casa Gràcia(Accommodation)
今日一整個就係恍惚嘅心情，朝早搭車錯漏百出，好彩用交通卡任搭，只係嘥時間，冇嘥到錢~
今次旅程係同屎塔屋企一齊去，我係行程設計者，我係司機，我係導遊，不得不承認，我感到嘅係壓力多於旅行嘅興奮~
但其實之前都同佢哋去過兩次旅行，一次係日本四國，一次係冰島，當時我冇咁大壓力，唔知點解今次會咁樣~
同埋其實佢哋全部都係旅行好伴侶，冇太多臨時嘅要求，順得人意，係好易相處嘅人嚟~
如果要俾個原因，我估係因為性質好唔同~
日本，佢哋個個都去過好多次，未必再有太多嘢令佢哋感到新奇，時間上係比較易預計~
冰島，雖然大家都未去過，相信會有好多嘢令大家感到新奇，但同一個地方亦冇太多原因令佢哋想停留太耐~
西葡就唔同，媽咪去過好多次歐洲，但珊飛除咗冰島，係冇去過歐洲旅行，沿途可以有無數咁多原因會令佢哋想停留，時間上非常難控制~
再講，西葡遊客極多，好多景點我係已經買咗門票，時間上係一定要控制好，否則就趕唔切入場，又或者入到場都唔夠時間行~
我相信屎塔或多或少要充當照顧者嘅角色，都未必可以自在地享受今次旅程~
祝我哋好運啦~
今日朝早有個任務，就係轉旅館~
今日佢哋會到，大家會一齊住另一間旅館，我哋兩個嘅行李，可以寄存喺噚晚嗰間，又或者今晚嗰間~
不過，有一個原因，令我哋一定要寄存喺今晚嗰間~
珊飛落機後會去球場參觀，為咗佢哋可以輕裝去參觀，我同屎塔就要負責將佢哋嘅行李拎去旅館寄存~
所以如果我哋一早搞掂自己行李先係最方便~
今晚嘅旅館係 Casa Gràcia，我哋 12 年前嚟 Barcelona 都係住佢~
今次再揀佢，唔係因為有情意結定同回憶有關，純粹因為佢係最好選擇~
地點價錢質素，呢間係喺有一定質素情況下最平(冇咁貴......)，能夠容納 5 人，地點又好嘅旅館~
而家嘅 Casa Gràcia 完全唔同晒，再唔係一間小小嘅 hostal，規模係三級跳，仲有埋自己嘅餐廳~
寄存好行李就開始今日行程~
Casa Vicens(文生之家)
高第第一個設計嘅私人住宅，建於 1883 年，直至 2017 年先開放俾公眾參觀~
上次我哋嚟係 2012 年，並不開放，所以只係喺門口影過相，冇得入去參觀~
既然二次探訪 Barcelona，又已經開放俾公眾參觀，我覺得一定要入去參觀吓~
由於今朝搭/轉錯咗幾次車，我哋係比預約時間遲咗半個鐘先到，有啲擔心唔俾入~
去到 Casa Vicens，相都唔影住，衝入去先，好彩都俾入~
照佢嘅正常路線，係參觀戶外部份先嘅，但而家落緊大雨，絕大部份人都跳過戶外部份，只有少數人照行出去~
而我哋都係嗰少部份人之一，但其實戶外部份冇咩睇......
內部~
天台~
開放前進行咗大翻新，感覺好似拆掉重起咁大工程~
離開時補返張外圍相~
相當有趣嘅建築~
可能因為唔近市中心，遊客量唔算好多，又可能因為雨天，冇人想刻意搭車過嚟~
而家就夠鐘出發去機場接機~
去機場呢程，又唔記得落車轉車~
喺呢度轉車，有時可以行好耐，耐到由太子站行去旺角站可能仲快，更莫講話我錯過咗個站要行返過對面等車搭返轉頭再轉車......
不過呢，佢哋班機遲咗超過一個鐘先起飛，所以其實我哋都大把時間，就算我哋遲一個鐘都應該冇問題~
轉車嗰時，行經一條長通道，前面有幾個人一字排開，原來係要查飛~
查我飛嗰個，個笑容俾我覺得佢預咗我冇飛咁......
到咗機場，佢哋又未到，就搵吓 ATM 機撳錢，始終要有少少現金備用嘅~
我用緊嗰張 debit card，之前喺歐洲撳錢都係免手續費，只要 ATM 所屬銀行都唔收手續費就兩邊都免費~
喺機場搵到一間銀行，點知要收手續費，咁就唔撳住，再搵吓先~
之後屎塔搵到一間兌換嗰啲公司嘅 ATM，我預咗實收，做外幣兌換嘅，多數都收，不過試吓冇壞，或者有驚喜~
一路試，試到去最後步驟先顯示會收手續費，只要我再撳一吓就會完成交易~
當然，只係第二次嘗試，唔想放棄住，唔撳住，再搵吓先~
喺呢個時候，屎塔唔知想講咩，佢指一指個螢幕，螢幕畫面一轉，交易完成......
呢一次意外嘅交易貴囉，我撳 €200，匯率連手續費，總共扣咗我 €235~
大拿拿蝕咗 €35，真係赤到入骨髓......
不過算啦，事已至此，都冇辦法~
屎塔話佢冇掂到個螢幕，只係個螢幕超敏感~
咁我信佢嘅，有啲螢幕真係未掂到已經有反應~
等等等，終於等到佢哋出嚟~
我哋準備咗啲簡單而隆重嘅歡迎儀式，佢哋見到都好開心~
第一件事，搵地方搞好啲電話卡先~
今次嘅電話卡，全部由我哋負責，因為喺英國買會平過喺香港買~
搞完一輪，確保大家都上到網就起程~
安排好阿飛落機後就去 Camp Nou(魯營球場)，阿珊就梗係跟老公~
媽咪呢，之前問過喇，喺球場同我哋之後會去嘅地方二選一，媽咪選擇咗跟我哋~
珊飛去球場，我哋就拎埋珊飛啲行李去旅館寄存先~
假設由機場去球場係由 A 站去 B 站落車行過去，咁我哋去旅館呢，就係由 A 站去 B 站轉車，再去 C 站，所以頭一程都係一齊嘅~
由於我哋今日遲過預期好多，所以去到旅館係可以直接 check-in，咁我哋就拎埋自己啲行李上房~
本來搞掂行李後就要去食嘢嘅，不過時間上真係已經好晏，要去嘅景點亦都已經買咗飛，但嘢就點都要食嘅~
沿路睇吓有冇麵包店，咬個包就算，我哋就冇問題，媽咪呢？佢係個好平易近人，好合作嘅人嚟，呢啲小事佢係冇問題嘅~
一路上都見唔到麵包店，到差唔多到目的地就見到麥記，快快手食個麥記都好~
麥記都冇乜好講，貼張相做個記錄~
食完嘢，行過隔籬就係目的地，一樣係比預約遲咗好多，但我相信都冇問題嘅~
Hospital de la Santa Creu i Sant Pau(聖十字聖保羅醫院)
※世界文化遺產
在 1901 年，加泰隆尼亞銀行家保羅吉爾(Pau Gil)希望在巴塞隆拿興建一座具建築特色且醫療技術先進的醫院，並希望能將醫院名為「聖保羅醫院」，作為對加泰隆尼亞守護神－聖喬治的尊敬。他找了加泰隆尼亞建築師多明尼克，在聖十字醫院的原址上擴充，在多明尼克過世後由其兒子接手，於 1930 年完成工程，醫院後來也被稱為「聖十字聖保羅醫院」。直到 2009 年 6 月還一直被當成醫院使用，目前已改為博物館和文化中心。
食麥記前冇落雨時影嘅~
食完麥記出嚟就落緊大雨~
上次嚟 Barcelona 都有嚟過 Hospital de la Santa Creu i Sant Pau，不過當時唔開放，可以探索嘅地方極少~
今次就唔同，係全面開放，都算多嘢睇，幾值得到此一遊~
比較唔明白嘅係，好多牆上面嘅花磚都已被拆除，究竟係咩原因呢？
我哋都行到差唔多，亦都見有工作人員清場，因為仲有 15 分鐘就閂門~
不過工作人員清場嘅態度真係好差，可以話只係比趕狗好少少~
約咗珊飛喺市場等，佢哋早過我哋好多到，喺市場門口間 donut 店食住等我哋~
我哋完咗行程就搭 metro 去市場同珊飛匯合~
不幸地，我入閘時，張飛俾部機食咗~
如果呢張係一張單程飛，我可能都由佢，買過張算，唔好煩~
不過我呢張係 72 小時交通飛，仲有兩日要用，當然唔可以由佢~
入閘機附近有求救同求助兩個掣，咁我就撳佢個求助掣，好快就有人應機，不過真係聽唔明對方講咩~
我係連對方係咪講緊英文都聽唔到......一來個 speaker 音質比較差啦~
與此同時，身後有五個亞洲女仔，都有票務問題，佢哋都需要求助~
佢哋又試吓同對方溝通，結果都係冇人聽得明~
屎塔喺閘入面，佢走落去睇吓可唔可以搵到人求助~
隔咗一陣，佢上返嚟話搵唔到人~
我又再撳個求助掣，今次聽到少少，佢好似叫我撳售票機個求助掣~
我走去售票機搵個掣，售票機得一個掣，係求救/求助，咁我就撳佢啦，好快有人應機，但一樣係聽唔明~
其中一個亞洲女仔又走去試吓，仍然係聽唔明~
同個亞洲女仔傾咗兩句，原來佢張 72 小時交通飛一入閘機就彈返出嚟，用唔到~
我哋兩個都半信半疑咁認為會有工作人員過嚟幫手~
等咗幾分鐘(其實呢刻除咗等都冇咩可以做，特別係我，冇飛喺手想試多幾次都唔得)，終於有個著制服嘅人由閘內出現~
嗰種喜悅，有時真係覺得開心可以好簡單，首先令自己唔開心先~😆
佢一出閘就走向啲女仔度，明明我求助先......
搞完一輪，就到我向佢求助~
佢拆開部閘機時，仲拆爛咗個蓋，之後攞返張難以辨認嘅垃圾出嚟，之後從佢個口講出單一個字，rain~
其實一食飛嗰刻，我都估到係因為張紙質交通飛濕咗嘅，係我放得唔好~
遊客係其中一個最煩人嘅角色，但呢個工作人員態度好好，只係唔多講到英文，所以好少講嘢，講都係單字咁講，但過程一直有笑容，滿分~💯
Mercado de Sant Josep(聖約瑟市場)
又稱 Mercado de la Boqueria(博蓋利亞市場)，興建自 1840 年，是巴塞隆拿面積最大嘅市集，主要販售新鮮地道西班牙食材，是當地人買餸嘅地方，亦是遊客很愛逛嘅區域，可以話係巴塞隆拿嘅大廚房。
喺市場匯合咗，行咗一陣，市場就......都係咁啦，相都冇乜點影~
喺市場買咗幾杯雪糕，最記得個店主，面口西到世界盡頭，但啲雪糕又真係幾好食~
計劃好去嘅晚餐餐廳，唔接受預約，所以其實去唔去都得，睇大家意願~
大家可能都攰喇，就喺市場揀間就算~
Àncora Restaurant Boqueria
Gingle Ale
Sangria de Cava Jarra(Jug of Sangria)
我同屎塔飲 Gingle Ale~
Gambas a la Plancha(Grilled Shrimps)
好食，幾有蝦味，又新鮮~
Sepia a la Plancha(Grilled Cuttlefish)
呢個麻麻，冇乜味~
Entrecote a la Plancha(Grilled Entrecot)
呢個直頭差，塊扒硬嘅，又冇牛肉味~
Paella de Marisco(Seafood paella)
不過不失，算係有啲失望，同我印象中嘅 Paella 有啲距離~
Arroz Negro(Black Paella)
呢個一致覺得唔錯，主要都係墨汁嘅功勞~
(後記：啲相用手機影，全部都鬆郁矇，可能因為個個輪住影相，一時心急所致~)
間嘢嘅食物呢，算係普普通通，不過幾佩服啲侍應，個個忙到甩轆，仍然笑容滿面~
食完飯就係咁易行吓著名大街 - 蘭布拉大道
La Rambla(蘭布拉大道)
巴塞隆拿最重要的大街，兩旁有好多商店、餐廳、市場、花市。由於經常有遊客被小偷偷嘢，故又被稱為小偷街。
喺大街見到啲磁石貼，€3.5 一個，感覺價錢都可以，但又唔想咁衝動，都唔唔買住~
跟住行咗入啲橫街，啲磁石貼 €1 一個，即刻買！
行夠就搭 metro 返旅館~
(後記：部相機唔知係壽終正寢定係雨水問題，好多都 out focus~)
沒有留言:
發佈留言