今日行程：
【Barcelona】Basílica de la Sagrada Família → Carmela(Lunch) → Palau de la Música Catalana → Centauro → 【Peníscola】Restaurante Camino De Santiago(Dinner) → Viewpoint → Hotel Marina(Accommodation)
屎塔世界末日都瞓到，所以噚晚同屎塔調咗床(六張單人床)，終於叫瞓到~
不過又咁講，噚日身心俱疲，可能唔調床都一樣瞓到~
同噚日朝一樣，同阿飛一早起身去買麵包~
今日唔係星期日，最近嗰間叫 El Fornet，已經開咗~
我例牌買牛角包，同噚日嗰間比，一樣係脆，但唔係酥脆，我就鍾意噚日嗰間多~
今日第一站：
Basílica de la Sagrada Família(聖家教堂)
※世界文化遺產
自 1882 年開始動工，高聳獨特嘅「聖家教堂」，係一座「贖罪教堂」，由高第設計。由於興建資金來源為捐款同每年 250 萬遊客嘅門票，收入多寡直接影響工程進度，所以至今尚未完成，是世界唯一未完工就被列為世界文化遺產嘅建築物。
到咗 Basílica de la Sagrada Família，有一邊有工程有圍板，另一邊係入口，已經有好多人排緊隊入場~
都唔係排咗好耐就可以入場，入場前要經安檢~
入場我 book 咗 09:00，上塔就 book 咗 09:45，咁我哋有大半個鐘參觀教堂內部先~
又係細數陣年往事嘅時候~
今次重臨 Basílica de la Sagrada Família，冇當初嗰種 WOW 嘅感覺，大概係因為天氣~
當年參觀時係好天氣，陽光穿過彩繪，將彩繪上面嘅色彩帶入教堂內，整個教堂內部都係彩色，係陽光透射嘅彩色，既莊嚴又漂亮~
今日，由出門口到達教堂都係落雨，完全冇陽光射入教堂內，大為失色~
雖然，聖家教堂呢，睇設計已經好好睇，了解埋個設計理念就仲好睇，但畢竟第一感覺都好重要嘅~
入到教堂，我自己已經去到冇興趣嘅境地，因為嚟過？因為落雨？因為其他原因？我真係唔知道~
大概係因為過於照顧團友感受所致，固然，天氣問題冇人可以控制，但作為行程設計者、導遊領隊，見唔到團友嘅笑容係一件難受嘅事情~
教堂內部~
差唔多夠鐘上塔，我就行過去塔嘅入口睇吓情況~
外面有個牌寫住「CLOSED」，會唔會係因為未夠鐘呢？
但我睇到有人同工作人員對話後嘅表情好失望，我不禁喺度諗，唔通係唔上得？
於是我就走埋去問吓，對方話天氣關係，唔開放上塔，差價會 refund~
WHAT??? 嚟 Basílica de la Sagrada Família 冇得上塔，真係大打折扣！
雖然我哋未走，可以晏啲再睇吓點，但其實我一啲都唔樂觀~
就算晏啲開返，當然只可以放買咗當刻 time slot 嘅人上去~
呢度係聖家教堂呀，唔可能仲會有空位未有人買而可以攝位上~
我講咗個情況俾團友聽，當然大家都好失望，好遺憾~
咁冇計啦，而家就去行吓教堂嘅博物館~
行完博物館就返去教堂內部，而家落緊大雨，冇得上塔即係我哋有時間多，所以就喺教堂入面等吓先~
教堂入面呢刻係勁多人，相信早嚟嘅因為避雨唔走，同時亦不停有人入嚟，逼爆教堂，進一步摧毀遊覽興致~
但總唔能夠避雨避成世，時間差唔多，都係要走~
離開教堂時，雨細咗，總算有啲好事發生~
而家就欣賞吓教堂嘅外部~
同當年比係多咗啲嘢，最易睇到分別係中間條主柱，當年係冇嘅~
完咗教堂，就搭 metro 去食嘢~
途經見到聖家教堂嘅朱古力模型~
出咗 metro，我就 keep 住一直行，我自己通常會行快少少，因為想探路，我行錯返轉頭，佢哋都唔駛跟我一樣行咁多錯路~
所以謂行快少少，真係只係少少，大約會同後面嘅團友保持唔多於 20 米距離~
轉咗兩個彎，回頭望，唔見晒佢哋，行返轉頭過返個彎位都唔見佢哋~
呢個時候電話響，係屎塔，原來佢哋唔知我行咗去邊~
匯合返時，屎塔話啲鴨仔唔見晒我都唔知~
落緊雨戴咗帽，連側邊嘅嘢都睇唔到，又要睇導航又要睇路，點顧到咁多嘢~
佢哋四個人，淨係望住前面嘅我跟住行都走失，仲好意思話我......
(佢哋講笑我梗係知，以上嘅對話我係真係有講出口，不過大家都係講笑，冇傷和氣嘅~)
Carmela
Fanta lemon / Fanta orange / Coke / Pineapple smoothie
Yogurt bowl
Yogurt griego natural, miel de abeja, frutas de la estación y granola
(Yogurt bowl
Natural Greek yogurt, honey, seasonal fruits, and granola)
呢個係我要叫嘅，我係幾鍾意食呢啲嘢，所以先揀呢間餐廳~
佢哋未必鍾意食，但總唔能夠太照顧其他人而忽略自己~
屎塔話佢唔係唔鍾意，只係唔係幾想午餐食呢啲~
其他人話 OK~
兜嘢就相當唔錯，其實呢啲嘢好少伏，通常都好食~
Pan con chicharrón
En pan francés artesanal, boniato frito, salsa criolla, crema de rocoto y crema de ají amarillo
(Pork belly sandwich
Fried sweet potato, criolla sauce, rocoto sauce, and yellow-chili sauce)
豬腩夾三文治又幾有趣，雖然有點乾，但味道相當出色~
Salmón ahumado
Aguacate tostado, queso crema al eneldo, cebolla roja encurtida, pepino, semillas de amapola, ikura y rotes orgánicos
(Smoked salmon
Toasted avocado, dill cream cheese, pickled red onion, cucumber, poppy seeds, ikura, and organic sprouts)
我冇印象我有食過......
我食嘢比較慢，返轉頭已經冇晒~
唔係話團友們餓狗搶屎咁食嘢，只係冇人知我食過未，係我自己食得太慢而已~
Brioche de pollo
Pollo desmenuzado en mayonesa de apio y moztaza, tomate rama, cogollos, aguacate y cebolla crocante
(Chicken brioche
Shredded chicken in celery and mustard mayo, vine-ripened tomatoes, lettuce hearts, avocado, and crispy onion on brioche bun)
雞肉算 moist，個醬好味，加埋其他配料幾好食~
Fritos
Acompañados de bacon ahumado y tostada de pan de masa madre
(Fried
Served with smoked bacon and sourdough toast)
就普通蛋同煙肉早餐咁~
門外有個雕像，佢哋話似 Bobby Hill 嗰個 meme~
Book 咗下個景點 13:30，係 guided tour 嚟，即係唔可以遲~
Palau de la Música Catalana(加泰隆尼亞音樂宮)
※世界文化遺產
音樂宮興建於 1905 年，是擁有「花之建築師」之名的加泰隆尼亞現代主義設計師多明尼克的作品。內部用了大量馬賽克磚、以花朵為主題的彩繪玻璃，成為加泰隆尼亞著名地標之一。
喺呢個時候，太陽出來了，喺呢個時候影外圍梗係好，但時間已經嚟到 13:29，我怕遲到唔入得，迫不得已拉佢哋走~
不過到入場時發現唔係 guided tour，係自由行，咁應該係我記錯，冇辦法，太多景點，記錯都好正常~
音樂宮唔大，好快就行晒~
有啲人真係好唔識做~
呢個咁靚嘅露台，好難得先等到冇人，想影嗰時有個女仔行咗出嚟，我揸住部相機，佢望一望我，冇諗住縮返入去，企定定喺度~
係，佢又冇責任，亦冇義務要方便我，但係只係縮返入去幾秒鐘行個方便都唔肯？
要睇嘅睇晒，大家就喺觀眾席度坐陣，當休息又好，靜靜地欣賞吓又好~
休息夠就搭 metro 返旅館攞行李~
攞完行李就搭 metro 去租車公司~
本來可以租咗車先返旅館攞行李嘅，咁就大家方便啲，但旅館嗰頭係幾繁忙嘅大街，要搵位停唔容易~
當初揀租車公司都相當傷腦筋，花多眼亂~
基本上就係比想像中貴，仲有口碑唔多好，不論大間定細間都係~
最後揀咗 Centauro，佢係唯一一間又平又口碑好，的確係好難令人相信，但我都想試一試佢~
其實只要我買最全面嘅保險，會省卻好多煩惱，咁當然就貴啲啦~
以前呢，如果保險太貴，我會搏唔買全保，而我過往紀錄亦良好，所以搏得過~
但近年我聽得太多，唔買全保的話，好多手尾跟，但我過往冇買全保都冇手尾跟，可能自己好彩~
所以近來我租車都會買全保，貴就貴啦，免卻麻煩~
而今次就更加要買全保，因為阿飛都會揸~
佢係雪藏牌，我當然知道危險，我揸咗咁多年車，從來都唔覺得揸車係一件好容易嘅事~
但佢有份俾錢，佢有份嚟玩，大家都想玩得開心，佢想做就唔應該阻止佢，最多我留心多啲，適當時俾啲意見~
攞車過程順利，係要行一小段路去停車場~
車程約三個鐘，大家最好去個洗手間先~
搵洗手間都花咗唔小時間~
落到去停車場，搵到部車，嚟到呢一刻，終於要面對我一直好擔心嘅嘢~
就係放唔放得晒啲行李呢？
一開尾箱，絕望嘅心情湧現，係因為一睇就覺得放唔晒！
我哋玩倉庫番玩咗一個鐘，係咁抬啲篋上上落落去換位試，真係身心俱疲~
篋高得滯，閂唔到尾門~
篋出得滯，閂唔到尾門~
佢入面仲有個尾冚，本來位置係喺淺紫色個篋嘅上面上面嘅水平，而家只可以晾喺篋頂，同埋要放入啲，否則都係閂唔到尾門~
睇落都冇乜嘢吖，但其實最大問題係，後座中至右排係要向前傾，推個篋入啲先可以做到呢個效果，無論係高定闊定深都好，爭半吋都絕對唔夠位~
即係話後座有兩個人會坐得比較辛苦，呢兩個人一定係屎塔同阿珊，真係辛苦晒~
另外仲有個大背囊，要放車廂入面了......
呢部車已經係呢間租車公司可以提供嘅最大部車，再上就係輕型貨車......
再講，行程中會去啲舊城，有啲路會比較窄，我真係唔想揸部再大啲嘅車~
我自己都會揸得辛苦，唔好講阿飛~
部車唔知咩牌子嚟，叫 Link & Co.，好奇怪~
同埋有啲舊，好多花痕，不過一分錢一分貨，我接受~
(後記：ChatGPT 話俾我知，呢部原來係中國吉利汽車同沃爾沃合作開發嘅車，真係大吉利~)
實在用咗太多時間去搞得李，我要即刻開車~
Peníscola(佩尼伊斯科拉)
位於地中海海岸線上嘅中世紀小鎮，曾獲選為西班牙最美小鎮，亦係《冰與火之歌：權力遊戲》嘅拍攝地之一。
出發前，珊問我有冇海邊小鎮可以去吓~
佢呢一吓咁樣問我，可以話係救返成個行程~
因為加插咗海邊小鎮，成個行程係豐富咗好多~
我先前太執著於帶大家去歷史名城，但其實除非大家對歷史好有興趣，否則呢啲歷史名城其實唔駛去太多個~
時間係有啲緊，但我相信我可以安排到~
最後，我調整過啲行程，西班牙同葡萄牙都加插咗一個海邊小鎮~
西班牙嘅就係 Peníscola~
一開始就一定係我揸先，又落雨又就快天黑，最好都係我揸~
掛住開車，都唔記得整個車 cam，諗住趁紅燈整吓，但點都搵唔到個點煙器~
我開車時阿飛都有幫手搵，都係搵唔到~
有人想用 USB 叉電，又搵唔到 USB port~
我絕對唔會相信部車唔提供點煙器同 USB port~
不過呢刻都冇辦法，由佢先~
第一次揸 SUV，仲要左軚，超唔慣~
部車好似好大部，但其實再大部嘅貨車我都揸過，冇理由揸唔掂呢部車，只係需要少少時間去適應~
而且佢有後波鏡頭，某程度上仲易揸過我自己部車~
離開咗超繁忙嘅市區，喺高速公路上奔馳，好快，就睇錯地圖，行咗上山路......
山路都通嘅，不過就慢啲，主要問題係車上有兩位乘客因山路而暈浪......
終於駁返落高速公路，天已全黑，落住大雨，水撥已經開到最大，駛經一部貨車，俾佢濺起嘅水搞到乜都睇唔到，我雙手捉實軚盤，輕拖迫力，有兩秒時間係乜都睇到，儘管水撥已經開到最大~
喺高速公路上，右邊係大貨車，左邊係欄杆，正常速度行駛中，失去兩秒視野係一個好恐怖嘅經歷，冇發生意外，係運氣，我亦相信經驗都好重要~
我相信可能咁啱當刻地面有少少積水，先會導致到有咁大量嘅水被濺起，因為之後我再靠近部貨車時，係冇咁多水濺起，由準備到超越成個過程都冇事發生，就係咁啱先前嗰一個位先係咁~
到咗旅館，被告知停車場唔喺旅館附近，所以而家要落低行李先~
由於附近有啲單程路，所以都要兜吓先去到~
我會話，行過去同揸車過去用嘅時間差唔多~
佢係一個有大閘嘅地牢停車場，要用旅館俾嘅遙控去開閘~
泊好車就行去餐廳食飯~
今晚間餐廳係有 book 位嘅，不過我哋應該會遲到少少~
跟住 google map 行，去到目的地，一片黑暗，係有餐廳，但係冇開亦唔係我 book 咗嗰間餐廳嘅名~
我哋圍住幾間舖行咗個圈，都冇發現~
只好打俾佢，第一次打冇人聽，第二次打，估計對方唔識聽同講英文，等咗陣，有個接，可以用英文對話~
其時，阿珊話搵到間餐廳~
間餐廳喺大街，我哋係有經過，只不過掛住睇住 google 行冇為意~
個地點完全唔係 google 所標示嘅位置，都真係算少有，雖然唔係第一次~
Restaurante Camino De Santiago
Fanta lemon / Coke / Aqua / Tercio Sin Glut
Costillar de cerdo cocinado al horno a baja temperatura con salsa barbacoa
(Pork ribs with barbecue sauce)
肉質超淋，味道好好，我好少覺得 BBQ sauce 好味，但呢個真心正~
食到尾我仲話如果有咩要再叫，我會叫多次呢個~
Rape gallego a la plancha con gambas al ajillo
(Grilled Galician monkfish with garlic prawns)
我都幾鍾意食鮟鱇魚，呢次都唔錯，幾有魚味，蝦冇乜驚喜，但絕對新鮮~
Hamburguesa Camino: 200 gr de vaca vieja madurada, mit cuit de foie, cebolla caramelizada al oporto y queso cheddar
(Hamburger Camino: 200 gr from cow matured 45 days, duck mus, caramelized onion and cheddar cheese)
個漢堡牛同鴨肝一齊食，個味道超夾，好食~
Nachos con carne, guacamole, salsa agria con pico de gallo y cheddar derretido
(Nachos with meat, guacamole, sour sauce with pico de gallo and cheddar melted)
一向麻麻地 nachos，呢個又幾好食~
Zamburiña
(Grilled scallops)
帶子好細粒，但幾有鮮味，但油多咗啲，不過應該係橄欖油嚟~
由頭到尾，主要都係個女侍應 serve 我哋，我哋講英文，佢講西班牙文，但唔知點解溝通到~😂
食完嘢，我話有個地方想去，其實佢哋個個都係夜鬼，夜晚有活動一般都冇問題~
我對 Peníscola 嘅夜景幾有興趣，揀咗個 viewpoint 去睇吓~
行經沙灘~
行吓行吓，唔多對路，我想去嘅地方應該係有少少高嘅，但條路一路行都係平地~
最後去咗個地方，基本上同個觀景點望嘅係同一個方，只不過個觀景點就喺身後上方~
反正都係望同一方向，所以都冇好堅持要走上去~
(後記：好後悔冇堅持，因為第二日有行上去，望嘅景雖然係同方向，但景觀好唔同，上面睇係靚好多~)
山上面嘅一點點光，令我諗起長崎嘅夜景~
我覺得長崎嘅夜景好靚，所以對 Peníscola 嘅夜景有興趣~
不過從低位望出去，好一般~
睇完夜景就行返旅館~
沒有留言:
發佈留言