《瞬間看地球》Stranger's Blog: 2025.05.07 馬爾他 (Malta、Gozo) (歐洲第二天)

今日行程：
【Malta】Talbot & Bons Bed & Breakfast(Breakfast) → Enterprise Rent-A-Car → 【Gozo】Karamelli Brunch Cafe(Lunch) → Cittadella de Victoria → Old Prison → Cittadella Visitor Centre → Gozo Museum Of Archaeology → Kercem Parish Church → Inland Sea Dwejra → Xaghra Parish Church → Peppina(Dinner) → Rosehill B&B(Accommodation)

朝早走去個泳池度望吓，冇人游水~

早餐旅館包埋，用餐環境本來幾好嘅，不過部份檯嘅位置係喺樓上嘅走廊同樓梯底，有人行過一定有污糟嘢跌落嚟~

早餐都係一般西式早餐，不過選擇算係比一般多~

我見佢有部自製 smoothie 機，又放咗啲唔同類型嘅生果，就試吓自己整杯奇異果汁，不過唔知點解失敗咗~
有個喺度做嘅姐姐走埋嚟拆咗部機嚟睇吓，其實佢都冇做過啲咩就裝返好部機，跟住佢幫我整，又成功喎~
新鮮奇異果汁，好好味！

今次旅程要採取慢遊態度，況且七日馬爾他，夠時間有凸~
一路食嘢都冇考慮過時間，慢慢嚟~

食完嘢就返房攞返晒啲行李，再行返去機場租車~

租車位置位於室內停車場內，不過指示好唔清晰，喺停車場內要周圍行去探索吓先搵到~
今次選擇咗喺 Enterprise 租車，冇咩特別原因，主要都係因為佢喺馬爾他機場，一眾租車公司當中評價最好，價錢唔係最平，但合理~

租車手續順利，工作人員帶我去攞車嗰時，見到部 Aygo X，好希望佢係俾呢部我~
點解想揸 Aygo X 呢，因為我喺英國，如果換車，我好可能係換呢部，可以先揸為快就好~
不過，我見佢行近部 Aygo X 都冇放慢腳步，唔係呢部啦~
但我仲未失望，可能係另一部 Aygo X 呢~
結果唔係，佢俾咗部 Kia Picanto 我~

我自己部車就細 cc 棍波，呢部車就細 cc 自動波，揸落真係兩個世界~
呢啲車仔一定係非常冇力，配合棍會比較好啲，但配合自動波，都唔知佢想點，好難捉摸~
不過揸得太多棍波，揸返自動波係有份莫名嘅舒適感~

攞咗車，而家就過去 Gozo 島先~
過去 Gozo 島，要去碼頭再坐渡輪，可以連車一齊過嘅~

過去碼頭嘅沿途，心情相當愉快，沿途嘅環境，好新鮮，冇乜我哋去過嘅地方係類似咁嘅環境，真係孤陋寡聞~

早已聽聞馬爾他人揸車比較快同急進，事實都的確係如此，而且比香港嘅急進更加急進，經常左穿右插~
但其實還好，好多都係快狠準，我冇問題，唔好猶豫完先快同狠，得快同狠但唔準就會出事~

嚟到碼頭都幾多車，唔知要等幾耐~
由於唔知一班船可以容納幾多車，就保守推算一吓，可能要等第三班船，半個鐘一班嚟講......
都 OK 嘅，我哋唔趕時間，喺車聽吓歌~

我哋發現部車機支援中文，不過有啲字又出唔到，出唔到個「玻」字，好奇怪，又唔係特別字~
(我知好多人鍾意黑玻璃呢隻歌，不過我同屎塔覺得一般，只係個 app 自己隨機播而已~)

向右邊望就係去 Comino 島嘅售票處，過兩日我哋都會去 Comino~

現場係超級曬，不過氣溫大約係 24 度，開咗兩邊窗，有啲風其實相當可以~

咦，第二班船到咗，我哋前面啲車郁喎，隻船嘅承載量比我哋想像中大~
左邊俾大車嘅，右邊俾細車，上好晒車，地板會升起變成上層，咁下層又可以放細車，所以承載量比我哋想像中大~

海水係真正嘅藍色~

到咗 Gozo 島，就去食嘢先~
碼頭一帶同島中心交通都幾繁忙，兩者之間嘅交通就通暢啲~

島中心交通非常繁忙，泊車位更是一位難求，要走入內街兜吓先搵到位停車~
泊車就要睇清楚啲規定，度度都唔同，但一般人只可以泊入白色格係一定嘅事~

餐廳對面係警局，警局出面有隻瞓到不醒貓士嘅貓~

Karamelli Brunch Cafe

Galvanina ice tea peach, hot chocolate

By order of the carbonari
Spaghetti with yolk, guanciale, pecorino romano
一睇以為係 Carbonara，點知原來唔係，Carbonari 係唔等於 Carbonara~
碟嘢幾鹹吓，亦唔算喜歡個味道，各樣嘢都好似好唔夾咁~

Spicy chick
Garganelli with nduja cream, chicken breast, parsley, basil oil
碟嘢主要係個醬汁，微辣，有少少食印度菜嘅感覺，唔錯~

食嘢之前，屎塔話食完嘢想食件蛋糕，不過呢度啲嘢幾大份，結果太飽就冇叫蛋糕食~

本來計劃係玩完先去旅館 check-in，因為我知道唔會過佢限定嘅 check-in 時間~
不過溝通過後，感覺對方想我哋早啲到，唔想麻煩人，所以決定早啲到~
但最早可以 check-in 時間又未到，我又唔想玩到中途走去 check-in，決定喺餐廳坐多陣，夾返時間再去 check-in，反正唔趕~

旅館老闆係英國人嚟，所以都比較多嘢傾~
佢好早已經搬咗過泰國，之後就搬咗嚟馬爾他，都住咗十幾年~
英國脫歐佢都冇打算離開，佢話佢對馬爾他有貢獻，馬爾他係唔會踢佢走~
佢亦都去過香港，因為佢有個親戚住喺登山纜車嗰頭嘅半山~

Check-in 完就出去玩喇~
沿途隨影~

去到目的地個停車場，唔俾入，佢指一指側面有張 poster，相信今日有 event，唔俾泊~
咁就麻煩嘞，呢一帶周圍都係車，幾繁忙吓，想搵個位泊一啲都唔易，周圍兜吓碰吓運氣~
兜咗兩個圈，終於見到有部車應該要離開，但我其實唔肯定，因為有成六七個人圍住部車吹水~
呢個情況下，實在唔可以咁厚面皮停低唔郁，唯有兜多個圈返嚟碰運氣~
兜咗個圈返嚟，上咗幾個人，仲有幾個人上緊車，都等咗有一分鐘先開車，算係好好彩了~
不過，佢個位嚴格嚟講係唔泊得咖，但實際嚟講應該冇問題~
雖然係閘口位，但已經雜草叢生，而家都就嚟下午四點，要開工做咩都好，唔會咁晏先開啦~

Cittadella de Victoria(維多利亞城堡)
這座城堡最早可追溯至羅馬時代，但現今的樣貌主要是由十六世紀騎士團時期重建而成，用以抵禦鄂圖曼土耳其的入侵。城內保留有古老的教堂、監獄遺跡、小巷和博物館。

博物館閂門時間較早，所以我決定睇咗啲博物館先，之後先行城堡~
博物館有聯票，€5 包五個博物館，很是佛心~
我就覺得唔需要真係睇晒咁多個，其實興趣都唔係話好大~
不過用 €5 淨係睇 Old Prison 都唔會覺得貴，所以就照買聯票，再睇吓之後想睇咩~

Old Prison(舊監獄)
這座監獄建於 16 世紀，最初是用來囚禁違反紀律的騎士團成員，後來也關押過普通犯人。Old Prison 一直使用到 1962 年，是 Gozo 使用最久的監獄之一。

一開始遊覽，睇咗幾間好細嘅房，跟住就有個比房大倍嘅範圍，似係操場咁上下嘅廣場，然後......已經沒然後......
我唔知係咪有部份冇開放定佢本身係真係咁細，我被「一開始便結束嘅感覺」殺個措手不及，不懂反應......
我來回行多一次，想睇吓有冇遺漏，係冇嘅......

之前仲話「用 €5 淨係睇 Old Prison 都唔會覺得貴」，我收返呢句說話......

距離各博物館閂門仲有啲時間，就行去下一間聯票包埋嘅博物館~

Cittadella Visitor Centre(遊客中心)
介紹 Cittadella 嘅歷史演變、生態、軍事、教會同民間生活故事。

其實都有少少悶~

仲有少少時間，行多間啦，最後一間，之後有冇時間都唔會再睇博物館了~

Gozo Museum Of Archaeology(考古博物館)
博物館的建築本身是由一座 17 世紀的修道院改建而成，內部展示了來自 Gozo 島及周邊地區的重要考古遺物。

呢間就多少少嘢睇~

之後都係自由時間，冇咩限制，就周圍行吓~
維多利亞城堡隨影~

想入嘅 Cathedral of the Assumption 冇開~

教堂對開廣場有得坐，最重要係冇俾太陽曬到，我哋都俾個太陽曬到冇晒體力，必需喺度坐陣先~
計劃好要去嘅地方都去晒，但時間尚早，要諗啲地方去吓~
就去一個本來聽日先去嘅教堂~

Kercem Parish Church(聖格列高利及永援聖母堂)
1846 年動工，1851 年落成，稍後於 1885 年成為獨立教區，為 Gozo 島唯一供奉兩位主保聖人嘅教堂。

之後再去一個聽日先去嘅地方，聽日唔知仲有咩地方可以去......聽日先算~
沿途隨影~

Inland Sea Dwejra(內海)
這裡是一個海水湖，與開放的海洋相連，透過一個天然的岩洞通道連接到外海。這個洞窟高約 30 米，寬約 10 米，船隻可以穿過這個洞進入大海，當中海水清澈透明，彷彿是一個隱藏的秘密世界。

附近有個小教堂，幾可愛~

附近有個觀景台，不過曬到唔想行，所以就冇去~
附近環境係幾唔錯~

又係嚟到有時間又冇地方去嘅時候，呢刻只有一個選擇，返旅館休息~
途中經過一間之前都經過嘅教堂，就走入去參觀吓~

Xaghra Parish Church(聖母誕生聖殿)
於 1815 年動工，1855 年基本完成，外觀為巴洛克風格。

休息夠就出去食飯~

Peppina

附近有間教堂，我搵唔到開放時間，行咗過去睇都搵唔到資料，所以就問吓呢度嘅服務員~
服務員話佢都唔知，不過可以幫我查~
之後佢覆返我中午 12:00 前任何時候都開放~
的確，喺網上面眾多不同資訊入面，其中一個資訊係話佢開 06:00 嘅~

Ginger ale
Strawberry, grapefruit + lime