今日行程：
【Gozo】Rotunda St. John Baptist Church → St. George’s Basilica → Tal Mixta Cave → Salt Pans → Sand waves → Wied il-Mielaħ → Ta' Pinu → Xlendi → The Boathouse Restaurant(Dinner) → 【Malta】Victoria by Petit Chic(Accommodation)
早餐旅館包埋，不過呢間就冇乜選擇，還好有我喜愛嘅窩夫~
食完嘢就出發去玩~
Rotunda St. John Baptist Church(聖若望洗者圓頂教堂)
建於 1952 年，最著名的是它巨大的圓頂，是整個馬爾他群島中最大的圓頂建築。圓頂高度約 75 米，是 Gozo 的地標。
可惜呢，去到因為維修，冇得上圓頂~
在場嘅員工，好忙碌咁招待遊客去參觀舊禮堂~
入到去就覺得，醉翁之意不在舊禮堂，在於入面出售嘅手作，同埋捐款箱~
明嘅，圓頂唔開放，少咗收入來源，手作就冇興趣喇，捐少少錢作為支持吓~
之後就去下一個教堂~
不過教堂附近冇位泊車，唯有周圍兜吓~
好彩都唔係兜咗好耐同唔駛行好遠~
嚟到教堂，先知原來要收 €3 入場費(網上資訊係免費)~
如果我哋唔駛太刻意同好輕易就嚟到又有位泊車，我真係未必會俾錢入場~
但我哋係兜路過嚟，又兜路搵位泊車，雖然唔係真係行好遠，都 5~10 分鐘吖，空手而回又實在接受唔到，所以都有俾錢入場~
St. George's Basilica(聖喬治大殿)
教堂係巴洛克風格，建於17世紀，呢座大殿又被稱為「Gozo 之金教堂」，因為裡面用咗大量金箔裝飾，內部華麗堂皇。
離開教堂就喺附近行吓~
去下一個地方時，途經一個位，風景唔錯，又睇到藍色嘅大海~
下個地方係一個洞穴，去洞穴沿路路況極差，有啲差到我懷疑俾咪路嚟......
沿路仲有唔少人行緊去，我估佢哋冇揸車，係搭巴士到最近嘅站再行過去~
咁樣曝曬住行，唔知要行幾耐，可能半個鐘都唔出奇，我哋真係絕對頂唔住，相當佩服佢哋~
Tal Mixta Cave(米什塔洞穴)
從洞穴口望出去，可以看到整個 Ramla Bay 的金紅色沙灘和蔚藍的地中海，風景非常迷人。洞穴是由自然風化與侵蝕形成的石灰岩洞穴，歷史悠久。
期間有兩位女士決定就地野餐~
好心就俾啲同理心，好多人嚟到都想影吓相，個個影完都會行開，佢哋咁樣佔據咗個影相位，好嗎？
之後就去鹽田，印象中未遊覽過鹽田，雖然唔係咩特別嘢~
沿途隨影~
Salt Pans(鹽田)
位於 Gozo Xwejni Bay 附近嘅鹽田，是一個歷史悠久嘅地方，自古以來就被用來製鹽，係 Gozo 島一個重要的文化與歷史遺跡，這些鹽田的歷史可追溯至數百年前。
個海藍到好唔真實~
呢度令我諗起高第~
之後去一個從未見過嘅自然生態，沙浪~
沿途遇到佢哋，好玩係好玩，不過長期曬住真係搞唔掂~
Sand waves(沙浪)
位於 Gozo Dwejra 附近嘅沙浪，是由長年風力與水流侵蝕而形成的石灰岩波紋，它像是細沙堆成的波浪，但其實是硬石，非常特別，是自然界的藝術品。
咁樣自然形成，真係好特別，好奇妙~
附近環境~
之後就去一個叫藍窗嘅地方~
藍窗係一個天然形成嘅石拱門，透過中間空心處望過去，可以見到藍色嘅天，藍色嘅海，因而被稱為藍窗~
Wied il-Mielaħ(藍窗)
這些石灰岩歷經了數萬年的自然風化和海水侵蝕，隨著時間的推移，一部分岩層被逐步磨損，形成了這個巨大的拱門結構。
望落就只係一啲石頭，但想像吓佢係點樣形成，其實感覺都相當壯觀~
原本最受歡迎嘅藍窗唔係呢個，係另一個叫 Azure Window 嘅藍窗，不過佢喺 2017 年 3 月 8 日發生倒塌，不復存在~
佢係《權力的遊戲》嘅拍攝點之一，加上佢本身嘅魅力，曾經係 Gozo 島其中一個最受歡迎嘅景點~
曬咗成日，雖然有啲肚空，但一啲胃口都冇，完全唔想食嘢，所以今日就唔食午餐~
下一站又係去教堂，馬爾他呢個國家非常細小，但據說有 365 間教堂，一日去一間就剛好要一年......
去到停車場，屎塔仲瞓緊覺，就冇叫醒佢，之後，連我自己都瞓著埋~
都唔知瞓咗幾耐，俾隔籬部車嘅一家人嘈醒，佢哋不停喺度用唔同語言講同一個詞語，其中我聽到普通話同唔純正嘅廣東話~
不過屎塔仲係昏迷緊，繼續等，反正唔趕時間，由佢瞓~
喺我瞓著之前，太陽仲係好猛烈，瞓醒之後，係小有嘅陰天~
Ta' Pinu(聖母朝聖教堂)
教堂的歷史可追溯至 16 世紀，原為一座小教堂。據說在 1883 年，一位當地婦女聽見聖母瑪利亞的聲音呼喚，之後教堂成為奇蹟與神蹟的象徵。目前的教堂是於 1920 年代重建而成，採用羅馬式建築風格，由當地金黃色石灰岩建成，與 Gozo 島的自然景色和諧融合。此教堂亦曾有多位教宗到訪。
離開教堂時落細雨，落咗幾分鐘就停咗，原來馬爾他係會落雨嘅~
教堂外有個指示牌，佢個膝頭哥好有趣~
有部雪糕車喺度，唔知點解感覺很古巴，我又未去過古巴......
跟住就去 Xlendi 呢個小鎮行吓~
沿途隨影，天氣麻麻~
嚟到 Xlendi，天色陰沉，呢度如果夠陽光係幾靚，可惜~
有啲人就係咁，有陽光又嫌太多；冇陽光就嫌唔夠靚~
Xlendi 隨影~
餐廳仲有半個鐘先開門，就喺海邊坐低等~
The Boathouse Restaurant
Peach ice tea, Kinnie
第一眼望落以為嚟錯咗係同一樣飲品~
Kinnie 係馬爾他地道汽水，味道有啲雲尼拿但苦苦哋嘅，幾特別~
餐前附上嘅~
Fried fish cake
Soft herbs, basil pesto mayo, lemon wedge
唔係我哋認知食開嘅魚餅，有啲驚喜，不過食到有內臟嘅味道，唔知係咪都係用魚嘅渣滓做材料，但味道其實都可以~
Spaghetti squid ink
Pan fried cuttlefish chunks, cuttlefish ink sauce, roasted cherry tomatoes
一個字，冇味！合埋眼食的話，都未必知食緊啲乜嘢~
Mixed shell fish marinara(Roast potatoes, seasonal salad)
Argentinian prawns, vongole, cozze, calamari, fresh herbs, white wine, garlic, marinara sauce
唔覺新鮮，冇鮮味亦唔覺好食~
嚟呢間嘢係因為有個香港 KOL 介紹，不過體驗就唔似得佢介紹嘅咁好~
咁有時啲嘢好難講嘅，唔能夠一次定生死，可以有好多原因嘅~
返去攞車時，一時間真係唔知邊部車係我哋嘅~
今日行程完晒，要離開 Gozo 島，搭渡輪返 Malta~
夜晚渡輪班次比較疏，但好好彩，只係等咗一陣就有船~
去到旅館，樓下有一個車位，不過只能泊到聽朝 06:30，唔理想，唯有周圍睇吓有冇位~
我決定步行，因為我唔想連而家泊緊嘅車位都冇埋~
行出大街加小巷，搵到幾個車位，但全部都貼咗紙，講明只能泊到朝早 07:00，即係冇用~
旅館外圍有條呈弧形嘅街，幾長吓，行都幾遠吓，但冇辦法，我就算肯 06:30 前落樓，咁之後又點呢？
不如今晚辛苦啲，搞掂個車位佢，聽朝就冇咁辛苦同苦惱~
終於俾我搵到個車位，不過步行返旅館要 10 分鐘，都好過冇位啦~
前前後後用咗超過一個鐘先搞得掂個車位......
呢間旅館個花灑呢，係風琴式出水，弱......猛......弱......猛......弱......猛......不斷循環......好不過癮......
沒有留言:
發佈留言