今日行程：
【Comino】Blue Lagoon → Crystal Lagoon → 【Malta】Popeye Village → Parish Church of Mellieha(觀景台) → Malta National Aquarium → Il-Bottegin(Dinner) → Victoria by Petit Chic(Accommodation)
今日天氣好似麻麻地，計劃好要去嘅地方係一定要好天先值得去~
而家要諗吓調唔調行程，食完早餐先算~
早餐旅館包埋，普普通通西式早餐，合格有餘~
食早餐時係落緊雨，仲有雷暴警告，根據天氣預報，天氣要到下午先好啲~
但其實食完早餐天氣已經好返啲，仲間中有少少陽光~
就係咁先煩，天氣又唔算好，但又好似開始好咁~
最後都係覺得唔需要調行程，因為天氣真係明顯轉好~
而家首先係去碼頭搭船過 Comino 島，不過今次就冇得連人帶車過去，只可以泊低部車喺碼頭，人就坐船過去~
碼頭停車場爆晒，要去個遠少少嘅停車場，都係得返一個位~
我哋已經算早到，再遲啲到嘅人唔知點算~
過去 Comino 島來回嘅價錢係 €15 一個人，二人就 €30，相當昂貴！
今次旅程比較即興，事前冇時間做功課，我喺現場絕對係有被驚嚇到！
尤其噚日去完 Gozo 島，連人帶車來回二人加埋都只係 €20，去 Comino 唔連車都貴過 Gozo 50%！
今次搭嘅係細船，人太多，我哋上唔到第一架，要上第二架，再等上爆先開船~
碼頭呢邊天氣麻麻哋，希望 Comino 嗰邊好啲啦~
去 Comino 島，主要係想去 Blue Lagoon，其次仲有個地方叫 Crystal Lagoon~
沿途船長會停靠吓啲洞穴，可能想藉此令到個昂貴船票值回票價......
越接近目的地，啲水就越清，越碧綠~
Comino 呢邊天氣唔算太差，都有足夠陽光，算唔錯~
Blue Lagoon(藍湖)
藍湖水質清澈透明，顏色呈夢幻的藍綠色，是浮潛、游泳和日光浴的熱門地點。
我哋好少去呢啲陽光與海灘嘅地方，可能真係第一次見咁靚嘅湖水~
時間唔算晏，又未到最旺季，所以人都唔算太多~
據網上面嘅人講，旺季中午打後先嚟的話，連搵個企位都難~
多數人上船前已經係著住泳衣同拖鞋，我估好多人嚟 Comino 都係為 Blue Lagoon 而嚟~
咁有部份人係唔落水嘅，就好似我哋咁，睇完 Blue Lagoon，就行遠少少睇吓~
Crystal Lagoon(水晶湖)
水晶湖水質極清澈，適合浮潛、潛水或從船上跳水。四周是壯觀的岩石峭壁，風景原始自然。遊客較少，氣氛寧靜，主要由遊船團或包船才能抵達，因為沒有步道連接。
行過去嘅路就唔係幾好行~
沿途隨影~
水晶湖呢度有個位可以俾人跳水，不過就要有船先去到~
啲船好似浮起半空咁~
要行的話係仲有地方可以行，不過最靚嘅地方已經行過，其他就算了~
返返去碼頭搵嘢食~
求其搵咗架美食車買咗啲嘢食~
Beef steak wrap
我呢就未食過拖鞋嘅，不過我就幾相信呢堆牛扒同拖鞋嘅質感應該差唔多，拖鞋可能都有膠味，呢件扒係冇味~
Crisp chicken wrap
雞肉就係雞肉，正正常常唔太乾已經 OK~
決定照計劃嚟 Comino 算係一個啱嘅決定，雖然唔係完美嘅天氣，但夠陽光又有啲風，唔太熱，不錯了~
而家就返主島 Malta，去一個有少少，少少兒時回憶嘅地方~
途經一處地方，看似風景不錯，停低睇吓~
Popeye Village(大力水手村)
原本是為 1980 年 Robin Williams 主演《大力水手 Popeye》真人電影而搭建嘅電影場景，電影拍完後，這裡保留成主題遊樂區。
講 Popeye 係兒時回憶其實都有點不正確~
對於 Popeye，係接近只記得個名嘅印象，冇乜其他~
都仲記得布魯圖呢個名，但唔記得係點樣嘅~
我連 Popeye 叫大力水手都要上網 search 先記得~
入場就唔會喇，冇乜興趣，喺觀景台望吓就幾靚嘅~
同埋意外發現原來對開都係個靚灘~
下一站又係教堂，不過今次其實唔係為去教堂，係去教堂側面嘅觀景台~
教堂叫 Parish Church of Mellieha(聖母聖誕堂)，不過冇開，我見牆外掛有燈飾，記得噚日揸車見過有座教堂高高在上又係有燈飾，相信係同一間~
呢度有兩個觀景台，一個細嘅喺教堂隔籬，一個大啲嘅喺教堂對開馬路嘅對面~
之後就去防空洞~
不過佢閂 15:00，我哋啱啱過咗時間，睇吓可唔可以聽日補返~
防空洞對開有壁畫~
見到有間雪糕店就買杯嚟食~
店員係超級臭臉型~
Vanilla + Dark chocolate
喺附近搵咗個冇太陽曬到又可以坐嘅地方慢慢嘆~
附近隨影~
期間有兩位女士，想我幫佢哋影相，俾人叫幫手影相，差唔多個個去旅行都會遇過，但呢次比較特別~
佢哋當咗我係攝影師，問我邊度好，我識條鐵咩~
我求其點咗個有花有草嘅位俾佢啦，影完佢話光得滯~
張相係用佢手機影嘅，其實我就覺得冇問題......
跟住佢哋走咗去啲暗位度影，又唔滿意......
重點係，佢哋膚色係好深吓，走去暗位影完係睇唔到樣~
叫完我就叫屎塔，屎塔同佢哋走晒全場，不停問屎塔邊度好，光又嫌光，暗又嫌暗~
之後就去水族館~
中途見到有個位靚靚地又走去睇吓~
Malta National Aquarium(馬爾他國家水族館)
間水族館好細，收 €17 一個入場費好貴，又唔多嘢睇~
呢度可以行入去，喺入面都可以望到出面，啱晒小朋友，我自己都係第一次見~
冇諗過喺水族館會見到 Madagascar hissing cockroach(馬達加斯加發聲蟑螂)
水族館雖然細，物種唔算太多，但有一樣設施又幾有趣~
Deep sea marine experience(模擬潛入深海)
這個設施會模擬潛水的過程，進入模擬潛水艙內，通過先進的視覺與音效技術，讓你彷彿置身於海底世界。你可以「親眼見到」珊瑚礁、各種魚群，甚至是神秘的海洋生物。這種沉浸式的體驗能讓遊客感受到深海的神秘與壯麗。
成個過程係模擬深潛，畫面上會見到魚群同珊瑚，到潛到入深海後就會被巨型章魚襲擊~
被襲擊時，畫面不時見到章魚身影，天花畫面會模擬被襲後嘅裂痕同埋有幾度實體窗門鬆脫，亦有警報響起~
成個過程非常搖晃，一定要雙手捉住扶手先可以保持平衡~
水族館外圍~
想話去返有燈飾嗰間教堂，所以就冇去到原定會去嘅嗰間餐廳，冇所謂，反正都係隨意揀嘅~
嚟到教堂，天仲係好光，當然唔會有燈飾，就喺教堂對開揀咗間餐廳食嘢先~
Il-Bottegin
(相係飯後影嘅)
Gingle ale & hot chocolate
Rib-eye steak (400g)
Grilled black angus rib-eye steak, cooked to your liking
安格斯牛扒竟然係冇味嘅，同埋都係熟得滯，麻麻地~
Salmon fillet
Pan-baked soya and honey salmon fillet
皮唔脆，不過肉質夠嫩，唔錯~
Tiramisu
幾有咖啡味又唔會過甜，讚~
Local cannoli
其實唔知係咩嚟，見到 local 呢個字就盲衝~
預咗本地甜品會偏甜，但又唔算太過份，但對我嚟講唔係咩好食嘅嘢，應該唔駛錢都唔會再食~
屎塔試完話超級無敵勁甜，食到揦埋口面~😆
埋單時見到個價錢咁平嘅，仔細啲睇，佢冇計到甜品，話返俾佢知，改返單先俾錢~
我哋慢慢慢慢咁食呢餐飯，係想捱吓時間等天黑，可以睇到教堂著燈~
不過呢，天色係黑呀，但教堂冇著燈......
教堂對開環境都幾唔錯~
今晚間旅館同噚晚嗰間一樣，即係好有可能又會有車位問題......
我由大街轉左入小街前，對面馬路有架車想轉入同一條街，正常情況下我都會讓佢入先，不過今次我點都唔會讓~
如果佢係嚟搵車位嘅，即係佢會同我爭，呢啲時候真係唔好扮好人~
結果，佢一路跟住我，跟到旅館樓下一排泊車位，俾我見到一千零一個車位！
如果之前我讓佢入先，佢又係想搵位泊車嘅，俾佢泊咗個位，我唔殺我自己，屎塔都會殺咗我！
今朝碼頭又係得返一個位，今晚旅館又係得返一個位，又會咁蹺~
沒有留言:
發佈留言