《瞬間看地球》Stranger's Blog: 2026.02.05 京都府(京都) (日本第二天)

今日行程：
【京都】任天堂博物館(連午餐) → 平等院 → かつくら四条東洞院店(晚餐)《住宿：東橫INN京都二條城南》

今日重點行程係任天堂博物館，之前抽中咗 11:00~11:30 入場，咁我就安排咗之前去平等院~
不過今朝屎塔唔係好願起身，我就話唔緊要，唔去平等院就得~
佢冇講啲咩，只係冇起身~

早餐旅館包埋，日式早餐，啲嘢好啱食~
仲有 15 分鐘就完早餐時段，竟然仲有新款嘢出同會 refill 其他嘢，真係未遇過，好意外~

食完早餐，未夠時間入任天堂博物館，但又唔會夠時間去其他地方，所以都慢慢咁準備同揸車過定去搵位泊車~
任天堂博物館本身冇提供停車場俾公眾，都係喺附近搵個停車場泊~

任天堂博物館
位於京都宇治的任天堂博物館，於 2024 年 10 月正式開幕，這裡不只是展示歷史，更強調「玩」的體驗。

早到咗 20 分鐘，都係要排隊等入場~

登記後每人有一張入館証，証入面有 10 個 token 作為玩遊戲嘅代幣，唔夠可以喺館內俾錢再加~

最後早咗幾分鐘入場，入場前要經過安檢~

入場後空地有兩個場景俾人打卡，不過我覺得實在太少，多幾個會好啲，感覺會歡樂啲~

一入館又有地方俾人打卡~
個頭係郁得嘅，掂吓佢仲會有聲音~

真正入博物館前，要聽講解，主要都係注意事項，特別係咩位置唔可以影相~
呢個位置幅牆都幾正~

聽完講解，就要用手上張入館証感應閘機入閘~

博物館主要分兩層，一入就要搭電梯上一層，呢層係博物館，全層禁止攝影及錄影~
我唔係機迷，但喺呢度見到好多未聽過未見過嘅遊戲機都覺得幾興奮~

博物館中間有兩條樓梯，同樣通向下一層嘅遊戲層，遊戲層就可以攝影及錄影~
遊戲嚟講，我覺得多啲款會正啲，我個人比較貪心~

先講啲冇咁受歡迎嘅先~

呢個就好似打棒球咁，冇乜特別~

呢個係用一個唔易操作嘅夾去夾波攞分，類似你個嘢壞咗嗰種夾~

呢兩個遊戲係隔空感應玩家嘅支體動作去操控~

呢個冇影到遊戲畫面......
係隔空感應玩家嘅支體動作去操控，不過呢個係感應成個人，唔只手部~
畫面入面會見到自己，畫面入面嘅自己，同真人同步移動，玩法係要避開面中不停飛出嘅障礙物~

呢個都幾受歡迎，我嚟之前睇過講解，不過嚟到就一啲印象都冇，就咁睇其實興趣都係冇乜嘅，就冇研究過~

唔少得嘅係真正大家都認識嘅實體遊戲機~

比較受歡迎嘅係二人操控大型手掣嘅遊戲~
用呢款手掣玩嘅，有三款遊戲可選：孖寶賽車、炸彈人、孖寶兄弟
我哋揀咗孖寶兄弟，因為佢寫難度比較低，以我同屎塔嘅默契，好有信心會係全場最低分~
結果，係咪最低分唔知，但低分到有啲尷尬......💨

用第二款手掣玩咗呢隻遊戲，主要係操控飛機，目標係衝向空中嘅汽球攞分~
一樣講求默契，結果當然係一樣低分......

呢款就唔同喇，默契嘅需求只佔好少成份~
玩法係不停有雪糕疊上去，疊得越高越易冧，我哋嘅成績相當唔錯，至少喺我眼見嘅人入面，我哋係最高分~😆

我自己就最鍾意呢隻遊戲~
上面玩過嘅三款遊戲，需要 2 個 token，呢款就要 4 個，啱啱好玩晒 10 個~
我喺自己嗰 round 入面，遺憾地只取得銅牌~
咁都好過有人咩牌都冇嘅~

喺我玩之前，有三個西人一齊玩緊，最終結果，佢三個包辦金銀銅牌，好彩冇夾佢哋同一 round~😝

博物館內有間漢堡餐廳，選擇喺度食，係純綷有種完滿感~
個感覺係，入呢間博物館，係要喺度食埋嘢先叫完整遊覽完呢間博物館~

包其實就得幾款，不過可以改配料，連包皮本身都可以改~
同時亦可以由零開始自己組合，悉隨尊便~

我哋就覺得費事煩，揀菜單上已經組合好嘅包，但就想改個包皮~
埋到去 order 時，佢話改包皮就要買套餐先可以改，咁算數，胃口上唔想食咁多~

西京焼きバーガー(西京燒漢堡)
我自己唔係西京燒 fans，不過呢個 OK，佢個醬汁中和咗西京燒個甜味，我又覺得幾好~

WASABIビーフバーガー(芥末牛肉漢堡)
芥末味唔係好重，牛肉味唔錯，肉汁相當豐富，口感則偏軟稔~

呢張紙個設計又幾正~

喺冇期望嘅情況下，算係喜出望外~

食嘢期間，有對母子坐咗喺我哋隔籬檯，揸住份菜單研究緊食咩~
我覺得奇怪，因為現場個流程係，排隊買嘢食，買完嘢食有飛揸手，之後就有人帶位~
理論上係唔會有人坐低咗先揀嘢食~
結果，之後有工作人員請佢哋起身去買嘢食先~
其實現場都幾多工作人員，嗰兩母子係點樣可以未買嘢食就坐低咗嘅呢？
又，嗰兩母子坐低咗都超過 5 分鐘，啲工作人員係點樣發現嘅呢？因為菜單人人都有，工作人員係點知佢哋未買嘢食呢？

食完嘢又落去打機嗰層行吓，人流明顯多咗好多，排隊打機嘅人多咗一倍，但尚算可以，唔算真係好擠擁，人流控制得唔錯~

行夠睇夠就離開，去到最後一站，商店~

喺走廊見到 Mario 40 年嚟嘅轉變~

入面好多精品，都幾多人買呢啲特大嘅手掣咕臣~

呢啲匙扣幾正，不過佢個購買規則有啲不近人情~
呢啲匙扣係以盲盒形式售賣，而每一位顧客只可以買兩盒~
盲盒仲只可以買兩盒，單人入場又想儲齊一套咪要入場好多次？

其實仲有其他幾款產品都係，以盲盒形式售賣，每位顧客只可以買兩盒~

其他精品~

博物館出入口相當平實，一啲任天堂嘅氣氛都冇~

遊覽完博物館，睇睇時間，可以去食下午茶，亦可以去返今朝冇去到嘅平等院~
由於大家胃口都唔係太好，所以就揀咗去平等院~

平等院
平等院是日本最具代表性的世界文化遺產之一。始建於 1052年(平安時代)，原本是重臣藤原道長的別墅，後來由其子藤原賴通改建為寺院。平等院在日本人的日常生活中無處不在，地位極其崇高，10 日圓硬幣背面的建築圖案正是平等院最重要的建築「鳳凰堂」。

平等院入面嘅鳳凰堂，真係幾靚，入平等院都係因為佢~

如果要入鳳凰堂參觀，要另外俾錢參加導覽，限時限刻同唔可以攝影錄影~
我哋都有入到，入面有一座巨大佛像同 52 座菩薩像~

巨大佛像係阿彌陀如來坐像，高 277.2 厘米，全木造~
52 座菩薩像為雲中供養菩薩像，各尊像都帶有光圈(光輪)，腳踏飛雲，變幻多姿。菩薩像或是演奏各類樂器、翩翩起舞；或是手持持物、雙手合掌，千姿百態。
(圖片來自官網 Facebook)

行完室外，就到室內嘅博物館風翔館~
內裡展示嘅有梵鐘 1 口、雲中供養菩薩像 26 尊、鳳凰 1 對~
亦有一啲文物如陶器同卷籍~
(博物館內禁止攝影及錄影)

我哋嚟嘅時候係大約下午四點，講光線的話，朝早嚟會好好多~

平等院隨影~

遊覽完平等院就去旅館 check-in 先~
旅館採自助式 check-in，但其實一路都有職員帶住~

Check-in 完就行去食晚餐嘅地點~
今晚去食炸豬扒，但今晚去嘅呢間，只係我第二選擇，我嘅第一選擇係「空蟬亭」~
我通常都好早開始計劃行程，我一早已經計劃好要去空蟬亭食炸豬扒~
知道去食呢間嘢要 book 定位，但有時我覺得太早 book 有啲誇張，同埋我啲行程未係好定~
最後，我喺出發前一個月先記得 book 呢間嘢，我知呢間嘢啲 booking 好搶手，初時覺得一個月前 book 都應該唔太遲，不過到我上佢官網 book 嘅時候，我喺京都嘅咁多日，全部 booking 滿晒......
有啲遺憾，只好安慰自己，我又唔係好識食嘅人，其實可能任何一間出名嘅炸豬扒店，我都覺得好好食同好滿足~
第二選擇嚟講，我有兩間，最後揀咗今晚食呢間~

かつくら四条東洞院店
呢間炸豬扒店，好多香港同台灣人都以名代豬扒嚟稱呼，因為佢喺 google map 上面個名係「名代とんかつかつくら四条東洞院店」

嚟到竟然冇人排隊！一間咁出名嘅炸豬扒店，嚟到可以直入，好意外！
我呢刻感到伏味非常濃......

入座後最先嘅感覺係，服務員態度冷冰，好唔係以前嚟日本嘅感覺~

叫完嘢食，嚟咗碗芝麻，我掛住同屎塔傾偈唔記得磨碎啲芝麻，隔咗一陣，服務員走過嚟問都冇問就收走咗個擂槌......
莫講話喺日本，就算喺香港，咁嘅服務態度都係太差~