我選擇揸車去，去同返都會比較方便。
為咗返嚟時可以用八達通俾停車場費，我刻意在出發前一晚食飯時將八達通增值至 $700( 預算泊車費為 $550)。
去到機場停車場，發現停車場號碼跟過往有所不同，以往露天長泊係 4 號，而家就改為 2 號。
一路跟指示牌行，到咗 2 號停車場，查問咗詳情，入閘攞飛仔，出閘就有兩個選擇，一係用八達通，一係到樓上繳費亭俾咗錢先可以出車。
哈~!我當然暗裡沾沾自喜，因為我早有準備，返嚟唔駛行嚟行去~!
泊咗一個比較近閘口嘅車位，好似一切都好順利咁，其實根本乜事都冇發生過。哈哈~!一個人開心就係咁，睇乜都係咁順心！
由於我哋出發前已經喺網上預辦登機，去到 CX 櫃檯就揀返「已於網上預辦登機」嘅櫃檯辦理餘下手續，好似勝人一籌咁！哈哈~!其實，喺呢個資訊發達嘅世代，淨係你識咩，多數人都識啦！XDDD
屎塔話我知對新鞋鞋踭有啲刮腳，咁就慘啦，去咁多日旅行，點算呢？屎塔提議買鞋踭墊，於是 check-in 完，我哋就搵萬寧屈臣氏之類嘅舖頭。但係個鞋墊實在太貴， 屎塔唔捨得買，我話唔怕啦，佢又話好快習慣，好易適應......
咁我都唔勉強佢嘞，佢有自己嘅主意嘅~
跟住我哋去咗 Burger King 食早餐 ，係我提議嘅，因為出面好似冇得食，我又唔記得自己食過未， 屎塔實話冇所謂......
見時間都差唔多，我哋就起程去入閘口，過程順利。
因為我哋早已在網上辦理登機，機位係自己揀嘅，我哋當然會揀窗口位啦！
放好兩件羽絨，唔計跟身嘢，手上已經冇晒行李。
屎塔話佢最驚起飛同降落嘅一刻，真係喺我意料之外，我自己一向有少少畏高，喺銅鑼灣 Time's Square 上幾層望落中間廣場都會腳軟，但坐飛機又唔係好驚，反觀屎塔，佢一向唔怕高，但就係怕坐飛機，世事真係奇妙~
滿以為可以借打機消磨時間，點知隻飛機冇得打機，咁我唯有聽吓歌睇下新聞咁啦......
過咗一陣，前面兩位人仕以高速將椅背放下，好彩我哋都飲晒我哋果杯嘢，否則......
其實前面放盡椅背，我哋所剩嘅空間真係好少！正所謂「己所不欲，勿施於人」，我同屎塔都只係輕輕將自己嘅椅背稍為放下了一點而已，並沒有將呢份壓逼感以骨牌效應將之傳後~
過咗大約一個鐘，有飛機餐食，我哋一人點一個唔同嘅，可以交換食吓。
呢次嘅飛機餐......
以飛機餐嚟計，都算可以啦，個蛋糕幾好食。
沿途都聽到機艙服務員提醒乘客要將椅背放直，用意好明顯，等後面啲人可以有多啲空間去進食。
但係，那機艙服務員並沒有提示我哋前面兩位乘客將椅背放直，我哋真係冇可能食到個飛機餐......
此時，我前面果位女仕稍為將椅背放直，只係稍為放直了一點點......
我逐示意那服務員，要求前面的兩位乘客將椅背放直。豈料，那服務員似面有難色，我知道所為何事了~
因為屎塔前面的乘客係一個小朋友，而且瞓著咗，那服務員正為進退兩難而感到難做......
但問題係，要不，弄醒那小朋友，要不，屎塔唔駛食......
我認為，你有你瞓嘅權利，我有我食嘅權利，但大前題係唔可以影響到人！
我心理上已準備直接向前面那位女仕提出我嘅要求，就喺呢一刻，那服務員先向我哋道歉，說明那小朋友瞓著咗，不便打擾。
屎塔向那服務員講，其實少少都好，唔駛多......
那服務員先要求那位女仕放直椅背，那位女仕便照做，那服務員再以手勢(板直手掌作一個請的意思)向著小朋友的位置伸一伸，幸好，那位女仕很快就立刻將那小朋友的椅背稍為放直，事件得到決了。
個人認為，有啲嘢係應該自動自覺，顧己及人嘅~
食完飯，屎塔話反正有時間，讀吓書先，我就唔係好贊成嘅，去玩要玩得開心，拋開顧慮嘛，不過玩還玩，又真係唔可以唔理考試，好啦，佢自己揸主意啦......
哈哈，結果，筆記是攤開了，人卻是睡著了。XDDD
好辛苦先捱到落機，嘩！雪呀！！！機外面落雪呀！！！我未見過落雪咖！！！
(我同屎塔一樣，成地雪就見過，落雪就真係第一次見......)
我同屎塔都好興奮，同機嘅人都一樣咁興奮，但係冇理由個個都係第一次見雪卦！？@@
落機攞行李過關，一切順利冇問題。
好嘞，真係開始自遊行，心情難免緊張，要知道所有交通資料只有我知道，如果連我都搞唔掂，都唔知點算！@@
第一件事，走去賣車飛的地方問一問先。問完，佢話唔關佢事，佢度冇得賣，跟住指咗我去第二度，正當我想循住佢所講嘅方向去，發現就喺佢隔離有地方可以買到車票嘅！
小姐，點解你要指我去第二度呀？唔通呢啲就係文化差異？
咁我又走過去隔離問吓啦，好嘢，真係可以喺佢度買車飛往難波(往酒店的其中一程)，我乘搭嘅係南海電鐵(南海空港線急行)。果位小姐同我哋講，下一班車六分鐘後開出，問我哋有冇問題......
我正想問佢再下一班車係幾點，屎塔就搶答問佢車站喺邊，果位小姐話喺二樓，屎塔即刻話冇問題......@@
吓？？？冇問題？既然係咁，博一博啦，果位小姐都好快手就將兩張飛交到我手，成惠 1390 日元一個， 我俾完錢就嗱嗱聲走人！
(一張係乘車劵，一張係特急劵，點解唔可以一張過？好難明......)
我哋本身喺一樓，即係要上一層，我就的住十五公斤嘅篋往上跑，上到去，有兩條路，但冇指示嘅，死啦，點算！求其見到個男人就拉住佢問，俾張飛佢睇，佢睇咗一陣指一指講：「呢邊。」佢講嘅係純正廣東話！XDDD
我哋唔該咗佢之後就向住佢所指嘅方向衝落去，要搭扶手電梯落一層，途中只見右邊有架列車，聽到剛才個男人講：「左邊果架就啱咖喇。」
左邊？左邊有車咩？望真啲，真係有喎！我哋實在太急趕，月台有少少暗，右邊架列車係白色嘅，左邊架列車係深紫藍色，再加上左上右落，扶手電梯係靠左邊，左邊視野自然較難睇得清楚。
好，一條氣衝向列車，上咗車，因為係指定席，所以要搵下邊個位先啱。一坐低，列車車門就閂，真係好好彩趕得切！@@
本來諗住喺機場買定其他長途指定席車飛，不過冇時間，唯有將計劃改一改。
到咗難波之後，要轉地鐵，但係，到咗之後完全唔知要點做，唯有問吓啲職員......
原來好簡單，只需到南海電鐵嘅出閘口出閘，再行去地鐵買飛入閘，就係咁簡單，好似以前九龍塘地鐵站轉去九龍塘火車站咁。XDDD
咁合邏輯嘅事情，我哋竟然唔知點做，諗返轉頭都真係好好笑！哈哈~！
到咗地鐵站，因為好多人，我叫屎塔企埋一邊，我去買飛。
我行到埋去，睇下點買，睇咗一陣，唔識買，又裝下人哋，佢哋個個幾秒鐘就買到，我完全睇唔到點買......
再研究多兩次，都係唔識......
咁我返去搵屎塔，我同佢講，我唔識買，我要搵職員問吓......
屎塔話等佢去睇吓，隔咗一陣，佢揸住兩張飛返嚟，仲好得戚咁款！
原來佢都唔識買，佢用身體語言叫後面個位女仕教佢買。哈哈~！呢種身體語言，屎塔稱之為「跳舞」，唔知隻舞老唔老嘅呢？=P
地鐵由難波站去到心齋橋站，成惠 200 日元一個。
初時都有少少擔心出咗地鐵站唔識搵 Nikko Osaka，點知，地鐵站上蓋已經係。酒店 Official website 話要行兩分鐘，其實直接寫邊個出口咪得囉，因為直情有個出口係 Nikko Osaka。
間酒店冇乜特別，幾好。
好嘞，終於可以放低個篋，係時候出街玩 lu~！
由於本旅遊書有一定重量同 size，我哋索性問酒店攞啲簡單嘅地圖，唔駛成日將本書拎出拎入。佢俾咗張 A4 咁大嘅紙我哋，夠用有凸，正！
終於可以感受吓日本嘅冬天，我哋一件 T-shirt 一件普通外套，OK 喎！
(開心得太早，出咗街一段時間，兩條粉腸凍到呢......)
我哋搵路行去心齋橋，一路行，一路俾人問：「你唔認得路咩？又話去過嘅？」
我：「er......你知我啲記性咖啦~@@」
直至行到固力菓大招牌，到喇~！
第一件事搵金龍拉麵食，其實呢間嘢只得普通拉麵同叉燒拉麵揀~XDDD
我哋揀咗普通啦麵(都有三塊叉燒)，一碗 share 食，留返個肚食其他嘢。
一貫水準啦，絕對好食過香港食到嘅拉麵。
(咁我都知唔可以咁比較嘅......)
食完麵，當然係周圍行啦，但因為只得一晚留喺大阪，心齋橋成為主要重點必到地方，而比較近啲又冇咁早閂門嘅，只有梅田區。
喺心齋橋，有三處必影嘅(我都唔知點解@@)，第一張已經 post 過，就係勁大霓虹廣告版固力菓，跟住就係......
好嘞，一場嚟到心齋橋，墨魚小丸子當然係必食項目啦！
好好食！！！
行完心齋橋，就搭地鐵由難波過梅田，成惠 230 日元一個。
(心齋橋嘅購物區，好近難波地鐵站，反而離心齋橋站幾遠。)
去到梅田，第一件事搵大阪 JR，因為第二日要搭，所以去視察吓環境先。
(梅田地鐵同大阪 JR 非常相近，可以話係連接嘅。)
去到大阪 JR，見到綠色窗口(即 Ticket Office)，立即走入去買車飛同問吓去環球影城嘅直通車情況。
成功買到後幾日要乘搭嘅長途 JR 指定席車飛，成個心都定晒！(搭唔到計劃中要搭嘅班次，將會極之麻煩！)
可能夜咗嘅關係，梅田其實冇乜嘢行，只淨商場未閂，其實我哋都好想行商場，唔係因為個商場好吸引，係因為我哋......好 Q 凍~@@
(過梅田主要為咗到 JR，行街？行唔到冇乜所謂，一啲都唔覺損失。)
諗住去到梅田再搵嘢食，點知乜鬼都冇得食，咁唯有淨行商場啦！
佢哋啲商場大到呢，真係可以行一整日！不過我哋都唔係鍾意 shopping 嘅人，去旅行係想開吓自己眼界，同實地踏足過異國嘅地方。
(當然，大把錢的話，我好可能會愛上 shopping~XDDD)
行完就搭地鐵返心齋橋(難波站落車，一樣都係 230 日元一個)搵嘢食，我哋都想搵吓地道嘅迴転壽司。(我習慣讀成回魂~=P)
其實當地唔多呢類壽司店，有嘅都閂咗門，佢哋真係好鬼早收工......
最後搵到一間，佢聲稱自己係迴転壽司嘅始祖，佢就係元祿壽司嘞！哈哈~！
全部 130 日元，即係大約 $9.5，仲可以點海膽！正呀！質素唔錯，絕對新鮮好食。
食完就棄地鐵，選擇步行返酒店。
每日點滴：
第一日行程，好成功，我哋做嘅功課完全用得著，亦都跟足流程，好開心，好有滿足感！
出發前仲笑言每日要影 200 張先影得爆張卡，以為實唔會，結果今日都影咗 1xx 張~@@
喺心齋橋，聽到好多人講廣東話......@@
雪，只有隔住玻璃見到，始終未感受過，唔知今次旅程有冇機會呢？
沒有留言:
發佈留言