溫泉蛋聽就聽得多，食我真係未食過。呢個早餐有提供，咁我就試吓啦。麻麻地姐，仲有啲抗拒添......
好嘞，食完早餐，就拎埋啲行李向環球影城出發！
今日預計要開門(1000)前到達，1600 走人(樂園閂 1700)，都有六個鐘玩。
我哋先搭地鐵到梅田站，再到大阪 JR 轉乘 JR 往環球影城站。之前上網睇過有直通車由大阪站到環球影城站 ，仲要係全車拉花嘅，但點搵都搵唔到更深入嘅資料 ，所以我哋第一站係大阪 JR 嘅 Ticket Office！
問好晒幾點嘅車同咩月台係往環球影城嘅列車，我哋就入閘搵月台。 (成惠 170 日元一個)
去到月台，見到部列車往櫻島嘅(去櫻島嘅車一定經環球影城站)，又見時間差唔多，但我哋都好猶豫，因為部列車冇拉花......
好，我搵咗咁多資料，要對自己有信心！上車！！！
上到車，我不停留意經過嘅站，到最後，我肯定呢班車係啱嘅 ，先放心啲，好刺激~@@
放心後先有心情留意吓四圍嘅嘢，我發現有唔少人都係去環球影城嘅 ，因為佢哋手上都睇緊啲小冊子......
出發前，諗住星期一，好放心唔會太多人，嚟到呢刻開始有啲擔心。
沿途見到幾部對頭列車都係公仔拉花，我深深不忿，就算冇份坐都要有份影！
我同屎塔講，我相信我哋坐早咗一班，不如到站落車後等一陣 ，起碼影張相吖......
意料之中，屎塔實話好~ =P
我哋落車後就企喺車尾，等下一班車到。
下一班車嚟喇，真係拉花車！好，我舉起相機準備，屎塔亦都準備好，萬事俱備，只欠列車！
佢埋站喇......咦，點解唔停嘅？@@？
原來佢唔係唔停，只係呢架車好短，停得前啲姐......
我同屎塔笑到收唔到聲！XDDD
笑完一輪，走上前影相，好彩架車未走。
去到 JR 環球影城站，第一件事要搵 locker 放行李，左搵右搵，都搵唔到，一問之下，原來俾條大柱遮住咗......
好啦，搵個空 locker 先......
竟然冇晒大嘅空 locker！點算呢？我再行多個圈，都係冇......
就喺我哋絕望之際，救星到！我哋周圍望，望到似係寄存行李嘅地方，即刻走過去問吓，真係得！正！
佢話 300 日元有交易，我直情唔信呀，locker 都 500 日元啦！
我再問清楚啲，300 日元係一日定係一個鐘？但由於溝通上出現咗少少問題，我只能夠估計係 300 日元一日。
反正就算 300 日元一個鐘我都要俾咖啦，唔通拉住個喼入場咩......@@
唔理喇，玩完先算！
0920 去到門口，己經覺得有啲唔妥，因為實在太多人......
我隨即發現，咦，多咗新嘢玩喎！多咗個睇嚟幾好玩嘅過山車！我一向都好鍾意玩過山車，幾高我都唔怕！
不過咁，肯定有排排......
好啦，埋去買飛，原價 5800 日元，我有九折劵(香港旅行社俾嘅)，成惠 5200 日元，好 & 很貴！@@
買完飛就排隊等開門，眼見多數都係日本人，日本人排隊好有秩序，我完全唔擔心一有空位就會俾人打尖，我又唔係特別崇日嘅 ，但無可否認，日本俾我感覺非常好。歷史嘅包袱......算把啦......
不過，有樣嘢有啲失望，Jurassic Park 18/2 開始要暫停一段時間，我哋立即諗吓即係幾時，原來就係今日！@@
未夠 1000 就開始俾人入場，就到閘口時，屎塔話見到有人搜隨身嘅袋，我哋都好擔心，因為...因為...因為...我哋個袋有支水！(好多樂園都唔俾帶飲同食嘅嘢入場)
不過佢哋又唔係個個查嘅，博一博囉，最多搜到咪唔要支水，都冇咩大不了嘅~
過閘前，又見到有啲人會被要求用一個盒狀物，裡面有多塊鏡子嘅嘢照一照，都唔知乜嘢嚟，個職員講嘢又鬼咁快(其實講得慢都係唔識聽...XDDD)，我哋求神拜佛過閘時唔駛搜唔駛照呀......
過閘喇！好好彩一切順利！
一過閘，就俾個女仔截住！原來係做問卷調查，其實咁多人入場，我哋都趕趕地，不過又唔好意思推，算啦，我估都唔會好耐嘅 。問問問，都問咗好多頁，都係問點知有呢個樂園，我哋係邊度人，嚟過幾多次，到過日本幾多次，到過邊度......等等問題，做完份問卷，都唔知佢喺邊度(好似屁股XDDD )拎咗份禮物出嚟，話多謝我哋喎，匆匆收埋落袋就走人，冇睇係咩。
呢個樂園，主要分三部份：機動遊戲、純 3D 電影、真人 Show。眼見入場人數都幾多，我哋決定主力玩機動遊戲，依地圖嘅次序，一路行(其實都唔係咁易睇)，去到條橫街，見到好多人排隊，走埋去睇吓啦，原來係玩 E.T.外星人！咁經典嘅項目，我哋又豈能錯過呢？即刻走過去排隊，點知，我哋所見嘅，係入口嘅另一邊，我哋只好兜返去前面入口排啦。入口掛咗個牌，寫住要等 30 分鐘。嘩！一開波就咁多人！@@
冇計啦，都係要等......
等等吓，見到有啲人 show 一 show 手上一張好細嘅飛，就可以排第二條隊，正確嚟講，係唔駛排隊，可以直接走到最前。
點解可以咁呢？原來佢哋買嘅係「環球快速」飛！我完全唔知有咁嘅飛，否則我都會買呢種，一場嚟到，駛多少少冇所謂，好過想玩嘅玩唔到 。
排隊途中，見到出面落雪呀！！！點解？點解落親雪我哋都喺有頂嘅地方？點解呀！唉......
佢哋啲時間都預得幾準嘅，半個鐘多少少啦，就輪到我哋，遲咗主要因為俾快速飛果班人「尖」咗。
究竟係玩乜咖呢？其實我玩過咖喇，不過真係一啲印象都冇，又俾人問我有冇搞錯......@@
終於等到入場，入面係一個樹林設計嘅地方，間中有啲會郁嘅 E.T. 公仔，但唔知佢噏乜 Q。
行行吓，前面有一班人，原來排緊隊。裡面係唔俾影相嘅，真係好可惜......
排排吓有個閘口，過咗閘口有個 counter，佢問我叫咩名，我噏咗俾佢聽，佢就襟電腦，跟住俾咗張信用卡大小同物料嘅卡我，話係 passport(日本乜鬼都叫 passport......)，同樣地，屎塔都攞咗一張，都唔知有乜用。
過咗 counter，又係排隊，原來係玩遊覽車，車係一架大型單車，一車可坐八人，二三三嘅排列方式，我哋被編排坐中間，同時又收返張卡，真係無聊到爆！
單車係採用懸掛方式，所以會有少少搖。其實都冇乜特別，周圍都係講緊我哋坐住架單車逃走，不停咁喺啲警車上方擦過，用聲效營做單車僅僅擦過警車頂嘅效果，仲有急速轉彎以避過障礙物 。
再講述部單車越踩越高，最後去到 E.T. 外星人嘅家鄉，有好多鄉親父老同小朋友。
其實呢個都有少少悶，不過咁經典嘅電影，值得回味一番嘅~
好嘞，跟住玩咩好呢？我哋嘅目標有三個：過山車(喺右邊) 、蜘蛛俠(喺左前方)、回到未來(喺蜘蛛俠後方)
為咗一定要玩到過山車，所以我哋就過去排過山車先。
部過山車叫 Hollywood Dream The Ride，勁多人排隊，排到過晒屬於過山車範圍嘅區域，咁都冇計啦，埋去排隊，門口寫住要排 55 分鐘，咦，OK 喎！就喺門口隔離有排 locker，咁我估計跟身嘢都要放低入 locker 先，所以就去放嘢，屎塔就排隊。
Locker 設計係要入錢但可以 refund 嘅，放好之後就返返去搵屎塔，佢仲未排到門口。
好嘞，去到門口(只係過山車範圍嘅大門口)，有位小姐指住我哋部相機耍手，我哋以為唔可以手拎住，屎塔就將之放入褸袋，打算拉好拉鍊之際，果位小姐即刻用鐵鍊打橫扣起並作出交叉手勢禁止我哋進入，原來放落袋都唔得，其實都可以理解嘅......
咁我唯有將部相機放埋落 locker 啦，出到嚟已經唔見咗屎塔，佢已經排咗入去~
我去搵返果位小姐，佢當然可以俾我入去，但要經過三條排隊線 ，場面實在尷尬，唔知情嘅人，會唔會以為我打尖呢？唔理得咁多啦......
入到門口，根本見唔到龍頭，一路排，至少過咗半個鐘，都仲未見到龍頭......
再過多一段時間，經過唔知幾多個蛇餅，終於到我哋，排隊時間超過一個鐘，其間見到好多手持快速飛嘅人一入嚟就有得玩，真係好恨點解我買嘅唔係快速飛！！！
好嘞，一坐上去，我哋坐最後，車未加速，心跳已經加速......
郁喇郁喇......
屎塔由開波嗌到落車咁滯......@@
中間仲有段時間嗌嗌吓冇咗聲(事後佢話我知嗌到冇氣~XDDD) 。其實我都唔知其他人有冇嗌，因為我只係聽到屎塔把聲......@@
玩完返落嚟，腳步浮浮，實在太刺激喇，絕對係我玩過最刺激嘅過山車！勁好玩！
屎塔話，叫佢玩多次都唔掂~XDDD
其實相就睇唔到啲咩嘅......
我哋決定唔好嘥時間食嘢，繼續去玩下一個項目。
下個項目係蜘蛛俠，一樣啦，我都係唔記得玩咩咖喇~@@
嘩！要等 100 分鐘......@@
都要等咖啦，唉，嘥晒啲時間~
等等等，真係擔心連回到未來都玩唔到......
兜咗好多好多個蛇餅，入到室內，我哋好好彩，打咗十幾人尖，點解呢？因為準備開果部車淨返兩個位，前面全部組合都唔止兩個人，正！
玩蜘蛛俠要戴3D眼鏡，究竟玩咩呢？原來係坐上車，部車可以坐九人，三三三咁排列，部車會配合播放緊嘅360度 3D 畫面，營造到部車真係郁緊咁。
故事講述好多壞人要襲擊部車，但每次喺千鈞一髮之際，蜘蛛俠都會出手營救！
由大樓頂跌落地，又或者喺地下俾人拋高，上下左右不停搖，雖然部車唔係真係飛嚟飛去，但個感覺做得好好，真係好似直墮十幾層樓咁，有水嘅時候真係有噴水，有火嘅時候又真係有熱力，幾值得玩。
玩完嗱嗱聲走去回到未來果度睇吓要等幾耐......
要等 80 分鐘！
計吓數，都 OK 喎！玩埋呢個仲有少少時間四圍行吓！
我由細到大記性都唔好，唔只係唔好，直情係差！
自然，都唔會記得回到未來係玩乜鬼嘅......
排排排，真係排到腰骨都痛，成日嘅時間排隊多過玩，唉......
不過啲日本人耐性真係好，排咁耐都冇俾我哋見過唔耐煩嘅一面，大家都好守秩序，完全冇怨氣~
好嘞，到我哋喇，玩嘅同蜘蛛俠差唔多，都係坐車，部車可以坐八人 ，四四咁排嘅。
不過就唔駛戴 3D 眼鏡，呢個遊戲比蜘蛛俠稍為遜色，既冇3D，走在熔岩上連一點熱力都冇。
但就有啲涼意，因為講佢穿越時空時嘅高速感，我哋坐後排，前排果個食晒啲冷霧，肯定好 & 很凍！XDDD
佢比蜘蛛俠強嘅地方，係搖得好勁，玩完我哋都有啲頭暈......
不過不失，始終係超級經典嘢，值得玩吓嘅~
玩完出嚟，比預計時間遲咗，已經係 1555，但預計 1600 要離開......@@
其實玩之前已經諗住 1615 先走，但冇諗到玩埋回到未來會去到成 1555 咁晏，唯有加快腳步周圍行吓啦~
好唔好彩，屎塔對鞋仲未著得夠鬆，搞到佢鬼咁痛，唯有就住行啦~
最後搞到遲晒，成 1630 先去到 JR 站，好彩我預時間預得鬆，一切順利的話，1630 先離開係冇問題嘅。
好嘞，緊張時刻到喇！究竟寄存行李 300 日元係一日定一個鐘呢？
好彩！係 300 日元一日！攞返行李就嗱嗱聲到綠色窗口買車飛。
其實只係搭幾個站，亦唔係咩指定席，喺售票機買都得，但係我仲未識買 JR 嘅車飛！@@
唔理啦，反正可以搵佢哋幫手~
我哋今次係要由環球影城搭 JR 到新今宮(都係成惠 170 日元一個)，再轉南海電鐵到關西機場。
由環球影城到新今宮，係要經過西九条站再轉車嘅，我哋到咗西九条站就落車過對面月台搭環狀線到新今宮站。
我喺車入面睇佢展示嘅地圖，確定列車方向係啱嘅，就好安心咁坐落去，去到今宮站，我哋都好猶豫，明明係新今宮，點解個站名係今宮？
唔理喇，落咗車先算！點知，一落車，睇到個站嘅燈廂係咁嘅......
唉，下個站先係新今宮呀......
咁我哋唯有等下班車再上啦，但係時間就由剛好夠變成好趕，甚至一定會遲添......
不過咁，我哋搭 1915 內陸機，一個鐘頭前 check-in，我相信內陸機遲少少係冇問題嘅。
睇吓指示牌，下一班車嚟緊喇！妖，班車唔停呢個站嘅，只係經過！
又等下一班車，都係飛站嘅，真係急鬼死人！！！錯過咗班內陸機我都唔知點算！！！
好嘞，第三班車係停站並且會到新今宮嘅，咁我哋就上車啦。
計吓時間，好趕吓，但都應該冇問題嘅。
順利喺新今宮落車，由於太急嘅關係，出咗 JR 閘之後，我走到 JR counter 買南海電鐵嘅車飛~XDDD
個職員指返我過對面買飛，咁我就照做啦，啍！遇到個唔係好熱心嘅職員，我同佢講我要買飛到關西機場，佢指一指部售票機，我頂你咩，我識買駛鬼同你買咩！
我同佢講我唔識買，咁佢就唔係好願咁教我買啦，最後買到嘞，但我要搭嘅係空急(即係到關西機場嘅直通特急列車)列車，你教我買區急列車嘅車飛梗係唔得啦！(買咗先知係區急......)咁我就問佢，嚟緊呢班區急列車開幾點同幾點到，佢話開 1727，1815 會到。
1815 正係我要 check-in 嘅最遲時間，但我相信遲少少冇問題，都 OK 喎！(成惠 890 日元一個)
咁算啦，當時都成 1708，唔想同佢糾纏落去，拎行李走人~
落到月台等車時，睇吓啲時間表，睇吓有冇空急列車會早啲開或到，有的話可以補錢換空急飛。
跟住俾我發現咗樣嘢......
1727 嘅區急列車係往和歌山港嘅！大鑊！！！我明明寫得好清楚要去關西機場，搞乜呀？？？@@
就喺呢個時候，見到月台有個票務處，你唔好彩喇，準備同我雞同鴨講啦！@@
又寫又講又指吓指吓，都係未能完全溝通到，佢走出崗位，去到個時間表同路線圖度係咁指，我明喇，佢叫我喺泉佐野(到和歌山港會經嘅一個站)度轉車到關西機場！
(由於出發前一心諗住搭空急列車，完全冇諗過要轉車，再加上本身時間充裕，以一個鐘頭有幾班空急列車，相信一定搵到班合適嘅空急列車搭。)
好，區急車要轉車，但可以 1815 到，咁空急呢？有冇空急車啱呢？呢一刻，俾多一倍錢完全唔係問題，最緊要快！
我又走過去問果位職員，下一班空急車係幾時，佢話 1738 開車，1824 到。
咁冇得揀啦，轉車就轉車啦......
1727 前都有幾班車埋站，呢位職員好照顧我哋，不停示意叫我哋唔到上，仲好好笑容，好多謝佢。
到咗 1727 班車，我都知道係啱咖喇，果位職員立即示意可以上車，臨上車前又同我講拜拜，真係同下面果位差天共地！
跟住順利到泉佐野轉車到關西機場。
去到機場，就搵 check-in counter，JL JL，JL 即係咩航空公司呢？@@
我同屎塔都係估 JAL，所以我哋就走埋去問，果時都成 1822。
真係 JAL，我哋就排隊 check-in，大約有十多人排緊，其間空姐問有冇 JL XXXX(不是我們那班) 班機嘅乘客喺度，我哋都好心急，好想問吓佢，咁我哋呢，我哋趕唔趕，駛唔駛打尖 check-in 先？
後來先知道，佢哋問緊果班機開 1830，嘩，果時係 1824，真係有人咁遲先到，我哋完全唔需要擔心嘞~XDDD
Check-in 後，第一件事，梗係搵嘢食啦！早餐後都未食過嘢，又趕又肚餓，仲要的住十五公斤係咁走，好慘呀！
Check-in 後都唔係剩好多時間，只好食啲快嘢，我哋揀咗時間同品質都有保証嘅麥記！
食品方面同香港有啲出入，我哋揀咗 McWrap，McWrap 有兩款，我哋一人揀一款，梗係交換食啦！
McWrap 係一塊薄餅包住生菜同沙律汁，一款中間係雞肉，一款中間係蝦同唔知乜肉，不過不失，冇期望亦冇失望。
內陸機係冇飛機餐嘅，只有飲料同糖果。
準時九點鬆啲就到達札幌新千歲機場，我到咗北海道喇！！！
今次出面冇落雪，我裝吓啲地勤人員著咩衫，究竟北海度有幾凍呢？
內陸機過關冇咩搞，攞行李過海關就搞掂。不過有樣唔同嘅係，過海關要俾返寄行李嘅 receipt label 佢。
我哋出到機場大堂，不停留意啲人著咩衫，點解個個都咁單簿嘅？@@
北海道嘅冬天唔係好凍咖咩？零度喎！啲人係咪癲咖 ？唔通入面著咗十件防寒？@@
其實我哋一直都好擔心件羽絨同雪褲唔夠暖......
一件咁嘅 McWrap，又點可以當正餐吖。於是我哋諗住喺新千歲機場搵吓嘢食。
點知，好多都閂咗門，有一間未閂嘅又好鬼貴，我哋又未去到唔即刻食嘢會暈嘅地步，我醒起酒店附近有啲嘢食嘅，仲開到半夜嘅，於是我哋決定返酒店放低行李再出去食嘢。
我哋要坐 JR 到札幌站再轉乘地鐵先可以到酒店。仲記得我係唔識買 JR 車飛嗎？所以我要搵綠色窗口買飛。點知，連綠色窗口都閂埋！@@
屎塔提議到 JR 閘前睇睇，都啱嘅，於是我哋就跟住指示去到 JR 月台閘前，見到 JR counter！好嘢！！！
買完飛就入閘(成惠 1040 日元一個)，2130 部車已經到咗，只係等夠鐘開車。
由於只係普通嘅 JR 快速列車，並非指定席列車，上到車搵唔到連位，只好分前後坐。
坐好後，我再由頭走到尾，幾卡車都冇連位，冇計啦~
再坐好後，發覺身體好似著火咁！梗係啦，車內廿幾度，我哋又外套又羽絨又頸巾......@@
即刻除晒佢啦，但係個位又細，又要拎住件外套同羽絨，都真係好麻煩。
眼見窗外滿地都係雪，我哋都好興奮同覺得好靚。
(上次到日本，只見地下有少少雪，今次係一望無際嘅雪地~)
開車後一段時間，玻璃變得好模糊，相信係車內同車外溫差太大所致，心情有啲緊張，心中再次出現同樣問題，究竟北海度嘅冬天有幾凍呢？
終於捱到落車(真係好熱@@)，落車後要轉地鐵。初時睇地圖，見到都有一段距離，以為一定要上地面。點知係唔需要嘅，JR 至地鐵站係一個地下城，大約行五分鐘就到。今次搭地鐵買飛，售票機同喺大阪嘅系統一樣，所以完全冇問題。
到站後，都要喺地鐵範圍行一段幾長嘅路，終於上地面喇，嘩！成地都係雪呀，個感好正，直情想喺條街度跑一個圈！
咪住先......咁個喼呢......最後當然冇跑到......
一出地鐵已經到酒店，發覺間酒店麻麻地，不過算啦，一分錢一分貨，係咁上下。Check-in 後，梗係搵嘢食啦！一樣啦，都係問佢攞咗一張紙嘅地圖，我哋去咗好多遊客都會去嘅拉麵橫丁。
本來以為係成條街咁嘅，點知原來只係一個唔起眼嘅商場入口，而呢個所謂商場，只得幾間拉麵店，我哋一落到去，又見到始祖兩個字，又係第一間，所以就揀咗第一間。
一人叫咗一碗，嘩，好味到唔識形容！那管只係一粒粟米，都好食過人！個麵啦，同湯底，真係好好味，好好食呀！！！
食完發現附近都冇咩好行，於是我哋就返酒店。回程途中，因為冇著雪褲嘅關係，對腳都幾凍......
每日點滴：
冇買到環球快速飛，係今日一個遺憾，不過都好好彩，最想玩嘅都玩得晒先走~
Jurassic Park 要暫停，有好有唔好，唔好嘅當然係冇得玩，好嘅，就係唔駛決定玩少邊樣，因為實在冇咁多時間......
其實就算唔計排隊，一日時間係玩唔晒所有嘢嘅，所以佢有兩日票，但我就好懷疑會唔會有人(我指非本地人)咁有心玩足兩日！@@
最後睇返份禮物，係一支好普通印有環球影城幾隻字嘅原子筆。
今日落錯站，又趕飛機，好彩有驚無險。
親眼見到一望無際嘅雪景，好開心！
不過今日仲未感受到落雪......
沒有留言:
發佈留言