初時諗住跟團，因為對日本自遊行實在冇咩信心。睇完資料，發現啱心水嘅團真係好少。屎塔話想試下自駕遊，所以我哋就開始研究下自遊行。
開始時，真係唔知從何入手，有一日，屎塔去買咗本書睇，講冬季北海道自遊行嘅，快速揭吓，好似幾好咁，信心開始多返啲。
屎塔好努力咁睇，我見佢張 post-it 紙越放越後，就知道佢已經睇咗好多。後期，啲 post-it 紙仲越嚟越多，我相信，佢心中已經有一個大概。
早期我工作比較忙，再加上有啲懶，幾乎全部早期工作都係屎塔做嘅，真係好多謝佢。
因為來回都冇直航機機位往來北海道，所以要到大阪或東京轉乘內陸機。
屎塔未去過大阪，又同我講話好想去環球影城，於是，我決定去程先往大阪，遊一吓環球影城。佢又話，佢去過東京，但未去過 HelloKittyLand，於是，我又決定回程時往東京。
本來七日六夜之旅，因頭尾冇咗兩晚，所以將行程改為八日七夜，呢個係旅行社個 package 可以提供嘅極限，再多就只可散計，會貴好多。基於金錢同假期都有限，我哋就決定去八日七夜。
頭尾已決定住邊區，中間呢？屎塔好叻，佢一邊研究，一邊上網搜集資料，我只係將佢所搜集嘅資料上面加點意見，其實我都冇做過啲咩，成個殼都係屎塔計劃嘅，我真係好多謝佢。
經過多番改變及爭扎，旅程已經有個雛型，以下係七晚酒店區嘅順序：
大阪 → 札幌 → 小樽 → 札幌 → 登別 → 函館 → 東京
(為咗過一過駕駛癮，同埋怕大雪關係，刻意安排路程較短的回頭路，即札幌 → 小樽 → 札幌。)
酒店如下：
17/2 ~ 18/2 大阪 Osaka Nikko Hotel
18/2 ~ 19/2 札幌 Susukino Green No.1
19/2 ~ 20/2 小樽 宏樂園
20/2 ~ 21/2 札幌 Susukino Green No.1
21/2 ~ 22/2 登別 万世閣
22/2 ~ 23/2 函館 Harbour View
23/2 ~ 24/2 新宿 Sunlite
由於東京果日好趕，但機位又爆，旅行社會幫我安排落較晚航班的 waiting list，可惜，最後都係冇位要搭較早的航班，呢度係有啲失望。
航班如下：
17/2 CX 506 1020 → 1440
香港機場 → 關西機場
18/2 JL 2519 1915 → 2105
關西機場 → 新千歲機場
23/2 JL 1168 1530 → 1655
函館機場 → 羽田機場
24/2 CX 521 1620 → 2045
成田機場 → 香港機場
至於細節，已經有高人俾咗意見，嚟到呢度，我哋嘅信心都大增咗。不過我同屎塔各有各忙，我忙工作，佢除咗忙工作，仲為咗應付考試而分身不暇，有好一段短時間，進度好慢。
臨新年假前，我哋日日放工都去買需要嘅用品，包括羽絨、雪褲、手套、厚襪、頸巾、帽......等等。佢仲為此而忘記咗上烹飪堂。
我開始抽時間搜集資料，將所有未計劃好嘅事一一完成。
由於屎塔要應付考試，我唯有自己計劃，定期將個進度俾佢睇，睇下佢有冇啲咩意見，或者睇下我個計劃裡頭有冇啲咩問題。
我首先記下每個地方有啲咩地點係想去嘅，再計劃時間分配，包括每個地點的營業時間(好影響遊玩的次序)、需要逗留嘅時間，點與點之間的交通時間。
有咗一個大概，再研究交通問題。最麻煩就係呢樣，好頭痛，就得呢樣又就唔到果樣，又唔識點轉車，又怕唔知咩站落車。不停上網搵資料，用咗好多好多時間同心機！好彩，最後都一一完成。日本嘅鐵路網非常完善，分公營同私營，但以我第一次日本自遊行，實在覺得好亂，令我好擔心，但我深信做足功課同到時問吓人，應該冇咩問題！
我開始用 Excel 做好一個又一個表，包括：
流程表
交通表
主要嘅電話、地址同網頁表
GPS 表
航班同酒店表
每日需要注意嘅事項表
中日對照表
已知嘅固定支出表
所有需要向服務員購買車票或門票的日式漢字表
優惠劵的圖樣表
完成後，就上網買旅遊保險、租車、登記成為 Asia Miles 會員(可以在網上預辦登機)。
跟住我哋一齊再到運輸署辦理國際駕駛執照，好快就搞掂，大約五分鐘(唔計排隊)！
由於屎塔冇篋嘅關係，我哋將兩個人嘅行李放埋一齊，用一個篋，有成十五公斤......@@！
兌換咗 151000 日元，兌換率係 0.0727，好貴！
後來怕唔夠，再兌換多 27000 日元，兌換率係 0.0728，仲貴！
後來知道有間嘢叫做「大黑屋」，買 HelloKittyLand 門票會平啲，於是又記低佢，同時，我亦喺 HelloKittyLand 嘅官方網 download 咗優惠劵，以備不時之需。
問同事借咗張 4GB Card，我哋計過，每日要影 200 張先至影得晒！=P
機票 + 酒店 + 各項稅款，$9678 一個人
一切準備好嘞，出發！！！
沒有留言:
發佈留言