Rothenburg (羅騰堡)
Altstadt (舊城區)
Mittelalterliches Kriminalmuseum (中世紀犯罪博物館)
Town Square (市廣場)
Rathaus (市政廳)
Burggarten (城堡花園)
Stuttgart (斯圖加特)
Porsche Museum (保時捷博物館)
Schweine Museum (豬博物館)
Stadtbibliothek Stuttgart (圖書館)
今日早餐旅館包埋，典型西式早餐，都幾豐富~
今日第一站「Rothenburg (羅騰堡)」
遊覽 Rothenburg，最主要都係行佢嘅舊城區，而當中有 Mittelalterliches Kriminalmuseum (中世紀犯罪博物館)、Town Square (市廣場)、Rathaus (市政廳)、Burggarten (城堡花園)等等地方值得一遊~
其他嘅出入口 (gate) 就唔打算有目標咁逐一參觀，行到邊就睇到邊吧~
去 Rothenburg 呢程冇乜車，趁有段大直路，就試吓部車同埋自己喺可控範圍去到幾多~
部車去到 190km/h 時已經上得好慢，過咗 195 km/h 更加係一下 1km/h 一下 1km/h 咁逐下上~
最後去到 205km/h 出警告，大意係條胎最高只可以承受 210km/h~
去到呢度我都唔敢再去，亦唔打算維持喺 205km/h 呢個速度繼續行，試過就算~
其實部車過咗 190km/h，已經開始覺得幾飄，已經去到可控邊緣，如果唔係大直路，那怕只係微彎，我早就收油了~
之後我保持住 190km/h 咁行，覺得可以用呢個速度在大直路時肆意飛馳都可以接受，唔會覺得飄~
(後記：德國嘅高速公路唔係全時間都無限速，有啲路係有限速嘅，返到香港，收到租車公司電郵俾我嘅信，話我超速 14 公里，當局罰我 €20，身在香港，要交呢個罰款，一係電匯，一係搵個當地人搞，最後搵咗個當地人搞，而租車公司會另收 €25 手續費，喺我信用卡扣，加埋總共 €45，不過以罰 €20 嚟講，真係算平！)
到咗 Rothenburg，去到南邊入口，睇吓邊度可以泊車~
我見近入口嘅路邊泊咗好多車，亦唔見車頭有紙仔，於是就跟人泊~
泊好之後，都係唔放心，諗住搵個人問吓，不過附近真係冇乜人，好難先見到兩個人~
第一個唔理我，第二個話應該可以......
其實德國呢度係咪真係咁難分啲車位泊唔泊得呢？已經唔係第一次有人唔肯定咁答我應該可以......
是旦啦，個個都咁泊，當可以啦！
行行吓見到有個大停車場，望兩望又見唔到票機，似乎係免費停車場喎，咁梗係泊呢邊啦！
於是我又行返轉頭揸車過嚟泊~
泊好車就行入去 Altstadt (舊城區)~
入到入面，真係好有中世紀色彩，而且保存得好好，如果冇咗現代嘅汽車，感覺應該更好~
行到嚟一個叫 Plönlein 嘅地方~
喺呢度附近，有間舖頭售賣嘅貨品好吸引~
嚟德國幾日，有種食品間中都見到，都幾有興趣試，就喺呢度又見到，一於試吓~
質感介乎麵包與蛋糕之間，甜甜地，都幾好食~
呢位賣藝人，四圍搵人同佢影相~
行行吓就行到嚟 Town Square (市廣場)~
呢座就係 Rathaus (市政廳)，側面有座塔可以上去~
呢個就當佢係鐘樓吧，咁啱 11:00 有機械鐘表演，所以呢刻廣場特別多人~
不過個機械鐘表演唔算好吸引，所以我事前都冇諗住夾好時間嚟睇，不過咁啱遇到就梗係睇吓啦~
睇完機械鐘表演就上塔~
上得塔，當然唔少得呢種樓梯~
上到平台，要等綠燈先可以通過~
塔頂限 20 人，所以要有人落先可以放人上~
之後就繼續上~
再上到一個平台，呢個平台就窄囉，只可以容納幾個人~
喺呢度玩咗好耐倉庫番先可以讓人落再俾人上~
塔頂風景~
附近風景~
行過見到有間舖頭~
好靚！
跟住就行到嚟 Mittelalterliches Kriminalmuseum (中世紀犯罪博物館)~
唔算太特別~
出口呢個位置幾靚~
再行就去到 Burggarten (城堡花園)，有點細~
之後求其搵咗間餐廳就坐低~
雞翼好好食，脆！嫩！少少辣~
薯條都好食~
土耳其烤肉都唔錯~
Rothenburg 真係幾正，好似穿越咗時空咁，如果成個舊城都唔俾車入就仲正！
行完 Rothenburg，就去攞車~
攞車時，發現水撥攝咗張紙，字係電腦印出嚟嘅，但全部德文，又有 €10 嘅字喺度，唔通俾人抄牌？
我即時諗，唔通呢度唔係免費嘅？我即刻周圍睇吓，終於俾我喺某角落發現到部停車收費機！
唉，仲以為係免費停車場......
€10 事少，聽聞遊客交罰款係好麻煩......
最後問咗好幾個人，所有人都只係知道一種方法，就係國民經電腦用自己銀行戶口繳交~
嚟咗幾日，覺得德國人英文都唔錯，唔難溝通，不過喺呢度，我問咁多個，其實都只係勉強溝通到~
點解我咁講呢，因為我想問佢哋，喺國內第二個城市嘅人交唔交到，如果得，我就諗住今晚請酒店嘅職員幫手，睇吓得唔得，咁我而家就唔駛煩交費先~
但最後都溝通唔到，冇計......
最後，可能因為溝通唔到，有人叫我哋去警局，咁都啱嘅，有咩事要尋求協助，搵警察係一個好正常嘅途徑~
Search 吓 GPS，原來去警局只係 1.3 公里車程，立即起程~
去到警局，為免又俾人抄牌，我睇車，屎塔入去搵警察~
佢都入咗去好耐吓，超過半個鐘~
大半個鐘，真係一個幾唔尋常嘅時間，一係可以喺度交，咁咪交錢囉，一係要去第二度交，咁咪話我知去邊度交囉，都唔駛大半個鐘咖喎......
真係急死人，whatsapp 屎塔又冇覆我，打俾佢又冇聽~
就喺我終於忍唔住，掉低部車走入警局嘅途中，見到屎塔走出嚟喇~
得到嘅答案係，罰單唔係警察開，唔可以喺警局交，要去單上面嘅機構交~
咁點解搞咁耐呢？原來，啲警察又係唔可以用英文溝通，最後搵到個英文好少少嘅(據屎塔講都係難溝通)，佢又走去部電腦度搞咗好耐~
搞咩呢？原來係印地圖！
佢想話俾屎塔知要去邊度交錢，其實呢，俾個地址我哋，靠 GPS 去就可以......
不過我哋都好欣賞佢哋嘅出發點，都係想幫我哋啫~
咁間機構究竟喺邊呢？呢度過去，都係 1.X 公里，因為交罰單嘅地方就喺 Rothenburg 嘅 Rathaus (市政廳)......
即係我哋原本所在嘅地方附近，真係激死！
由於我哋部車唔入得舊城，只好照舊做法啦，我睇車，屎塔去搞，辛苦晒你喇屎塔......
又搞咗唔知幾耐，終於見返屎塔，好消息係，已經搞掂咗！
成個過程係咁：
由城外行入去，仲要以心急嘅心情行入去，仲辛苦過今日行咗幾個鐘......
去到警察講嘅地方，原來又唔係嗰度，嗰度嘅人再教去邊度同點去......
又去到喇，係一個辦公室嚟，敲門冇人應，門又鎖咗......
見到清潔阿姐，不過佢唔識英文......
佢睇完張罰單示意呢度啱......
正喺屎塔迷茫之際，終於有人開門，順利交錢！
再次心急咁行返去車，上到車佢話好想死......
下一站係 Stuttgart (斯圖加特) 嘅 Porsche Museum (保時捷博物館)
Mercedes-Benz、BMW、Porsche，三間車廠博物館，我哋揀咗 Porsche~
而家就嚟 15:50，Porsche Museum 閂 18:00，車程正常要 1hr50mins，其實我都打定輸數，正路應該趕唔切~
不過，反正今晚住喺 Stuttgart，照趕過去試一試都冇壞，反正有時 GPS 啲時間又唔一定咁準，就照計劃進行~
一路都好順利，直至去到近 Stuttgart，慢線貨車排晒隊停晒，之後快線都停埋，真係心急死人......
好彩唔係停咗好耐，幾分鐘後郁返，好快就離開咗高速公路~
到喇到喇，到 Porsche Museum 喇！
比預期仲早咗，泊埋車買埋飛仲有半個鐘行，半個鐘當然係太少，但，總比冇嚟過好吖~
成間博物館都係 Porsche(廢話)，真係好正！
半個鐘真係過得好快，要走人喇，勁唔夠喉......
Porsche Museum 外圍~
下一站係 Schweine Museum (豬博物館)
呢間博物館嘅展品全部都同豬有關嘅~
呢邊有個停車場，有幾個位可以俾 Schweine Museum 嘅顧客停泊~
喺門前行個圈先~
Schweine Museum 閂 19:30，我哋泊埋車，去到門口時係 18:50，但係博物館閂咗，只係樓下嘅餐廳開咗~
於是我哋就搵個職員問吓，佢冇解釋原因，只係話閂咗~
跟住佢後面有個人同佢講嘢，嗰個人走上前嚟同我哋講，俾我哋入去都得，但係要靜啲，同埋只可以參觀半小時~
咁梗係冇問題啦！
睇睇吓有班人入咗嚟，入咗其中一間房，又有職員講解咁，可能有導覽所以提早閂門~
我哋咁都入得嚟，真係超好運，多謝放我哋入嚟嗰個職員，我哋一定會好靜，唔會嘈住人~
初頭睇真係覺得冇咩特別，但睇吓睇吓原來有勁多收藏品，勁多唔同種類嘅嘢，越睇越過癮，當然啦，豬，全部都係豬！
呢間房有晒一年 365 日，可以揀返自己生日嘅開嚟睇，雖則冇咩意義，但其實幾有心思~
以上見到只係好少部份，呢度啲展品真係多得好誇張！幾值得嚟行吓~
離開時又喺外面行咗個圈~
下一站係 Stadtbibliothek Stuttgart (圖書館)
有世上最美圖書館嘅稱號！
去到 Stadtbibliothek Stuttgart 附近，見到有條街勁多車泊埋一啲疑似停車位，我又跟住泊，再落車問人~
不過冇人知係咪合法泊得，大家都係估估吓，真係奇怪，呢幾日問親人啲泊車問題都係冇人知，咩事......
不過我唔會搏喇，今日違泊可以即刻喺辦公時間交到已算幸運，再嚟多劑真係唔掂~
唯有去泊附近一個貴嘅停車場，冇計~
Stadtbibliothek Stuttgart 門外~
大堂~
內部~
再嚟 Stadtbibliothek Stuttgart 門外~
係唔係世上最美我唔知，但絕對係非常美麗嘅圖書館，尤其內部，實在美得讓人窒息~
今日嘅行程就完結喇，想搵啲嘢食吓，不過附近所有餐廳一係已關門，一係準備關門，包括麥當奴~
再行遠啲都真係完全搵唔到嘢食，放棄，捱住肚餓去油站買嘢食~
去到油站，買咗兩個杯麵同兩個牛角包，本身我哋仲有蘋果同埋橙，夠啦~
去到酒店，我前面部車行咗個圈出返嚟，我估冇位泊，佢夾硬搵咗個唔係位嘅位泊~
咁我自己就點都會行個圈先嘅，睇吓係咪真係冇位，自己親眼睇吓好啲~
原來位就有半個 + 半個，因為有一部車泊咗喺兩個位中間......
屎塔去 check-in 先，再問吓前台部車泊邊好，結果佢叫我泊喺之前又係冇位嗰部車隔籬(原來佢有 cam 睇到)，我泊埋嗰個窄位，成個場就真係再冇位可以泊車了~
沒有留言:
發佈留言